„Naalagaq ilumut makissimavoq!“

Takorlooriassagit Jiisusip ajoqersugai Naalagartik toqutaammat qanoq aliasutsigisimassasut. Timitut toqungasutut Josefip Arimatæamiup ilivermut ilisaatut neriuutaat uumassuseqarpalunngitsigaaq. Romamiut naalliutsitsinerannit aniguisinneqarnissaminnik juutit ilimasunnerigaluat aamma maangaannarpoq.

TAAMAASSIMASSAGALUARPAT Jiisusip ajoqersugai Missiarsiunerartut ajoqersugaasulli allatut piffissap ingerlanerani nungussimassagaluarput. Jiisusili uumavoq! Biibili naapertorlugu toqunermi kinguninngua ajoqersukkaminut arlaleriarluni takutittarsimavoq. Taamaammat ilaat ima nillersimapput: „Naalagaq ilumut makissimavoq!“ — Lukasi 24:34.

Jiisusip Missiarsiuneranik uppernertik ajoqersukkat illersortariaqarsimavaat. Taamaaliornerminni pingaarnerusumik toqusunit makissimanera uppernarsaatissatut pingaarnertut tikkuartarsimavaat. Aap, „apustilit Naalakkap Jiisusip toqusunit makinnera pikkunartumik nalunaajaatigaat“. — Apustilit Suliaat 4:33.

Jiisusip toqusunit makissimanera salluliuutaasoq uppernarsarneqarsinnaasimagaluarpat, immaqa ajoqersugaasa ilaat sallunerannik nassuertinneratigut imaluunniit Jiisusip timaata ilivermiiginnarneranik nittarsaassinikkut, taava kristumiussuseq aallaqqaammulli iluatsissimassangikkaluarpoq. Taamaanngilarli. Kristusi inuusoq ajoqersugaasa nalunnginnamikku toqusunit makissimanera sumi tamani oqaluussissutigisimavaat, inuppassuillu Kristusimut makissimasumut uppertunngorsimapput.

 Suut pissutigalugit Jiisusip toqusunit makissimanera upperisinnaavarput? Ilumut pisimasuuneranik sunik uppernarsaatissaqarpa?

Sooq uppernarsaatit misissortariaqarpavut?

Jiisusip toqusunit makissimanera iivangkiiliuni sisamani tamani oqaluttuarineqarpoq. (Matthæusi 28:1-10; Markusi 16:1-8; Lukasi 24:1-12; Johannesi 20:1-29) * Kristusip toqusunit makititaasimanera Allakkat Grækerisuut ilaanni qularutigineqanngivilluni eqqartorneqarpoq.

Jiisusip toqusunit makissimanera ajoqersugaanit oqaluussissutigineqarsimammat tupinnanngilaq! Ilumut Guutimit makitinneqarsimappat aatsaat taama tupinnartigisumik tusartoqassaaq. Taava Guuti piuinnarani aamma Jiisusi uumasimassaaq.

Tamanna qanoq uatsinnut sunniuteqarpa? Jiisusi ima qinusimavoq: „Inuunerlu naassaanngitsoq tassaavoq ilinnik, ilumut kisimi Guutiusumik aallartitaanillu Jiisusi-Kristusimik, ilisimanninneq.“ (Johannesi 17:3) Aap, Jiisusimik Ataataanillu ilisarsineq inuunartoq angusinnaavarput. Ilisarsineq taamaattoq atorutsigu taava toqugaluaruttaluunniit Jiisusip makititaasimaneratut uaguttaaq makititaasinnaavugut. (Johannesi 5:28, 29) Kunngit kunngiannik Jiisusi Kristusimik naalannassuseqalersimasumik aqunneqartumi Guutip Naalagaaffiata ataani, nunami paratiisiusumi inuunermik naassaanngitsumik neriuuteqalersinnaavugut. — Esaja 9:5, 6; Lukasi 23:43; Saqqummersitat 17:14.

Ilumut Jiisusi toqusunit makissimanersoq apeqqutaalerpoq pingaarutilik. Maanna inuunerput siunissarpullu sunnerpaa. Taamaammat Jiisusip toquneranik makissimaneranillu uppernarsaatit sisamat misissoqqullugit kajumissaassavatsigit.

Ilumut Jiisusi qisummi nappakkami toqusimavoq

Qulartut ilaasa oqaatigaat Jiisusi kikiattugaasimagaluarluni toqusimanngitsoq. Oqaatigaat toqungajaannariarluni ilerrup iluata nillerneranik ilisimmaqqissimasoq. Paasissutissaasinnaasulli tamarmik ersersippaat Jiisusip timaa toqungasoq ilivermut ilineqarsimasoq.

Jiisusip kikiattugaanera kikkut tamarmik isiginnaarsinnaasimammassuk qisummi nappakkami ilumut toqusimaneranut uppernarsaasussaqarsimavoq. Kikiattuinermut akisussaatitamit toqunera uppernarsarneqartussaasimavoq. Sakkutuut naalagaata taassuma suliaminik ilisimannilluartup pillakkap ilumut toqusimanera uppernarsisussaasimavaa. Aamma aatsaat Jiisusip ilumut toqusimanera uppernarsarneqareermat nunap ilaanut naalagaasup Pontius Pilatusip Josefimut Arimatæameersumut Jiisusip timaa iliverneqaqqullugu tunniussinnaasimavaa. — Markusi 15:39-46.

Iliveq imaqanngilaq!

Jiisusip toqusunit makissimaneranut iliveq imaqanngitsoq ajoqersukkanut uppernarsaataasimavoq siulleq ulloq manna tikillugu assortorneqarsinnaasimanngitsoq. Jiisusi ilivermut atorneqarsimanngisaannartumut ilineqarsimavoq. Kikiattugaaffiata qanittuaniippoq, tamanillu ajornaquteqanngitsumik nanineqarsinnaalluni. (Johannesi 19:41, 42) Iivangkiiliunik allaatiginnittut tamarmik oqaluttuaraat Jiisusip toquneraniit ullup aappassaanni ikinngutai ilivermut pigamik iliveq imaqanngitsoq takusimagaat. — Matthæusi 28:1-7; Markusi 16:1-7; Lukasi 24:1-3; Johannesi 20:1-10.

Iliveq imaqanngimmat Jiisusip akeraasa ikinngutaatulli tupaallaatigitigaat. Sivisuumik toqunniarsimavaat. Anguniagartik angugamikku Jiisusip ilerra paarsisulerlugulu naqissuserpaat. Taamaakkaluartoq toquneranit ullut aappassaanni ullaakkut iliveq imaqanngilaq.

Jiisusip ikinngutaasa timaa tigusimavaat? Tassaqa, tassami iivangkiiliut takutippaat Jiisusip toquata kingorna qanoq aliasutsigisimasut. Aamma ajoqersugaasa makissimanera salloqittaataasoq nalunngikkaluarunikku malersugaanissartik allaallu toqunissartik akuerinaviarsimanngikkaluarpaat.

 Kiami taava iliveq imaarsimavaa? Jiisusip akerai taamaaliornavianngillat. Taamaaliorsimagaluarunik qularnanngitsumik kingorna Jiisusip toqusunit makinneranik inuuneranillu ajoqersugaasa oqaluussinerat tunuartinniarlugu timaa toqungasoq takutissimassagaluarpaat. Taamaattoqarsimanngilarli, tassami Guutip nammineq iliveq imaarsimavaa.

Sapaatit akunneri arlallit qaangiummata Jiisusip akerai akerliliinngillat Pitrusi ima nalunaajaammat: „Israelikkuususi, oqaatsit uku tusarsigit: Jiisusi Nazeretimioq — angut Guutimit ilissinnut qinigaasoq malunnangaartuliatigut tupinnartuliatigullu nalunaaqutiliatigullu Guutip taassumuunakkut akornassinni suliaasigut, soorlu nammineq nalunngikkissi — tassa ilissinnut tunniunneqarpoq Guutip aalajngereersimasaa siumullu nalunngeriigaa naapertorlugit, inatsisinillu unioqqutitsisut assaasigut [qisummut nappakkamut, NV] kikiattorparsi toqullugulu. Guutilli toqup annernartui kipitillugit toqusunit makitippaa toqup tigusarisimajuarneq sapermagu. Taannami pillugu Daavi oqarpoq: [Jehova] takkunniitittuuaannarpara, taanna talerpimma tungaaniippoq patajaatsooqqullunga. . . . Ilumut, timiga neriuummi ineqassaaq. Toqusummi inaaniitiinnarnianngilarma, illernartortat aserornermik takusaqartinnianngilat.“ — Apustilit Suliaat 2:22-27.

Jiisusi toqusunit makissimasoq amerlasuut takuaat

Apustilit Suliaannik allattoq Lukasi qularani ima allappoq: „Anniarnermi toqunermilu kingorna Jiisusip ajoqersukkani saqqummerfigisarpai amerlasuunik uppernarsaateq arluni ilumut uumagami, ullunimi 40-ni taakkununnga takutittarami Guutip naalagaaffia eqqartortarlugu.“ (Apustilit Suliaat 1:2, 3) Jiisusi toqusunit makissimasoq ajoqersugaasa arlaleriarlutik takusarsimavaat, soorlu naatsiivimmi, aqqusinermi, neritillutik, Tiberiasip tasiata eqqaani. — Matthæusi 28:8-10; Lukasi 24:13-43; Johannesi 21:1-23.

Jiisusi ajoqersukkaminut ilumut saqqummertarsimanersoq isornartorsiuisartunit apeqquserneqartarpoq. Oqaluttuat ajoqersugaanit nassaarineqarsimanerartarpaat imaluunniit oqaluttuat naapertuutinnginneri tikkuarniartarpaat. Akerlianilli iivangkiiliut annikitsumik assigiinnginnerisa isumaqatigiipiluttoqarsimanngitsoq takutippaat. Kristusip inuunerani pisimasut aalajangersimasut siulliup oqaluttuarisimanngisai allap ilanngullugit allaaserigaangagit Jiisusi pillugu ilisimasavut annertusisarput.

Jiisusip toqusunit makissimanera takorluugaannaasimava? Taamaannavianngilaq, tassami inupassuarnit takuneqarsimavoq. Aalisartut, arnat, kiffaq atorfilillu takunnittuusimapput, allaallu apustilit ilaat Tuuma qulartoq Jiisusip toqusunit makissimaneranut uppernarsaammik takugami aatsaat qularunnaarsimavoq. (Johannesi 20:24-29) Jiisusip ajoqersugaasa Naalagartik makissimasoq amerlasuutigut ilisarineq ajorsimavaat. Ilaanni inuit 500-nik amerlanerusut ataatsikkut takusimammassuk Jiisusip toqusunit makissimanera illersorniarlugu pisimasoq tamanna uppernarsaatissatut Paulusip atorsimavaa. Pisimasoq tamanna uppernarsaatitut atormagu takunnissimasut ilaat suli inuupput. — 1 Korinthimiut 15:6.

Jiisusip toqusunit makinnera sunniuteqangaarpoq

Jiisusip toqusunit makissimanera alapernaanniaannagassaanngilaq oqallisiginiaannagassaananiluunniit. Ilumut inuusoq paasillugu inupassuarnut ajunngitsumik sunniuteqarsimavoq. Ukiut untritillit  siulliilli aallarnerfigalugit inuppassuit kristumiussusermik soqutigisaqarsimanngikkaluartut akerlilersuisimagaluartulluunniit upperisaq ilumoortuusoq qularutigiunnaartarsimavaat. Sooq isumartik allanngortissimavaat? Biibilimik misissueqqissaarnerisa qularunnaarsissimavaat Guutip Jiisusi naalannarsusilerlugu qilammut inuunermut makitissimagaa. (Filippimiut 2:8-11) Jiisusi Kristusimut, taassumalu pilliutaa aqqutigalugu Jehova Guutip annannissamik aqqutissiussisimaneranut uppertunngorsimapput. (Romamiut 5:8) Guutip piumasaa malillugu Jiisusillu ajoqersuutaa naapertorlugu inuunermikkut inuit taakku piviusumik pilluarneq nanisimavaat.

Ukiuni hundredelinni siullerni kritumiuulluni qanoq issimassasoq eqqarsaatigeriassagit. Kristumiuunertik tusaamasannguutiginngilaat, pissaaneqalerutiginagu pisuunnguutiginaguluunniit. Akerlianik uppernertik pillugu kristumiut siulliit ilarpassuisa ’pigisaminnik arsaarneqaraangamik nuannaarlutik tamanna naammagiinnartarpaat.’ (Hebræerit 10:34) Kristumiussuseq pilliuteqariaannaanermik malersugaanermik allaallu toqumik kinguneqartarsimavoq.

Kristusimik malinnittunngunngikkallaramik ilaat tusaamasanngornissaminnut pisuunngornissaminnullu periarfissaqartarsimagaluarput. Saulusip Tarsusimiup ajoqersuisoq tusaamasaq Gamaliel ilinniarfigisimavaa, juuterpassuillu akornanni tusaamasanngoriartuaalersimagaluarluni. (Apustilit Suliaat 9:1, 2; 22:3; Galatiamiut 1:14) Taamaakkaluartoq Saulusi apustili Paulusitut ilisimaneqartoq Jiisusimut ajoqersuganngorpoq. Allarpassuit assigalugit tusaamasaaneq pissaaneqarnerlu silarsuup massuma neqeroorutigisinnaasai tunuartippai. Sooq? Neriuummik piviusumik Guutip neriorsuutaanik, Jiisusi Kristusillu ilumut toqusunit makissimaneranik tunngavilimmik oqariartuut siaruarterniarlugu. (Kolossemiut 1:28) Oqariartuutertik ilumoortoq nalunnginnamikku naalliussallutik piareersimapput.

Inuit millionilippassuit ullumikkut aamma taamaliussallutik piareersimapput. Nunarsuaq tamakkerlugu Jehovap Nalunaajaasuisa naalagaaffilersaartarfiini naapissinnaavatit. Ukiumoortumik Jiisusip toqunerata eqqaaniarnissaanut, ukioq manna sapaammi apriilip 8-ani seqernup tarrinnerata kingorna pisussamut, tikilluaqqusaavutit. Eqqaaniaaneq taanna pillugu Biibilimillu misissueqqissaarnerit Naalagaaffilersaatarfiini ingerlanneqartartut pillugit Jehovap Nalunaajaasuisa oqaluttuutissallutit nuannaarutigissavaat.

Jiisusip toqua makissimaneralu pillugit ilinniaannarnak sooq inuunera ilinniutaalu pillugit ilinniarnianngilatit? Jiisusip nammineq qaaqquaatigut. (Matthæusi 11:28-30) Jehova Guuti Jiisusi Kristusilu pillugit eqqortumik ilisimasaqarniarlutit maanna iliuuseqarit. Taamaaliornerit Guutip Naalgaaffiata ataani, erneranit asasaanit aqunneqartumi inuunermik naassaanngitsumik kinguneqarsinnaavoq. (wE 15/3 01)

[Quppernerup ataani ilanngussaq]

[Qupp. 7-mi assiliartat]

Jiisusi Kristusimik malinnittut millionilippassuit pilluarneq piviusoq nanisimavaat

[Suminngaanneernera]

The Self-Pronouncing Edition of the Holy Bible, King James Version-imik aamma Revised Standard Version-imik imalik