„Pilluarpoq inuk ilisimassusermik pissarsisoq“

TAALLIORTUULLUNI, illussanik titartaasartuullunilu kunngiuvoq. Ukiumut isertitaasa 200 million dollarit sinnertarpaat, taamaattumillu nunarsuarmi kunngit pisuujunerpaartaraat. Aamma ilisimassutsini tusamasaassutigaa. Tikeraava dronninngi tupigusunnermik nillerpoq: „Uannut oqaluttuarineqartut maanna takusama affaannilluunniit inornerupput! Ilisimassutsit peqangaarutitillu tusaamanerinit annerungaarput.“ (1 Kunngit 10:4-9) Kunngi Salomo Israelitoqqami inuusoq taama oqaatigineqarpoq.

Salomo pisoorsuullunilu ilisimassuseqangaarpoq. Taamaattumik taakkunannga sorleq pingaaruteqarnerunersoq aalajangerluarsinnaavaa. Salomo allappoq: „Pilluarpoq inuk ilisimassusermik pissarsisoq, inuk siuneqarluartunngorsimasoq. Ilisimassutsimmi pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq. Ilisimassut sapanngarissunit erlinnarneruvoq, pisuussutivit suugaluartulluunniit allat nallersinnaanngilaat.“ — Ussatit 3:13-15.

Ilisimassuserli sumi nanineqarsinnaava? Sooq pisuussutinit naleqarnerua? Sooq taama kajungernartigaa? Ussatit-ni kunngi Salomop allagaani kapitali 8-mi apeqqutit tamakku pissanganartumik akineqarput. Kapitalimi tamatumani ilisimassuseq inuttut kinaassusilittut oqalussinnaasutut iliuuseqarsinnaasutullu allaaserineqarpoq. Nammineq oqaluttuarpoq sooq noqqaassutigineqartariaqarluni.

’Suaartarpoq’

Ussatit kapitali 8-mut aallarniut apeqqutaavoq akisariaqanngitsoq: „Tusaasiuk ilisimassuseq qanoq suaartartoq, silassorissutsillu qanoq nipini anikkaa.“ * Aap, ilisimassuseq silassorissuserlu suaartarput — arnaq kanngunartuliortartoq angutit inuusuttut kisimiittut misilittagaqarpianngitsut tammartinniarlugit taartumi isertorluni qamasartoq assiginagu. (Ussatit 7:12) „Qattornit qaanni aqquserngup killingani, aqqusernit imminnut paarlaffiini qeqarpoq, isaaffiit killingini, illoqarfimmut isaaffiit killingini, matut ammarngisa killingini suaarpoq.“ (Ussatit 8:1-3) Ilisimassutsip nipaa nipituumik erseqqissumillu tamanit tusarneqarsinnaavoq — isaaffinni, aqqusernit paarlaffiini, illoqarfiup isaaffiini. Nipaa tusaaneqarluarsinnaavoq qisuariarfigineqarsinnaallunilu.

Miserratigineqarsinnaanerpa ilisimassutip Guutimeersup Biibilimi, oqaasiani isumassarsiarititaasumi, allassimasup pigiliusserusuttunit tamanit paasineqarsinnaanera? „Biibili tassaavoq inuiaat oqaluttuarisaaneranni atuakkat atuarneqarnerpaartaat,“ The World Book Encyclopedia-imi allassimavoq. Qinerlerfissiami nangilluni allassimavoq: „Biibili atuakkanit allanit tamanit siammarsimanerpaavoq. Atuakkanillu allanit nutserneqarneruvoq oqaatsinullu amerlanerusunut nutserneqartarluni.“ Biibili tamaat ilaannaaluunniit oqaatsinut sumiorpaluutinullu  2100-nit amerlanerusunut nutserneqarsimavoq. Taamaattumik nunarsuarmiut 90 procentiisa Biibili ilaaluunniit namminneq oqaatsiminni pisinnaavaat.

Jehovap Nalunaajaasuisa Biibilip tusarliussaa sumiluunniit nalunaajaatigisarpaat. Nunani 235-ni Guutip naalagaaffia pillugu nutaarsiassaq nuannersoq oqaluussissutigisarpaat inuillu sallusuissummik Guutip oqaasianeersumik ajoqersortarlugit. Atuagassiaataat Napasuliaq Alapernaarsuiffik aamma Iteritsi! Biibilimik tunngaveqartut oqaatsinilu 140-ni aamma 83-ini saqqummertartut 20 millioninit amerlanerusunut naqiterneqartarput. Aap, ilisimassuseq tamanut suaartarpoq.

„Inunnut nipiga tutsiuppoq“

Ilisimassuseq inuttut kinaassusiligaq maanna oqalulerpoq: „Ilissi angutit, torlulaffigaassi, ilissinnut inunnut nipiga tutsiuppoq. Silatussuseq ilinniarniarsiuk misilittagakitsusi, silattorsarniaritsi sianiitsuususi!“ — Ussatit 8:4, 5.

Ilisimassutsip suaartarnera silarsuarmut tamarmut tutsiuppoq. Inuiaat tamarmik kajumissaarneqarput. Allaat misilittagakitsut silatussutsip ilinniarnissaanut qaaqquneqarput, sianiitsullu silattoqqullugit kajumissaarneqarlutik. Jehovap Nalunaajaasui isumaqarput Biibili inunnut tamanut atuagaasoq, taamaattumillu kinaassusersiornatik naapitatik tamaasa kajumissaarniartarlugit ilisimassusia paasiniarlugu misissuinissaannut.

„Qanera ilumoortumik oqaluttarpoq“

Ilisimassutsip ilungersorluni kajumissaarinini sakkortusisippaa ima oqarluni: „Tusaaniaritsi, oqaatigisassarami eqqortuuvoq; uanga qarlunnit tutsiutissaaq peqqusersuissuseq. Qanera ilumoortumik oqaluttarpoq, qarlumalu eqqunngitsoq uumissorpaat. Qanerma oqaasii tamarmik iluartuupput, peqqusersusaarnertaqanngillat peqquserlunnertaqarnatilluunniit.“ Ilisimassutsip ajoqersuutai pitsaalluinnarlutillu peqqusersuitsuupput, ilumoorlutillu naapertuilluartuupput. Aap, peqqusersusaarnertaqanngillat. „Silassorissumut paasiuminaatsoqanngillat ilisimasaqartumullu eqqortuullutik.“ — Ussatit 8:6-9.

Ilisimassuseq naleqqulluartumik ima kajumissaarivoq: „Ilassiniarsigit ajoqersuussutiga piumanerullugu sølvimit, ilisimasaqarnerlu pingaartinnerullugu kuultimit pitsaanersiukkamit.“ Tamanna silatusaarluni kajumissaarineruvoq. „Massami ilisimassuseq sapanngarissunit pitsaaneruvoq, erlinnartuutillu taassumunnga nallersuunneqarsinnaanngillat.“ (Ussatit 8:10, 11) Sooq taamaappa? Suna pissutigalugu ilisimassuseq pisuussutinit naleqarnerua?

„Inerititakka pitsaanerupput kuultimit“

Ilisimassutsip tusarnaartiminut tunissutai kuutimit, sølvimit sapanngarissunillu naleqarnerupput. Ilisimassutsip tunissutit suunerannik paasitippaatigut: „Uanga, tassaasunga ilisimassuseq, silatussusermik pigisaqartoq, ilisimasaqarneq pigilerpara silatusaarnikkut. [Jehova] mianerigaanni ajortoq uumigisassaavoq. Uumigaakka makitasaarneq usorsisimaarnerlu, ileqqorlunneq salloqittaagajuttumillu oqalunneq.“ — Ussatit 8:12, 13.

 Ilisimassuseq piginnitsiminut silatussutsimik eqqarsarsinnaanermillu tunisivoq. ’Jehovamik mianerinninneq ilisimassusermut aallarniutaammat’, Guutimeersumik ilisimassusillip taanna ataqqingaassavaa. (Ussatit 9:10) Jehovap uumigisai uumigissavai. Makitasaarneq, usorsisimaarneq, kanngunartuliorneq oqaasipilunnerlu ingalassimasarpai. Ajortunut uumiginninnerata oqartussaassuseqartutut ajortunngortitsisinnaasunut illersorpaa. Ilaqutariinni ittuusut ilagiinnilu kristumiuni akisussaaffillit ilisimassuseqarniarnissaat pingaaruteqartorujussuuvoq.

Ilisimassuseq ima nangippoq: „Uanniipput siunnersuineq silatusaarnerlu, paasisimasaqarpunga pissaaneqarlungalu. Kunngit uakkut naalakkersuisinnaapput naalagaanerillu aalajangertarpaat innarluissut sunaasoq. Uakkut siulersuisarput naalagartat, akimarnit eqqartuussisullu naapertuilluartut tamarmik.“ (Ussatit 8:14-16) Ilisimassutsip inerititaasa ilagai paasisimasaqarneq, silatusaarneq pissaanerlu — ileqqut angutini nuimasuni, naalakkersuisuni pissaanilinni kissaatigineqangaartut. Oqartussaassusillit allanillu siunnersuisartut ilisimassuseq pinngitsoorsinnaanngilaat.

Ilisimassuseq piviusoq inuit tamarmik pisinnaagaluarpaat, tamakkerlutilli piginngilaat. Ilaasa itigartillugulu pinngitsoorniartarpaat matumik silatinnguaniikkaluarpalluunniit. Ilisimassuseq oqarpoq: „Asavakka uannik asannittut, uannillu ujarlersut nanisarpaannga.“ (Ussatit 8:17) Taamaallaat ilumoorlutik ujaasisut ilisimassuseq pigilersinnaavaat.

Ilisimassutsip aqqutigisai peqqusersuillutillu naapertuilluartuupput. Ilisimassutsip imminik ujaasisut akilertarpai. „Uanniipput pisuussutit ataqqisaanerlu, pigissaarneq pilluarnerlu kingornussaasut. Inerititakka pitsaanerupput kuultimit akuinnerpaamit, pissarsiarititakkalu sølvimit pitsaanerpaamit. Ingerlavigaara iluarnerup aqquserna, atuarlugit aqqusininnguit eqqortut, uannik asannittut pisuussutinik tuniumallugit peqqumaasiviilu immertarlugit ulikkaarlugit.“ — Ussatit 8:18-21.

Ileqqut ajunngitsut soorlu silatussuseq, eqqarsarsinnaaneq, maniguunneq, paasisimasaqarneq, ilisimassuseq atoriaannaasoq silatusaarnerlu ilisimassuserlu piginnitsiminnut pisuunngortitsisarlutillu ataqqinartunngortitsisarput. Ilisimassusilik naapertuilluartumik iliorluni anersaakkut siumukaatigaluni pigissaalersinnaavoq. (3 Johannesi 2) Ilisimassuseq aamma ataqqisaanermik kinguneqartarpoq. Tamakkua saniatigut ilisimassusillip aamma angusani naammagisarpai. Isummamigut eqqissisimallunilu Guutimut ilerasuuteqanngilaq. Aap, pilluarpoq inuk ilisimassutsimik nassaartoq. Taassuma inerititai guultimit akuiakkamit sølvimillu pitsaanerpaamit pitsaanerungaarput.

Unnersuut tamanna uagutsinnut tulluartuuvoq silarsuarmi piumatuffioqisumi inuugatta — silarsuarmi qanorluunniit suulluunniillu tamaasa akigalugit pisuunngorniarnermik pingaartitsiuffioqisumi. Puinngisaannassavarput ilisimassutsip qanoq naleqartiginera. Naapertuilluannginneq aqqutigalugu pigissaarneq  angunianngisaannartigu. Pisuunngorniaannarluta periarfissat ilisimassuseqalersitsisinnaasut atornissaat — soorlu kristumiutut ataatsimiittarneri, Biibilimik nammineq atuaqqissaartarnerput atuagassiallu „kiffap aalajaallunilu silatuup“ saqqummersittagai sumiginnanngisaannartigit. — Matthæusi 24:45-47.

„Naassaanngitsumit pilersitaavunga pileqqaarnerani“

Ilisimassuseq kinaassusiligaq Ussatit kapitali arfineq-pingajuanniittoq tassaannaanngilaq ilisarnaat pissuseq timitaqanngitsoq pillugu oqaatit tungaatigut paasititsiniut, aammattarli Jehovap pinngortitaasa pingaarnersaannut asersuutaavoq. Ilisimassut ingerlaqqippoq: „Suliaminut aallaqqaatigitillunga Naalakkap pinngortippaanga taamani pilersitamini siullerpaatippaanga. Naassaanngitsumit pilersitaavunga, pileqqaarneranni, nuna pingunngikkallarmat. Erniuvunga kuussuaqanngillarmat, puilasoqanngikkallarmat imaqangaartunik, qaqqat inissinneqanngikkallarmata, qattorngit tamarmik peqanngikkallarmata erniuvunga, Naalakkap pinngortinngikkallarmagit nuna narsaatillu silarsuarmilu pujoralaat siulliit.“ — Ussatit 8:22-26

Ilisimassut kinaassusiligaq siuliani allaaserineqartoq Biibilip „oqaaseq“-mik taasaanut naapertuulluinnarpoq. Apustili Johannesi allappoq: „Pileqqaarneranni ippoq Oqaaseq, Oqaaserlu Guutimiippoq, Oqaaserlu Guutiuvoq.“ (Johannesi 1:1) Ilisimasut kinaassusiligaq Guutip erneranut, Jiisusi Kristusimut suli inunngunngikkallarnerani assersuutaavoq. *

Jiisusi Kristusi ’pinngortitaani tamani erniusut siullersaaraat. Taassumuuna suut tamarmik pinngortitaapput qilanni nunamilu, takussaasut takussaanngitsullu,’ (Kolossemiut 1:15, 16) Ilisimassuseq kinaassusiligaq nangippoq: „Tassaneereerpunga qilak aalajaatsumik tunngavilermagu, taamani nunarsuup siaangasortaa aalajangermagu itinersuarmut, pavani nuissat katersormagit itinersuullu puilasui puilatilermagit, imaq killiffisalermagu peqqusinini immamit unioqqutinneqartussajunnaarlugu; nunap tungavii aalajangermagit, tatigisaatut sanianiippunga. Taassumunnga nuannaarutaavunga ullut tamaasa, kiinnaatalu saani qitittuarpunga. Nunarsuarmi pigisaani isorartuumi qitippunga inuillu nuannarutigalugit.“ (Ussatit 8:27-31) Jehovap angajulliliaa ataatani suleqatigalugu saaniippoq — qilammik nunamillu pinngortitsisoq asseqanngitsoq. Jehova Guutip inuk siulleq pinngortimmagu, ernerata tatigisaatut ilagaa. (1 Mosesi 1:26) Tupinnanngilaq Guutip ernerata inuit soqutigalugillu nuannaringaarmagit.

„Pilluarpoq inuk oqaatsinnik tusartoq“

Ilisimassutitut kinaassusilikkatut Guutip ernera oqarpoq: „Maannali tusaaniarsinga, ernikka! Pilluarput uanga aqqusininnik atuaasut. Ajoqersuussutiga naalaarsiuk ilisimasunngorlusilu, suusupageqinasiuk! Pilluarpoq inuk oqaatsinnik tusarnartoq, ullu tamaasa matuma killigini alaatsinaattoq matserfimmalu killinganni alapernaarsuisoq. Uannimmi nanisisoq inuussummik nanisivoq [Jehovamullu] iluarinartunngorluni. Uannilli nanisinngitsoq imminut ajoquserpoq, uumissortikka tamarmik tassaapput toqumik asannittut.“ — Ussatit 8:32-36.

Jiisusi Kristusi tassaavoq Guutip ilisimassutaa timeqalersitaq. „Ilisimassutsikkut paasinninnikkullu pisuussutit tamarmik isertugaaffigisaat. (Kolossemiut 2:3) Taamaattumik taassumunnga tusarnaarluartariaqarpugut tumaalu atuarlugit. (1 Petrusi 2:21) Itigartikkaanni assigiinnarpaa imminut ajoquserluni toqulu asallugu, „allakkummi annaffissaqanngilaq“. (Apustilit suliaat 4:12) Jiisusi Kristusi aqqutigalugu Guutip annassut pilersissimasaa akuerisigu. (Matthæusi 20:28; Johannesi 3:16) Taamaaliorutta nuannaarneq ’inuussummik nanisinermik Jehovamullu iluaritinnermik’ kingunilik misigissavarput.

[Quppernerup ataani ilanngussat]

[Qupp. 21-mi assiliartat]

Ilisimassut akisussaaffilinnit pinngitsoorneqarsinnaanngilaq

[Qupp. 22-mi assiliartat]

Ilisimassuseqalersitsisinnaasut atorluakkit