Inuunermi misigisat

Qaqugukkulluunniit Jehovamit napatinneqarneq

OQALUTTUARTOQ FORREST LEE

1940-mi juulip 4-aniuvoq. Politiit oqaluttartutsinnik Biibilimillu atuagassiaatitsinnik arsaaqqammerpaatigut. Sorsunnersuup kingulliup akerlilersuisut patsisissaqartilersimavai Jehovap Nalunaajaasuisa sulinerata inerteqqutaalernissaat anguniarlugu Canadap generalguvernøritaavanik akuersisitsinissaannut.

TAMANNA unissutiginatu toqqorsivimmiit atuagassianik aalleriarluta kiffartornerput nangeqqipparput. Taamani ataatama oqaasii puiunngisaannassavakka: „Taama ajornanngitsigisumik unitsinneqassanngilagut. Jehovap oqaluusseqquaatigut.“ Taamanikkut qulinik ukioqarpunga sapiissuseqangaarlungalu. Ataatamali kiffartornermini aalajaassusermik nikallujuissusermillu maligassiuinerata, Guutitta Jehovap nalunaajaasuminik aalajaatsunik qanoq napatitsisarneranik suli eqqaasitsiuartarpoq.

Tullianik politiinit unitsitaagatta atuagassiaatitsinnik arsaartiinnanngilaatigut, aammali ataataga parnaarullugu anaanaga meeqqanik sisamanik paarisaqartoq kisimiittussanngortippaat. Tamanna 1940-mi septembarimi Saskatchewanimi pivoq. Sivitsunngitsoq atuarfimmit anisitaavunga nalunngeqatiginnissusera Biiblilimit ilinniartinneqartoq pissutigalugu erfalasoq ilassiumannginnakku inuiaassutsimillu erinarsuut erinarsoqataaffigiumannginnakku. Atuarnera allakkatigut nangippara piffissarlu atugassara nammineq aalajangersinnaanerulerlugu; tamatuma oqaluusseqataanissamut periarfissaqarnerulersippaanga.

1948-mi pioneerit, imaluunniit Jehovamut Nalunaajaasut piffissaq tamaat atorlugu oqaluussisartut, Canadap kangiata sineriaanut nooqqullugit kajumissaarneqarput. Taamaattumik pioneeritut Halifaximut Nova Scotiamiittumukarpunga Cape Wolfemullu Prince Edward Islandimiittumut. Ukiumi tulliuttumi Torontomi Canadamiittumi Jehovap Nalunaajaasuisa immikkoortortaqarfianni  sapaatip-akunnerini marlunni suliartoqqusaaninnut akuersivunga. Sapaatip-akunneri marluk tassaalerput ukiut arfinillit sinnerlugit nuannersumik kiffartorfiusut. Taava Myrna, uattulli Jehovamut asanningaassuseqartoq naapippara, 1955-imilu decembarimi katippugut. Miltonimut Ontariomiittumut nunasivugut; sivitsunngitsorlu tassani ilagiit pilersinneqarput. Illutsinni naqqup ataa naalagaaffilersaarfittut atorneqarpoq.

Kiffartornitta annertusinissaanik kissaateqarneq

Ukiuni tulliuttuni tulleriiginnarnik arfinilinnik qitornartaarpugut. Angajullersaavoq panipput Miriam, taava Charmaine, Mark, Annette, Grant nukarlersaavorlu Glen. Sulereerlunga angerlaraangama tamatigorluinnangajak Myrnap, meeqqavut ikumatitsiviup eqqaani natermi eqqaminut issaatillugit, Biibilimik oqaluttuanik atuffattarpai nassuiaallugillu uummatikkut Jehovamut ilumoortumik asannissuseqalersinniarlugit. Asannilluni tapersersuineratigut meeqqavut tamarmik qujanartumik mikinerminniilli Biibilimik ilisimasaqarlualersimapput.

Ataatama kiffartornermik ilungersuussinerata eqqarsartaatsikkut uummatikkullu katattussaanngitsumik sunnersimavaanga. (Ussatit 22:6) 1968-imi Jehovap Nalunaajaasuisa akornanni ilaqutariit Amerika-Qiterlermut Amerika-Kujallermullu oqaluussiartorlutik nooqqullugit kajumissaarneqarmata, kajumissaarut malikkusupparput. Taamanikkut meeqqavut tallimanit 13-it tikillugit ukioqarput, arlarpullu Spaniamiutut oqalussinnaanngilaq. Siunnersorneqarnerput malillugu nunani assigiinngitsuni angalavunga inuuniarnermi pissutsit misissorniarlugit. Angerlarama ilaqutariittut periarfissavut qinunikkut eqqarsaatigeqqissaarpavut, aalajangerlutalu Nicaraguamut nuunniarluta.

Nicaraguami sulinerput

1970-imi oktobarimi angerlarsimaffittaatsinnut inissippugut, sapaatillu-akunneri pingasut qaangiutinngitsut ilagiit ataatsimiinnerisa ilaanni annikitsumik pisassinneqarpunga. Pisassiissutigineqartoq Spaniamiutut ilungersoqalunga naammassivara naggataatigullu ilagiit arfininngornermi nalunaaqutaq 9.30 uagutsinni cerveza-mut qaaqqullugit. Oqartussaagaluarpunga servicio, isumaqartoq oqaluussineq, kisianni uagutsinnut immiaarartoriartoqqullugit tamaasa qaaqqusimavakka. Oqaatsinik ilinniarneq unamminiarnartorujussuusimavoq.

Aallaqqaammut aallarniissutissakka itummannut allattarpakka matullu tungaanukaatigalunga uteqqittarlugit. Oqarsinnaavunga: „Atuagaq una ilanngullugu akeqanngitsumik Biibilimik atuaqissaaqateqarnisaq neqeroorutigaarput.“ Angut neqeroorummik tigusisoq kingusinnerusukkut oqarpoq ataatsimiinnernut aggertariaqarsimalluni, sumik oqaluttuunniarsariginni paasiniassagamiuk. Angut taanna Jehovamut Nalunaajaasunngorpoq.  Apustili Paulusip allanneratulli sallusuissutsip inerittussaa inuit maniguuttut uummataannut siaruarterneqaraangat, Guutip naalersitsisarnera ersarilluinnarpoq. — 1 Korintumiut 3:7.

Illoqarfiit pingaarnersaanni Managuami ukiuni marlunni kifartoreerluta Nicaraguap kujasissuanut nuunnissatsinnut kajumissaarneqarpugut. Tamaani Rivasimi ilagiit tamaanilu nunap ilaani soqutiginnittut eqimattat immikkoortut suleqatigaavut. Oqaluussisartup utoqqasaap aalajaatsup Pedro Peñamik atillip eqimattanut taakkununnga tikeraaraangama ilagisarpaanga. Eqimattat ilaat Nicaraguap tasiata qeqqani, anitsisartumik qaqqalimmi qeqertamiipput, tassani ilaqutariit Jehovamut Nalunaajaasuusut ataasiinnaapput.

Ilaqutariit taakkua pigisaqarpianngikkaluarlutik tikeraarneqarnerminnut pingaartitsinertik takutinniarlugu suliniuteqangaarsimapput. Tikippugut nerisassiuutereersimagaatigut. Sapaatip-akunnera ataaseq tassaniippugut. Sapaammi tamanut ammasumik oqalugiaammut 101-it najuunnerat nuannaarutigeqaarput.

Pifissami allami soqutiginnittut Costa Ricap killeqarfiata eqqaani qaqqaniittut tikeraartussanngorlugit, Jehovap pissaanerata napatitsisinnaanera misigeqqippara. Ullormi aallarfissatsinni Pedrop aammanga, malariamik napparsimallunga siniffinni nalavunga. „Pedro, aallarsinnaanngilanga“ oqarpunga. Assani qaannut tutsippaa akillunilu: „Kissarneqartorujussuuvutit, ilaasariaqarputilli. Qatanngutit tamanna naatsorsuutigivaat.“ Taamaaleriarluni qinnummik, tusarsimasannit aatsaat taama qamanngaanneerpalutsigisumik, qinuvoq.

Kingorna oqarpunga: „Anillutit fresco-toriartorniarit (paarnanik imeruersaat). Minutsit qulit qaangiuppata piariissaanga.“ Tamaani Jehovap Nalunaajaasui ilaqutariit marluupput, asannittumillu isumagivaatigut. Naak suli kissarneqaraluarlunga inuunilukkaluarlungalu aqaguani oqaluuseqatigaavut. Inuit hundredet sinnerlugit sapaammi ataatsimiinnitsinnut takkunnerat nakussatsissutigeqaara.

Angalaqqinneq

1975-imi meeqqatta arfineq aappassaat, Vaughn, meerartaaraarput. Ukiumi tulliuttumi aningaasaqarniarneq pissutaalluni Canadamut aallartariaqalerpugut. Jehovap napatitsinera malunnartumik misigisimagatsigu Nicaraguap qimannera oqitsuunngilaq. 500-it sinnerlugit ilagiit ataatsimiinnerinut takkuttartut aallarpugut.

Taamani uanga panippullu Miriam Nicaraguami specialpioneerinngortinneqaratta, panitta aperisivaanga: „Ataata, qaquguluunniit Canadamut utertariaqalissagaluarussi, maaniiginnarnissara akuerissagaluarpiuk?“ Qaquguluunniit tamaanngaanit aallarnissaq eqqarsaatiginnginnakku akivunga: „Soorunami.“ Aallarattalu Miriam aallaqataanngilaq, Nicaraguami piffissaq tamaat atorlugu kiffartornini ingerlatiinnaramiuk. Kingusinnerusukkut Andrew Reedilu katipput. 1984-imi ajoqersuiartortitat atuarfiani Gileadimi, taamanikkut New Yorkimi Brooklynimiittoq, klassit 77-iat peqataaffigaat. Nammineq ajoqersuiartortitanngornissamik kissaateqalersimanera Nicaraguami ajoqersuiartortitat nikallujuitsut pilersissimasaat maanna piviusunngorpoq, maannami uinilu Den Dominikanske Republikimi kiffartorput.

Ataatama oqaasia: „Taama ajornanngitsigisumik tunniutiinnassanngilagut,“ suli uummatinni ikumavoq. 1981-imi aningaasanik naammattunik katersereeratta Amerika-Qiterlermut aallarsinnaanngorluta, nooqqippugut; tamatumuuna Costa Ricamut. Tassaniitilluta immikkoortortaqarfiup allaffissaata sananeqarnerani suleqataanissatsinnut akuerineqarpugut. 1985-imili ernerput Grant nakorsamit ikiorneqarnissamik pisariaqartitsilerpoq, Canadamullu utertariaqalerpugut. Glen immikkoortortaqarfiup allaffeqarfiisa sananeqarnerani suleqataaniarluni Costa Recamiiginnarpoq, Annette Charmainelu specialpioneriupput. Uagut Costa Ricamit aallartugut, uteqqinngisaannarnissarput ilisimanngilarput.

Inuunermi atugarliornerit

1993-imi septembarip ulluisa 17-ianni qaammarilluni seqinnarippoq. Ernerput angajulleq Mark peqatigalugu illutta qaava qallersorparput. Sanileriilluta sulivugut pisarnitsitullu anersaamut tunngasunik oqaloqatigiippugut. Nalunartumik pissuteqartumik upperiataarpunga qalianiillu nakkarlunga. Ilisimmarama qaamaneq sakkortooq inuillu qaqortunik kittelillit takusinnaasatuaraakka. Napparsimmaviliaanneqarsimavunga immikkullu nakkutigineqartarfimmiillunga.

 Aak pillugu Biibilimi qanoq allassimasoq nalunnginnakku, eqqarsaatiga siulleq tassavoq: „Aalersornanga, aalersornanga.“ (apustilit suliait 15:28, 29) Charmainemit eqqissisapallanneqarpunga, oqarami: „Ataata, ajunngilaq. Tamatta maaniippugut.“ Kingusinnerusukkut paasivara aalersortinnginnissamut allagartara nakorsat takusimagaat. Qungasera napisimavara nukillaarluinnarsimallungalu, nammineq anersaartorsinnaananga.

Maanna nikissinnaajunnaarama, Jehovamit ikiorneqarnissara aatsaat taama atorfissaqartitsigilerpara. Tracheotomimik suliaritippunga, anersaartuutip slangiata ikkunneqarnissaa siunertaralugu torloq ammarlugu pilattaaneq. Taamatut pilattaanerup toqqusaanni nipip pinngortarfiisa asserneqarneranik kinguneqarpoq, oqalussinnaajunnaarpungalu. Inuit qanoq oqarniarnersunga paasiniarlugu qanerma aalanera isigisariaqarpaat.

Akiligassat amerlipallapput. Nuliama meeqqattalu ilaat piffissaq tamaat oqaluussisartuusut, aningaasartuutit akilersinnajumallugit unittariaqassanersut eqqarsaatigivara. Markili suliffissamik isumaqatigiissuteqarluni iluatsitsivoq qaammatillu pingasuinnaat ingerlaneranni akiligassat amerlanersaat akilerneqarsinnaalerput. Tamarmik piffissaq tamaat oqaluussisartuuginnarsinnaanngorput, nuliara uangalu kisitta pinnata.

Allakkanik kortinillu hundredelippassuarnik nassinneqarpugut — nunanit assigiinngitsunit arfinilinnit — siniffimmalu eqqaanut iikkamut nivinngarneqarput. Jehovamit napatinneqarnera misigivara. Qaammatini tallimani affarmilu immikkut nakkutigineqartarfimmi uninnganinni, ilagiit ilaqutannik ikiunissartik puiunngilaat ilaannikkullu nerisassiuuttarlugit. Ualit tamaasa kristumioq utoqqaanertaq pulaartarpoq Biibilimik atuagassiaatitsinnillu atuffakkiartorlunga misigisanillu nuannersunik oqaluttuukkiartorlunga. Marluk ilaquttanneersut ataatsimiilernerit tamaasa sioqqullugit piareersaqatigisarmannga, anersaakkut nerisassanik inuunermut pisariaqarluinnartunik amigaateqanngisaannarpunga.

Suli napparsimmavimmiittunga ataatsimeersuarnermut immikkut ittumut najuussinnaalertillunga aaqqiisoqarpoq. Napparsimasunik paarsisutut ilinniarsimasumik anersaartuutimalu nakkutiginissaanik ilinniarsimasumik ulloq naallugu najorneqarnissara napparsimmaviup isumagaa. Iluaqutaaqaaq kritsumiut qatanngutit ilageqqillugit. Ilassiniarlunga kinguleriiaarsimasut hundredelippassuit takusakka puiunngisaannassavakka.

Anersaakkut napatinneqarneq

Ajutoornermit ukiup ataatsip missaa qaangiuttoq ilaquttannut angerlarlunga nuussinnaanngorpunga,  sulili ulloq unnuarlu tamaat paarineqartariaqarpunga. Biili immikkut atortulersugaq iluaqutigalugu ataatsimiigiarsinnaavunga, qaqutiguinnarlu ataatsimiigianngitsoortarpunga. Miserratigisinnaanngilarali aalajangeriataallaqqissuseq ingerlaqqinnissamut pisariaqarmat. Angerlaramali nunap immikkoortortaani ataatsimeersuarnerit tamaasa peqataaffigisimavakka.

1997-imi februaarimi ilaatigut oqalussinnaaleqqippunga. Napparsimasunik paarsisut paarsisuma ilai Biibilimi neriuutigisannik oqaloqatigigaangakkit ajunngitsumik qisuariartarput tusarnaarlutillu. Ataatsip atuagaq Jehovas Vidner — Forkyndere af Guds Rige (Jehovap Nalunaajaasui — Guutip Naalagaaffianik oqaluussissuteqartut) naallugu atuagassianillu Napasuliaq Alapernaarsuiffiup Peqatigiiffiata atuagassiaataanik allanik atuffappaanga. Aquut amitsukujooq atorlugu Computeri iluaqutigalugu allanut allattarpunga. Taamatut allanneq arriinnaqaaq, oqaluussinermili suleqataajuarsinnaanerma imminut nammagisimaalersippaanga.

Anniartaqaanga. Neriuulli Biibilimeersoq oqaluussissutigigaangakku Biibilimiilluunniit atuaraangama, anniarpallaarunnaartarpunga. Ilannikkut aqqusinermi angalaarlunga oqaluussisarpunga, nuliara imminut tunniusimasoq pisariaqartitannik ikiuisartoq ilagalugu. Arlaleriarlunga ikiorti pioneeriusinnaasarpunga. Aamma ilagiinni utoqqaanertatut sulineq nuannaarutissartaqarpoq, pingaartumik ataatsimiinnerup kingorna uannut orniguttut, angerlarsimaffitsinniluunniit uannut pulaartut ikiorlugillu qiimassarsinnaagaangakkit.

Isumatsangaarnerup pingitsoortinnissaata oqitsuunnginnera miserratigisinnaanngilara. Nikalloqqajaaleraangamalu Jehovamut ingerlaannaq qinusarpunga nuannaartuunissannut ikioqqullunga. Jehovamit napatinneqaqqullunga ulloq unnuarlu qinusarpunga. Pulaarneqaraangama allaffigineqaraangamaluunniit tamatigut qiimmassarneqartutut misigisarpunga. Napasuliaq Alapernaarsuiffik-up Iteritsi!-llu atuarnerisa aamma eqqarsartaasera eqqaarsaatinik ineriartornartunik immertarpaat. Ilaanni napparsimasunik paarsisut atuagassianik nipituumik atuffattarpaannga. Ajutoornerup kingorna Biibili tamaat immiussaq arfineq marloriarlunga tusarnaarpara. Tamanna Jehovap uannik napatitsinerisa assigiinngitsorpassuit ilagaat. — Tussiaat 41:4.

Atukkama allanngornerisa Pinngortitsisorsuatta, Jehovap, inuunermi atukkatsinnik sutigut tamatigut ilitsersuisarneranik eqqarsatiginninnissannut piffissaqarluartilerpaannga. Piumasaminik siunertaminillu ilisimassummik, kiffartornermik siunertaqarluartumik, ilaqutariilluni pilluarneq qanoq anguneqarsinnaanersoq siunnersuutinik, siuneqassusermik ajornartorsiornermi ikiuisartumik eqqorluartumik tunivaatigut. Jehovap nuliamik ajunngingaartumik ilumoortumillu pilluaqquaanga. Meeqqamalu ilumoorlutik tapersersorpaannga, tamarmillu piffissaq tamaat oqaluussisartuunerat nuannaarutigeqaara. 2000-imi marsip ulluisa 11-anni ernerput Mark nulialu, Allyson, Gileadip atuarfiata klassit 108-ni naammassipput Nicaraguamullu aallartinneqarlutik. Nuliaralu naggataarnersiorluni nalliuttorsiornermut peqataavugut. Sallunanga oqassaanga ajutoornerup inuunera allanngortissimagaa, uummatigali pinnagu. — Tussiaat 127:3, 4.

Jehova qutsavigaara anersaakkut kingornussama ilaquttannut ingerlateqqinnissaanut ilisimassusermik tunisimammanga. Meeqqakka ataatattut isiginnittaaseqarlutik Pinngortitsisumik kiffartuussinerat takullugu nakussatsissutigalugu qiimmassaatigaara, oqarmat: „Taama ajornanngitsigisumik unitsinneqassanngilagut. Jehovap peqquaatigut oqaluusseqqulluta.“ Aap, Jehovap uanga ilaquttakkalu qaqugukkulluunniit napatissimavaatigut. (wE 1/3 01)

[Qupp. 25-mi assiliartaq]

Ataatagalu, qatanngutikka angutit qatanngutigalu arnaq biilip najugaqarfissiap pioneeriugallaratta atukkatta saavani. Uanga talerperlersaavunga

[Qupp. 27-mi assiliartaq]

Nuliaralu, Myrna

[Qupp. 27-mi assiliartaq]

Ilaqutariiulluta qanittukkut assilisaq

[Qupp. 28-mi assiliartaq]

Suli allattarpunga