Guutip naalagaaffianik nutaarsiassaq nuannersoq sunaana?

Siorna inuit, inuusuttut utoqqaallu 6.035.564-t nalunaaquttap akunneri 1.171.270.425-t atorsimavaat tamanna pillugu oqaluussillutik, nunarsuarlu tamakkerlugu taamaaliorsimapput nunanilu 235-ni. Aap, oqaluuseriinnanngilaat, aammali naqitatigut 700 millionit sinnerlugit nassuiartarsimavaat suna siunertarineraa. Aammattaaq kassettebåndit videobåndillu tusindilippassuit agguaanneqartarput suli amerlasuut taanna pillugu ilikkaqqullugit. Suna pillugu?

GUUTIP naalagaaffianik nutaarsiassaq nuannersoq. Oqaluttuarisaanermi ’naalagaaffimmik iivangkiiliu’ aatsaat taama oqaluussissutigineqartigaaq soorlu taama pisoqarnera ullumikkut takuneqarsinnaasoq. — Matthæusi 24:14.

Oqaluussisartut ajoqersuisullu tamarmik nammineq piumassutsiminnik sulipput. Avataaniit isigalugit suliamut immaqa piukkunnarpasinngikkaluarput. Qanorli pigisaqarnerat angusarissaarnerallu nassuiarneqarsinnaappat? Pingaarnerusoq tassaavoq oqariartuummi, Guutip naalagaafianik nutaarsiassap nuannersup, nukinga. Nutaarsiassaq nuannersoq pilluaqqussutinik inuiaat peqataaffigisinnaasaannik oqariartuuteqarpoq, pilluaqqussutissat kikkut tamarmik maqaasigisaat — pilluarneq, nalakkersueriaaseq pitsaasoq, eqqissineq aarlerigisaqannginnerlu, aningaasatigut ajornartorsiorneq, taavalu amerlanernit upperiuminaatsinneqarnerpaaq tassa: inuuneq naassaanngitsoq! Inunnut inuunermik siunertalimmik ujaasisunut taassaavoq tusagassaq nuannersoq. Aap, pilluaqqussutissat tamakku sipporlugilluunniit misigisinnaavatit Guutip naalagaaffianik nutaarsiassap nuannersup oqaluussissutigineqarnera ajunngitsumik ilassigukku.

Naalagaaffik taanna sunaana?

Naalagaaffik taanna nutaarsiassamik nuannersumut tunngasoq sunaana? Tassaavoq naalagaaffik inuit millionillit oqaatsini ilisimaneqarluartuni qinnutigissallugu ilikkarsimasaat: „Ataatarput qilanniittutit! Aqqit illernartitaali, naalagaaffiit tikiulli.“ — Matthæusi 6:9, 10.

Tamannaavortaaq naalagaaffik ukiut 2500-t matuma siornatigut pruffiitip hebræeriusup Danielip eqqartugaa, ima allakkami: „Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu  inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnarsillugillu, namminerli soraajuitsumik atassaaq.“ — Danieli 2:44.

Nutaarsiassaq nuannersoq unaavoq, Guutip naalagaaffik taanna ikiortigalugu ajussuseq pissutsillu ajortut piiassavai, nunamilu tamarmi eqqissineqartitsilluni. Taamaalilluni naalagaafiup aallaqqaammulli Pinngortitsisup inunnut nunamullu siunertai piviusunngortissavai. — 1 Mosesi 1:28.

’Qilaap Naalagaaffia qanillivoq’

Ukiut 2000-ingajaat matuma siornatigut Guutip naalagaaffia pillugu nutaarsiassamik nuannersumik nuannaarutiginneqaluni uummammillu tamakkiisumik tamanut oqaluussisoq siulleq angutaavoq isikkumigut nuannaarpalunnermigullu amerlasuunut maluginiarnartoq. Angut taanna Johannesi Kuisisumik ateqarpoq, juutit palasiannit Zakariamit nulianillu Elisabethimit ernerineqartoq. Eliatut, siumut assersuutaasumik, qatigaatuup meqquinik sanaamik atisaqarpoq qiteruteqarlunilu amiusumik. Tusarliussaali maluginiarneqarnerpaavoq. „Allamik isumataaritsi,“ oqarpoq, „Qilaap Naalagaaffia qanillimmat.“ — Matthæusi 3:1-6.

Johannesip tusarnaartai juutiupput Guutimik ilumoortumik, Jehovamik, pallorfiginninnerartut. Ukiut 1500-t sioqqullugit naggueqataat inatsisit tunngavigalugit angerutsimik Moses aqqutigalugu pisimapput. Naalaffik kusanarluinnartoq suli Jerusalemimiippoq, Inatsisit naapertorlugit pilliiffiusarluni, juutillu upperilluinnarpaat kisimik Guuti eqqortumik pallorfigalugu.

Johannesimik tusarnaarluartut paasiartulerpaat pallorfiginneriaaseq eqqorsorisartik eqqunngitsuusoq. Ajoqersuutaat grækerit kulturiannik isumaliutersuutaannillu sunnerneqarsimavoq, inatsisillu Guutimit Mosesikkut pisimasatik muminneqarsimallutik, aap allaat inuit isumaannik oqaluttuarsiaannillu atorunnaarsinneqarsimallutik. (Matthæusi 15:6) Uummataat manngertunik naakkittaatsunillu upperisarsiornermik pisortanik, inuit tammartitaasimasut Guutip akuerisaatut Guuti pallorfigiunnaarsimavaat. (Jaaku 1:27) Guutimut angerutsimullu ajortuliarisimasatik peqqissimissutigisariaqarpaat.

Tamatuma nalaani juuterpassuit Missiarsip, imaluunniit Kristusip, neriorsuutaasup saqqummernissaa ilimagisimavaat, ilaasalu Johannesi pillugu qamuuna eqqarsarput ’Kristusiunersoq’. Johannesili  taannaannginnerarpoq, allamulli siulersorpai ima eqqaasaminut: ’Uanga qinngaqquppunga singii qilerussaassallugit.’ (Lukasi 3:15, 16) Johannesip ajoqersukkaminut ilisarititaa Jiisusiuvoq ima oqarami: „Aajuna Guutip savaaraa silarsuup ajortaanik nammattoq.“ — Johannesi 1:29.

Tamanna nutarsiassaavoq nuannerluinnartoq, tassami taana Johannesip tamanut eqqaasaa inuunermut pilluarnermullu aqqutissatuaavoq, tassa Jiisusi, „silarsuup ajortaanik nammattoq“. Adamimut Evamullu kinguaajusut inuit tamarmik ajortimit toqumillu qunusiarineqarlutik inuupput. Romamiut 5:19-imi ima nassuiarneqarpoq: „Soorlumi inuup ataatsip [Adamip] naalanngitsuliorneratigut inuit amerlasuut ajortilinngortut, taamatut inuup ataasiinnarluinnaap [Jiisusip] naalanneratigut inuit amerlasuut iluartungorumaarput.“ Jiisusi savatut pilliutissatut, ’silarsuup ajortaanik nammassaaq’ inuillu atugarisaat alianartut iluarsissallugit. „Ajortimmi akissarsiarititaa tassa toqu,“ Biibili paasissutissiivoq, „Guutilli saammannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.“ — Romamiut 6:23.

Jiisusi naammalluinnartutut inuugallarami — aap, inuit inuusimasut pingaarnersaattut — nutaarsiassamik nuannersumik oqaluussilluni aallartippoq. Biibilimi iivangkiiliut ilaanni oqaluttuarineqarpoq: „Johannesi paarnaarussivimmut pisinneqareersoq Jiisusi Galilæamut pivoq Guutillu iivangkiiliua oqaluussissutigalugu oqarluni: ’Piffissaq nalliuppoq, Guutillu naalagaaffia qanillivoq; allamik isumataaritsi, iivangkiiliulu upperisiuk’“ — Markusi 1:14, 15.

Jiisusip ajoqersuutaanik ilassinnittut nutaarsiassarlu nuannersoq upperalugu pilluaqqusaangaassapput. Johannesi 1:12-mi allassimavoq: „Ilassinnitsinili tamaasa Guutimut qitornanngorsinnaalersippai — tassa taakku aterminut uppertut.“ Guutip qitornaasut inuunermik naassaanngitsumik akissarsiassaq qilanaarisinnaavaat. — 1 Johannesi 2:25.

Guutilli naalagaaffiata pilluaqqussutissai ukiuni hundredelinni siullerni inuusut kisimik misigissanngilaat. Aallarniummi oqaatigineqareersutut nutaarsiassaq nuannersoq nunarsuaq tamakkerlugu ullumikkut oqaluussissutigineqarpoq ilinniartitsinersuaqarlunilu. Tassa suli Guutip naalagaaffiata pilluaqqussutaanik ilanngiisoqarsinnaavoq. Pilluaqqussutissat tamakku piniarlugit qanoq iliorsinnaavit? Allaaserisami tullermi tamanna sammineqassaaq.