Guutip naalagaaffiata pilluaqqussutai misigisinnaavatit

APUSTILI Paulusi taamani oqaatsit siammarsimanerpaat arlallit sapersaatiginagit oqalussinnaavoq ullumikkullu ilisimatusarfimmut nallersuunneqarsinnaasumik ilinniarsimavoq. Romamiunut innuttaaqataasutut periarfissarpassuaqarlunilu pisinnaatitaaffippassuaqarpoq. (Apustilit Suliaat 21:37-40; 22:3, 28) Tunuliaqutarissaarami pisoorsuanngorlunilu tusamasanngorsinnaagaluarpoq.  Oqarporli: „Tamaattoq siornatigut iluanaarutigigaluakka tamakku maanna Kristusi pissutigalugu ajunaarutaatippakka . . . tamaasalu perlukutut igitassaannaatippakka Kristusi pigilerumallugu.“ (Filippimiut 3:7, 8) Suumuna Paulusi taamatut eqqarsalersissimagaa?

Siornatigut Paulusi Saulusitut Tarsusiminngaanneersutut ’Aqqummillu atuaasunik’ qinuginnittutut ilisarisimaneqarpoq, maannalu kristumiunngorsimalerpoq. Tamanna pivoq Jiisusimik makissimasumik naalannartitamillu takusaqartitaareermat. (Apustilit Suliaat 9:1-19) Paulusip misigisaata qularunnaarsilluinnarpaa Jiisusi Missiarsiusoq imaluunniit Kristusi neriorsuutigisaq — naalagaaffimmi neriorsuutigisami naalakkersuisussaasoq. Qulaani oqaasiini kimeqarluartuni atuarneqarsinnaavoq misigisap tamatuma Paulusip inuunera allanngortilluinnaraa. Allatut oqaatigalugu: allamik isumataarpoq, ilumoortutut naapertuilluartutullu. — Galatiamiut 1:13-16.

Biibilimi oqaariaaseq ’allamik isumataarneq’ grækerit oqaluutaannit nutserneqartartoq isumaqavippoq „kingornatigut paasinninneq (nassuerutiginninneq),“ „siumut aalajangiuteriikkap“ akerlia. Allamik isumaqalerneq oqaatigineqarsinnaavoq, isiginnittaatsimik imaluunniit siunertamik allanngortitsineq, siornatigut iliuuserisimasaminut naammaginninnginnertut. (Apustilit Suliaat 3:19; Saqqummersitat 2:5) Paulusip Damaskusiliartilluni pisimasoq pingaaartoq misigissutsimiguinnaq „anersaakkuinnarluunniit“ misigisaqarfiginngilaa. Paasilerppaa siornatigut Kristusi eqqarsaatiginagu inuuserisimasani siunertaqarsimanngitsoq. Paasilerpaattaaq Kristusi pillugu paasilikkani iluaqutigissaguniuk, inuunini allanngortittariaqarlugu. — Romamiut 2:4; Efesosimiut 4:24.

Allanngorneq pilluaqqusaanernik kingunilik

Paulusip siornatigut Guuti pillugu ilisimasani pingaarnerusumik farisiiarit immikkut upperusiaannit ilaasortaaffigisaminit pisimavai. Ajoqersuutaat inuinnaat isumaliutersuutaannik kingornussarsiaannillu tunngaveqarput. Upperisami tungaatigut aalajangiussisimasaata kukkusumik ilungersuussitippaa nukiinillu atuitillugu. Isumaqarpoq Guuti kiffartuullugu, ilumoortumilli oqaatigissagaanni akerlilersorpaa. — Filippimiut 3:5, 6.

Maanna Paulusi Guutip siunertaani Kristusi inissisimaffialu pillugit eqqoqqissaartumik ilisimasaqalerami paasisinnaavaa aalajangertariaqarluni: Farisiiariuinnassava inuiaqatigiinnilu inissisimaffini nuimasoq aallutiinnarlugu, imaluunniit qanorluuniit issagaluarpat, Guutimut iluarisaajumalluni inuunini allanngortissavaa? Qujanartumik Paulusi eqqortumik aalajangiivoq, ima oqarami: „Tassami iivangkiiliu kanngusuutiginngilara, tassaammat Guutip pissaanera uppertut kikkulluunniit annasutissaat — juuteq siulliulluni, aammattaarlu grækereq.“ (Romamiut 1:16)  Paulusi Kristusi Guutillu naalagaaffia pillugit nutaarsiassamik nuannersumik ilungersorluni oqaluussissutiginnittunngorpoq.

Ukiorpassuit qaangiummata Paulusi kristumioqatimi ilaanut allappoq: „Qatanngutit, uanga nammineq pillunga isumaqanngilanga tigoreersimallugu, imaaliuinnarpungali: Kinguninniittut isumakkeerlugit siuninniittut isattorpakka, appuuffissaq anguniarpara ajugaasup nersornaatisiassaa piniarlugu, Guutip Kristusi-Jiisusikkut pavannga uatsinnut qaaqqusissutaa.“ (Filippimiut 3:13, 14) Aap, Paulusip nutaarsiassamik nuannersumik iluaqutiginninneranut pissutaavoq, Guutimik tunussititsisut kajumilluni qimakkamigit anguniakkanullu Guutip siunertaanut naapertuuttumik anguniakkanut ’apuunnissani anguniaramiuk’.

Qanoq iliussavit?

Immaqa aatsaat ungasinngitsukkut Guutip naalagaaffianik tusarliussaq tusaqqaarpat. Paratiisimi naammalluinnartumi naassaanngitsumik inuunissamik eqqarsaat nuannaraajuk? Tamanna pissusissamisoorluinnassaaq. Tamatta eqqissisimasumik toqqissinermillu inuunissamik inoorusussusermillu kissaateqarluta inuuvugut. Biibili naapertorlugu Guutip inunnut ’ittuinnartoqarnera uummaataannut tunniuppaa’. (Oqaluussisartup oqaasii 3:11) Tassa pissusissamisuuginnarpoq eqqissilluni pilluarlunilu naassaanngitsumik inuunissap qilanaarinissaa. Taannarpiaavoq Guutip naalagaaffianik nutaarsiassap nuannersup ilinnut pingaaruteqarsinnaanera.

Neriuut ilinnut piviusorpalaalissappat, misissorlugulu paasiniartariaqassavat nutaarsiassap nuannersup suna siunertarineraa. Paulusi ima kajumissaarivoq: „Allanngoritsi isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluartoq naammalluinnartoq.“ (Romamiut 12:2) Ilisimasaqarnerulersimaguit paasisaqarnerulerlutillu Paulusitut qinersisariaqassaatit.

Imaassinnaavoq upperisat tunngavigalugu siunissat pillugu takorluugaqareersutit. Aamma Saulusip, apustili Paulusinngunngikkallarami Guutip piumasaa sunaanersoq takorloortarsimavaa. Paulusitut Guutimik nalunaarfigineqarnissarput utaqqiinnarnagu, upperisarput pillugu imminnut aperisinnaavugut: ’Inuit nunarsuarlu pillugit Guutip siunertaa ilisimaqqissaarpara? Upperisama ilumoorneranik tunngaviusunik sunik uppernarsaatissaqarpunga? Guutip oqaasia Biibili atorlugu sukumiinerusumik misissorukku atasinnaava? Upperisat pillugu taamatut misissuiguit annaasaqaatigissanngilat. Tassami taamaa iliornissatsinnut Biibilip kajumissaarpaatigut: „Tamaasa misilittarsigit, ajunngitsorlu aalajangiussiuk.“ (1 Thessalonikamiut 5:21) Ataatsimut oqaatigalugu Guutimut iluarisaaneq apeqqutaaginnanngila? — Johannesi 17:3; 1 Timotheusi 2:3, 4.

Upperisarsioqatigiit pisortaasa siunissaq naassaanngitsoq pillugu neriorsorsinnaavaatigut, neriorsuulli Biibilip ajoqersuutaanik tunngaveqanngippat, Guutip naalagaaffiata pilluaqqussutissai misiginavianngilavut. Jiisusip qaqqami oqaluutsimini mianersoqqungaarpaatigut: „Imaanngilaq kinaluunniit uannut oqartoq: Naalagaq, Naalagaq! Qilaap Naalagaaffianut isissasoq, Ataatamali qilanniittup piumasaanik iliortoq kisimi.“ — Matthæusi 7:21.

Malugiuk Jiisusip erseqqissaraa Guutip Naalagaaffiata pilluaqqussutissaanik misigisaqarusukkaanni, Ataatap qilammiusup piumasaanik iliornissaq aalajangiisuusoq.  Allatut oqaatigalugu Guutip iluarisaanik iliorsorisoqarsinnaavoq, uffa taamaattoqanngitsoq. Jiisusi nangilluni oqarpoq: „Ullussami tassani amerlasuut uannut oqarumaarput: Naalaga, Naalagaq! illit atikkut siulittuisarsimannginnerpugut, atikkullu anersaapilunnik anisitsisarsimannginnerpugut, atikkullu amerlaqisunik malunnangaartuliortarsimannginnerpugut? Taava isertuarnaga nalunaarfigiumaarpakka: Ilisarisimanngisaannarpassi. Nigorsinga, ilissi inatsisinik unioqqutitsisuususi!“ (Matthæusi 7:22, 23) Pingaarnerpaamik Guutip naalagaaffianik nutaarsiassap siunertaa paasilluaqissaartariaqarparput, paasisimasatsinnullu naapertuuttumik inuulerluta. — Matthæusi 7:24, 25.

Ikiortissarsisinnaavutit

Ukiut 100-t sinnerlugit Jehovap Nalunaajaasuisa Guutip naalagaaffianik nutaarsiassaq nuannersoq oqaluussissutigisimavaat. Naqitatigut oqaatsimikkullu silarsuaq tamakkerlugu naalagaaffik pillugu sallusuissummik, sunillu pilluaqqussutissaqarnersoq, tamakkulu misigiumallugit qanoq iliortoqarsinnaaneranik inuit ikiorlugit, paasitinniarsimavaat.

Kajumissaarumavatsigit oqariartuummut Jehovap Nalunaajaasuisa oqaluussissutigisaannut tusarnaaqqullutit. Nutaarsiassap nuannersup ilassineratigut maleruarneratigullu pilluaqqussutissat nuanningaartut siunissami qilanaarisinnaavatit — massakkuinnaanngitsoq, aammali siunissami Guutip naalagaaffia nunarsuaq tamakkerlugu naalakkersuilerpat. — 1 Timotheusi 4:8.

Pisariaqartut maannakkut suliarikkit — Guutip naalagaaffiata pilluaqqussutissai qanittuararsuarmiimmata! (wE 1/4 01)

[Qupp. 32-mi assiliartat]

Jehovap Nalunaajaasuisa Guutip naalagaaffianik nutaarsiassaq nuannersoq naqitatigut oqaatsimikkullu oqaluussissutigisarpaat