Guutip tupinnartuliai maluginiakkit

„Angingaarput naammassisatit; [Jehova] Guutiga, iluaqutigaavut suliatit pilersaarutitillu tupinnangaartut, ilinnut naleqqiunneqartoqarsinnaanngilaq!“ — TUSSIAAT 40:6.

1, 2. Guutip tupinnartuliai sunik uppernarsaatissaqartippavut, qanorlu iliortittariaqarpaatigut?

BIIBILI atuaraangatsigu paasilluarsinnaasarparput itsaq Guutip innuttani, Israeli, tupinnartuliorfigisarai. (Josva 3:5; Tussiaat 106:7, 21) Jehova itsaq Israelimitulli nunarsuarmi pissutsinut maanna akuliutinngikkaluartoq tupinnartuliaanut takussutissarpassuaqarpoq. Taamaattumik tussiaasiortutut oqarnissatsinnut pissutissaqarpugut: „Amerlangaarput pinngortitatit, [Jehova]! pinngortippatit tamaasa ilisimasuullutit. Nuanarsuaq pinngortitannik ulikkaarpoq.“ — Tussiaat 104:24; 148:1-5.

² Guutip pinngortitsineranut uppernarsaatit erseqqissut taamaattut inuppassuarnit sumiginnarneqarput akueriumaneqaratilluunniit. (Romamiut 1:20) Eqqarsaatigeqqissaartariaqarpagulli Pinngortitsisumullu attaveqarnitsinnut akiitsugaqarnitsinnullu  tunngatillugu isummartariaqarluta. Jobimik allakkat kapitalit 38-miit 41-mut taamaaliornissamut iluaqutaalluassapput, tassanimi Jehovap tupinnartuliami ilai Jobimut misissoqqissaaqquvai. Guutip eqqartugaasa ilai misissorneroriartigik.

Guutip tupinnartuliai sunniinertuut

3. Jobi 38:22-29-mi Guuti qanoq aperiva?

³ Guutip Jobi aperaa: „Apummut peqqumaasivinniissimavit nataqqornanut peqqumaasiviit takusimallugit? Tamakku uninngatittarpakka annikilliulerfissanut, ullormut akiuuffiusussamut sorsuffiusussamullu.“ Nittaalaq nataqqornallu inuit ilarpassuisa ulluinnarsiutigaat. Guuti nangippoq: „Kina qillerilluni ikerasaliorpa erngup supisup aqqutissaanik, kia ingerlavissiorpai nuissat kallerup pilerfii - siallersitsilluni nunamut nunagineqanngitsumut, allat inoqajuitsumut inoqanngitsumut, taamaalilluni inoqajuitsoq naammattumik imeqalersillugu ivikkallu naatillutigit? Sialuk ataataqanerpa? Kanernerillu kuseriarneri kimit kinguaassiarineqarpat? Sermeq kimit erniarineqarpa, kialu erniarai qaqornaat qilammit nakkartartut?“ — Jobi 38:22, 23, 25-29.

4-6. Inuit apummik ilisimasaat naammanngitsoq qanoq paasisariaqarpa?

⁴ Inunnut inuiaqatigiinni ulapittuartuni inuusunut angalasariaqartunullu nittaalaq akornutaasassaaq. Allanulli nittaalaq allaalluinnarpoq: Immikkut illuinnartunik periarfissarpassualimmik avatangiisinik oqaluttualiatut ittunik pilersitsisarpoq. Guutip apeqqutaa eqqarsaatigalugu oqarsinnaanerpugut nittaalaq ilisimalluarlugu — soorlu nalunnginnerparput qanoq isikkoqartoq. Tassami, nalunngikkaluarparput apusinersuaq qanoq isikkoqartoq. Makkuli nittaallat ataasiakkaat? Qanoq isikkoqartut nalunngiligit?

⁵ Inoqarpoq nittaallanik ukiorpassuarni misissuillutillu assiliisarsimasunik. Nittaalaq ataaseq nilamineerannguanik 100-nik katitigaasinnaavoq assigiinngitsorpassuarnik kusanartunik ilusilinnik. Atuakkiami Atmosfæren-imi ima allassimasoqarpoq: „Nittaallat assigiinngisitaartorpassuunerat tupinnarluinnarpoq, ilisimatuullu aalajangiusimagaluaraat marlunnik assigiinnik nittaalaqarsinnaanera pinngortitap inatsisaasa akornutissaqartinngikkaat, taamaattoq nittaalanik assigiinnik marlunnik nassaartoqarsimanngisaannarpoq. . . . Wilson A. Bentley kakkaginartumik misissuisarsimavoq, ukiullu 40-nit amerlanerusut ingerlaneranni allisitsiuserluni nittaallanik misissuillunilu assiliisaqattaartarsimagaluarluni marlunnik assigeeqqissaanik nassaarsimanngisaannarpoq.“ Qaqutigooraluartumillu marluk assigeeqqissaaraluarpata tupinnarluinnartumik assigiinngisitaartorpassuaqarnera allanngortissavaa?

⁶ Guuti ima aperisoq eqqaamajuk: „Apummut peqqumaasivinniissimavit?“ Qularnanngitsumik amerlasuut eqqarsarput nuissat nittaallat pilersarfigigaat, ’peqqumaasivigigaat’. Takorloorsinnaanerparput peqqumaasivimmut taamaattumut isertugut nittaallat assigiinngitsorpassuit nalunaarsoriartorlugit? Imaluunniit qanoq ilillutik pinngortarnersut paasiniarluariartorlugit? Ilisimatuut qinerlerfissiaanni ima allassimasoqarpoq: „Sermileqqaatit — nuissat kuseriarnimineerarpassui minus 40 gradit missaanni qerisinnaassappata pisariaqartut — qanoq pinngortarnerat qanorlu ittuunerat suli nalorninarpoq.“ — Tussiaat 147:16, 17; Esaja 55:9, 10.

7. Sialuk qanoq ilisimasaqarluarfigitigaarput?

⁷ Sialummi? Guutip Jobi aperaa: „Sialuk ataataqarnerpa? Kanernerillu kuseriarneri kimit kinguaassiarineqarpat?“ Ujarlerfissiami taaneqareersumi ima allassimasoqarpoq: „Silaannaap aalaneri aammalu isugutaap partikelillu silaannarmiittut allanngorartorujussuunerat pissutigalugu ajornarluinnarunarpoq nuissat aammalu sialuit nittaallalluunniit qanoq pinngortarnerannik erseqqissumik tamanullu atorsinnaasumik nassuiaaniaraluassalluni.“  Paasiuminartumik oqaatigalugu paasiniaaqqissaartartut sialuk pillugu isumaliuutersuuteqarput, tamakkiisumilli suli nassuiaasinnaanatik. Taamaakkaluartorli nuissat siallersitsiuartarput nunamik naasunillu imerterillutik taamalu inuusoqarsinnaanngorlugu ilorrisimaartoqarsinnaanngorlugulu.

8. Paulusi Apustilit Suliaat 14:17-imi oqarami sooq taama torrallaatigaa?

⁸ Apustili Paulusip inerniliinera isumaqatiginartinnginnerparput? Kajumissaarivoq tupinnartuliat tamakku tamakkuninnga pinngortitsisumut nalunaajaatitut isigeqqullugit. Paulusip Jehova Guuti ima oqaatigaa: „Imminut nalunaajaassutigisimavoq ajunngitsuliornermigut tunisarlusi qilammit sialummik ullunillu naalluarfiusunik, qaarsillartittarlusi uummatisilu nuannaartittarlugit.“ — Apustilit Suliaat 14:17; Tussiaat 147:8.

9. Guutip pissaaneqangaarnera tupinnartuliaani qanoq erserpa?

⁹ Nalunanngivippoq tupinnartulianik tamakkuninnga uagutsinnut iluaqutissanik pilersitsisimasoq ilisimassusersuarmik pissaanersuarmillu peqartoq. Pissaaneranut assersuutissatut taaneqarsinnaavoq nunarsuarmi tamarmi ullormut 45.000-it missiliorlugit kallertarmat; imaappoq ukiumut 16 millioninit amerlanerusunik. Tassa nunarsuarmi sumiiffinni 2000-it missaanniittuni maannakkorpiaq kallerpoq. Taamatut kallertillugu kallerup nuiaasa iluini akornannilu silaannaap aalanersuatigut nukik pilersarpoq ikinnerpaamik atombombet qulit sorsunnersuit aappaanni qaartinneqartut nalingi. Nukiup taassuma ilaa innaallannertut takuneqarsinnaavoq. Innaallannerup kusanangaarnerata saniatigut kvælstoffinut atassusiisarpoq nunami naasunut naasorissaataalluni. Innaallannerit nukerujussualiortuupput, iluaqutigingaarpagullu. — Tussiaat 104:14, 15.

Qanoq sunnerpaatigut?

10. Jobi 38:33-38-mi apeqqutit qanoq akissavigit?

¹⁰ Inuit amerlanersaat Guutip tupinnartuliaanik soqutigisaqarpallanngillat. Jobiullutilli Guutimillu ajugaqanngitsumik apersorneqarlutit takorlooriaruk. Jobi 38:33-38-mi Jehova ima aperivoq: „Qilammut inatsisit ilisimavigit, nunamut pissaanera  aalajangiiffigisarpiuk? Nipit nuissanut anngutitissinnaaviuk imersuarnit qallerneqartillutit? Innaallagissat aallarartissinnaanerpigit ilinnut oqartillugit: Piareersimavugut? Kia timmiaq ibisi ilisimassusilersimavaa, kialu kukkukooq angutiviaq silaqassusilerpaa? Kina ima ilisimatuujutigaa nuissat kisissinnaallugit? Kialu imeq qilaap imertaataanit kuisarpaa issoq manngertikkaangat mattutsikkaangallu saanngullu issoqqanngortiterluni?“

11, 12. Guutip tupinnartuliortuuneranut takutitsisut ilaannik taasaqarit.

¹¹ Elihup Jobimut taasaasa ilaminiinnanngui Jehovallu Jobimut apeqqutit „angutitut“ akeqqusaasa ilaminiinnanngui takuavut. (Jobi 38:3) Kapitalini 38-mi 39-milu Jehovap Jobi pinngortitarsuarmut tunngasunik arlalinnik maluaginiagaqaqquaa. Assersuutigalugu ullorissat tavai. Kia inatsisit tamakku tamaasa taakkununnga atortut nalunngilai? (Jobi 38:31-33) Aamma Jehovap Jobimut uumasut ilaat maluginiaqquvai — løveq tulugarlu, savaasaq innarmiu siutitoorlu nujuartaq, ussik nujuartaq qatigattuusarlu, hesti nattoralillu. Iluamik oqaatigalugu Guutip Jobi aperaa uumasut assigiinngitsorpassuit taakkua immikkut ilisarnaatilersimanerai qanorlu ittuussanersut aalajangersimaneraa. Immaqa kapitalit taakkua misissorluarnerorusuppatit, ingammik hestit uumasulluunniit allat nuannarigukkit. — Tussiaat 50:10, 11.

¹² Aammattaaq kapitalit 40 41-lu atuarsinnaavatit, Jehovap Jobi akisassaanik arlalinnik apereqqikkaa, tamatumuuna uumasut aalajangersimasut marluk pillugit. Ima paasivarput uummasut taakkua tassaasut imermiutarsuaq angisooq nukiittoorlu (Behemoti) kuukkoriarsuarlu ersinartoq (Livjatani). Marluullutik pinngortitamut tupinnartumut alapernaattariaqakkatsinnut ilaapput. Takoriartigu qanoq isummertariaqartugut.

13. Guutip apeqqutai Jobimut qanoq sunniuteqarpat, eqqartukkavullu uagutsinnut qanoq sunniteqartariaqarpat?

¹³ Jobimik allakkat kapitali 42-mi Guutip apeqqutaanut Jobi qanoq qisuariarnersoq takusinnaavarput. Siornatigut Jobi imminut allanullu sammivallaarsimavoq. Maannali Guutip aperisarluni perorsaanera ilassivaa, eqqarsariaatsinilu allanngortillugu. Oqarpoq: „Paasivara tamanik sapigaqangitsutit [Jehova], iliuuseriumasannik tamanik ilinnut ajornartoqanngitsoq. Kinaana ilisimasaqarnani aalangeriikkannik taalliiniartoq? Uanga oqaluuserisimavakka paasinngisakka, tupinnangaaramik uanni siunersissaanngitsut.“ (Jobi 42:2, 3) Aap, Guutip tupinnartuliaanik maluginnereerluni tamakku tamarmik tupinnangaarnerat oqaatigaa. Pinngortami tupinnartut tamakku, Guutip ilisimassusersuanut pissaanersuanullu nalunaajaataasut, uaguttaaq killissutigisariaqarpavut. Suna kinguneralugu? Tupigusorujussuaannassaagut? Sunniuteqarnerusariaqarpalluunniit?

14. Guutip tupinnartuliai Daavimut qanoq sunniuppat?

¹⁴ Tussiaat 86-imi Daavi assingusunik oqaaseqarpoq, tussiaammi siusinnerusukkut ima allappoq: „Qilaap oqaluttuaraa Guutip naalannassusia, qilaanngusaasap nalunaarutigaa assaasa piliaat, ullup oqariartorfigaa ulloqanni, unnuap nalunaarfigaa unnuaqanni.“ (Tussiaat 19:2, 3) Daavili ingerlaqqippoq. Tussiaat 86:10, 11 allassimavoq: „Illimmi angingaarputit tupinnartuliortarlutillu, kisivit Guutiuvutit. Ajoqersunnga [Jehova] aqqutigeqqusannik, inuusinnaaqqullunga sallusuissutinni. Uummatima illit aqqit kisiat mianeriliuk.“ Daavip Pinngortitsisoq tupinnartuliai tamaasa pillugit ataqqivaa mianeralugulu. Paasilluarparput. Taamaattunik tupinnartuliortartumut iluarisaajunnaarnissani kissaatiginngilaa. Taamatut isummeriartaaseqartariaqarpugut.

15. Daavip Guutimut mianerinninnera sooq pissusissamisoorpa?

¹⁵ Daavip paasisimavaa Guutip pissaanersuani nukerujussuillu atorsinnaasani kimulluunniit iluarinngisaminut atorsinnaagai — taakkununnga ajortumik kinguneqartumik. Guutip Jobi aperaa: „Apummut peqqumaasivinniissimavit nataqqornanut peqqumaasiviit takusimallugit? Tamakku uninngatittarpakka annikilliulerfissanut, ullormut akiuuffiusussamut sorsuffiusussamullu.“ Guutip aput, nataqqornat, sialuk, anorersuaq innaallanerlu — pinngortitami nukerujussuit — sakkussamaatigai. — Jobi 38:22, 23.

16, 17. Guutip nukinga mianernangaartoq qanoq erserpa nukillu taanna itsaq qanoq atorsimavaa?

¹⁶ Pinngortitap nukiinit taakkunannga ajunaarnersuaqartitsisumik immaqa eqqaamasaqarpugut — anorersuaq, perlussuaq qarsutsinerluunniit.  Assersuuteqariarta: 2000-innguliivissoq Europap kujataata kitaani anorersuarujussuarpoq allaat silasiortut pakasarlugit. Nalunaaquttap-akunneranut 200 kilometerit tikillugit anoraasuartarpoq qaliallu tusintilikkuutaat teqqarlugit, innaallagissallu aqqutaanut napparutit uppikaatillugit lastbilillu eqqakattaaralugit. Orpiit 270 millionit missaat anorersuup uppitillugilluunniit napivai, taakkunannga 10.000-it Parisip avataani Versaillesip illoqannginnersaaniinnaq. Angerlarsimaffiit millionilikkuutaat innaallagiaqanngillat. Hundredingajaat ajunaarput. Tamakku tamarmik anorersuarmik sivikikkaluamik pissuteqarput. 3. decembari Danmarkimi anorersuarmat inuit arfineq-marluk ajunaarput amerlasuullu aqqunarlutik. Anorersuup orpiit uppititai ima amerlatigipput ukiuni arfineq-marlunni uppikaatitatulli amerlatigalutik.

¹⁷ Anorersuit naatsorsoruminaatsutut aqunneqarsinnaanngitsutullu isigineqarajupput. Qanorli pisoqassagaluarpa Ajugaqanngitsoq nukissuit taakku siunnerfeqarluarluni atorlugit tupinnartulioraluarpat? Abrahamip nalaani assingusumik iliorpoq. Abraham oqarfigineqarpoq nunarsuarmik tamarmik eqqartuussisup illoqarfiit marluk, Sodomap Gomorrallu, innuttaasa ajussusiat malugisimagaa nalilerlugulu. Ajungaarmat taakku pillugit nipituumik nillianeq Guutimut apuussimavoq, naapertuilluartullu tamaasa illoqarfinnit eqqartuunneqartunit aniguisillugit. Biibilimi oqaluttuarineqarpoq Jehova illoqarfinnut taakkununnga marlunnut ’ikuallassaammik innermillu [Jehovamit] qilammiittumit nakkaatitsisoq’. Naapertuilluartut inuuginnartippai ajortullu peqqissimiumanngitsut piuneerutitillugit. — 1 Mosesi 19:24.

18. Esajap Allagai-ni kapitali 25-mi tupinnartuliat suut uparuarneqarpat?

¹⁸ Kingusinnerusukkut Jehovap Babylonitoqaq eqqartuuppaa, Esajap Allagai-ni kapitali 25-mi illukuinnanngortussatut Guutip siulittuutigisimasaa: „Illit illoqarfik ujaqqanik nakkaanikunngortissimavat, illoqarfik pallittaalisaagaluaq illukuinnanngortillugu. Allamiut pallittaalisaat illoqarfiujunnaarsimavoq sanaqqinneqartussaajunnaarluni.“ (Esaja 25:2) Babylonitoqaasimasumut tikeraarsimasut tamatuma eqquussimanera uppernarsarsinnaavaat. Nalaatsornerinnakkut Babylon aserorneqarpa? Naamik. Esajap oqaasii tapersersinnaavavut: „[Jehova], illit Guutigaakkit; nersorpakkit aqqillu unnersiutigalugu pilersaarutitit itsarniit aalajatsumik isumannaatsumillu naammassisimagakkit tupigisassaasumik.“ — Esaja 25:1.

Siunissami Guutip tupinnartuliariumaagai

19, 20. Esaja 25:6-8-p qanoq eqquunnissaa ilimagisinnaavarput?

¹⁹ Itsaq siulittuutit Guutip eqquutitippai siunissamilu tupinnartuliorumaarluni. Esaja 25:1-ip, Guutip tupinnartuliorneranik eqqartuisup, versialuit kingorna siulittuut tatiginartoq suli eqquussimanngitsoq atuarsinnaavarput. Eqquukkumaarpoq, Babylonimut eqqartuussutip siulittuutaasup eqquunneratulli qularnaatsigisumik eqquutissaaq. Jehova sunik ’tupinnartuliorumava’? Esaja 25:6-imi allassimavoq: „Katersaarsuit [Jehovaat] qaqqami Zionimi inuiannik tamanik neriartortitsissaaq sassarlugit nerisassat pikkunartut viinnilu uninngatitaasimasoq, nerisassat patermik orsuarnequtillit viinnilu uninngatitaasimasoq pitsaalluinnartoq.“

²⁰ Silarsuarmi nutaami Guutip neriorsuutigisaani siunitsinniittumilu siulittuutip taassuma eqquunnissaa qularnaappoq. Taamanikkussaq inuiaat ajornartorsiutinik maanna amerlasuut ajornartorsiutaannik aniguisinneqarsimassapput. Esaja 25:7, 8-mi siulittuut qulakkeerutaavoq Guutip pinngortitsisutut nukimminik tupinnartuliat takorloorsinnaasatta annersaannut atuiumaarneranut.  „Toqu nungutinneqassaaq piujunnaarsivillugu. Guutillu [Jehovap] isit tamaasa qullingiarumaarpai nunarsuarmilu tamarmi innuttani kanngunarsagaajunnaarsillugit. [Jehovami] taama oqaluppoq.“ Kingusinnerusukkut apustili Paulusip allassimaffiit taakku issuarpai Guutillu toqusimasunik uummartitsinissamik neriorsuutaanut atorlugit. Tupinnartuliamik annerusumik takorluuisinnaavugut? — 1 Korinthimiut 15:51-54.

21. Guuti toqusimasunut qanoq tupinnartuliussava?

²¹ Aliasunnermit qiasoqartariaarunneranut pissutaasussat ilagissavaat inuit timikkut nappaataarunnissaat. Jiisusi nunamiikkallarami amerlassut ajorunnaarsippai. Tapiitsut isigisaqarlersippai, tusilartut tusaasaqalersillugit innarluutillillu innarluutaarutsillugit. Johannesi 5:5-9-mi atuarsinnaavarput angut ukiuni 38-ni nukillaarsimasimasoq ajorunnaarsikkaa. Takunnittut tamanna tupinnartuliatut isigaat. Taamaapporlumi. Jiisusilli oqaluttuuppai annerungaartumik tupinnartuliormaarluni: toqusunik makitsitsiumaarluni! „Tamanna tupigusuutigissanngilarsi; piffissarmi nalliukkumaarpoq ilivermiittut tamarmik taassuma nipaanik tusarumaarfissaat ilervernillu aniumaarfissaat - angunngitsumik iliorsimasut makillutik inuunissamut.“ — Johannesi 5:28, 29.

22. Sooq piitsut annikilliortitaasullu neriullutik siunissaq isigisinnaavaat?

²² Taamaalisoqarnissaa qularnanngilluinnarpoq, neriorsuisormi tassaavoq Jehova. Pissaanersuani siunnerfeqarluarluni atorpagu nuanningaartumik kinguneqarumaartoq qularutiginngilluinnarsinnaavarput. Tussiaat 72-imi atuarsinnaavarput erni, kunngi Jiisusi Kristusi, aqqutigalugu qanoq iliorumaartoq. Taamanikkussaq iluarneq inerilluarumaarpoq eqqissineqangaarumaarlunilu. Piitsoq annikilliortitaasorlu annaatissavai. Ima neriorsuivoq: „Qanortoq karrit naammangaartut nunami naagilit, qaqqat qaanni aalataarumaarput, inerittui Libanonimisut naalluassapput, karrii narsaatip ivigaasut napassapput.“ — Tussiaat 72:16.

23. Guutip tupinnartuliaasa qanoq iliorusutsittariaqarpaatigut?

²³ Jehovap itsaq ullumikkullu tupinnartuliaasa siunissamilu qaninnerpaami tupinnartuliariumaagaasa maluginissaannut pissutissarpassuaqarpugut. „Unnersiutigineqarli Guuti [Jehova], Israelip Gutia, kisimi tupinnartuliortartoq. Unnersiutigineqarli aqqa naalannartoq naassaanngitsumik! Naalannassusiata nunarsuaq tamakkissavaa. Amen. Amen.“ (Tussiaat 72:18, 19) Tulluusimaarutiginnilluta Jehovap tupinnartuliaanik eqqarlivut allallu oqaluttuuttartigik. Aap, ’inuiaat oqaluttuutsigit naalannassusianik, inuiaqatigiit tamaasa tupinnartuliaanik’. — Tussiaat 78:3, 4; 96:3, 4. wE 15/4 01

Qanoq akissavit?

• Inuup ilisimassusiata killeqarnera Guutip Jobimut apeqqutaani qanoq ersersinneqarpa?

• Guutip tupinnartuliai Jobimik Allakkat-ni kapitalini 37-miit 40-mut allassimasut arlaat sorliit killissutigineruvigit?

• Guutip tupinnartuliaasa ilaat eqqartoreerlugit qanoq qisuariartariaqarpugut?

[Atuaqqissaarnermi apeqqutit]

[Qupp. 10-mi assiliartat]

Nittaallat tupinnarluinnartumik assigiinngisitaartorpassuaqarnerat innaallannerillup kusanangaarnerat qanoq isumaqarfigaagit?

[Suminngaanneernera]

snowcrystals.net

[Qupp. 13-mi assiliartat]

Guutip tupinnartuliai allanut oqaluttuarisakkit