Misigissutsit ajortut qanoq qaangerneqarsinnaappat?

• Asaf anersaamivoq: „Uummatiga minguitsuutinniarsimavara asuliinnaasumik, pinngitsuutinniarlungalu assakka asattarsimallugit, taamaattoq ulloq tamaat eqqorneqartarpunga anusinngorsarneqartarlungalu ullaat tamarluinnaasa.“ — Tussiaat 73:13, 14.

• Baruk nimaarpoq: „Eqqanaq uanga, [Jehovap] anniaatikka ilammagit naalliungaarnermik. Anersaaruluttarninnit qasoqaanga qasuerfissaqarnangalu!“ — Jeremia 45:3.

• No’omi kappialavoq: „Ajugaqanngitsup narrutsatsissimavaanga. Peqangaarlungami maanngaaniit aallarpunga, suerutitillungali [Jehovap] maanga utertippaanga. Sooq taava No’omimik taasassavisinga uffa [Jehovap] pisuutillunga uppernarsaasoq, uffa Ajugaqanngitsup ajunaartikkaanga?“ — Ruthi 1:20, 21.

JEHOVAP kiffaanik aalajaatsunik ilaanni nikallunganermit artorsartitaallutik misigisunik amerlaqisunik Biibilimi assersuutissaqarpoq. Qularnaateqanngilaq tamatta inuttut naamalluinnanngitsutut misigissutsit taamaattut ilaanni misigisassagivut. Ilaalli alianartunik misigisaqarsimapput taamaattumillu nikallungalianerusarlutik – immaqalu allaat imminnut naakkigilertarlutik.

Mianersunngikkaanni, Jehova Guutimut allanullu atassuteqarneq misigissutsinit taamaattunit aserorneqarsinnaavoq. Arnaq kristumiu ilaannikkut imminut naakkigilaartartoq nassuerpoq: „Akulikitsunik ilagiinniittut ilaasa pulaarnissaannut qujaannartarpunga, ilaginissaannut qinngaqqunnartutut misigisimanera pissutigalugu.“ Misigissutsit taamaattut aseruisinnaassusiat eqqarsaatigiuk. Akiorniarlugit qanoq iliortoqarsinnaava?

Jehovamut qanilligit

Tussiaat 73-imi Asaf isertorani allappoq qanoq nalornitigaluni. Pissutsit atukkani guutiitsut atugarissaarnerannut naleqqiukkaangamigit uumigalugit misigisarpoq. Takuaa ajortut qanoq makitatigalutillu nakuusertigisut, takullugulu allaat taamaaliornerminni kingunerlutitsineq ajortut. Asafip qularilerpaa inuunermini ajunngitsumik malitaqarnini naleqarnersoq. — Tussiaat 73:3-9, 13, 14.

Illit Asafitut takuiuk guutiitsut suliaminnik ajortunik usorsitsaarutiginnittut qanoq ajunngitsigisumik ingerlagunartut? Asafip misigissutsini ajortut qanoq qaangerpai? Nangippoq: „Taava eqqarsarpunga paasiniarumallugu. Uanga isinni tamanna eqqunngitsuuvoq Guutip illernartuutaanut pitserlunga qanorlu naggatissaqarnersut sianigilerserlugu.“ (Tussiaat 73:16, 17) Asafi ajunngitsumik iliuuseqarpoq Jehovamut qinunikkut saaffiginnikkami. Paulusip oqarneratut Asafip ’inuk tarnimut tunngasoq’ qunutippaa ’inuup anersaamut atasup’ itertinneratigut. Anersaakkut ittumik takunnissinnaanera nutaanngorsarpaa. Paasivaa Jehovap ajussuseq uumigigaa, guutiitsorlu piffissaq nalliuppat pillarneqarumaartoq. Asafip eqqortumik paasinninnerminut ikiortigisaa tassaavoq Jehovap illernartuutaani ilinniartitsineq. — 1 Korinthimiut 2:14, 15.

 Inuunermi pissusiviusut akuerinissaannut Biibilimik iluaquteqarnitta pingaaruteqassusia! Jehovap eqqaasippaatigut guutiitsut suliaat arajutsisimanagit. Biibilimi allassimavoq: „Tammaqinasi! Guuti mitaatigeqqunngilaq. Inuup siaruartikkani aamma katersorumaarpai. . . . Ajunngitsuliorneq qatsuteqinatigu.“ (Galatiamiut 6:7-9) Ajortut Jehovap ’quasartunut’ pisikkumaarpai, ’aserorsimassusermiitikkumaarpai’. (Tussiaat 73:18) Guutip naapertuilluassusia ajugaajuaannassaaq.

Jehovap nerriviani akuttoqatigiimmik nerisarnitta Guutillu innuttaasa katisimanerinut ilaasarnitta, uppernitsinni nakussatsisavaatigut ikiorlutalu nikallunganerup misigissutsillu allat ajortut qaangernissaannut. (Hebræerit 10:25) Asafitulli Guutimut qanittumik attaveqarnitsigut, paasissavarput qanoq asannilluni tapersersoraatigut atatillutalu. Asaf nangilluni oqarpoq: „Maannali ilinniittuaannarpunga, talerpiga tigummivat. Ilitsersuutikkut ingerlatissavarma, naalannassusermukaatissavarma.“ (Tussiaat 73:23, 24) Arnap kristumiup meeraalluni atornerlunneqarsimasup paasivaa oqaatsit takkua ilisimassusermik qanoq ittumik imaqarnerat. Oqaluttuarpoq: „Ilagiinnut atalluarnerma paasitippaanga inuuneq allaanerusinnaasoq. Paasivara kristumiut utoqqaanertat asannittumik paarsisuusut politiiunatik.“ Aap, kristumiut utoqqaanertat misigittartut misigissutsinik ajortunik akiorniagaqartariaqartunut iluaqutaasorujussuusinnaapput. — Esaja 32:1, 2; 1 Thessalonikamiut 2:7, 8.

Jehovap siunnersuutaa ilassiuk

Barukip, Jeremiap allattaata suliassami misigissutsikkuk nanertuinera nimaarutigaa. Jehovalli piviusunik pingaarnerutitsinissaanut asannittumik ikiorpaa. „’Illit ujarpat angisooq. Taamaalioqinak! Uanga inuit tamaasa perlummik aallartitsivigissavakka, oqarpoq [Jehova], kisiannili illit inuuginnartisavakkit sumiikkaluaruilluunniit.’“ — Jeremia 45:2-5.

Oqaatsini toqqaannartuni Jehovap Bakukip piumatussusia paatsiveerunneranut pissutaanerarpaa. Barukip Guutimit suliassinneqarnini nuannaarutigilersinnaanngilaa angisuumik ujarliitigaluni. Uaguttaaq immaqa aamma nikallungajunnaarsinnaavugut allamut saatitsisinnasut ingalassimasarutsigit, eqqarsaativullu eqqissinermik Guutip peqqusaanik iliornermit pisunik immerlugit. — Filippimiut 4:6, 7.

No’omi Moabimi uini erninilu marluk annaagamigit aliasunnermit sapilersitaanngilaq. Takussutissaqarporli aallaqqaammut ukussanilu atukkatik narrutsassimassutigigai. No’omip aallartippai ima oqarluni: „Uanga ilissinnit annerusumik annikilliorpunga, uangaana [Jehovap] assaanik eqqorneqartunga.“ Betlehemilu tikikkamiuk oqaqqippoq: „No’omimik taananga Maramik taasalerniarsinga  Ajugaqanngitsup narrutsatsissimammanga.“ — Ruthi 1:13, 20.

Kisianni narrutsassimanerup aliasunnerullu No’omi Jehovamit innuttaanillu avissaartillugu immikkuulersinngilaat. Moabimiitilluni tusarpaa „[Jehovap] innuttani isumassorsimagai inuussutissaannik tunillugit“. (Ruthi 1:6) Paasivaa Jehovap innuttaasa akornanniinneq najorsinnaasami pitsaanersarigaat. Taamaattumik ukussani Ruthi Judamut uteqatigaa. Tassani Ruthi silatuumik siunnersorpaa eqqarliminnut Boazimut utertitsisiminut qanoq iliussanersoq.

Ullumikkuttaaq Jehovap kiffai ilumoortut aappaminnik annaasaqarsimasut misigissutsip ilungersornartup tamatuma qaangernissaanut ikiorneqarsimapput. No’omitulli anersaakkut ittunik sammisaqarnissartik isumagivaat. Kristumiut ilagiivini ulapputeqarput Guutillu oqaasia ullut tamaasa atuartarlugu.

Guutip ilisimassusiata sunniutai iluaqutaasut

Biibilimi oqaluttuarineqartut taakkua paasitippaatigut qanoq ililluni misigissutsit ajortut qaangerneqarsinnaasut. Asaf Jehovap illernartuani ikiortissarsiorpoq naammagittarlunilu Jehova utaqqillugu. Barukip ilitsersorneqarnini akueraa soqutigittaallunilu pigisaqalerniarunnaarluni. Allat sinngaginngilai, naammagittarlunili Jehova utaqqivaa. No’omip suliumatunermigut Jehova innuttai peqatigalugit kiffartuuttuarpaa arnarlu inuusuttoq Ruthi Guutimik ilumoortumik pallorfiginninnermi immikkut pisinnaatitaaffissaanut piareersarlugu. — 1 Korinthimiut 4:7; Galatiamiut 5:25; 6:4.

Nikallunganeq eqqarsaatillu allat ajortut qaangerneqarsinnaapput, inuttut ataasiakkaatut eqimattatullu Jehovap innuttaminik ajugaatitsisarneri kingumut qiviaraanni. Tassunga atatillugu eqqarsaatigiuk utertitsissutissamik pilliuteqarnermigut asannissuseq Jehovap takutitaa. Kristumiuni qatanngutigiissuarni asanninnerup malunnartup pingaartinnera ineriartortiguk, Guutilllu silarsuassaani nutaami qanittukkut piviusunngortussami inuunissaq siuninniitittuaruk. Taava Asafitut oqarneq ajornassanngilaq: „Kisianni Guuti qanillugu inuuneq tassa pilluarnartora. Qimarnguffigaara Guuti [Jehova] — suliatit tamaasa oqaluttuarisinnaaniassagakkit.“ — Tussiaat 73:28. (wE 15/4 01)