Paatsorneqartutut misigivit?

ANTONIO annilaangavoq. Ikinngutigilluagaa Leonardo tassanngaannaq nassuiaatissaqanngitsumillu ilasseraarunnaarpoq. * Piffissani assigiinngitsuni Leonardo ilassigaluarlugu ilasseqqittanngilaq, aamma ilagiikkaangamik, soorlu assiaquteqarlutik. Antoniop annilaangassutigaa oqartoorsimanerluni iliuuseqartoorsimanerluniluunniit ikinngummi paatsuugaanik. Kisianni suna?

Paatsooqatigiinnerit nalinginnaasuupput. Amerlasuut pingaaruteqanngillat anillatsinnissaallu sapernanngitsuararsuullutik. Ilaat ilungersuummernarsinnaapput, ingammik aaqqiinniarsuataaraluarluni ajortoqaannarpat. Sooq paatsuuisoqartarpa? Akuliunneqartunut qanoq sunniuteqartarpa? Paatsoorneqaraanni qanoq iliortoqarsinnaava? Allat qanoq eqqarsarnerat apeqqutaava?

Pinngitsoorneqarsinnaanngilaq

Allat eqqarsaatitsinnik siunertatsinnillu atuaasinnaanngimmata, oqaatsivut imaluunniit iliuutsivut piffissap ilaatigut eqqungitsumik paasineqarsinnaapput. Paatsoorneqarnissamut periarfissat amerlaqaat. Ilaatigut eqqarsaativut paasinartumik eqqorluartumillu kissaatigisaraluatsitut saqqummiunneq ajorpavut. Nipiliortut allalluunniit akornusersuisinnaasut oqaaserisatta pingaartortaat tusaanngitsoortissinnaavaat.

Ussersuataarnerinnarpulluunniit paatsoorneqarsinnaavoq. Ittuutooq, ilasseraanngitsutut, soqutigisaqanngitsutut imaluunniit pingaarniartutut nalilerneqarsinnaavoq. Siusinnerusukkut nalaassimasatta silatusaarnissatsinninngarnit misigittaatsumik qisuariartissinnaavaatigut. Kulturikkut oqaatsitigullu assigiinngissutitta paaseqatigiinnissarput ajornakusoornerulersissinnaavaa. Taakkununnga ilannguneqarsinnaavoq eqqunngitsumik issuaasoqarpat oqaatissuaasoqarpalluunniit, tupaalannanngilaq oqaatsitsinnik iliuutsitsinnillu paatsuuisoqarsinnaanera. Tamakkuali paatsoorneqartumut soorunami tuppalernarpallaanngillat.

Assersuutissaavoq Anna ikinngutimi ilaata nuannarisaanera pillugu pasinanngitsumik oqaaseqalaarsimasoq. Oqaaseqalaarsimanera  allamut atatillugu issuarneqarpoq, Annalu tupaallaatinneqarpoq annilaartinneqarlunilu ikinngummi allat tusaatillugit angutip nalunngisamik soqutiginninneranut sinnganerarmani. Annap oqaaseqalaarsimanera kukkulluinnartumik oqaatigineqarsimavoq, ikinngutiminullu qanorsuaq ajortumik isumaqartinngikkini nassuiarniaraluaramiuk iluatsinngilaq. Marluullutik aliasuutigeqaat, piffissagaatsiarlu ingerlareermat aatsaat Annap paatsooqatigiinneq aaqqippaa.

Allat uagutsinnik naliliisarnerat siunertatsinnullu qanoq isumaqarnerat apeqqutaagajuttarpoq. Taamaattumik eqqumiippallaanngilaq siunertarisaq eqqunngitsumik paasineqartillugu aalassaataasinnaasarmat. Narrujuummisoqarsinnaavoq allat paatsoornissaminnut pissutissaqanngitsut takusinnaagaanni. Isumaqartoqarsinnaavoq naliliinerit taamaattut paqumisunnerusut, isornartorsiunerusut imaluunniit eqqunngilluinnartuusut. Annernarluinnarsinnaapputtaaq — ingammik inuit taakkua eqqunngitsumik naliliisut isumaat pingaartikkaanni.

Allat qanoq naliliinerat narrujuummissutigigaluarlugulluunniit, allat isumaannik ataqqinnittariaqarpugut. Kristumiutut allat isiginnittaasiat asissortussaanngilarput, aamma kissaatiginngisaannassavarput oqaatsitsigut iliuutsitsigullu allat ajoqusernissaat. (Matthæusi 7:12; 1 Korinthimiut 8:12) Taamaattumik piffissap ilaatigut pisariaqarsinnaavoq allat eqqunngitsumik isumaqarnerat naqqissallugu. Ingasaassilluni allanut akueritikkusukkaanni kingunerluttitsisoqarsinnaavoq imminut ataqqineq annaaneqarsinnaagami imaluunniit piluarineqartutut misigisoqarsinnaalluni. Kinaassusivimmut allat isumaat aalajangiisuusussaanngilaq.

Aappaatigulli immaqa isornartorsiuineq pissutissaqarluartoq nassuerutigaarput. Aamma tamanna annernarsinnaavoq. Piumassuseqaraannili ilumoorlunilu naammalluinnanngitsuulluni miserratiginngikkaanni, misilittakkat tamaattut ajunngitsuusinnaapput kajumissaataallutillu pisariaqartunik allannguinissamut.

Kinguneri ajortut

Paatsooqatigiinnerup kinguneri ilungersunannginnerusinnaapput ilungersunarnerusinnaallutilluunniit. Assersuutigalugu neriniartarfimmi angut nalinginnaasumit nipitunerusumik oqaluttoq tusaraanni, immaqa ittuutuujuittuunerarneqassaaq imminulluunniit malugeqqusaartuunerarneqassalluni. Immaqali kukkuneruvoq. Imaassinnaavoq oqaluussaa, tusilartuusoq. Assersuut alla. Immaqa isumaqartoqarpoq pisiniartitsisoq nuanniilliortitsisartoq, imaassinnaavorli ajukujuinnartoq. Kukkusumik isumaqarfiginninnerit taamaattut inummik isigineqarnerlutsitsigaluartut, ilungersunartumik ataavartumilluunniit kinguneqartarunanngillat. Paatsooqatigiinnerilli ilaat allanngornersuaqartitsisinnaasarput. Israelitoqqap oqaluttuarisaanerani pisimasut marluk qimerlooriartigik.

Ammonikkut kunngiat Nahashi toqummat, Daavi nalunaariartortussanik aallartitsivoq erneranik Hanunimik tuppallersaasussanik, ataatani kingoraarlugu naalakkersuilersumut. Nalunaariartortulli takkunnerat kukkusumik akeqqatut Ammonikkunnut alapernaakkiartuinnarnertut isumaqarfigaat, tamatuma kingorna Hanunip nalunaariartortut nikanarsariarlugit Israelikkunnut sorsulerpoq. 47.000-init ikinngerunngitsut toqupput — tassa ajunngitsumik siunertaqarnerup paatsoorneqarnera pissutigiinnarlugu. — 1 Nalunaarsuutit 19:1-19.

Israelip oqaluttuarissanerani siusinnerusukkut allaanerulluinnartumik pisoqarpoq paatsooqatigiittoqaqqunagu sapinngisamik iliortoqarmat. Rubenip Gadillu nagguveqatigiivi Manassellu nagguveqatigiivisa affai Jordanip kuussuata killingani saqqumisumi pilliiviliormata. Israelikkut sinnerisa ilumuunngitsuliornertut, Jehovamut pikititsinertut, isigaat. Taamaattumik saassunniarlugit katersuupput. Israelikkut sualuttumik  iliuuseqartinnatik, nalunaariartortut marluk aallartippaat ilumuunngitsuliornerusorisartik iluarinngikkitsik takutinniarlugu. Tamanna silatusaartuliorneruvoq, pilliiviliortummi akipput pallorfiginninneq minguitsoq tununniarnagu. Akerlianik pilliivik Jehovamut aalajaannerannut nalunaajaataasussaavoq. Paatsuuineq tamanna toqoraannermik kinguneqangajappoq, silatusaarnerulli ajunaarnissaagaluaq pinngitsoortippaa. — Josva 22:10-34.

Pisimasoq asannittumik anersaaqarlusi aalajangiiffigisiuk

Pisimasut taakkua sanilliukkaanni ilinniarfissaalluarput. Nalunanngilaq apeqqutip paasiniarnissaa silatusaarnerusoq. Kia nalunngilaa pisimasumi kingullermi pineqartut taakkua marluk oqaloqaloqatigiinnerinnaasa qassit toqutaanngitsoortikkai? Inuup siunertavianik paasininnginneq, inuunermik naleqanngisaannangajappoq, ikinngutigiinnermilli akeqarsinnaalluni. Misigisimaguit ilaat ilinnut kukkusumik iliuuseqartut, qulakkerpiuk pisimasut qanoq ataqatigiinnivii paasillugit, paatsuuisorlu illiunngitsoq? Akerlerisavit suna pissutigaa? Pineqartoq aperiuk. Paatsoorneqartutut misigivit? Oqaloqatigiissutigisiuk. Pingaarniarneq akornutaateqinasiuk.

Paatsooqatigiinnerit aaqqinnissaannut Jiisusip pitsaasumik kajumissaarpaatigut: „Taamaattumik tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak, taavalu aatsaat kingorna tunissutissat pilliutigiartorlugu.“ (Matthæusi 5:23, 24) Pitsaanerpaassaaq isumaqatiginngisat kisimeeqatigigukku allat akuliutsinnagit. Iluaqutaanavianngilaq ilinnik ajuallatitsisimasup allaninngaanniit tusaqqaaruniuk. (Ussatit 17:9) Anguniagarisariaqarpat asannittumik eqqisseqatigiinnissaq. Eqqissisimalluinnartumik paasiuminartunik inussiarnersumillu oqalulluni ajornartorsiut eqqartuusserpalaanngitsumik saqqummiunneqassaaq. Nassuiaruk pisimasup misigissutsikkut qanoq sunnersimagaatit. Isumaqatiginngisat tusarnaaraangakku naapertuilluartuuniartarit. Ajortumik pissuteqarnerajaarpallaarniaqinagu. Qularnerit tassunga iluaqutaatiguk. Eqqaamajuk asannittoq ’tamatigut uppertarpoq’. — 1 Korinthimiut 13:7.

Paatsooqatigiinnerit aaqqereeraluarlugilluunniit misigissutikkut ikeqartoqarsinnaavoq ataavartumilluunniit ajoqutaasinnaallutik. Taava qanoq iliortoqarsinnaava? Isumassarsiatsialaavoq ilumoorluni utoqqatserfiginissaa pisimasullu naggasernissaanut ingasaassinngitsumik ilimagisaatut iliuuseqarluni. Pissutsini taamaattuni tamani eqqunngitsuliorfigineqartup isumassarsisitaanikkut unnersuussut manna malittariaqarpaa: „Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi. Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa.“ — Kolossemiut 3:13, 14; 1 Petrusi 4:8.

Naammalluinnanngitsuugallartilluta paatsooqatigiittoqartuarlunilu misigissutikkut ikilertittoqartuassaaq. Kikkut tamarmik kukkusoorsinnaapput kusananngitsumilluunniit inussiarninngitsumilluunnniillu oqartoorsinnaallutik. Biibilimi naatsumik torrammillu allassimavoq: „Tamatta amerlasuunik kukkussuteqartarpugut. Oqalunnermigut kukkussuteqartanngitsoq naammalluinnartuuvoq timiminillu tamarmiusumik naalatsitsisinnaasuulluni.“ (Jaaku 3:2) Tamanna Jehovap nalunngilluinnaramiuk unnersuussummik uuminnga tunivaatigut: „Kamaammernaveersaartarniarit sianiitsut kisimik kamaammiasuusarmata. Inuit oqaluuserisaat soqutiginiartarpallaartaqinagit inussiaativit perloqqugaatit tusaaratarsinnaagakku. Qamuuna nalunngilat nammineq qasseeriaqalutit inoqatitit perloqqusarakkit.“ — Oqaluussisartup oqaasii 7:9, 21, 22.

 „Jehovap uummatit misilittarpai“

Qanormi ilaasa isiginerluilersimanerat aaqqinneqarsinnaasorinanngippat? Tamanna nikalluutigisariaqanngilaq. Kristumiutut ileqqut ineriartortittuartariaqarput sapinngisamillu atortariaqarlutik. Siumukarnissamut pisariaqartumik ikioqqulluni Jehova qinnuigisariaqarpoq. Ilumoortumik oqaatigissagaanni inuttut kinaassusivipput allat nalilertussaanngilaat. Taamaallaat Jehovap ‘uummatit misilittarpai’. (Ussatit 21:2) Allaat Jiisusi nikagisaasimavoq, Jehovalli isiginnittaasianut ajoqutaanngilaq. (Esaja 53:3) Ilaasa kukkusumik nalilerpatsit, ‘uummammiugisatit tamaasa saqqummiussinnaavatit’ Jehovamut nalunagu paasissagaatit, ‘inuit pingaartitaat’ Guutip ‘pingaartittarinngimmagit. Inuimmi isiminnut saqqummisuinnaat isigisarpaat, [Jehovalli] inuup uummataa isigisarpaa’. (Tussiaat 62:9; 1 Samuel 16:7) Ajunngitsuliortuaannaruit, ilinnik ajortumik isumaqarfiginnittut, piffissap ingerlanerani paasilissavaat kukkusimallutik, isumartillu allanngortillugu. — Galatiamiut 6:9; 2 Timotheusi 2:15.

Antonio eqqaamaviuk, ilanngutassiap aallaqqaataani eqqaaneqartoq? Biibilimi unnersuussut malippaa ikinngunnilu Leonardo aperalugu arlaatigut ajuallatsissimanerlugu. Tamanna qanoq kinguneqarpa? Leonardo tupaallattorujussuuvoq. Akivaa Antonio susimanngitsoq, uppernarsaavigalugulu pisarnerminit allaanerusumik iliornissani siunertarisimanagu. Inussiarniissimaguni, eqqarsaatimigut allamut saaqqajaasimanera pissutaaginnarsimagunarpoq. Leonardo utoqqatserpoq ikinngunni ajuallatsissimagamiuk, Antoniolu qujaffigaa ajornartorsiut uparuarmagu. Nangippoq siunissami mianersorneruniarluni, allat taamatut misigeqqunagit. Tassangaannaq sukangassutaasut tamarmik peerulluinnarput, aatsaallu taama ikinngutigiilluartigilerlutik.

Paatsoorneqartutut misigaluni nuanninngisaannarpoq. Pisimasulli aaqqinniarlugit iliuuserisinnaasat tamaasa iliuuserigaanni Biibilimilu asanninneq isumakkeerfiginninnerlu pillugit najoqqutassiat atoraanni, qularnanngitsumik Antoniotut Leonardotullu ajunngitsumik angusaqartoqarsinnaavoq. (wE 1/4 01)

[Quppernerup ataani ilanngussaq]

[Qupp. 23-mi assiliartat]

Asannittumik anersaaqarluni aalajangiiffigigaanni ajunngitsumik kinguneqarsinnaavoq