Aappassarsiorninni Guutimut siunnersortigit

„Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ — TUSSIAAT 32:8.

1. Aappariilluassagaanni suut pisariaqarpat?

CIRKUSIMI eqaatsorujussuaq issakatsiaarfimminit pisilluni silaannarmi kusanaffaarimmik uleqattaarpoq. Timini narlortipallappaa, talini siumut isatsillugit eqaatsorujussuarmillu allamit illua’tungaani issakatsiaartumit tiguneqarluni. Sukuutsertut marluk sikumi sukuutersuataarput. Angutip sukuuteqatini kiveriataarpaa silaannarmullu miloriullugu. Arnaq kaavippoq, niumilu aappaanik kusanartumik tulluni, sukuuteqatinilu sukuuteqatigeqqilerlugu. Isiginnaartitsineri ajornanngippasipput. Kinali taakkunatut iliorsinnaanerpa sungiusarsimanani pikkorissumillu aappaqarnani, pingaarnerusumillu eqqortumik ilitsersorteqarnani? Aamma aappariinneq eqqarsaatigalugu taamaappoq. Aappariilluarneq ajornanngippasissinnaavoq. Iluatsissappalli aappariilluarneq assigiimmik anguniagaqarneq minnerunngitsumillu siunnersuutinut silatuunut tusarnaarneq pisariaqarput. Aap, eqqortumik siunnersorneqarnissaq pingaaruteqarnerpaavoq.

2. (a) Kia aappariinnermik aaqqissuussineq pilersippaa, sunalu siunertaraa? (b) Ilaat qanoq aappassarsiuussisarpat?

² Angut arnarluunniit inuusuttoq inooqatigissinnaasaminik aappassarsiorusuppat pissusissamisoorluinnarpoq. Jehova Guutip aappariinneq pilersimmaguli angutip arnallu inooqatigiittarnerat pissusissamisoorpoq. Angutilli siulliup Adamip nuliani nammineq toqqanngilaa. Jehovap tamanna isumagaa. (1 Mosesi 2:18-24) Aappariit siulliit kinguaassiortussaapput, nunarsuup tamarmi naggataatigut inoqalernissaata tungaanut. Katittut siulliit taakku kingorna uissap nuliassalluunniit angajoqqaavisa katittussat amerlanertigut isumagisarpaat — ilaatigulli aappariinngortussat akuersisinnaanersut paasiniaqqaartarpaat. (1 Mosesi 21:21; 24:2-4, 58; 38:6; Josva 15:16, 17) Nunalli kulturillu ilaanni aappassarsiuussisarneq suli nalinginnaagaluartoq, ullumikkut amerlasuut aappassartik namminneq toqqartarpaat.

3. Qanoq silatuumik aappassarsiortoqarsinnaava?

³ Qanoq silatuumik aappassarsiortoqarsinnaava? Ilaasa aappassap qallikkut isikkua kajungernartuuneralu eqqarsaatiginerusarpaat. Allat pigisanut tunngasut — aappassap pilersuilluarsinnaanera kissaatigisanillu pisariaqartitanillu matussutsisiisinnaanera — pingaartinneruaat. Tamakkuinnaalli aappariinnermik pilluarnartunngortitsisinnaallutillu nalerisimaarnartunngortitsisinnaapput. Ussatit 31:30-mi allassimavoq: „Takujuminassuseq peqquserlunneruvoq, pinnissuserlu piunngitsuuvoq; arnarli [Jehovamik] mianerinnittoq tassaavoq nersortarialik.“ Uani pingaartoq manna erseqqissarneqarpoq: Aappassarsioraanni Jehova eqqarsaatigineqartariaqarpoq.

Guutimit asannittumit siunnersuutit

4. Aappassarsiorniartut Guutip qanoq ikiortarpai?

⁴ Ataatatta qilammiusup asannittup pissutsini atukkatsinni tamani siunnersortissatsinnik oqaatsiminik allanneqarsimasumik tunivaatigut. Ima oqarpoq: „Uanga tassa [Naalagaq], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq.“ (Esaja  48:17) Taamaattumik tupinnanngilaq Biibilimi aappassarsiornermut misilittarneqarluarsimasunik najoqqutassiaqarmat. Jehovap kissaatigigamiuk aappariinneq ataavassallunilu pilluarnassasoq, najoqqutassiat tamakkua paasinissaannut maleruarnissaannullu ikiortarpaatigut. Tamannalu Pinngortitsisumit asannittumit ilimagissannginnerparput? — Tussiaat 19:9.

5. Aappariit pilluartuarnissaannut suna pingaaruteqarpa?

⁵ Jehovap aappariinneq pilersikkamiuk attaveqatigiinnerup maannaannaq kipineqannginnissaa siunertaraa. (Markusi 10:6-12; 1 Korinthimiut 7:10, 11) Aap, Jehovap ’avinneq uumigaa’ taamaallaallu avinnissaq kinguaassiuutitigut inuunerlunnermik peqquteqarpat akueralugu. (Malaki 2:13-16, NV; Matthæusi 19:9) Taamaattumik aappassarsiorneq inuunermi aalajangigassat ilungersunarnerpaat ilagaat asuleerutaasussaanngitsoq. Aalajangigassat allat ikittuinnaat taamatut pilluangaarnermik aliasungaarnermilluunniit kinguneqarsinnaapput. Silatuumik aappassarsioraanni inuunermut pisuunnguutaasinnaavoq, sianiilliorlunili toqqaagaanni killeqanngiusattumik ajornartorsiuterpassuaqartoqarsinnaavoq. (Ussatit 21:19; 26:21) Pilluartuarusukkaanni silatuumik aappassarsiorneq aappariinnermillu inuuneq naallugu atasussatut isiginninneq pingaaruteqarput. Guutip aappariinneq pilersippaa aaqqiagiittoqarpat ataasiussuseqartoqarpallu ingerlalluartussatut. — Matthæusi 19:6.

6. Sooq ingammik angutit arnallu inuusuttut aappassarsiornerminni mianersortariaqarpat, suullu iluaqutigalugit silatuumik toqqaasinnaappat?

⁶ Ingammik angutit arnallu inuusuttut aappassarsiornerminni mianersuutigisariaqarpaat siuneqassutsimik timikkut kajungerisanit misigissutsinillu sakkortuunit sanngiillisinneqannginnissaa. Aappariinneq tamakkuninngaannaq tungaveqartikkaanni erniinnaq narruginninnermik uumissuinermilluunniit kinguneqarsinnaavoq. (2 Samueli 13:15) Asanninnerli ataavartumik ineriartortinneqarsinnaavoq aappartik — imminullu — ilikkarunik. Aamma paasisariaqarparput uummatitta maannakkorpiaq kissaatigisai tamatigorluinnaanngitsoq uagutsinnut pitsaanerpaasartut. (Jeremia 17:9) Taamaattumik Guutip unnersuussinera Biibilimiittoq taama pingaaruteqartigaaq. Silatuumik aalajangernissatsinnut  iluaqutigisinnaavarput. Tussiaasiortoq aqqutigalugu Jehova oqarpoq: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ (Tussiaat 32:8; Hebræerit 4:12) Aappariinnerup pissusissamisoortumik asaneqarnissaq peqateqarnissarlu matussutississinnaavai, aammalu unamminiarnartoqartarmat inersimalluartariaqarpoq siunneqassuseqartariaqarlunilu.

7. Sooq ilaasa aappassarsiorneq pillugu Biibilip siunnersuutai akueriumanngilaat, tamannalu qanoq kinguneqarsinnaava?

⁷ Aappariinnerup Pilersitsisuata aappassarsiorneq pillugu oqaaserisaasa maleruarnissaat silatusaarnerussaaq. Taamaattorli ilaasa immaqa angajoqqaamik kristumiulluunniit utoqqaanertap Biibilimit siunnersuutaasa maleruarnissaat nangaassutigisarpaat. Immaqa isumaqarput pissutsit atukkatik inuit allat paaserpianngikkaat misigissutsiminnillu sakkortuunit aqqutsillutik. Kingusinnerusukkulli ulluinnarni tatineqaleramik ajornartorsiuleramillu immaqa peqqissimissutigaat silatuumik siunnersuineq iluaqutigisinnaasartik tusarumannginnamikku. (Ussatit 23:19; 28:26) Immaqa asanatik Jehovamut kiffartortuunngitsumik aappaqarput, meeraqarlutillu isumagiuminaatsitaminnik. Ajoraluaqaaq aappariinneq pilluartitsisussaagaluaq erloqinartorpassuarnut pissutaasarmat.

Guutimut tunniusimaneq pingaaruteqartut ilagaat

8. Suut aappariinneq ataavartuutillugulu pilluarnartuutissinnaavaat?

⁸ Miserratigineqarsinnaanngilaq kajungeqatigiinneq aappariinnermut nakussatsitseqataasartoq. Aappariinnerli ataavassallunilu pilluarnartuussappat pingaartitaqaqatigiinneq pingaaruteqarneruvoq. Aappariit tamarmik Jehova Guutimut tunniusimanerat ataqatigiititsisarpoq allanillu tamanit ataasiussuseqartitsinerusarluni. (Oqaluussisartup oqaasii 4:12) Aappariit kristumiut inuunerminni Jehovamik pallorfiginninneq ilumoortoq qitiutikkunikku anersaakkut, eqqarsartaatsikkut ileqqussatigullu  ataasiusseqassapput. Guutip oqaasia atuaqqissaaqatigiissutigigaangamikku, qinoqatigiikkaangamik, ataatsimiigiaqatigiikkaangamik oqaluusseqatigiikkaangamik, anersaakkut imminnut ataqatigiinnerujartortarput. Pingaarnerusumillu Jehovamit pilluaqquneqassapput.

9. Abrahamip Iisaaq nuliassarsiussagamiuk qanoq iliorpa, sumillu kinguneqarpa?

⁹ Guutimut tunniusimanini pissutigalugu ataataanerpaaq aalajaatsoq Abrahami Guutimut iluarisaajumavoq ernini Iisaaq nuliassarsiussagamiuk. Abrahamip kiffani tatigisani oqarfigaa: „[Jehova] qilaap nunallu Guutiat ilisimannittoralugu uppernarsaatissagakkit, ernera Kana’anikkut najugaqarfigisama arnartaannik nuliarsaatissanngikkit. Uangali nunannut eqqarlinnullu aallarlutit tassannga ernera Iisaaq nuliassarsiussavat. . . . [Jehovap] inngilini illit siunikkut aallartikkumaarpaa ernera tassannga nuliassarseqqullugu.“ Paasinarsivoq Rebekka nuliaalluartoq Iisaallu asangaaraa. — 1 Mosesi 24:3, 4, 7, 14-21, 67.

10. Biibili naapertorlugu uiusoq nuliaasorlu qanoq akisussaaffeqarpat?

¹⁰ Kristumiut katissimanngitsut Guutimut tunniusimaneq iluaqutigalugu pissusiminnik Biibilimi aappariinnut piumasaqaataasunik ineriartortitsisinnaapput. Apustili Paulusip uiusut nuliaasullu akisussaaffiisa ilaat eqqaavai: „Nuliaasusi uissinnut naalatsigitillusi soorlu Naalakkamut . . . Angutit, nuliasi asassavasi soorlu Kristusip ilagiit asagai imminullu tunniulluni taakku pillugit . . . Taamatut aamma uiusut nuliatik asassavaat namminneq timimittut. . . . Ilississaarli tamassi immikkut nuliasi immissisut asasussaavasi, nuliaasullu uini mianerisussaavaa.“ (Efesosimiut 5:22-33) Paulusip isumassarsisitaalluni allassimasaasa asanninnerup ataqqinninnerullu pingaaruteqassusiat erseqqissarpaat. Unnersuussineq tamanna maleruassagaanni Jehovamik ataqqinnittuusariaqarpoq aapparminullu atoruminartuni atoruminaatsunilu akisussaasutut misigisariaqarluni. Kristumiut aappassarsiortut taamatut akisussaaffeqarsinaasariaqarput.

Qaqugukkut katinissamut piareertoqartarpa?

11. (a) Qaqugu katinissamut piareeqqaneq eqqarsaatigalugu Biibilimi sunik siunnersuuteqarpa? (b) Assersuutip suup takutippaa Biibilimi 1 Korinthimiut 7:36-mi unnersuussutip maleruarnissaa silatusaarnerusoq?

¹¹ Qaqugukkut katinissamut piareertoqartarnerata nalunnginnissaa pingaaruteqarpoq. Assigiivinnik atugaqartoqanngisaannarpoq, taamaattumillu Biibilimi qassinik ukioqarluni katittoqarsinnaanera aalajangiiffigineqanngilaq. Guutilli oqaasiani takutinneqarpoq ’inuusuttuunerup aallaqqaataata’ kingornanut utaqqigaanni silatusaarnerussasoq, kinguaassiuutitigut misigissutsit sakkortunerusarmata siuneqassuserlu annikillisissinnaallugu. (1 Korinthimiut 7:36, NV) „Ikinngutikka, amerlasuut suli inuusuttuaraatillutik, peeraqalerlutillu katittut takusarakkit unnersuussut taanna maleruaruminartuaannanngilaq,“ Michelle oqarpoq. „Nalunngilarali Jehovameersuusut, oqaasiilu tamaasa iluaqutigigivut. Katinissara kinguartikkakku Jehovamut attaveqarnera aallunnerusinnaavara inuunermilu misilittagaqarnerusinnaallunga — inuusuttuaqqatummi misilittagaqannginnama. Ukiualuit tamatuma kingorna aappariinnermi ajornartorsiutaalersinnaasut aaqqinniarnissaannut akisussaaffeqarnissamullu piareeqqaneruvunga.“

12. Sooq inuusuppallaarluni katinnissaq silatusaarnerunngila?

¹² Inuusuttuunerminnili katittut misigigajuppaat inersimasunngoriartortillutik pisariaqartitatik kissaatigisatillu allanngortartut. Paasivaat siornatigut pingaartitamik ilaat taamatut pingaaruteqarunnaartut. Niviarsiaq kristumiu aalajangersimavoq 16-inik ukioqarluni katinniarluni. Aanaa anaanaalu tamarmik 16-inik ukioqarlutik katissimapput. Angutip inuusuttup nuannarisami katikkusunngimmani, alla katippaa. Kingusinnerusukkut katiaarpallaarnini peqqissimisutigingaarpaa.

13. Inuusuppallaarlutik katittut suut amigaatigigajuppaat?

¹³ Katinniaraanni inersimasunngorneq aappariinnerullu  qanoq nassataqarnerata paasinissaa pingaaruteqarput. Katiaarpallaaraanni imminnut aapparmullu nammineerluni aaqqissinnaanngisanik ajornartorsiuterpassuarnik atugaqartitsisoqarsinnaavoq. Aappariit immaqa aappariinnerup angajoqqaajunerullu unamminiarnartuisa iliuuseqarfiginissaannut misilittagaqaratillu inersimassuseqanngillat. Timikkut, eqqarsartaatsikkut anersaakkullu ataavartumik aappaqarnissamut piareeqqanngikkaanni katittariaqanngilaq.

14. Aappariittut ajornartorsiutinik aaqqiissagaanni suut pisariaqartinneqarpat?

¹⁴ Paulusi allappoq aappallit ’inuunerminni ajornartorsiorumaartut’. (1 Korinthimiut 7:28) Katittut inuttut assigiinngitsuugamik ilaannikkut assigiinngitsumik isiginnittaaseqartarlutik ajornartorsiunngitsoornavianngillat. Inuttunut naammalluinnanngissuseq pissutigalugu Biibili naapertorlugu akisussaaffiit aappariinnermut atasut naammassiuminaassinnaapput. (1 Korinthimiut 11:3; Kolossemiut 3:18, 19; Titusi 2:4, 5; 1 Petrusi 3:1, 2,7) Aappariittut ajornartorsiutit asannittumik aaqqinniarlugit Guutimut siunnersortinniaraanni siunnersuutaanillu maleruaaniaraanni inersimassuseqartariaqarpoq anersaakkullu aalajaassuseqartariaqarluni.

15. Angajoqqaat meeqqamik aappaninnissaannut piareersaanissaat qanoq pingaaruteqarpa? Assersuummik taasaqarit.

¹⁵ Angajoqqaat meeqqatik aappaqalernissaannut piareersarsinnaavaat Guutip siunnersuutaanik maleruaanerup pingaaruteqassusia erseqqissarlugu. Biibili kristumiullu atuagassiaat atorluarunikkik angajoqqaat meeqqatik ikiorsinnaavaat aappariittut akisussaaffeqalernissamut piareeqqanerlutik imminnut misissornissaannut. * Blossomip 18-inik ukioqarami ilagiinni angut inuusuttoq ajuutigilerpaa. Angut piffissaq tamaat oqaluussisartuuvoq, katikkusuppullu. Blossomilli angajoqqaavi isumaqaramik panitsik inuusuppallaartoq ukioq ataaseq utaqqeqquaat. Blossom kingusinnerusukkut allappoq: „Qujamasungaarpunga siunnersuut pitsaasoq tamanna malikkakku. Ukiup tamatuma ingerlanerani inersimasunngorneruvunga paasilerlugulu angut inuusuttoq taanna uiulluartumut piumasarineqartunik pissuseqanngitsoq. Naggataatigut Guutip peqatigiissortai qimappai, aliasungaarnissaralu pinngitsoortippara. Nuannerluinnarpoq angajoqqaat naliliineri tatigisinnaanerlugit!“

Taamaallaat „Naalakkami“ katigit

16. (a) Kristumiut qanoq misilinneqarsinnaappat taamaallaat „Naalakkami“ katinissamik siunnersuut Biibilimeersoq eqqarsaatigalugu? (b) Kristumiu Jehovamik kiffartuussinngitsumik katinnissaminut ussernartorsiuleraluaruni kia maligassiaa eqqarsaatigisinnaavaa?

¹⁶ Aappassarsioraanni Jehovap kristumiunut siunnersuutaa paasinartoq eqqaamaneqartariaqarpoq: Taamaallaat „Naalakkami“ katigit. (1 Korinthimiut 7:39) Apeqqummi tamatumani krisutmiut angajoqqaat meeraallu misilinneqarsinnaapput. Qanoq? Inuusuttut ilaasa katinnissartik erinigeqaat, kristumiulli ilagiissaanni aapparisinnaasaminnik nassaarsinnaagunarnatik. Immaqa sumiiffiit ilaanni qatanngutit angutit qatanngutinit arnanit ikinnerunerat pissutaavoq, immaqaluunniit tulluussorisaminnik nassaarsinnaasoqanngilaq. Angutip inuusuttup arnaq kristumiu inuusuttoq ilagiinnut ilaasortaanani kuisissimananilu soqutigilerpani  (imaluunniit arnaq angummut soqutiginnileruni), immaqa Jehovap najoqqutassiaasa sumiginnarnissaannut ussernartorsiorsinnaavoq. Pissutsit taamaappata Abrahamip maligassiaa eqqarsaatigissallugu pitsaassaaq. Abrahami Guutimut ajunngitsumik attaveqaannarpoq ilaatigut ernermi Iisaap Jehovamut ilumoortumik pallorfiginnittumik aappaqarnissaa isumagigamiuk. Aamma Iisaaq ernini Jaaku eqqarsaatigalugu taamaaliorpoq. Tamarmik iliuuseqartariaqarput, Guutimilli iluarisaapput pilluaqquneqarlutillu. — 1 Mosesi 28:1-4.

17. Sooq Naalakkamiunngitsoq katikkutta ajornartorsiungaassaagut, siunnersuutillu tamatuma malinnissaanut suna pissutaanerpaava?

¹⁷ Ilaannikkut aappaq uppinngitsoq piffissap ingerlanerani kristumiunngorpoq. Naalakkamiunngitsorli katikkaanni amerlanertigut ajornartorsiuterpassuarnut pissutaasarpoq. Aappariit najoqqutassiaqaqatigiinnatillu upperisaqaqatigiinnatik ’uniaqatigiittut’ anguniagaqatigiinngillat. (2 Korinthimiut 6:14) Tamanna attaveqatigiinnermut aappariittullu pilluarnermut ajoqutaasinnaavoq. Assersuutigalugu arnaq kristumiu oqaluttuarpoq aliasuutigingaarlugu ineriartornartumik ataatsimeeqataareerluni uini Jehovamut nalunaajaasuunngitsoq eqqartorneqartut pillugit oqaloqatigisinnaannginnamiuk. Pingaarnerpaavorli „Naalakkami“ katikkaanni Jehovamut ilumoornerluni. Guutip oqaasia naalakkutsigu ’uummatitta pillagassaatissanngilaatigut’ Guutip ’iluarisaanik ilioratta’. — 1 Johannesi 3:21, 22.

18. Aappassarsioraanni pingaartut suut eqqarsaatigineqartariaqarpat, aamma sooq?

¹⁸ Aappassarsiorniaraanni pingaarnerpaamik aappassap inuttut pissusii anersaakkullu qanoq innersoq eqqarsaatigineqartariaqarput. Kristumiup inuttut pissusii, Guutimut asanninnera uummammillu tamakkiisumik tunniusimanera pinnissutsimit naleqangaarnerupput. Aappariit akisussaaffigisaminnik sapinngisamik anersaakkut nukittuniarlutik naammassinninniartut Guutimit iluarineqartarput. Aappariillu tamarmik Pinngortitsisumut tunniusimappata taassumanngalu siulersortittuarpata aappariinnermut allamik taama patajaallinartigisoqanngilaq. Taamaalillutik Jehova ataqqissavaat, aappariinnerlu aallaqqaataaniit anersaakkut tunngavissaqarluassaaq atalluarnerussallunilu. (wE 15/5 01)

[Quppernerup ataani ilanngussaq]

Qanoq akissavigit?

• Aappassarsiorutta sooq Guutimit siulersortittariaqarpugut?

• Guutimut tunniusimaneq qanoq aappariinnermut iluaqutaasinnaava?

• Angajoqqaat meeqqatik qanoq aappariinnissamut piareersarsinnaavaat?

• Sooq taamaallaat „Naalakkami“ katinissaq pingaaruteqarpa?

[Atuaqqissaarnermi apeqqutit]

[Qupp. 17-mi assiliartat]

Aappassarsiorluni Guutip siunnersuutaa malikkaanni pilluangaartoqarsinnaavoq

[Qupp. 18-mi assiliartaq]

Taamaallaat „Naalakkami“ katikkaanni nuannaangaartoqartarpoq