Guutip naalagaaffianik oqaluussissutiginninnermit nutaarsiassat

Guutip aqqa kanngunarsagaajunnaartoq

GUUTIP oqaasiani Biibilimi oqaatigineqarpoq: „Guutimik nalusut akornanni ajunngitsumik inuugitsi, tamatumuunarpiaq taakkua ilissinnik pinerluttuuneraallutik mamarliisartut takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.“ (1 Petrusi 2:12) Kristumiut ilumoortut kissaatiginngilaat Jehovap aqqata kanngunarsagaanissaa. Taamaattumik ileqqorissaartuunertik attatiinnarusuppaat.

Zambiap ilaani ungasissumiittumi Senangamik taaguutilimmi ilinniartitsisup angerlarsimaffiani radio tillinneqarsimavoq. Jehovap Nalunaajaasui tamaani oqaluussisimammata, tillittutut pisuutippai. Pisimasorlu politiinut nalunaarutigaa nalunaajaasullu unnerluutigalugit. Nalunaajaasut angerlarsimaffianiissimanerannut naqitaaraq natermi nassaarisimasani uppernarsaatigaa. Politiilli upperivallaanngilaat siunnersorluguli angerlarluni misissuilluarneroqqullugu.

Ilagiinni utoqqaanertat ulloq taanna tamatuma eqqaani angalaarsimasut kajumissaarpaat pisoq pillugu ilinniartitsisumut saaffiginneqqullugit. Qatanngutit angutit ilaat taamaaliorput nassuiaallugulu Jehovap aqqata pisimasumit kanngunarsagaajunnaarnissaa kissaatigigitsik. Oqaloqatigiitillutik eqqaavaat angut inuusuttoq naapissimallugu naqitaaqqamillu tunnisimallugu. Nassuiaaneratigut kinaanera ilinniartitsisup ilisarisinnaavaa. Angutaasimassaaq inuusuttoq ilinniartsitsisup nammineq oqaluffianeersoq. Ilinniartitsisup angut oqaloqatigaa, radiomilli tillissimanini miserratigaa. Taava ilinniartitsisup angutip angajoqqaavi pisimasumik oqaloqatigai angerlarlunilu. Akunneq ataaseq qaangiutinngitsoq, angutip arnaa takkuppoq radio tillitaq nassarlugu.

Ilinniartitsisoq eqqunngitsumik pasilliisimanini pillugu ilerasulerpoq, utoqqaanertanut saaffiginnippoq utoqqatsissutini tigoqqullugu. Taamaaliorput, piumaffigaalli pisimasup ataqatigiinnera eqqortoq tamanut nalunaarutigeqqullugu paasiniassammassuk Jehovap Nalunaajaasui pinngitsuusut. Atuarfimmi nalunaarutigineqarpoq Jehovallu aqqa kanngunarsagaajunnaarpoq. Jehovap Nalunaajaasuisa oqaluussinertik akornuteqaratik tamaani nangeqqissinnaalerpaat. (wE 1/5 01)

[Nunap assinga/assiliartaq]

(Allassimasut qanoq inissisimanersut naqitami takuneqarsinnaavoq)

AFRIKA

Zambia

[Suminngaanneernera]

Mountain High Maps® Copyright © 1997 Digital Wisdom, Inc.