Ilaqutariit anersaakkut nukittuut ineriartortikkit
Ilaqutariit anersaakkut nukittuut ineriartortikkit
’Perorsarsigit anusinngorsartarlugit oqaaqqissaartarlugillu Jehovamit pisumik.’ — EFESOSIMIUT 6:4.
1. Guutip ilaqutariinnik aaqqissuussaaneq qanoq siunertaqarfigaa, akerlianilli qanoq pisoqarpa?
„KINGUAASSIORLUSI amerliartoritsi nunarsuaq tamakkerlugu.“ (1 Mosesi 1:28) Taama oqaaseqarluni Jehova Guuti ilaqutariinnik aaqqissuussaaneq pilersippaa. (Efesosimiut 3:14, 15) Adamip Evallu siunissaq eqqarsaatigigaangamikku nunarsuaq kinguaassaminnik ulikkaartoq — ilaqutariissuit naammalluinnartut paratiisimi pilluarlutik inooqatigiittut, Pinngortitsisumik pallorfiginninnermi ataasiussuseqarlutik — takorloorsinnaagaluarpaat. Adamili Evalu ajortuliorput, taamaattuminguna nunarsuaq inunnik naapertuilluartunik Guutimillu mianerinnittunik ulikkaarsimanngitsoq. (Romamiut 5:12) Ilaqutariittut inuuneq ajorsiartuppallappoq. Taamanerniilli inuiaat uumissuinermik, nakuusernermik asanniuitsuunermillu erloqissuteqalersimapput, pissutsillu tamakku ’ulluni kingullerni’ makkunani ajorsiartuinnarsimapput. — 2 Timotheusi 3:1-5; 1 Mosesi 4:8, 23; 6:5, 11, 12.
2. Adamip kinguaavi sunik piginnaaneqarpat, ilaqutariilli anersaakkut nukittuut ineriartortinneqassappata suna pisariaqarpa?
2 Adami Evalu Guuti assilillugu pinngortitaapput. Adami ajortulioraluartoq Jehovap meeqqiornissaa akueraa. (1 Mosesi 1:27; 5:1-4) Adamip meerai ataatamissut ileqqussatigut sianissuseqarput, ajortullu ajunngitsullu immikkoortinnissaat ilinniarsinnaallugu. Pinngortitsisup qanoq pallorfigineqarnissaanik siunnersorneqarsinnaapput, ilikkarsinnaallugulu taassuma uummatikkut, tarnikkut isumakkullu iluunngarluni nukinilu tamakkerlugit asanissaa qanoq pingaaruteqartigisoq. (Markusi 12:30; Johannesi 4:24; Jaaku 1:27) Ilinniarsinnaavaattaaq ’iluartumik iliornissaq, ilumoortumik asanninneq anneruniajuillunilu Guutip inooqatiginissaa’. (Mika 6:8) Ilaqutariilli anersaakkut nukittuut ineriartortinniarlugit ajortilittut immikkut iliuuseqartoqartariaqarpoq.
Piffissaqqissorsiortariaqarpugut
3. Angajoqqaat meeqqaminnik sallusuissummi perorsaanissaminnut ’piffissaqqissorsiorsinnaappat’?
3 Ulluni makkunani ajornartorsiorfiusuni meeqqatta ’Jehovamik asanninnissaannut’ ’ajortullu uumiginissaannut’ ikiorniarlugit iliuuseqangaartariaqarpugut. (Tussiaat 97:10) Angajoqqaat silatuut suliassap ajornakusoortup tamatuma naammassinissaanut piffissaqqissorsiortariaqarput’. (Efesosimiut 5:15-17) Qanoq tamaaliorsinnaappat? Siullermik pingaarnersiuisariaqarput ’suut pingaartittariaqartut’, soorlu meeqqaminnik ajoqersuineq ilinniartitsinerlu, eqqumaffigalugit. (Filippimiut 1:10, 11) Aappassaatut inuunertik pisariillisartariaqarpaat. Immaqa suliniutit pingaaruteqarpallaanngitsut imaluunniit pigisat pisariaqanngitsut aserfallatsaalineqartariaqartullu taamaatittariaqarpaat. Angajoqqaat kristumiut meeqqaminnik Guutimik mianerinninnermik ilinniartitsillutik iliuuseqarsimanertik peqqissimissutiginngisaannassavaat. — Ussatit 29:15, 17.
4. Ilaqutariit qanoq ataasiussuseqaannarsinnaappat?
4 Angajoqqaat meeqqaminnik ataatsimooqateqarnertik — ingammillu anersaakkut ittunut atortarunikku — ilungersuanerit tamarmik asuliinnarnavianngillat, tassaavorlu ilaqutariit ataasiussuseqartuarnissaannut iliuuserisat pitsaanerpaartaasa ilaat. Nalaatsornerinnakkuusariaqanngilarli. Ilaqutariit aalajangersimasumik ataatsimoorfeqartikkit. Imatulli paasisariaqanngilaq tamarmik angerlarsimaffimminniiginnassasut namminnerlu soqutigisaminnik sammisaqassallutik. Meeqqat ajunnginnerusarput ullut tamaasa angajoqqaaminnit inuttut soqutigineqaraangamik. Asaneqangaartariaqarlutillu isumassorneqartariaqarput. Aappariit akisussaaffik pingaartoq tamanna eqqarsaatigeqqissaartariaqarpaat meeqqiornissartik aalajangertinnagu. (Lukasi 14:28) Taava meeqqaminnik perorsaanissartik immikkut pisinnaatitaaffittut isigissavaat pisussaaffittut nuanniitsutut isiginagu. — 1 Mosesi 33:5; Tussiaat 127:3.
Oqaatsikkut maligassiuinikkullu ajoqersuigit
5. (a) Meeqqatik Jehovap asanissaanik ilinniartissinnaassagunikkik suna pisariaqarpa? (b) 5 Mosesi 6:5-7-imi angajoqqaat qanoq siunnersorneqarpat?
5 Angajoqqaat aatsaat namminneq Jehova asagunikku meeqqatik taassumunnga asanninnissaannut ilinniartissinnaavaat. Angajoqqaat Guutimut asannissuseqarunik aalajaallutik peqqussutai tamaasa maleruassavaat. Tamatumunnga ilaavoq qitornanik perorsaaneq oqaaqqissaarinerlu ’Jehovamit pisumik’. (Efesosimiut 6:4) Guutip angajoqqaat siunnersorpai meeqqaminnut maligassaalluaqqullugit, attaveqarfigalugit ajoqersorlugillu. 5 Mosesi 6:5-7-mi allassimavoq: „[Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit. Oqaatsit taakku peqqussutillu ullumi ilinnut tunniussakka aalajangiutissavatit. Erninnut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Eqqaasikulallugit uteqqeeqatigikulallugillu angajoqqaat meeqqaminnut Guutip inatsisai ’nangeqqittuarsinnaavaat’. Taamaalillutik meeqqat paasissavaat angajoqqaat Jehova asagaat namminnerlu taassumunnga attaveqarlualernissaminnut kajumississutigissallugu. — Ussatit 20:7.
6. Angajoqqaat meeqqaminnik ilinniartitsinerminni maligassiuinermik sunniuteqarsinnaanera qanoq atorluarsinnaavaat?
6 Meeqqat ilinniarusussuseqartorujussuusarput. Tusarnaartarput alapernaatsuullutillu angajoqqaamillu maligassiaat ilaarasuartarlugit. Angajoqqaatik takusinnaagaangamikkik pigisalerituujunngitsut ilikkartarpaat Jiisusip siunnersuutai qanoq maleruarsinnaanerlugit. Ilikkartarpaat nunap pii isumakuluutigissanagit ’Guutilli naalagaaffia iluarneralu ujaqqaartussaallugit’. (Matthæusi 6:25-33) Angajoqqaat sallusuissut, Guutip ilagiissai utoqqaanertallu toqqakkat ajunngitsumik oqaluuserisarunikkit, meeqqatik Jehovamut ataqqinninnissaannik anersaakkullu pilersitaanik pingaartitsinissaannik ilinniartittarpaat. Angajoqqaat iliuusii isiginnittaasialu ajoqersuinerannut naapertuuttariaqarput. Meeqqat erniinnaq malugissavaat angajoqqaamik isumaat allanngorartuuppaat. Angajoqqaat meeqqamik anersaakkut ittunik pingaartitsinissaat kissaatigigamikku soorunami aamma namminneq taamaattariaqarput. Angajoqqaat nuannaarutiginngaassavaat takugunikku maligassiuilluarnertik meeqqamik Jehovamut qamannga pisumik asanninnissaminnut iluaqutigigaat. — Ussatit 23:24, 25.
7, 8. Assersuutip suup takutippaa meeqqat mikisuaraaneranniilli ajoqersorneqarnerat iluaqutaasorujussuusoq, angusaqarluarnerlu kia nersorneqaatigisinnaavaa?
7 Mikineriniilli meeqqanik ajoqersuinerup pingaaruteqassusia assersuussiamit Venezuelameersumit takuneqarsinnaavoq. (2 Timotheusi 3:15) Félix Mayerlinilu, aappariit inuusuttut pioneriusut, Felito ernertaarigamikku, aalajangersimapput sapinngisaminnik iliorniarlutik ernertik Jehovamut ilumoortumik pallorfiginnilernissaanut ikiorniarlugu. Mayerlinip Felito Biibilimit Oqaluttuaatikka-mit, Jehovap Nalunaajaasuisa naqitigaanit, atuffattalerpaa. Felitop mikisuaraallunili Mosesi inuillu allat atuakkami eqqartorneqartut ilisarisinnaagunarpai.
8 Felitop mikillunili allat oqaluussiffigisalereerpai. Tallimaannarnik ukioqarlunili aalajangersimasumik oqaluusseqataasarpoq. Kingusinnerusukkut kuisippoq, qulingiluanillu ukioqarami pionerinngorpoq. Angajoqqaavi oqarput: „Ernitta siumukarneri takugaangatsigit paasisarparput tamakku tamarmik Jehovap taassumalu siunnersuineranik pissuteqartut.“
Meeqqatit anersaakkut ineriartornissaannut ikiukkit
9. Sooq qujamasuutigisariaqarparput kiffaqatigiit ilumoorlutillu silatuut aqqutigalugit anersaakkut siunnersorneqartaratta?
9 Atuagassiaqarpoq assigiinngitsorpassuarnik, atuagaqarpoq hundredelikkuutaanik tusindilikkuutaanillu Internettimi qupperneqarluni meeqqat qanoq perorsarneqarsinnaanerat pillugu siunnersuuteqartunik. Arlalippassuartigulli „paasissutissat imminnut akerliusarput,“ atuagassiap Newsweek-ip meeqqat pillugit immikkut normuani allassimavoq. Imalu nangippoq: „Isumakulunnarnerusarpoq paasissutissat tatiginarsorinartut eqqunngivissuusut paasinarsigaangat.“ Qujamasuutigisinnaavarput Jehovap ilaqutariit anersaakkut ineriartornissaannut pisariaqartunik tamanik siunnersortarmatigut. Kiffaqatigiit ilumoorlutillu silatuut aqqutigalugit pilersitai tamaasa iluaqutigisarpigit? — Matthæusi 24:45-47.
10. Ilaqutariittut atuaqqissaarneq pitsaappat angajoqqaat meeqqallu tamarmik qanoq iluaqutigisinnaavaat?
10 Aamma ilaqutariit pilersaarusiukkamik qasukkarsimanartumillu Biibilimik atuaqqissaaqatigiittarnerat pingaaruteqangaarpoq. Atuaqqissaaqatigiinneq ilikkarnartuussappat, soqutiginartuussappat kajumissinartuussapallu, angajoqqaat piareersarluarsimasariaqarput. Angajoqqaat meeqqatik ammasumik oqalussinnaatikkunikkit eqqarsaataasa misigissusiisalu paasinissaannut periarfissaqarput. Ilaqutariittut atuaqqissaarnerup pitsaassusia ilaatigut nalilerneqarsinnaavoq ilaqutariit tamarmik qilanaarisarneraat maluginiarlugu.
11. (a) Angajoqqaat meeqqatik sunik anguniaqartinniarsinnaavaat? (b) Niviarsiaqqap Japanimiup anguniakkaminik iliuuseqarfiginninnera qanoq kinguneqarpa?
11 Aamma ilaqutariinnut anersaakkut nukittutitseqataasoq tassaavoq angajoqqaat meeqqamminnik anersaakkut anguniagaqalernissaannut ikiuinerat. Meeqqat Biibilimi ullut tamaasa atuartarnissaq, nutaarsiassamik nuannersumik aalajangersimasumik oqaluussisarnissaq aamma tunniulluinnarnissamut kuisinnissamullu siumukarnissaq anguniartariaqarpaat. Aamma pionerinngornissaq, Betelimi kiffartornissaq ajoqersuiartortitanngornissarluunniit anguniarsarisinnaavaat. Niviarsiaraq Japanimiu Ayumi atualerami aalajangerpoq atuaqatini klassiminiittut tamaasa oqaluussiffiginiarlugit. Ilinniartitsoq atuaqatinilu soqutiginnilersinniarlugit Biibililersaarutit atuakkat ilaannik atuagaateqarfimmut ilisinissaminut qinnuteqarpoq. Ukiut arfinillit meeqqat atuarfianiinnermini Ayumi 13-inik Biibilimik atuaqqissaaqateqarpoq. Atuaqqissaaqataasa ilaat ataaseq taassumalu ilaqutaasa ilaat kristumiunngorput kuisimasut.
12. Meeqqat qanoq kristumiut ataatsimiinneri pissarsiffiginerususinnaavaat?
12 Anersaakkut nukittussagutta ataatsimiinnerit tamaasa najuuffigisariaqarpavut. Apustili Paulusip uppeqatini kajumissaarpai ’ilagiittut katisimasarnitik tamatigut peqataanngitsoorfigeqqunagit, soorlu ilaat taama ileqqoqartut’. Kristumiut ataatsimiinneri inuusuttunut utoqqaanullu iluaqutaangaartarmata, najuutinngitsoortarneq ileqquliutinngisaannartariaqarparput. (Hebræerit 10:24, 25; 5 Mosesi 31:12) Meeqqat malinnaaqqissaarnissartik ilinniartariaqarpaat. Piareersarsimanissaat aamma pingaaruteqarpoq ataatsimiinnerit pissarsiffiginerussagamikkit nammineq akeqataallutik. Assersuutigalugu meeqqat akeqataasalersinnaapput naatsunnguamik oqaaseqarlutik akissutaaluunniit immikkoortumi atuarlugu, akissutissaatalu namminneq naninissaa namminerlu oqaatsini atorlugit akinissaa ilinniartariaqarpaat. Ilissi angajoqqaat maligassaalluarpisi ataatsimiinnerni imaqarluartunik akisarlusi? Iluaqutaassaaq ilaqutariit tamarmik Biibilimik, erinarsuutinik atuaqqissaaqatigiissutissanillu namminneq peqarpata.
13, 14. (a) Sooq angajoqqaat meeqqatik oqaluusseqatigisariaqarpaat? (b) Angajoqqaat meeqqatik qanoq oqaluusserusussuseqartilersinnaavaat siunertaqarluartumillu suliniuteqartilersinnaallugit?
13 Angajoqqaat asannittut meeqqatik ikiorniarpaat nukitik uummaarinnertillu Jehovamut kiffartornermi atoqqullugit oqaluussinerlu inuuneranni pingaartunut ilaaleqqullugu. (Hebræerit 13:15) Angajoqqaat meeqqatik oqaluusseqatigisarunikkit pisariaqartumik ilinniartillugit, ’kanngusuutissaqanngitsutut oqaatsimik sallusuissutaasumik nassuiaasutut’ oqaluussisartunngornissaat aatsaat qulakkeersinnaavaat. (2 Timotheusi 2:15) Angajoqqaat meeqqatik ikiortariaqarpaat oqaluussinissamut piareersarnissaannut. Taava meeqqat oqaluusserusussuseqalissapput siunertaqarluartumillu suliniuteqarlualissallutik.
14 Sooq angajoqqaat meeqqaminnik oqaluusseqatiginnittarnerat iluaqutaava? Taamaalillutik meeqqat angajoqqaamik maligassiuilluarnerat takusinnaagamikku ilaarsinnaallugulu. Angajoqqaallu meeqqat isiginnittaasiat pissusilersornerallu maluginiaatigisinnaavaat oqaluussinermilu qanoq ingerlanerat takusinnaallugu. Meeqqat kiffartuusseriaatsinut assigiinngitsunut peqataatikkit. Namminneq pooqattaqarunik kusanartuutinnissaa torersuutinnissaalu isumagisinnaappassuk pitsaassaaq. Angajoqqaat aalajangersimasumik siunnersuisarlutillu kajumissaarisarunik meeqqat oqaluussinermik pingaartitsinerat nakussatsissinnaavaat. Taava meeqqat kiffartorneq Jehovamut tullerminnullu asanninnermik ersersinnissaannut periarfissatut isigissavaat. — Matthæusi 22.37-39; 28:19-20.
Anersaakkut peqqissuujuarit
15. Ilaqutariit anersaakkut peqqissuunerata illersornissaa sooq taama pingaaruteqartigaa, qanorlu taamaaliortoqarsinnaava?
15 Ilaqutariit anersaakkut peqqissuujuarnissaat pingaartorujussuuvoq. (Tussiaat 119:93) Qanoq taamaassinnaappat? Ilaatigut taamaassinnaapput periarfissat tamaasa anersaakkut ittunik oqaloqatigiissuteqartarlutik. Ullut tamaasa meeqqatit ullormut allassimaffimmik oqaloqatigisarpigit? „Angalaartaraangavit“ oqaluussinermit misigisat imaluunniit Napasuliaq Alapernaarsuiffik-mi Iteritsi!-miluunniit allaaserisat oqaluttuarinerat ilinnut pissusissamisoorpa? „Innartaraangavit makittaraangavillu“ eqqaamasarpiuk Jehova inuunermut tunissutaanullu ajunngitsorpassuarnut qutsavigissallugu? (5 Mosesi 6:6-9) Meeqqavit iliuutsinni tamani Guutimut asanninnerit takugaangamikku sallusuissummut namminneq aalajangiussinissaminnut ikiorneqassapput.
16. Biibilimut tunngasunik meeqqat namminneq misissuinissaannut kajumissaarineq qanoq iluaqutaasinnaava?
16 Meeqqat ajornartorsiutimik misigisamillu iliuuseqarfiginissaannut siunnersorneqarnissartik atorfissaqartikkajuppaat. Qanoq iliornissaannik oqaluttuutiinnarnagit soormi takutikkutsigit nammineq qanoq apeqqutinik misissuisinnaasut Guutip isiginnittaasia paasiniarlugu? Meeqqat atortussat atuagassiallu ’inussiaq aalajaatsoq’ aqqutigalugu pisartakkatta atornissaat ilinniarunikku, Jehovamut qanittumik attaveqarnissaminnut iluaqutigissavaat. (1 Samueli 2:21b) Namminneq atuaqqissaarnerminni ilikkakkatik ilaquttaminni oqaloqatigiissutigigaangamikkit ilaqutariit anersaakkut peqqissuunissaannut aamma tapersersuutaasarpoq.
Jehova tatigilluinnaruk
17. Sooq angajoqqaat kisimiittut meeqqamik kristumiutut perorsarneranni nikallortariaqanngillat?
17 Kisimiillutimmi meeqqanik perorsaasut? Taakku immikkut ilungersortariaqarput. Nikallortariaqanngillalli. Iluatsitsissinnaanerinut takussutissaavoq, kisimiillutik pilersuisut amerlasuut Guuti tatigalugu naalallutik taassuma siunnersuutaanut malinninnerat meeqqamillu anersaakkut nukittunissaannik ikiuinerat. (Ussatit 22:6) Kristumiut kisimiillutik pilersuisut soorunami Jehova tatigilluinnartariaqarpaat ikiuinissaa tunaaralugu. — Tussiaat 121:1-3.
18. Meeqqat eqqarsartaatsikkut timikkullu pisariaqartitaat suut angajoqqaat eqqumaffigisariaqarpaat, sunali pingaartinneqarnerpaasariaqarpa?
18 Angajoqqaajulluartut nalunngilaat ’illarfissaqarlunilu qittaserfissaqartoq’. (Oqaluussisartup oqaasii 3:1, 4) Qasuersaarneq peqqinnartumillu aliikkusersorneq meqqat eqqarsartaatsikkut timikkullu ineriartornissaannut pingaaruteqarput. Nipilersukkat ineriartornartut tusarnaartarnerat ingammillu Naalagaaffiup erinarsuutaasa erinarsortarnerat iluaqutigalugit meeqqat Jehovamut attaveqarnertik nakussatsissinnaavaat. (Kolossemiut 3:16) Inuusuttuunerminni piareersartariaqarput inersimasutut Guutimik mianerinnittunngornissaminnut, inuuneq Paratiisimi naassaanngitsumut nuannaarutigiinnarsinnaaniassagamikku. — Galatiamiut 6:8.
19. Sooq angajoqqaat tatigisinnaavaat Jehovap ilaqutariit anersaakkut nukittuut ineriartortinnissaannut ilungersornitik pilluaqqussagai?
19 Jehovap kissaatigaa ilaqutariit kristumiut tamarmik anersaakkut nukittussasut ataasiussuseqartuassasullu. Guuti asagutsigu sapinngisatsinnillu oqaasia maleruartarlugu, suliniutivut pilluaqqussavai siunnersuutimilu piviusunngortinnissaannut nukissaqartissalluta. (Esaja 48:17; Filippimiut 4:13) Eqqaamajuk massakkutut meeqqavit ilinniartinnissaannut ajoqersornissaannullu periarfissaqaqqinnavianngitsutit. Taamaattumik sapinngisannik iliuuseqarit Guutip oqaasiani siunnersuutit maleruarniarlugit, Jehovallu ilaqutariit anersaakkut nukittuut ineriartortinnissaannut ilungersornitit pilluaqqussavai. (wE 15/5 01)
Suut ilikkarpavut?
• Angajoqqaat meeqqamik sallusuissummi perorsarneqartarnerannut piffissaqqissorsiornissaat sooq taama pingaaruteqartigaa?
• Sooq angajoqqaat meeqqaminnut maligassaalluartarpat?
• Meeqqavut anersaakkut ineriartornissaannut qanoq ikiorsinnaavavut?
• Ilaqutariit anersaakkut qanoq peqqissuujuarsinnaappat?
[Atuaqqissaarnermi apeqqutit]
[Qupp. 24-mi assiliartat]
Ilaqutariit anersaakkut nukittuut aalajangersimasumik Guutip oqaasia atuartarpaat, kristumiut ataatsimiinneri najuuffigisarlugit oqaluusseqatigiittarlutillu