’Ilisimassutsip amerlasuunik ulloqalersissavaatigut’

KIA miserratigissavaa inuunermi ajornartorsiutinik aaqqiiniarluni ilisimassuseqartoqartariaqarnera? Ilisimassuseq ilumoortoq tassaavoq ilisarsinermik paasinninnermillu eqqortumik atuisinnaaneq. Taassuma akerlii tassaapput sianiissuseq, silaassuseq silanngajaanerlu. Taamaattumik Biibilimi kajumissaarneqarpugut ilisimassuseqalerniaqqulluta. (Ussatit 4:7) Ussatit Biibilimi allanneqarnerisa pingaarnertut siunertaraa ilisimassuseqalersitsinissaq oqaaqqissaarinissarlu. Ussatit ima aallartipput: „Salomop Daavip ernerata Israelip kunngiata ussatiliai. Paasinnitsissavaat ilisimassusermik ajoqersuussutinillu.“ — Ussatit 1:1, 2.

Atuakkap taassuma kapitaliini siullerni ajoqersuut peqqinnartoq tatiginartorlu sammeriartigu. Ataatatut asannittutut ernerminut kajumissaarisutut Salomop atuartut perorsaanermik ilassinneqqullugit ilisimassummullu tusarnaaqqissaaqqullugit ilungersorluni kajumissaarpai. (Kapitali 1 aamma 2) Jehovamut qanittumik attaveqarnerup qanoq ineriartortinneqarsinnaanera uummaterpullu qanoq paarisinnaaneripput takutippaa. (Kapitali 3 aamma 4) Ileqqussatigut minguitsuujuaqqulluta Salomop oqaaqqissaarpaatigut. (Kapitali 5 aamma 6) Inuup ileqqorluttup periaasianik qulaarineq uagutsinnut pingaaruteqangaarpoq. (Kapitali 7) Ilisimassutsip kinaassusilikkap ilungersorluni kajumissaarinera tamatsinnut kajumissinarpoq. (Kapitali 8) Kunngi Salomop kapitalini tulliuttuni ussatit immikkut ittut eqqartortinnagit allaatigeriikkani kajumissinartumik uteqqiiffigai. — Kapitali 9.

’Nerisassiannik neriartorit viinnimillu akuukkannik imeriartorlutit’

Ussatit immikkoortuanik siullermik oqaaseqarfiginninneq siunnersuutigeriikkanik qasunartumik uteqqiinerinnaanngilaq. Naagga, pissanganartumik tiguartinnartumillu assersuutitut saqqummiunneqarpoq atuartumut ilisimassuseqalerusutsitsisumik.

Ussatit kapitaliisa qulingiluaat ima aallartippoq: „Ilisimassuseq imminut illuliuuppoq sukarsualiuullunilu arfineq-marlunnik.“ (Ussatit 9:1) Oqaatsit ’sukarsuit arfineq-marluk’ misissueqqissaartartoq naapertorlugu tassaapput „illussaarsuup ungalusatut iloqqasutut sanaap, sanerai sammiveqatigiit marluk pingasunik sukarsuaqartup, saneraasali pingajuat isaariaasoq, qeqqani ataatsimik sukarsuaqartup ilisarnaatai“. Qanorluunniit ikkaluarpat ilisimassuseq qajannaatsumik illuliorsimavoq pulaartorpassuaqarsinnaasumik.

Illumi suut tamarmik nalliuttorsiornissamut piareeqqapput. Neqeqarpoq viinneqarlunilu. Ilisimassutsip nerisassiorneq nerriviliornerlu nammineerluni akuliuffigisimavai. „Nersutaatinik toqutsivoq, viinniutiminik akoorilluni nerisassanillu piareersaalluni.“ (Ussatit 9:2) Nerrivimmi assersuutaasumi tassani anersaakkut qaammarsaataasunik eqqarsarnartunik nerisassaqangaartoq erseqqippoq. — Esaja 55:1, 2.

Nalliuttorsiornermut ilisimassutsip ilumoortup piareersagaanut kina qaaqqusaava? „Kiffani arnat aallartippai illoqarfiullu portunersartaani ima torlulatillugit: ’Misilittagakitsoq maanga sanguli!’ Sianiitsumullu ima oqarpoq: ’Nerisassiannik neriartorniarit viinnimillu akuukkannik imeriartorlutit!’ Misilittagaqanngitsuunersi  iperarniarsiuk, taava inuuginnassaasi; silassorissutsip aqqutaani ingerlaniaritsi.“ — Ussatit 9:3-6.

Ilisimassutsip kiffani arnat nalliuttorsiornissamut qaaqqusiartortippai. Niueriartortarfimmukarput amerlanerpaat tusarfigisinnaasaannut. Kikkut tamarmik — ’sianiitsut’, paasisimasakitsut misilittagakitsullu — qaaqquneqarput. (Ussatit 9:4) Inuunermik neriuutissinneqarput. Guutip oqaasiani ilisimassuseq, aamma Ussatiniittoq, inunnit tamangajannit pissarsiarineqarsinnaavoq. Ilisimassutsip ilumoortup aallartitaattut Jehovap Nalunaajaasuisa silarsuarmi inuit sumi tamaaniittut Biibilimik atuaqqissaaqqullugit kajumissaarpaat. Ilisarsinermik Biibilimiittumik ilassinninneq naassaanngitsumik inuussutaasinnaavoq. — Johannesi 17:3.

Kristumiut maniguullutik ilisimassutsip perorsaanera ilassisariaqarpaat. Ingammik inuusuttut Jehovamillu ilinnialerlaat taamaattariaqarput. Jehovap aqqutigeqqusaanik ilisimasatik killeqarmata immaqa ’sianiitsuupput’. Imaanngilaq pissutigisaat tamarmik ajortuusut, Jehovamulli iluarisaasumik uummateqalerniarneq sivisusarlunilu ilungersunartarpoq. Eqqarsaatit, kissaatit anguniakkallu Guutip iluarisaanut naapertuuttunngortittariaqarput. ’Inoorlaannguatut oqaatsip immuata minguitsup kajungerinissaa’ inuunermut pingaaruteqarpoq. — 1 Petrusi 2:2.

Tamatta ’ilinniaqqaagassanit’ ingerlaqqittariaqarpugut. ’Guutip itissusiinik’ soqutiginninneq ineriartortittariaqarparput. (Hebræerit 5:12–6:1; 1 Korinthimiut 2:10) ’Inersimasunngorluarsimasunut nerisassat tamuasarissat’ nerisariaqarpavut. ’Kiffap ilumoortup silatuullu’, Jiisusi Kristusip toqqaannartumik nakkutigisaata, piffissaq eqqorlugu tamanut anersaakkut nerisassiorneq eqiasuilluni isumagaa. (Matthæusi 24:45-47) Guutip oqasianik kiffaqatigiinillu Biibililersaarutinik atuagassiissutaannik qasusuilluta atuaqqissaarluta ilisimassutsip nerriviani nerisassanik nerisariaqarpugut.

„Mitalliisoq avoqqaariniaqinagu“

Ilisimassutsip ajoqersuutaanik ilassinninnermut ilaavoq oqaaqqissaarinermik avoqqaallernermillu ilassinninneq. Tamarmiunngitsorli ilisimassutsip tassunga tunngasortaanik nuannarinnipput. Taamaattumik Ussatit immikkoortuisa siulliata naggataa ima mianersoqqusivoq: „Mitaatilliisumik oqaaqqissaarisoq kanngusuutissippoq, iluaatsumik avoqqaarinnittoq ajoqutissarsiinnartarpoq. Mitaatilliisoq avoqqaariniaqinagu uumigiliinnaqinammatit.“ — Ussatit 9:7, 8a.

Mitalliisup eqqortumik aqqutissiuussiniartoq kamaakkaluttuinnarlugulu uumigigaluttuinnartarpaa. Guutiitsut oqaaqqissaarinerup pingaaruteqarnera naluaat. Sallusuissummik uumiginnittumut mitalliiniartumulluunniit Guutip oqaasiani sallusuissutinik nuannersunik saqqummiineq silatusaanerunngilaq. Apustili Paulusi Antiochiami oqalluussilluni juutit sallusuissummut asanninngitsut naapippai. Mitallerpaluttumik akerlilerlugu oqalliseqataatinniaraluarpaat, Paulusili oqaannarpoq: „Ilissi [Guutip oqaasia] ajattorassiuk inuunermullu naassaanngitsumut naleqquttuutinnasi taava Guutimik nalusut saaffigissavavut.“ — Apustilit Suliaat 13:45, 46.

Guutip Naalagaaffia pillugu nutaarsiassamik nuannersumik ilumoortut tusarlerniartillugit mitalliisunik oqalliseqateqannginnissarput assortuuteqateqannginnissarpullu mianersuuttariaqarparput. Jiisusi Kristusip ajoqersukkani ima siunnersorpai: „Illumut iseraangassi eqqisseqqusisaritsi. Illup inui tamatumunnga naleqquppata eqqisseqqusissutissi tikissavai, naleqqutinngippatali eqqisseqqusissutissi uterfigissavaasi. Ilassiumanngippasili oqaatsisilu tusaajumanagit, taava illu taanna illoqarfilluunniit taanna qimassiuk, isikkasilu pujoralaajarsigit.“ — Matthæusi 10:12-14.

Ilisimasup avoqqaarineqarneq allatorluinnaq qisuariarfigissavaa. Salomo oqarpoq: „Ilisimasoq avoqqaariuk, taava asajumaarpaatit. Ilisimasoq ilinniartikkukku ilisimassuseqarnerulissaaq.“ (Ussatit 9:8b, 9a) Ilisimasup  nalunngilaa ’perorsagaaneq sunaluunniit atuutsilluni iluaaginartuusaraluartoq nuannersortaqarnani, kingunerisaraali eqqissineq iluarnerlu’. (Hebræerit 12:11) Annernaraluarluni siunnersorneqarnerup ilassineratigut ilisimassuseqarnerulersinnaagaanni, soormi taava itigartinneqassava mamiatsaatigineqassavaluunniit?

„Iluartoq ajoqersorukku ilisimasartunerulissaaq,“ kunngi nangippoq. (Ussatit 9:9b) Kinaluunniit ilikkagaqaqqinnissaminut utoqqaavallaanngilaq ilisimavallaarnaniluunniit. Aamma ukioqqortusisimasut sallusuissummik ilassinnittut Jehovamullu tunniulluinnartut takullugit nuanneqaaq. Ilinniagaqartuarusussuseqarneq anersaakkullu eqiingasuuneq tamatta noqqaassutigisigit.

’Ukiut inuuffigisatit amerlissapput’

Uani oqallisigineqartumut tunngasut pingaarnersaat Salomop erseqqissarpaa ilisimassuseqalissagaanni pisariaqartoq eqqaallugu. Allappoq: „[Jehovamik] mianerinninneq ilisimassusermut aallarniutaavoq, Illernartuusumik ilisimanninneq silaqassuseqalersitsisarpoq.“ (Ussatit 9:10) Guutimut ilumoortumut qamannga pisumik mianerinninnani Guutimeersumik ilisimassuseqalertoqarsinnaanngilaq. Ilisimasaqaraanni Jehovali mianerinagu ilisimasaqarneq tamanna Pinngortitsisumut ataqqinaatitut atorneqanngitsoorsinnaavoq. Allaat pisimasut ilisimaneqarluartut eqqunngitsumik isummerfigineqarsinnaapput taamaalillunilu silannitsorpallalluni. Aammattaaq silaqassuseqalissagaanni Jehova, Illernartuusoq, pillugu ilisimasaqarneq, ilisimassutsimut tunngasut ilaat maluginiarnartoq, pingaaruteqarpoq.

Ilisimassuseq sumik nassataqartarpa? (Ussatit 8:12-21, 35) Israelip kunngia oqarpoq: „Amerlasuunik ullussaqartissavakkit ukiullu inuuffigisassatit amerlisillugit.“ (Ussatit 9:11) Ilisimassuseqarneq amerlasuunik ulloqalersitsisarpoq ukiullu inuuffigisat amerlisittarlugit. Aap, ’ilisimassutsip ilisimassuseqartoq inuutittarpaa’. — Oqaluussisartup oqaasii 7:12.

Ilisimassuseqarniarluni ilungersuutigisariaqakkat nammineq akisussaaffigaavut. Tamanna Salomop ima erseqqissarpaa: „Ilisimassuseqaruit tamanna iluaqutigissavat; mitalliisaruilli kinguneri nammineq atortussaassavatit.“ (Ussatit 9:12) Ilisimassuseqartup ilisimassuseqarnini iluaqutigaa, mitalliisulli naalliuutini nammineq pissuussutigai. Aap, siaruartikkatsinnik katersuisarpugut. Taamaattumik ’ilisimassusermut naalaarneq’ taama pingaaruteqartigaaq. — Ussatit 2:2.

„Sianiissuseq eqqissiveqanngitsuuvoq“

Akerlianik maanna Salomo oqarpoq: „Sianiissuseq eqqissiveqanngitsuuvoq nakutitsiniartuullunilu, paasisimasaqanngitsuuvoq. Issiasarpoq illumi isaariaata killingani issiavimmi illoqarfiup portunersartaani. Ima suaartartarpai sanioqquttut, aqqut eqqortoq atuarlugu ingerlasut: ’Misilittagakitsoq maanga sanguniarli!’“ — Ussatit 9:13-16a.

Sianiissuseq peqqaluttutut, piumasaarsortutut isumaatsutullu allaatigineqarpoq. (ússatit 9:13) Aamma taanna illuliorpoq. Misilittagakitsunulli nammineerluni suaartarpoq. Tassa sanioqqutut qinigassinneqarput. Sorlermita ilassissavaat? Ilisimassutsip sianiissutsilluunniit qaaqqusissutaa?

„Imeruersaatissaq tillitaq mamarnerusarpoq“

Ilisimassutsip sianiissutsillu tusarnaatitik „maannga“ qaaqquaat. Qaaqqusanulli neqeroorutaat assigiinngillat. Ilisimassuseq nalliuttorsiornermut viinnitalimmut, neqitalimmut iffiartalimmullu qaaqqusivoq. Sianiissutsip qaaqqusissutaa arnap inuunerluttup pissusilersorneranut eqqaanarpoq. Salomo oqarpoq: „Sianiitsumut ima oqartarpoq: ’Imeruersaatissaq tillitaq mamarnerusarpoq isertuarlunilu nerisaq iiuminallaraaluni’“. — Ussatit 9:16b-17.

„Sianiissutsip“ viinni akuugaq neqeroorutiginagu „imeruersaatissaq tillitaq“ neqeroorutigaa. (Ussatit 9:13, 17) Nuliamik asasamik  kinguaassiuutitigut atoqateqarneq Biibilimi imermik nutaannguallannartumik imernermut assersuunneqarpoq. (Ussatit 5:15-17) Taamaattumik imeq tillitaq isertortumik kinguaassiuutitigut atoqateqarnermut assersuutaavoq. Imeq taamaattoq illinnarsinnaavoq — viinnimit illinnarnerulluni — tillitaammallu isumaqarnarsinnaalluni paasineqassanani. Iffiap isertorluni nerisap iffiamit neqimillu ilisimassutsip neqeroorutaanit illinnaneruneranut pissuterpiaavoq peqquserluttuliornikkut pissarsiarineqarnera. Inerteqqutaasut isertortariaqartullu kajungerineri sianiitsuunermut ersiutaavoq.

Ilisimassutsip qaaqqusissutaa inuunermik neriorsuutitaqarpoq, akerlianilli arnap sianiitsup aqqutiminik atuaasut kingunerlutsitsisinnaanerat uparuanngilaa. Kunngili Salomo mianersoqqusivoq: „Naluaa toqoreersut tassani najugaqartut, pulaartui toqusut inaata itinersaaniipput.“ (Ussatit 9:18) „Sianiissutsip illua angerlarsimaffiunngilaq, iliviuvoq illorsuaasaliaq,“ misissueqqissaartartoq allappoq. „Tassunga iseraanni uummalluni aneqqittoqarsinnaanngilaq.“ Ileqqorluttumik inooriaaseqalerneq silatusaarnerunngilaq; toqunartuugami.

Jiisusi Kristusi oqarpoq: „Isaaffikkut nerukitsukkut iseritsi; nerutoqaarmi tammarfimmut isaaffik tassungalu aqqutaa sileqaluni; amerlaqaallu tassuuna isaasut. Nerukeqaarli inuussummut isaaffik tassungalu aqqutaa ameqaluni; ikittuinnaappullu taassuminnga nanisisut!“ (Matthæusi 7:13, 14) Aqqutikkut inuunermut sammisukkooqataajumalluta ilisimassutsip nerriviani neriuarta. (wE 15/5 01)

[Qupp. 15-mi assiliartaq]

Ilisimasup oqaaqqissarutit ilassisarpai

[Qupp. 15-mi assiliartaq]

Ilisimassuseqalerniarneq nammineq akisussaaffigaarput