’Piffissaqqissoq atorluarpiuk’?

APUSTILI Paulusip ukiuni hundredelinni siullerni kristumiut Efesosimiittut siunnersuummik imaattumik tunivai: „Taamaattumik sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk, ullut ajortuummata.“ (Efesosimiut 5:15, 16) Sooq taama siunnersorneqarnissaq pisariaqarsimava? Apeqqut akissutissaqartikkumallugu pissutsit, taamani kristumiut Efesosimi inuuserisimasaat paasineqaqqaartariaqarput.

Efesosip pigissaarfiulluarnini, sakkortuumik ileqqorluffiunini, pinerluttoqarfiungaarnini assigiinngitsunillu anersaarsiortoqarfiunini tusaamasaassutigisimavai. Aammattaaq kristumiut grækerit isumaliuutersortartuisa piffissamik paasinneriaasiannik eqqaasinneqartuarsimapput. Efesosimi grækerit kristumiuunngitsut isumaqarput inuuneq killeqanngitsumik nangeqqettaqattaartuartuusoq, piffissarlu siumukaannanngitsoq. Inuunerup ingerlanerani piffissamik asiutitsisoq, aallaqqaataaniit aallarteqqissinnaavoq. Eqqarsartaaseq tamanna kristumiut Efesosimiut Jehovap pisussanik piffissalersuineranik, ilaatigullu eqqartuussinissaminik piffissaliisimaneranik paatsiveerussaatigisinnaavaat. Taamaattuminguna pissutissaqarluarluni Paulusip oqaaqqissaarai ’piffissaqqissoq atorluaqqullugu’.

Paulusip piffissaq nalinginnaasoq eqqartunngilaa. Oqaaseq grækerisooq atugaa, isumaqarpoq piffissaq aalajangersagaq, piffissaalluartoq aalajangersimasumik siunertalik. Taamaattumik taamanikkut kristumiut siunnersorpai silatusaartumik piffissaqqissumik atueqqullugit, suli piffissaalluartillugu, naggatissaq takkutsinnagu, Guutillu nallittuilluni annannissamut neqeroorutaa atorunnaartinnagu. — Romamiut 13:11-13; 1 Thessalonikamiut 5:6-11.

Aamma uagut nalerput piffissaqqissuuvoq piffissaalluartuulluniluunniit. Taamaattumik kristumiut piffissartik silatusaartumik atortariaqarpaat, uteqqinnavianngimmat. Piffissamik atuilussinnarneruvoq nuannaarniutit silarsuup neqeroorutai atuukkallartut salliutinneqarpata. Kristumiut silatusaarput piffissartik Guutimik mianerinnillutik atorunikku. Taamaalillutik Pinngortitsisumut, Jehova Guutimut attaveqarnertik nakussatsissavaat. — 2 Petrusi 3:11; Tussiaat 73:28; Filippimiut 1:10. (wE 1/5 01)