„Guutip illersorpatigut kia assortussavaatigut?“

„Taava tamatumunnga qanoq oqassaagut? Guutip illersorpatigut kia assortussavaatigut?“ — ROMAMIUT 8:31.

1. Israelikkut peqatigalugit kikkut Egypteni qimappaat, aamma sooq taamaaliorpat?

ISRAELIKKUT ukiuni 215-ini Egyptenimeereerlutik, ilaatigut ukiorpassuarni inussiaallutik, kiffaanngissuseqalissallutik aallalermata „peqataaniartorpassuit assigiinngeqisut aallaqataapput“. (2 Mosesi 12:38) Israelikkuunngitsut taakkua perluit qulit annilaarnangaartut Egyptenimut aseruutaalluinnartut guutipiluinullu ataqqinaataajaasut misigisimavaat. Takunnittuusimappullu — ingammik perluit sisamassaanniit — Jehovap innuttaminik illersuisinnaaneranut. (2 Mosesi 8:23, 24) Jehovap siunertaanik ilisimasaqarpallaanngikkaluarlutik una qularinngilaat: Egyptenimiut guutiisa Egyptenimiut illersorsinnaasimanngilaat, Jehovalli pissaanini Israelikkunnut iluaqutaasoq takutippaa.

2. Sooq Rahabip Israelikkut alapernaarsuiartortut ikiorpai, taakkualu Guutiannut tatiginninnera sooq asuliinnanngila?

² Ukiut 40-t qaangiuttut Israelikkut nunamut neriorsuutigisamut apuutinngitsiarneranni, Mosesip kingorartaata Josvap angutit marluk aallartippai nuna misissoriartortillugu. Tassani Rahabi Jerikomiu naapippaat. Taassuma tusarsimagamiuk qanoq Jehovap pissaaneqangaarluni  Israelikkut Egyptenimit qimagunneranni ukiuni 40-ni illersorsimagai, taamaattumik nalunngilaa Guutimit pilluaqquneqassaguni Guutip innuttai tapersersortariaqarlugit. Kingusinnerusukkut Israelikkut illoqarfik tiguarmassuk silatuumik aalajangerallartilluni taanna inoqutinilu asattuunneqarput. Tupinnartuliornikkut annaanneqarnerat Guutimit illersorneqarnerannut ersiutaalluarpoq. Taamaattumik Rahabip Israelikkut Guutiannut tatiginninnera asuliinnanngilaq. — Josva 2:1, 9-13; 6:15-17, 25.

3. (a) Jerikop sanaqqitap eqqaani Jiisusi qanoq tupinnartuliorpa, juutillu palasii qanoq qisuariarpat? (b) Juutit ilaasa, kingusinnerusukkullu juutiunngitsorpassuit, suna paasilerpaat?

³ Ukiut 1500-t qaangiuttut illoqarfiup sanaqqitap Jerikop eqqaani Jiisusi Kristusip qinusartoq tappiitsoq tappissisippaa. (Markusi 10:46-52; Lukasi 18:35-43) Angutip taassuma Jiisusi qinnuigaa naakkigeqqulluni, tassuunalu takutippaa Jiisusi Guutimit iluarineqartoq akueralugu. Juutilli upperisarsiornikkut siuttuisa malittaasalu amerlanertigut Jiisusip tupinnartuliai itigartittarpaat Guutillu suliaanik naammassinninneranut uppernarsaatitut isigiumanagit. Akerlianik isornartorsiortarpaat. (Markusi 2:15, 16; 3.1-6; Lukasi 7:31-35) Allaat paasinarsimmat Jiisusi namminneq toqutartik makissimasoq, akueriumanngilaat Guutip makitikkaa. Akerlianik Jiisusip ajoqersugaasa malersorneqarneranni siuttuupput, taakkua ’Naalakkamik Jiisusimik nutaarsiassamik nuannersumik nalunaajaanerat’ akornusersorniaraluarlugu. Juutilli ilaasa, kingusinnerusukkullu juutiunngitsorpassuit, pissutsit paasivaat eqqortumillu nalilerlugit. Taakkununnga paasinarluinnarpoq Guutip juutit siuttui imminnut iluartuutittut ajattorai Jiisusillu ajoqersugai maniguuttut najorai. — Apustilit Suliaat 11:19-21.

Ullumikkut kikkut Guutip illersorpai?

4, 5. (a) Ilaasa suut tunngavigalugit upperisartik aalajangertarpaat? (b) Upperisaq ilumoortoq paasisinnaassagaanni apeqqutit suut akineqartariaqarpat?

⁴ Ungasinngitsukkut rabbineri tv-mi aperineqarami upperisaq ilumoortoq sunaanersoq akivoq: „Isumaqarpunga upperisaq ilumoortuusoq tamatuminnga malinnittut inuttut pitsaanerulerpata.“ Ilumoorpoq upperisap ilumoortup inuit pitsaanerulersittarai. Upperisalli inunnik pitsaanerulersitsinera ima paasisariaqarpa Guutimit iluarineqartoq? Upperisap ilumoorneranut uppernarsaatituaava?

⁵ Inuit tamarmik namminneq, ilaatigut upperisamut sorlermut atarusunnerminnik, aalajangiisinnaatitaanertik pingaartippaat. Toqqaanissamulli kiffaanngissuseq tamanna eqqortumik aalajangernissamut qulakkeerutaanngilaq. Assersuutigalugu ilaasa upperisartik aalajangertarpaat ilaasortat amerlassusii,  pigissaarnera, alutornangaarnera ilaquttatilluunniit pissutigalugit. Tamakkuli tamarmik upperisap ilumoorneranut aalajangiisuunngillat. Pingaaruteqarnerpaaq tassaavoq: Upperisaq sorleq Guutip piumasaatut iliornissamut kajumissaarivaa, Guutillu illersuineranut nalunaajaataasunik erseqqissunik sunik takutitsisinnaava, taassuminnga malinnittut ilumoorlutik ima oqarsinnaatillugit: „Guutip ilagaatigut“?

6. Jiisusip oqaasii suut iluaqutigalugit pallorfiginninneq ilumoortoq eqqunngitsorlu immikkoortinneqarsinnaappat?

⁶ Jiisusip pallorfiginninnerup ilumoortup eqqunngitsullu immikkoortinnissaannut najoqqutassiaq aalajangersarpaa oqarami: „Pruffiitioqqusersunut mianersoritsi; taakkua savatut atisaqarlutik ornittarpaasi, ilumikkulli amaruupput kiisortut. Inerititaasigut ilisarisinnaassavasi.“ (Matthæusi 7:15, 16; Malaki 3:18) Ullumikkut kikkut Guutip illersorai aalajangersinnaajumallugu upperisap ilumoortup ’inerititaasa’ imaluunniit ilisarnaataasa ilaat misissoriartigik.

Guutip iluarisai sunik ilisarnaateqarpat?

7. Biibiliminngaanneersuinnarmik ajoqersuuteqarnissaq qanoq paasisariaqarpa?

⁷ Biibili tunngavigalugu ajoqersuuteqarput. Jiisusi oqarpoq: „Ajoqersuutiga uanga nammineq piginngilara, aallartitsisimali pigaa. Taassuma piumasaa malillugu iliorumasup ilisimassavaa ajoqersuutiga Guutimit pisuunersoq uannilluunniit pisumik oqalunnersunga.“ Aamma oqarpoq: „Guutimit pisup Guutip oqaasia tusaasarpaa.“ (Johannesi 7:16, 17; 8:47) Guutip iluarissappatigut Guutip oqaatsimini saqqummersitaanik taamaallaat ajoqersuutitta tunngaveqarnissaa, ajoqersuullu inuit ilisimassusiannit ileqqulersuutaannilluunniit tunngaveqartoq itigartissallugu tunngavissaqarluarpoq. — Esaja 29:13; Matthæusi 15:3-9; Kolossemiut 2:8.

8. Guutip aqqata pallorfiginninnermi atornissaa sooq pingaaruteqarpa?

⁸ Guutip aqqa Jehova atortarpaat tamanullu oqaluussissutigisarlugu. Esaja ima siulittuisimavoq: „Ullussami tassani oqarumaarpusi: ’Qutsavigisiuk [Jehova], aqqa torlorfigisiuk! Naammassisai inuiaqatigiinnut nalunaarutigisigit, tusarliussiuk aqqa naalannangaartoq! [Jehova] erinalimmik unnersiutigisiuk malunnangaartumik naammassisaqarsimammat; tamanna ilisimatinneqarli nunarsuarmi tamarmi.’“ (Esaja 12:4, 5) Jiisusip ajoqersukkani ajoqersorpai ima qinusaqqullugit: „Ataatarput qilanniittutit! Aqqit illernartitaali.“ (Matthæusi 6:9) Taamaattumik kristumiut, juutiugaluarunik juutiunngikkaluarunilluunniit, Guutip aqqanut ’innuttaasussaapput’. (Apustilit Suliaat 15:14) Aap, erseqqippoq Guutip tapersersorusukkai ’aterminut innuttaanerminnik’ nuannaarutiginnittut tulluusimaarutiginnittullu.

9. (a) Sooq ilumoortumik upperisallit nuannaartuuppat? (b) Esajap ilumoortumik eqqunngitsumillu guutisiornerup assigiinngissutai qanoq oqaatigai?

⁹ Guutip nuannaarnera ilaartarpaat. Jehova ’nutaarsiassap nuannersup’ aallaavia ’Guutitut pilluartutut’ allaatigineqarpoq. (1 Timotheusi 1:11) Taamaattumik taassuminnga pallorfiginnittut qanoq nikallungasinnaappat isumalluanngitsuusinnaallutilluunniit? Naak silarsuarmi erloqinartoqaraluartoq inuttullu ajornartorsiuteqaraluarlutik kristumiut ilumoortut isumalluartuupput aalajangersimasumik anersaakkut inuussutissanik pissaqarluartaramik. Esajap eqqunngitsumik guutisiortartut allaanerusut oqaatigai: „Taamaattumik ima oqarpoq Guuti [Jehova]: ’Kiffakka nerissapput, ilissili kaassaasi, kiffakka imissapput, ilissili imerusussaasi, kiffakka nuannaartinneqassapput, ilissili kanngusutsinneqassaasi, kiffakka uummammik iluunngaannit qiimmattassapput, ilissili uummatissigut naalliunnermik nilliassaasi  nimaarlusilu isumatsannissinni.’“ — Esaja 65:13, 14.

10. Ilumoortumik upperisallit atugarliungaarnissartik qanoq pinngitsoorsinnaavaat?

¹⁰ Iliuutsiminni aalajangigassaqaraangamillu Biibilimi najoqqutassianit siulersortittarput. Ussatit-nik allattup ima siunnersorpaatigut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ (Ussatit 3:5, 6) Inuit isumaliutaat, imminnut assortuuttut ilisimassutsimik Guutimeersumik sumiginnaasut, tatiginagit Guutip imminut siulersortikkusuttut illersorpai. Guutip oqaasia naapertorlugu inooriaaserput ilusilersoraangatsigu atugarliungaarnissarput pinngitsoorsinnaavarput. — Tussiaat 119:33; 1 Korinthimiut 1:19-21.

11. (a) Sooq ilumoortumik upperisallit palasinut inuinnarnullu immikkoortinneqarsinnaanngillat? (b) Guutip innuttaasa akornanni siuttuusut qanoq savaatinut maligassaasariaqarpat?

¹¹ Ukiuni hundredelinni siullerni kristumiut aaqqissugaapput. Jiisusip najoqqutassiaq manna eqqaavaa: „Ilissili rabbimik taagortissanngilasi; ataasermi ajoqersuisoraarsi, ilissilu tamassi qatanngutigiippusi. Nunamiittoq kinaluunniit ataatassinnik taassanngilarsi; ataasermi ataatagaarsi, taanna qilammiittoq. Ilitsersuisumilluunniit taagortissanngilasi, ataasermi ilitsersuisoraarsi, Kristusi. Annertarsi kiffarissavarsi.“ (Matthæusi 23:8-11) Ilagiinni tamarmik qatanngutigiittuni nuimasunik taaguusersortunik imminnullu inuinnarnit qutsinnerutittunik pingaakujuttunik palaseqarsinnaanngilaq. (Jobi 32:21, 22) Guutip savaataanik paarsisut ’tamatumunnga pinngitsaalisaasutut pinnatik namminerli kajumissutsiminnit, soorlu Guuti taama piumasaqartoq, iluanaarniapilunneq siunertarinagu nuannaarlutilli kajumillutillu; akisussaaffigisaminnut naalagaaniassanngillat, savaatinulli maligassaallutik’. (1 Petrusi 5:2, 3) Paarsisut kristumiut ilumoortut allat upperisaannut naalagaaniartussaanngillat. Guutimut kiffartornermi suleqataasutut maligassaalluarnissartik noqqaassutigiinnarpaat. — 2 Korinthimiut 1:24.

12. Guutip imminut tapersersortikkusuttut nunami naalakkersuisunut oqimaaqatigiissumik qanoq isiginnittaaseqaqquai?

¹² Inuit naalakkersuisui naalattarpaat, kalluunnaveersaartuujuarlutilli. ’Naalakkersuisunut qullersarisaminut’ naalakkumanngitsup ilimagisinnaanngilaa Guutip illersussagaani. Sooq? Naalakkersuisut ’atuuttuusut Guutip atulersimmagit’ imaluunniit Ny Verden-Oversættelsen naapertorlugu ’oqartussaasut piusut atorfimminnut annerusumik  minnerusumilluunniit oqartussaassuseqarfiusunut Guutimit ivertitaammata’. „Taamaattumik naalakkersuisunut akerlilersuisoq tassaavoq Guutip aaqqissuussineranut assortuisoq.“ (Romamiut 13:1, 2) Jiisusilli miserratiginngilaa akerleriissuteqartoqalersinnaasoq, oqarlunilu: „Kaasari tunisiuk kaasarip piinik Guutilu Guutip piinik.“ (Markusi 12:17) Guutimut illersortikkusuttut ’Guutip naalagaaffia iluarneralu ujaqqaartariaqarpaat’, tamannalu ilutigalugu nunami inatsisaasut Guutimut akisussaaffeqarnerunitsinnut naapertuuttut naalallugit. (Matthæusi 6:33; Apustilit Suliaat 5:29) Jiisusip kalluunnaveersaartuunerup pingaaruteqassusia erseqqissarpaa ajoqersukkani ima oqaatigigamigit: „Silarsuarmit pisuunngillat, soorlu uanga silarsuarmit pisuunngitsunga.“ Kingusinnerusukkut nangilluni oqarpoq: „Uanga naalagaaffiga silarsuarmit matumannga pinngilaq.“ — Johannesi 17:16; 18:36.

13. Guutip innuttaanut asanninneq ilisarnaatitut qanoq pingaaruteqarpa?

¹³ Kinaassusersiornatillu ’tamanut ajunngitsuliortarput’. (Galatiamiut 6:10) Kristumiutut asanninneq kinaassusersiortuunngilaq, ammip qalipaataa, aningaasaqarneq, ilinniagaqarneq, inuiaassuseq oqaatsilluunniit apeqqutaatinnagit tamanut ersersinneqartarluni. Tamanut pingaartumillu uppeqatiminnut ajunngitsuliortarnertik Guutimit iluarisaasutut ilisarnaatigaat. Jiisusi oqarpoq: „Asaqatigiikkussi tamatumuuna tamarmik paasissavaat ajoqersugarigissi.“ — Johannesi 13:35; Apustilit Suliaat 10:34, 35.

14. Inuit amerlanersaasa Guutip iluarisai iluarisarpaat? Nassuiaruk.

¹⁴ Malersorneqassagaluarunilluunniit Guutip piumasaatut iliorusupput. Jiisusip ajoqersukkani ima mianersoqquai: „Uanga qinugisimaguninnga ilississaaq qinugiumaarpaasi; oqaatsikka aalajangiussimagamikkit ilississaaq oqaatsisi aalajangiukkumaarpaat.“ (Johannesi 15:20; Matthæusi 5:11, 12; 2 Timotheusi 3:12) Guutimit iluarisaasut silamiunit iluarineqanngittuaannarput, soorlu Noap uppernermigut silarsuaq eqqartuukkaa. (Hebræerit 11:7) Ullumikkut Guutimit illersorneqarusuttut malersorneqarumanatik Guutip oqaasia kimikillisissinnaanngilaat Guutilluunniit najoqqutassiaanut akerliusumik iliuuseqarsinnaanatik. Nalunngilaat  Guuti aalajaallutik kiffartuuttuartillugu inuit allat eqqumiigissagaatsik ’mitaatigigaatsillu’. — 1 Petrusi 2:12; 3:16; 4:4.

Maannakkut piviusuusut paasikkit!

15, 16. (a) Uppeqatigiit Guutimit illersorneqartut kinaassusersinissaannut apeqqutit suut iluaqutigisinnaavavut? (b) Millionilikkuutaat qanoq isummerpat, aamma sooq?

¹⁵ Imminut aperigit: ’Kikkut Guutip oqaasianik maleruaaqqissaarnertik tusaamassaassutigaat, naak amerlanerussuteqartunit allaanerugaluarlutik? Kikkut Guutip aqqata atornissaa pingaartittarpaat, allaat ateq taanna taaguutigalugu? Kikkut isumalluarlutik Guutip naalagaaffia inuiaat ajornartorsiutaannut aaqqiissutissatuaanerarpaat? Kikkut Biibilip ileqqussatigut najoqqutassiai illersortarpaat, naak ittangasutut isigineqarsinnaagaluarlutik? Upperisarsioqatigiinni sorlerni tamarmik oqaluussisartuunertik, palaseqannginnertik akilerneqartartunik, ilisimaneqaatigaat? Kikkut innuttaasutut inatsisinut naalattutut nersorneqartarpat, naalakkersuinermulli akuliukkumanatik? Kikkut asannillutik piffissartik aningaasaatitillu atortarpaat allat Guutimik siunertaanillu ilisimasaqalersinniarlugit? Ajunngitsuliornerillu tamakkorpassuit soqutiginagit kikkut ammut isigineqartarpat, mitaatigineqartarlutik malersorneqartarlutillu?

¹⁶ Silarsuaq tamakkerlugu inuit millionilikkuutaat piviusut paasivaat qulakkeerlugulu Jehovap Nalunaajaasui kisimik ilumoortumik guutisiortuusut. Jehovap Nalunaajaasuisa ajoqersuutaat, ileqqui upperisaatalu iluaqutaanerat pissutigalugit amerlasuut taama isummerput. (Esaja 48:17) Aap, millionillit Zakaria 8:23-mi siulittuutigineqartutut oqarput: „Ingerlaqatigissavassi tusaratsigu Guutip najoraasi.“

17. Upperisartik ilumoortuusoq Jehovap Nalunaajaasui oqaramik sooq pingaakujunnerunngila?

¹⁷ Jehovap Nalunaajaasui pingaakujuttuuppat oqaramik kisimik Guutimit iluarineqarlutik? Naamik, soorluttaaq Israelikkut Egyptenimiitillutik pingaakujunnatik oqarsinnaasut Guutip illersoraatik Egyptenimiullu illersornagit, imaluunniit ukiuni hundredelinni siullerni kristumiut Guutimit iluarineqarnerartut juutiussutsimillu malinnittut Guutimit iluarineqannginnerarlugit. Piviusut paasinngitsuusaarneqarsinnaanngillat. Nunani 235-ni Jehovap Nalunaajaasuisa Jiisusip ajoqersukkaminut ilumoortunut naggatissap nalaani suliareqqusaa suliarisarpaat: „Naalagaaffimmillu iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ — Matthæusi 24:14.

18, 19. (a) Jehovap Nalunaajaasui assortorneqaraluarlutik sooq oqaluussiunnaassanngillat? (b) Jehovap Nalunaajaasuisa Guutimit iluarineqarnerat Tussiaat 41:12-ip qanoq uppernarsarpaa?

¹⁸ Jehovap Nalunaajaasuisa suliassaq tamanna ingerlatiinnassavaat, malersorneqarnerlu assortorneqarnerlu akornutiginagit. Jehovap suliareqqusaa naammassineqassaaq. Ukiut 1900-kkut ingerlaneranni Jehovap Nalunaajaasuisa Guutip suliareqqusaanik suliaqarnerannik akornusersueriaraluartut tamarmik iluatsitsisoqanngisaannarput, Jehova ima neriorsuigami: „Sakkut ilinnut sakkuaatissatut saffiukkat atorsinnaassuseqassanngillat, oqqat ilinnik unnerluutiginnittut tamaasa eqqartuutitissavatit pisuusutut. Tassa [Jehovap] kiffaasa pissarsiassaat, iluarnerat uannit pivoq, oqarpoq [Jehova].“ — Esaja 54:17.

¹⁹ Jehovap Nalunaajaasuisa maanna aatsaat taama nukittutiginerat suliniuteqartiginerallu — silarsuaq tamakkerlugu assortorneqaraluarlutik — suliaannik Jehovap iluarinninneranut nalunaajaataavoq. Kunngi Daavi oqarpoq: „Akeqqama ajugaasimaarutiginngippannga tamatumuuna paasissavara asagimma.“ (Tussiaat 41:12; 56:10, 12) Jehovap akeraasa innuttai ajugaasimaarutiginngisaannassavaat, siuttuat Jiisusi Kristusi ajugaalluinnassammat! (wE 1/6 01)

Uteqqiineq

• Guutimit iluarineqartut ilaannik itsaq inuusunik taasaqarit.

• Upperisaq ilumoortoq sunik ilisarnaateqarpa?

• Sooq qularinngiliuk Jehovap Nalunaajaasui Guutimit iluarineqartut?

[Atuaqqissaarnermi apeqqutit]

[Qupp. 14-mi assiliartaq]

Guutimit iluarineqarusuttut ajoqersuutertik taamaallaat oqaasianik tunngaveqartittariaqarpaat

[Qupp. 16-mi assiliartaq]

Kristumiut utoqqaanertat savaatinut maligassaalluarput