Jehovamik tatiginninnerit nakussatsiguk

Toqutsinissamik perlulioqatigiinniarneq pilersinneqalerpoq. Nunap qutsissumik atorfilittai tamarmik ataatsimoorlutik inatsisitaassamik siunnersuut saqqummiussimavaat. Pallorfiginninnermut naalagaaffimmit akuerisaanngitsumut qanoq ittumulluunniit peqataasumut toqumik pillaaneq atulersinniarpaat.

ILISARNARPA? Silamiut oqaluttuarisaanerat pisimasunik inuit ’inatsisit tunngavigalugit eqqunngitsuliornerannut’ assersuutissanik ulikkaarpoq. Pisimasoq qulaani eqqaaneqartoq pruffiiti Danielip nalaani Persiami pisimavoq. Inatsit kunngi Dariusip taamani atulersitaa imaappoq: ’Kinaluunniit ullut 30-t ingerlaneranni kimut guutiusumut inuinnaasumulluunniit illiunngitsumut qinusoq itersaliamut løvit inaannut iginneqassaaq.’ — Danieli 6:8-10.

Taama sioorasaarneqarami Danieli qanoq iliussava? Guutini Jehova tatigiuassavaa, imaluunniit kunngip inatsisaa naalaannassavaa? Biibilimi ima oqaluttuarineqarpoq: „Danielip allakkiaq taanna suliarineqartoq tusaramiuk angerlarpoq. Inimi qullermi igalaaqarpoq Jerusalemip tungaanut sammisunik, ullormullu pingasoriarluni seeqqummerluni Guutini qinnuigalugulu unnersiutigisarpaa siornatigut ileqqoriuakkamisut.“ (Danieli 6:11) Oqaluttuap sinnera ilisimaneqarluarpoq. Danieli uppernini pissutigalugu itersaliamut løvit inaannut iginneqarpoq, Jehovali ’løvit qarninik matusivoq’ kiffanilu aalajaatsoq annaallugu. — Hebræerit 11:33; Danieli 6:17-23.

Imminut misissorfissanngorpoq

Ullumikkut Jehovap kiffai silarsuarmi akeqqersimaartumi inuupput, tassanilu timikkut anersaakkullu ingerlalluarnerat navianartorsiortinneqakulavoq.  Assersuutigalugu nunat ilaanni naggueqatiginngisanik peqqarniitsumik qinngarsuinermut atatillugu ilarpassui toqutaasimapput. Nunani allani nerisassaaleqineq, aningaasatigut ajornartorsiornerit, ajunaarnersuit pinngortitat pilersitaat, nappaat ilungersunartoq pissutsillu allat inuunermik navianartorsiortitsisut. Aammattaaq malersugaasimapput, suliffimminni tatineqarlutik eqqunngitsuliornissaminnullu assiginngitsutigut ussernartorsiortinneqarlutik, tamakku tamarmik anersaakkut peqqissusiannut navianartorsiortitsisuusimapput. Assortuisorsuaq, Saatani Diaavulu aalajangerluinarsimavoq, atorsinnaasani tamaasa atorlugit Jehovap kiffai nungutinniarlugit. — 1 Petrusi 5:8.

Pissutsini taamaattuni qanoq iliorsinnaavugut? Sioorasaarneqarnermi ersineq pissusissamisoorpoq, apustili Paulusilli oqaasii eqqissiallannartut eqqaamaniartigik: „Guutimi nammineq oqarpoq: ’Iperassanngilakkit imminiiginnassanallu.’ Taamaattumik nakimanata oqarsinnaavugut: ’Jehova ikiortigaara, sioorassanngilanga, inuup qanoq iliorfigisinnaagaminga?’“ (Hebræerit 13:5, 6) Ullumikkuttaaq Jehovap kiffani taamatut isumassortarai qularinngivissinnaavarput. Kisianni Jehovap neriorsuutaanik ilisimasaqarneq ataasiuvoq, taassumali iluaqutissatsinnik akuliukkumaarneranik qulanngivinneq allaalluinnarpoq. Taamaattumik uagutsinnut pingaartuuvoq Jehovamik tatiginninneq sumik tunngaveqarsinnaanersoq misissussallugu, taassumunngalu tatiginninnerput nakussatsillugulu serniginiarlugu ilungersorluta. Taamaaliortarutta ’taava eqqissinerup Guutimit pisup siuneqassusernit tamanit annerungaartup uummativut eqqarsaativullu sernigissavai Kristusi-Jiisusimi.’ (Filippimiut 4:7) Taava misilinneqarnerit takkuppata paasilertuisinnaassallutalu siuneqassuserput atorlugu anigorsinnaassavavut.

Jehovamik tatiginninnermut tunngaviusoq

Pinngortitsisitsinnik, Jehovamik, tatiginninnissatsinnut pissutissarpassuaqarpugut. Pingaarnerpaamik qularnaateqanngilaq Jehova Guutiusoq asannittoq kiffaminik ilumut nuannarinnittoq. Biibilimi oqaluttuarpassuaqarpoq taakkununnga asannittumik isumassuineranut ersiutaasunik. Jehovap innuttaminik toqqakkaninik isumaginneriaasia Mosesip ima allaatigaa: „[Jehovap] Israeli nanivaa inoqajuitsumi, inuilaami soqanngitsumi nilliaffiusumi; isumassugaraa nakkutigalugulu paaralugulu asanerpaasamisut.“ (5 Mosesi 32:10) Ukiuni nutaanerusuni Jehovap kiffani, ataatsimut isigalugit inuttullu ataasiakkaatut suli isumassortuarpai. Bosniami naalagaaffiup inuisa imminnut sorsuunnerata nalaani Jehovap nalunaajaasuisa ilai ilungersunartumik nerisassaaleqilermata, pisariaqartunik pilersugaanissaat Jehovap isumagaa. Qatanngutit ilaat tatituut Østrigimeersut Kroatiameersullu inuunertik navianartorsiortippaat ikiuutit qatanngutiminnukaanniarlugit sumiiffikkut navianavissukkut ingerlasariaqaramik. *

Jehova Guuti ajugaqanngitsuuvoq. Taamaammat kiffani sernisorsinnaavai pissutsit atugaat qanoq ikkaluarpataluunniit. (Esaja 33:22; Saqqummersitat 4:8) Kisianni allaat Jehovap kiffami ilaasa toqu tikillugu aalajaannermik ersersitsinissaat akuerigaangamiuk napatittarpai assuarnaassutsiminnik attassiuaannarsinnaaqqullugit. Naggataa tikillugu aalajaattuarnissaannut nuannaarnermik eqqissisimanermillu attassiuarnissaannut annertoqqusersorlugillu ikiortarpai. Tussiaasiortutut Guutimik tatiginnittuusinnaavugut: „Guuti tassa qimarnguffipput nakuussuterpullu, tamatigut ikiuiserput annikilliornartuni. Taamaattumik ersissanngilagut nuna sajulissagaluarpat, qaqqarsuillu uppikaqqajaalissagaluarpata immap iterngani.“ — Tussiaat 46:2, 3.

Biibilimi aamma takutinneqarpoq Jehova tassaasoq Guuti unneqqarissoq. Neriorsuutini eqquutitittuaannarpai. Biibilimi Guutitut ’sallusuitsutut’ allaatigineqarportaaq. (Titusi 1:2) Jehovap kiffaminik sernissuiumatussutsi annaassiumatussutsilu ersersittuartarsimavaa. Taamaattumik qularinngilluinnarsinnaavarput neriorsuutiminik eqquutitsisinnaaginnarani kisianni aamma neriorsuutimi piviusunngortinnissaannut piareersimasoq. — Jobi 42:2.

 Qanoq ililluta Guutimik tatiginninnerput nakussatsissinnaavarput?

Naak Jehovap tatiginissaanut pissutissarpassuaqaraluarluta tatiginninneq taanna taamaattussaannartut isigissanngilarput. Silarsuarmiut Guuti tatigivallaanngilaat, taamalu isumaqarnermut sunnertiasinnaavugut. Taamaattumik taassuminnga tatiginninnerput nakussassarniarlugu attanniarlugulu ilungersortariaqarpugut. Jehovap tamanna nalunngilaa, tamatumunngalu atatillugu ikiuutissat atorfissaqartitavut isumagisimavai.

Pingaarnerpaatillugu oqaatsini allaganngukkat, Biibili, kiffami iluaqutissaannik suliaanik angingaartunik oqaluttuarpassuarnik imalik, tunniussimavaa. Atiinnaatigut nalunngisarput qanoq tatigisinnaatigivarput? Tamatigut immannguaannaq. Inuk tatigisinnaassagutsigu taassuma qanoq-issusianik suliarisimasaanillu ilisimasaqartariaqarpugut. Biibilimi oqaluttuarineqartut atuarlugillu eqqarsaatigeqqissaaraangatsigik Jehova aqqutigisaalu tupinnangaartut pillugit itinerusumik ilisimasaqalertarpugut, tamatumalu qanoq uppernartigissusianik paasinninnerulersittarpaatigut. Taamatut taassuminnga tatiginninnerput nakussatsinneqartarpoq. Tussiaasiortup qamannga pisumik Guutimut qinunermigut maligassiorluarpaatigut: „Taagussavakka [Jehovap] naammassisai, eqqaamavakka tupinnartuliatit itsarsuummat. Isumaliutigaara piliarsuit tamaat, eqqarsaatigaakkalu suliatit tamaasa.“ — Tussiaat 77:12, 13.

Biibilip saniatigut atuagassiani Biibililersaarutini Guutip peqatigiissortaasa saqqummersitaannik anersaakkut inuussutissassarpassuaqarpugut. Akuttunngitsumik misigisalikkersaarutit killinnartut Guutip kiffaanit ullumikkut inuusunit oqaluttuarineqartut imarisarpaat. Oqaluttuat ersersitsisut qanoq Jehovap ikiuneq aniguisitsinerlu isumagisarai, ernumanartumik iluatsittussaanngitsutullu isikkulimmik pisoqartillugu. Assersuutigalugu Martin Pötzinger, kingusinnerusukkut Jehovap Nalunaajaasuisa Siulersuisoqatigiivinut ilaasortanngortoq, Europami nunaminit ungasissumi pioneeriutilluni perululluni napparsimalerpoq. Aningaasaateqanngilaq, nakorsallu arlaannaataluunniit ikiorumanngilaa. Jehovalli sumiginnanngilaa. Kiisami najugaani napparsimavimmi nakorsaanerup tullia saaffigineqarpoq. Angutip taassuma, Biibilimik upperisaqarluartup, qatanngut Pötzinger ernermisullusooq isumagaa akilerneqarumananilu. Misigisalikkersaarutinik taamaattunik atuarnikkut Ataatatsinnik qilammiusumik tatiginninnerput assut nakussatsinneqarsinnaavoq.

Iluaqutaasoq nalissaqanngitsoq alla Jehovap atorsinnaassatsitut tunniusaa tassa qinunerup immikkut pisinnaatitaaffia erlinnartoq. Apustili Paulusip asannilluni allaffigaatigut: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu.“ (Filippimiut 4:6) ’Sumilluunniit’-mut ilaapput misigissutsivut, pisariaqartitavut, ersinerput ernumassutivullu. Qinunitta akulikilliartornerat misigissuseqarnerujartornerallu ilutigalugu Jehovamik tatiginninnerput sakkortusiartussaaq.

Jiisusi nunamiikkallarami ilaannikkut inoqanngitsumukartarpoq kisimiilluni akornusersorneqaranilu qinusinnaajumalluni. (Matthæusi 14:23; Markusi 1:35) Ilaannikkut pingaaruteqartunik aalajangigassaqaraangami unnuaq naallugu Jehovamut qinusinnaasarpoq. (Lukasi 6:12, 13) Tupinnanngilaq Jiisusip Jehovamik tatiginninnera ima sakkortutigilersimammat misilinneqarneq siornatigut kingornatigullu inuup kialuunniit anigorsimasaasa artornarnersaat naammagittarluni atorsinnaavaa. Nappakkami naalliutsitaaffimmi oqaasii kingulliit imaapput: „Ataataq, anersaara assannut tunniuppara.“ Tatiginninnermik takutitsinerup tamatuma ersersippaa Jiisusip Guutimik tatiginninnera toqussaa tikillugu annikillisimanngitsoq,  naak annaanniarlugu Jehova akuliutinngikkaluartoq. — Lukasi 23:46.

Jehovamik tatiginninneq ineriartortissinnaasarput suli alla, tassa uummatikkut iluunngarlutik taassuminnga tatiginnittut allat akuttoqatigiimmik katisimaqatigisarlugit. Jehovap innuttani peqquai taanna ilisarineruniarlugu imminnullu qiimmassaqatigiinniarlutik akuttoqatigiimmik katisimasassasut. (5 Mosesi 31:12; Hebræerit 10:24, 25) Katisimasarnerup tamatuma Jehovamik tatiginninnerat nakussatsittarpaa uppernikkullu misilinneqarnerit artornangaartut naammagittarlutik atornissaannut piginnaanngorsartarlugit. Nunami Afrikamiittumi oqaluussinermik inerteqquteqarfiusumi Jehovap nalunaajaasui politiinit illersuuteqarnissaat itigartinneqarpoq, pappiaqqanik angalanerminni atugassaannik tuniumaneqanngillat, katinnermut uppernarsaantinik tuniumaneqanngillat, napparsimmavimmi passunneqarumanngillat suliffisaannillu tuniumaneqaratik. Nunap immikkoortuani naalagaaffiup inui imminnut sorsuutilermata qanittumiittunut ilagiinnut ilaasortat 39-t (meeqqat ilanngullugit) puilasuitsumi ikaartarfiup pukkitsup ataani qaammatit sisamat missaanni najugaqarput illoqarfimminnut qaartartunik nakkaatitsineq anigorniarlugu. Pissutsit ingasattumik artornartut tamakku atuutsillugit ullut tamaasa Biibilimi allassimaffiit oqaloqatigiissutigisarneri ataatsimiinnerillu allat nakussatsissutigisarpaat. Innermillusooq misilinneqarnerup tamatuma naammagalugu atornera iluatsippoq anersaakkut ittunik pingaartitsinerat ajoquserneqarani. Misigisap taassuma erseqqissumik takutippaa Guutip innuttaanik akuttoqatigiimmik katisimaqateqartarneq qanoq pingaartigisoq.

Jehovamik tatiginninnerput nakussatsinniarlugu aamma Guutip naalagaaffianik oqaluussissutiginninnermik sulinermut peqataajuaannartariaqarpugut nutaarsiassamillu nuannersumik allanik avitseqatiqarnisamut piareersimajuartariaqarluta. Canadami oqaluussisartup inuusuttup ilungersortup tamatuma pingaaruteqassusia killinnangaartumik ersersippaa. Aammigut katsorsarneqarsinnaanngitsumik kræfterpoq, naak taama perululluni napparsimatigigaluarluni nalinginnaasumik pioneerinngornissaminik kissaateqarpoq, tassa piffissaq tamaat oqaluussisartoq. Nappaatimi pitsaanerulerallarnerani oqaluussinermi qaammat ataaseq ikiorti-pioneeritut peqataasinnaasimavoq. Taava ajorsiartulerpoq, qaammatillu arlalialuit tamatuma kingorna toquvoq. Toqussi tikillugu anersaakkut nukittunini attappaa Jehovamillu tatiginninnermini nalorninngisaannarluni. Anaanaa oqaluttuarpoq: „Toqussi tikillugu [Brunella] imminut eqqarsaatigeqqaarani allat eqqarsaatigeqqaartuaannarpai. Allat Biibilimik atuaqqissaarnissaannik kajumissaartarpai oqarfigalugillu: ’paratiisimeeqatigiikkumaarpugut.’“

Jehovamik tatiginninnerput ersersitsigu

„Soorlumi timi anersaartunngitsoq toqungasoq, taamattaaq upperneq sulianik ilaqanngitsoq toqungavoq.“ (Jaaku 2:26) Jaakup Guutimut upperneq pillugu oqarneratut aamma Guutimut tatiginninnerput taamatut oqaatigineqarsinnaavoq. Qanorluunniit Jehovamut tatiginninnerartigigaluarutta, pingaaruteqanngilaq iliuutsitta tatiginninnerput uppernarsanngippassuk. Abrahamip Guuti tatigilluinnarpaa, tatiginninninilu uppernarsarpaa peqqussutaanut tamatigut naalannermigut, aap allaat ernermi Isakip pilliutiginissaanut piareersimalluni. Asseqanngitsumik tatiginninnini naalassutsilu pissutigalugit Abrahami Jehovap ikinngutaatut tusaamaneqarpoq. — Hebræerit 11:8-10, 17-19; Jaaku 2:23.

Jehovamik tatiginninnerput ersersinniarlugu ilungersunartumik misilinneqarnissatsinnut utaqqisariaqanngilagut. Jiisusip ajoqersukkani oqarfigai: „Annikitsutigut ilumoortoq annertuutiguttaaq ilumoorpoq. Annikitsutigut peqquserluttoq annertuutiguttaaq peqquserluppoq.“ (Lukasi 16:10) Iliuutsitsinni tamani, aammattaaq apeqqutini pingaanngissorinarsinnaasuni, Jehovamut tatiginnillutalu naalannissarput ilinniartariaqartarpavut. Naalanneq taamaattoq qanoq iluaqutigigipput paasilerutsigu, Ataatatsinnik qilammiusumik tatiginninnerput nakussatsinneqassaaq, uppernikkullu misilinneqarnerit annerungaartut anigornissaannut piginnaanngorsarneqassaagut.

Silarsuup matuma nungutitaanissaa qanilliartortillugu Guutip innuttai pinngitsooratik amerlanerusunik misilinneqarlutillu ajornartorsiortinneqassapput. (Apustilit Suliaat 14:22;  2 Timotheusi 3:12) Kisiannili Jehovamik tatiginnilluinnarneq maanna ineriartortikkutsigu silarsuarmut nutaamut neriorsuutigisaanut isernissarput qilanaarisinnaavarput — annikilliornartussami angisuumi aniguisitaanikkut imaluunniit toqusunit makititaanikkut. (2 Petrusi 3:13) Qaquguluunniit Jehovamut attaveqarnerput erlinnangaartoq tatiginninnginnermit aserugaatinngisaannartariaqarparput. Taava uagut oqaatigineqarsinnaassaagut soorlu Daniel itersaliamit løvit inaannit aniguisinneqarmat oqaatigineqartoq: „Ajoquserneqarneranik malunnartoqanngilaq, tassami Guutini tatigisimagamiuk.“ — Danieli 6:24. (wE 1/6 01)

[Quppernerup ataani ilanngussaq]

[Qupp. 11-mi assiliartaq]

Jehovap kiffai aalajaatsut pillugit oqaluttuat atuarnerat uppernikkut nakussatsinnarpoq, soorlu assersuutigalugu Martin Pötzinger pillugu oqaluttuaq