Suna qinerpiuk — aningaasat inuunerluunniit?

Tillinniamik tigusaminut sakkuminik silugussisimasumut ima oqartumik tusarnikuusimassaatit: „aningaasat inuunerluunniit!“ Ullumikkut tamatta — ingammik nunani pisuuni — assingusunik atugaqarpugut. Toqqaaqqullutali tillinniamik tatineqanngilagut, inuiaqatigiilli aningaasanillu pingaartitsiartuinnarnerujussuup pigisatigullu siuariartornerup tativaatigut.

PISSUTSIT nutaat apeqqutissaqalersillutalu ernumalersippaatigut. Aningaasat pigisallu qanoq pingaartinneqartigissappat? Suli annikinnerusoq naammagineqarsinnaava? „Inuuneq piviusoq“ ilumut inuit piumatussutsimut pilliutiginiarpaat? Aningaasat pillualersitsisinnaappat?

Aningaaserituneq

Kissaatigisatsinnit maqaasigisatsinnillu tamanit — pissutissaqarluta pissutissaqarnataluunniit — aningaasat siulliutinneqartalersimapput. Tiingatunerup nerisasserinerullu akerlianik aningaaserituneq ataavartuugajuppoq. Utoqqaliartornermi aningaasat soqutigineqannginnerulertarnerannik takussutissaqanngilaq. Amerlasuutigut takuneqarsinnaavoq inuit utoqqaliartortillutik aningaasanik sunillu pisissutaasinnaanerinik soqutiginninnerulersarlutillu ernumanerulersartut.

Qularutissaanngitsumik piumatussuseq annertusisimavoq. Filmimi inuttaasut pingaarnersaat oqarpoq: „Piumatussuseq iluaqutaavoq. Piumatussuseq ajunngilaq.“ 1980-ikkut „Piumatussutsip ukiuinik“ taaneqaraluartut, ukiut siuliiniittut kinguliiniittullu takutippaat inuit aningaasanut isiginnittaasiat allanngungaarsimanngitsoq.

Una nutaajugunarpoq, amerlasuut periarfissaqarmata amerlanerusunik perusullutik kissaatitik tassuuguinnaq matussusissallugit. Soorlumi silarsuaq tamakkingajavillugu, piffissap annersaa, nukitik tamangajaasa atortaraat sanaartornernut atuisunullu suli amerlanerusunut. Immaqa aamma illit ullumikkut — ilaatigut sualuttumik, aningaasanik atuinerujussuaq pigisaqarniarnerujussuarlu malugisimassavatit.

Inuit nuannaarnerulersittarpaat? Apeqqummut akissutitut ukiut 3000-t matuma siornatigut silatooq pisoorsuarlu kunngi Salomo ima allappoq: „Aningaaseritooq aningaasaatiminik ilatsaasuiuartarpoq. Pisuussutinik nuannarinnittup tamakku pissarsissutigisanngilai. Tamannattaaq piunngitsuuvoq!“ (Oqaluussisartup oqaasii 5:10) Innuttaaqatigiinnik ilisimatuut ullumikkut taama isumaqarput.

Aningaasat pilluarnerlu

Inuit pissusiinik maluginiakkat tupaallannarnerpaat ilaat tassa aningaasaateqarnerulerneq pigisaqarnerulernerlu nalerisimaarnerulersitsisarnatillu pilluarnerulersitsisanngitsut. Misissueqqissaartartorpassuit naliliipput pigissaarnerulernermi qanoq pigisaqartigineq nuannaarnermut nalerisimaarnermullu apeqqutaanngitsut.

Pigisanik aningaasanillu katersuiniarnerujussuup amerlasuut ima eqqarsalersippai: ’Pisaagut nuannaarutigisaraluarlugit, sooq tamakku nalerisimaanerulersissinnaanngilaatigut?’

 Atuakkiamini Happy People-mi Jonathan Freedman oqarpoq: „Isertitaqarnerulaalersimagaanni, aningaasat amerlassusii pillualernissamut apeqqutaarujussuanngillat. Piitsuussutip killinga qaangersimagaanni isertitaqarnerup pilluarnermut sunniutaa mikisuararsuuvoq.“ Amerlasuut paasisimavaat, anersaakkut pisuujuneq, siunertaqarluartunik sammisaqarneq qutsissunillu najoqqutaqarneq pilluarnissamut apeqqutaanerpaasut. Allanut attaveqarluarneq, akerleriissuteqannginneq suulluunniit pigisanik nuannaarutiginninnissamut akornutaannginnissaa aamma pingaaruteqarput.

Ileqquliunneqarsimavoq misigissutsikkut artorsaativiusut pisuussutinik taarserniartarlugit. Amerlasuut tamanna inuiaqatigiinni ajornartorsiuterpassuarnut pissutaanerarpaat. Innuttaaqatigiinnik ilisimatuut ilaasa naliginnaasumik isumalluannginneq nalerisimaannginnerlu eqqartorpaat. Aammattaaq malugisimavaat inuiaqatigiinni ingerlalluartuni, siunnersuisartunut imaluunnit anersaakkut siulersuisunut nuimanngitsumillu immikkut ileqqulersuuteqarlutik guutisiortunut katsorsaaniartartunullu saaffiginnittartut amerliartuinnartut. Tamatuma ersersippaa pigisat inuunermik piviusumik siunertaqalersitsisanngitsut.

Aningaasat pissaaneqarfii pissaaneqarfiginngisaalu

Aningaasat pissaaneqaqaat. Illumik kusanartumik, atisaasivimmik pequtinillu pisissutaasinnaapput. Aamma iluareqqusaarutaasinnaapput, suliffissaqartitsillutik nersorneqaataasinnaallutillu immaqalu ikiuiumassuseqartunik ikinngutaagallartunik ikittunik ikinnguteqartitsisinnaallutik. Pissaaneqarnerunngillalli. Pisariaqartinnerpaasavut aningaassat tunniussinnaanngilaat — ikinngut ilumoortoq tunniussimasoq, isummakkut eqqissineq toqulernermilu asannippaluttumik tuppallersarneqarneq. Aamma Guutimut iluaritinnissaq pisiarineqarsinnaanngilaq.

Kunngi Salomop, pisiarineqarsinnaasunik pisuussutinik amingaateqanngitsup paasisimavaa pisuussutinik isumalluuteqarneq ataavartumik pillualersitsisinnaanngitsoq. (Oqaluussisartup oqaasii 5:12-15) Aningaaserivik ajunaaruteqarpat aningaasalluunniit naleeruppata aningaasat annaaneqarsinnaapput. Nunaatit pinngortitap nukinganik aserorneqarsinnaapput. Sillimmasiisarfiit pigisat annaaneqartut ilaannaat taarsiivigisinnaavaat, misigissutsikkulli annaasat taarserneqarsinnaanngisaannarput. Piginneqataassutit aningaasanullu uppernasaatit allagartaat ullormiit ullormut, aningaasaqarneq ajutoorpat naleeruteriaannaapput. Allaat suliffik akigissaartoq pissuterpassuaqarluni suliffiugallatsiaannarsinnaavoq.

Aningaasanut isiginnittaaserput qanoq oqimaaqatigiissaasinnaavarput? Aningaasat pigisallu inuunitsinni qanoq inissisimaffeqartariaqarpat? Tamanna qanimut misissoriartigu naleqangaartumik — „inuunermik piviusumik“ qanoq pigisaqarlersinnaanerput paasiniarlugu.

[Qupp. 4-mi assiliartaq]

Pigisat ataavartumik pillualersitsisinnaanngillat