Tusaasusi puiutuunngoqinasi
Tusaasusi puiutuunngoqinasi
„Oqaaseq tusaaginnarnagu maleruarsiuk, taamaaliunngikkussi immissinnut salloqittaqinaasi.“ — JAAKU 1:22.
1. Tupinnartuliat suut Israelikkut itsaq inuusut misigisimavaat?
JEHOVAP Egyptenimi tupinnartuliai qanoq puiorneqarsinnaagamik? Perluit qulit tamarmik immikkut mianernangaartuupput, perluillu kingorna Israelikkut tupinnartumik Immakkut Aappalaartukkut aniguisitaapput. (5 Mosesi 34:10-12) Pisimasunut taakkununnga takunnittuugaluaruit taakkuninnga suliarinnittoq puiunngisaannassagunarpat. Taamaattoq tussiaasiortoq ima erinarsorpoq: „Puiorpaat Guuti annatsitsisertik, malunnangaartuliortoq Egyptenimi, tupinnartuliortoq Kamip nunaani, suliaqartorlu annilaarnangaartunik Immami Ivissuartuumi [Aappalaartumi].“ — Tussiaat 106:21, 22.
2. Qanoq takuneqarsinnaava Israelikkut sivikitsuinnarmik Guutip tupinnangaartuliai qujamasuutigigaat?
2 Imaq Aappalaartoq ikaareerlugu „inuit [Jehova] mianerilerpaat, upperaallu [Jehova] kiffaalu Mosesi.“ (2 Mosesi 14:31) Mosesi angutillu Israelikkuusut ajugaasimaarummik Jehova tussiarfigaat, aamma Mirjami arnallu allat qilaatersuutigalutik qitillutillu nuannaarnertik ersersippaat. (2 Mosesi 15:1, 20) Aap, Jehovap tupinnangaartuliai Guutip innuttaanut sunniuteqarluarput. Israelikkulli Jehovamut qujamasunnerat sivikitsuinnaavoq. Sivitsunngitsoq ilarpassui misigisaminnik puiuisimasutut pissusilersorput. Oqalorujullutik Jehova naammagittaalliorfigilerpaat, ilaallu guutipilussiulerlutillu kanngunartuliortalerput. — 4 Mosesi 14:27; 25:1-9.
Suup puiortissinnaavaatigut?
3. Naammalluinnanngitsuugatta suut puioriaannaavavut?
3 Paasiuminaappoq Israelikkut taama pingaartitsinngitsigisinnaammata qujamasunngitsigisinnaammatalu, taammaattorli uaguttaaq taamaalisoorsinnaavugut. Soorunami Guutip tupinnartuliaanut takunnittuunngilagut, Guutilli ilisarisimanerani qularnanngitsumik inuunitsinni misigisaqarsimassaagut puiugassarinngisatsinnik. Ilatta eqqaamalluassavaat sallusuissummik Biibilimeersumik ilinnialeqqaarnertik. Qularnanngilaq eqqaamagipput Jehovamut qinunitsinni tunniulluinnarluta kingornalu kuisilluta. Ilarpassuatta periarfissani allani aamma malugisarpaat Jehovamit ikiorneqarlutik. (Tussiaat 118:15) Tamanit pingaarnerpaamik Guutip ernerata Jiisusi Kristusip pilluta inuunerminik pilliutaata annannissamik neriuutissippaatigut. (Johannesi 3:16) Naammalluinnanngitsuugattali eqqunngitsunik kissaateqaleraangatta inuunermiluunniit isumakuluutinit nanertorneqartutut misigigaangatta, Jehovap uatsinnut ajunngitsuliai puioriaannaavavut.
4, 5. (a) Jaaku tusaalluni puiutuunerup ulorianaataanut qanoq mianersoqqusiva? (b)Jaakup angummik tarrarsortumik assersuussiaa qanoq atorsinnaavarput?
4 Uppeqatiminut allakkamini Jiisusip qatanngutissaata Jaakup tusaalluni puiutuunerup ulorianaataanut mianersoqquai. Allappoq: „Oqaaseq tusaaginnarnagu maleruarsiuk, taamaaliunngikkussi immissinnut salloqittaqinaasi. Oqaatsimimmi tusaaginnartup maleruarnagulu assigaa inuk kiinnaminik tarrarsuutikkut qimerluuisoq: Imminut qimerlooraluarpoq, qimagukkamili qanoq isikkoqarnini erniinnaq puiorpaa.“ (Jaaku 1:22-24) Jaakup oqaatsit qanoq-una isumaqartikkai?
5 Ullaakkut makikkaangatta tarrarsortarpugut takuniarlugu isikkutsinni sunik iluarsisassaqarnersoq. Ullorornerani allanik sammisaqartarpugut tarrarsuummilu suna takunerlugu eqqarsaatigiunnaartarlugu. Aamma anersaakkut ittunut taamatut pisoqarsinnaavoq. Guutip oqaasiani atuaraangatta qanoq ittuunissatsinnik Jehovap ilimagisaanut qanoq ittuunerput naleqqiussinnaavarput. Taamaalilluta nammineq sanngiiffivut eqqumaffigissavavut. Taamatut paasisaqarnitta inuttut allannguerusutsittariaqarpaatigut. Ulluinnarnili sammisartakkavut sammitillugit assigiinngitsunillu ajornartorsiuteqartilluta anersaakkut ittut puioriaannaavavut. (Matthæusi 5:3; Lukasi 21:34) Soorlu tassa Guutip uatsinnut ajunngitsuliai puiorivut, taamaappallu ajortuliortooriaannaavugut.
6. Eqqarsaatit Biibilimeersut suut Jehovap oqaasianik puiutsaatissinnaavaatigut?
6 Isumassarsisitaalluni Korinthimiunut allakkamini siullerni apustili Paulusip Israelikkut puiutuut inoqajuitsumiittut eqqaavai. Paulusip oqaasii kristumiut ukiuni hundredelinni siullerni inuusut iluaqutigaat, allagaalu atuaraangatsigik uaguttaaq Jehovap oqaasianik puiutsaalineqartarpugut. Taamaattumik Korinthimiunut allakkat siulliit 10:1-12 misissoriartigik.
Silarsuarmiut kajungerisaat naaggaartariaqarpavut
7. Israelikkut Jehovap asanninnerata takussutissartai assortugassaanngitsut suut takuaat?
7 Paulusip Israelikkut pillugit allagai kristumiunut tamanut mianersoqqussutaapput. Ima allappoq: „Qatanngutit, matuminnga ilisimatinniarpassi: Siuaasavut tamarluinnarmik nuiap ataaniipput tamarluinnarmillu imaq ingerlavigalugu.“ (1 Korinthimiut 10:1-4) Mosesip nalaani Israelikkut Guutip pissaanera tupinnartuliornikkut ersersinneqartoq arlaleriarlutik takusimavaat, ilaatigut napasumit nuiaasumit tupinnartuliamit ullukkut siulersorneqartaramik Immakkullu Aappalaartukkut aniguisinneqaramik. (2 Mosesi 13:21; 14:21, 22) Aap, Israelikkut Jehovamit asaneqarnerat assortugassaanngitsunik takussutissaqarpoq.
8. Israelikkut anersaakkut ittut pingaartinngitsoormatigik qanoq kinguneqarpa?
8 Paulusi nangippoq: „Taamaakkaluartoq Guutimi iluarinartitaasut taakkunani amerlanngeqaat, toqorarneqarpummi inoqajuitsumi.“ (1 Korinthimiut 10:5) Alianassusia! Israelikkut Egyptenimit aniguisut amerlanersaat nunamut neriorsuutigisamut isernissaminnut qinngaqqunnarput. Guutimit ajattorneqarput uppernikikkamik, taamaattumillu inoqajuitsumi toqupput. (Hebræerit 3:16-19) Qanoq ilinniarfigisinnaavarput? Paulusi oqarpoq: „Pisimasut tamakku uatsinnut mianersoqqussutinngorput, pilerissusipiloqaqqunata taakkua pilerissusipiloqarnerattut.“ — 1 Korinthimiut 10:6.
9. Jehovap Israelikkut sunik tunisimavai, qanorlu qisuariarpat?
9 Israelikkut inoqajuitsumiitillutik anersaakkut eqqumassutissarpassuaqaraluarput. Jehova angerfigeqatigaat inuiaqatigiinngorlutillu taassumunnga tunniulluinnarsimasut. Aammattaaq palaseqatigeeqartinneqarput, pallorfiginninnermut qitiusutut Tupermik Naapeqatigiittarfeqartinneqarlutik aamma aaqqissuussamik Jehovamut pilliiffissaqartinneqarlutik. Tunissutilli anersaakkut ittut taakku nuannaarutiginagit Israelikkut timikkut nerisassat Jehovap tunniusai naammagittaalliutigaat. — 4 Mosesi 11:4-6.
10. Sooq Jehova eqqarsaatitsinniittuartariaqarpaa?
10 Israelikkut inoqajuitsumiittut assiginagit ullumikkut Jehovap innuttaasa Guutimit iluarisaanertik nuannaarutigaat. Pingaaruteqangaarporli tamatta immikkut Guutip eqqarsaatiginissaa. Taamaaliorutta kissaatit namminissarsiortut anersaakkut isiginninnitsinnut ersernerlutsitsisinnaasut naaggaassavavut. Aalajangiusimasariaqarparput ’naaggaarnissarput iluaatsuussusermut silarsuarmiullu kajungerisaannut, silatusaarluta peqqusersuillutalu Guutimillu mianerinnittuulluta silarsuarmi matumani inuusinnaaqqulluta’. (Titusi 2:12) Meeraatillutik kristumiut ilagiivinut ilanngussimasut isumaqassanngillat misiginngitsuugaqassallutik. Taama eqqarsaateqallatsialissagaluarutta silatusaarnerussaaq Jehova pilluaqqussutissarititaalu nuanningaartut eqqaamassallugit. — Hebræerit 12:2, 3.
Jehova sutigut tamatigut naalattariaqarparput
11, 12. Qiperukkat pallorfiginngikkaluarlugit qanoq guutipilussiortoqarsinnaava?
11 Paulusi allamik mianersoqqussuteqaqqippoq: „Aamma guutipilussiortunngoqinasi taakkua ilaasa guutipilussiortunngornerattut — soorlu allassimasoq: ’Inuit issaallutik neripput imerlutillu, taavalu nikuipput qittanniarlutik.’“ (1 Korinthimiut 10:7) Paulusip innersuussutigaa Aronip Israelikkunnit kuultimik nersuuteeraasaliornissaanut kimigiiserfigineqarnera. (2 Mosesi 32:1-4) Soorunami toqqaannartumik guutipilussiornissarput ilimananngilaq, guutipilussiulersinnaavugulli uagut nammineq kissaatigisavut namminissarsiortut Jehovamik pallorfiginninnermit pingaartinnerulerutsigit. — Kolossemiut 3:5.
12 Piffissami allami Paulusip ilaat anersaakkut ittunit nunap piinik pingaartitsinerusut eqqartorpai. Taakku ’nappakkamut Kristusip naalliutsitaaffianut akeraallutik inuusut’ pillugit allappoq: „Taakkua tammarnissaq naggatissaraat, aqajarortik guutigaat.“ (Filippimiut 3:18, 19, NV) Qiperugaq pallorfiginngikkaluarlugu guutipilussiortuupput, nunap piinik piumatuallaaramik. Soorunami kissaatit tamarmik eqqunngitsuunngillat. Jehovap pisariaqartitaqartilluta inuunermillu nuannaarutiginnissinnaatilluta pinngortissimavaatigut. Guutimulli attaveqarnerminnit pilerissuseqarnermut atatillugu nuannaarutinik pingaarnerutitsisut guutipilussiortuupput. — 2 Timotheusi 3:1-5.
13. Kuultimik nersuteeraasaliamik kuultiusumik qualuttuaq qanoq illinniarfigisinnaavarput?
13 Israelikkut Egypteni qimareerlugu nersuteeraasaliorput kuultimik pallorfigilerlugulu. Oqaluttuap guutipilussiornermut mianersoqqussutitaqarnerata saniatigut aamma allamik ilinniarfigisinnaavarput. Israelikkut Jehovap siunnersuutaa erseqqissoq sumiginnarpaat. (2 Mosesi 20:4-6) Jehova Guutimissut ajattorumanngikkaluarpaat, nersuteeraasaliamummi pilliipput ’ullorlu Jehovamut nalliussivittut’ taallugu. Imminnut salloqittarput isumaqarlutillu Guutip naalannginnertik isiginngitsuussagaa. Jehova narrunarsarpaat kamatsilerlugulu. — 2 Mosesi 32:5, 7-10; Tussiaat 106:19, 20.
14, 15. (a) Sooq Israelikkut tusaallutillu puiutuunngornissaminnut patsisisaqanngillat? (b) Aalajangerutta tusaalluta puiutuunngunnginnissatsinnut Jehovap maleruaqqusai qanoq isigissavavut?
14 Sallusuissummik ilisimasalimmik qaqutiguinnaq eqqunngitsumik upperisarsioqatigiinnut ilannguttoqartarpoq. Ilagiinnulli kristumiunut ilaagaluarluniluunniit Jehovamut siulersortikkusunngitsoqarsinnaavoq. Israelikkut tusaallutik puiutuunngornissaminnut patsisaqanngillat. Inatsisit Qulit tusaavaat Mosesilu aqqutigalugu Guutimit ima peqquneqarlutik: „Guutilialiussanngilasi sølviusunik uanga saninniittussamik, immissinnullu guutilialiuutissanngilasi kuultiusunik.“ (2 Mosesi 20:18, 19, 22, 23) Taamaattorli nersuteeraasaliaq kuultiusoq pallorfigaat.
15 Uaguttaaq tusaalluta puiutuunngornissatsinnut patsisisaqanngilagut. Biibilimi Guutimeersunik ilitsersuuteqarpoq qanoq inooriaaseqarnissatsinnut. Assersuutigalugu Jehovap oqaatsimini taarsigassarsisoq taarsiinngisaannartoq erseqqissumik assuaraa. (Tussiaat 37:21) Meeqqat angajoqqaaminnut naalaqquneqarput, ataataasullu qitornaminnik perorsaaqquneqarlutik ’anusinngorsaallutik oqaaqqissaarillutillu [Jehovamit] pisumik’. (Efesosimiut 6:1-4) Kristumiut katissimanngitsut taamaallaat ’Naalakkami’ kateqquneqarput, katissimasullu ima peqquneqarlutik: „Aappariinneq tamanit ataqqineqassaaq, aappariillu siniffiat minguitsuussaaq. Guutimmi eqqartuukkumaarpai kinguaassiuutitigut inuunerluttut allasiortullu.“ (1 Korinthimiut 7:39; Hebræerit 13:4) Aalajangersimagutta tusaalluta puiutuunngunnginnissatsinnut, Guutimit maleruaqqusat taakku allallu ilumoorullugillu maleruassavavut.
16. Kuultimik nersuteeraasaliamik pallorfiginninneq qanoq kinguneqarpa?
16 Jehovap akuerinngilaa Israelikkut namminneq piumasarisatik malillugit pallorfigissagaanni. Akerlianik taakkua ilaat 3000-t toqutippai, qularnanngitsumik nersuteeraasaliamik kuultiusumik pallorfiginninnermi nuimanerummata. Pikitsitseqataasut perlummik Jehovameersumik eqqorneqarput. (2 Mosesi 32:28, 35) Tamanna ilinniutissaalluarpoq Biibilimik atuartunut tamanut, namminissarsiorlutik Guutip inatsisaanik sorlernik maleruassanerlutik aalajangertunut!
„Kinguaassiuutitigut inuunerlunneq nigorsimaniarsiuk“
17. Korinthimiunut allakkat siulliit 10:8-mi pisimasoq suna innersuussutigineqarpa?
17 Paulusip timikkut kissaatigisat ilaat anersaakkut naleqartunik puiortitsisinnaasut eqqaavai. Ima oqarpoq: „Aamma kinguaassiuutitigut inuunerloqinata soorlu taakkua ilaat taamaaliortut ullormilu ataatsimi 23.000-it toqutaallutik.“ (1 Korinthimiut 10:8) Tassani Paulusip innersuussutigaa Israelikkut ukiuni 40-ni inoqajuitsumi angalaarnerata naalernerani Moabip narsaataani pisimasoq. Tamatuma siunitsiannguani Israelikkut Jehovap ikiuineratigut Jordanip kangiani nuna tiguarpaat, amerlasuulli puiutuullutillu qujamasuttuunngillat. Nunap neriorsuutigisap killeqarfianiitillutik kanngunartuliornissamut Ba’al-Peorimillu minguttuumik pallorfiginninnissamut usserneqarput. 24.000-t missaat toqutaapput, taakkua ilaat 1000-t pikitsitsinermi siutuusut. — 4 Mosesi 25:9.
18. Ileqqut suut kinguaassiuutitigut inuunerlunnermik kinguneqarsinnaappat?
18 Ullumikkut Jehovap innuttaasa ileqqussatigut najoqqutassianik qutsissunik maleruaasarnertik tusaamasaassutigaat. Ilaasali Guuti najoqqutassiaalu puiortarpaat kinguaassiuutitigut kanngunartuliornissamut usserneqaraangamik. Tusaallutik puiutuunngorsimapput. Immaqa aallaqqaammut inuunerlunnermut ussertinngikkaluarput, alapernaallutilli tiingasulersaarutit sammilerpaat, kanngunartunik oqaluttuartalerlutik, qaninniartalerlutik inuilluunniit ileqqussatigut sanngiitsut ilagisalerlugit. Misilittakkat takutippaat kristumiut taamaaliuleraangamik ajortuliortartut. — 1 Korinthimiut 15:33; Jaaku 4:4.
19. ’Kinguaassiuutitigut inuunerlunneq nigorsimaniassagutsigu’ Biibilimi siunnersuutit suut iluaqutigissavavut?
19 Inuunerlunnissamut usserneqassagaluarutta Jehova puiortariaqanngilarput. Akerlianik eqqaamasariaqarparput oqaasianilu oqaaqqissaarutit maleruartarlugit. (Tussiaat 119:1, 2) Amerlanersavut ileqqussatigut minguitsuujuarniarlutik sapinngisamik iliortarput, Guutilli isaani eqqortuliorniarluta ilungersuussiuartariaqarpugut. (1 Korinthimiut 9:27) Kristumiut Romamiittut Paulusip ima allaffigai: „Ilissili naalassusersi tamani tusaamasaalerpoq, tamannalu pillugu tipaatsuutigaassi. Qanortoq ilisimassuseqaritsi ajunngitsuliornissamut pisuutitassaanasilu ajortuliornissamut.“ (Romamiut 16:19) Israelikkut 24.000-t ajortuliatik pillarneqaatigalugit toqutaasut assigalugit, kanngunartuliortut Jehovallu siunnersuutaanik sumiginnaasut allat qanittukkut taassumannga eqqartuunneqassapput. (Efesosimiut 5:3-6) Taamaattumik tusaalluta puiutuunngornissatsinninngarnit ’kinguaassiuutitigut inuunerlunneq nigorsimaniartuartariaqarparput’. — 1 Korinthimiut 6:18.
Jehovap uagutsinnut tunniussai pingaartittuartigik
20. Israelikkut Jehova qanoq misilissimavaat, sunalu kinguneralugu?
20 Kristumiut ilumoortut amerlanersaat kinguaassiuutitigut inuunerlulinngisaannassapput. Aammali Guutip iluarinngisaanik naammagittaatsumik isiginnittaaseqalernissarput mianersuutigisariaqarparput. Paulusi mianersoqqusilluni allappoq: „Aamma [Jehova, NV] misilinnaveertigu soorlu taakkua ilaasa misilissimagaat pulateriaarsunnillu toqunneqarlutik. Naammagittaallioqinasilu taakkua ilaasa naammagittaalliorsimanerattut inngilimillu toqutitsisumit toqutaallutik.“ (1 Korinthimiut 10:9, 10) Israelikkut Mosesimut Aronimullu — aap, allaat Guutimut — naammagittaalliorput manna tupinnartuliornikkut pisartik maalaarutigalugu. (4 Mosesi 16:41; 21:5) Jehova narrunarsarneqarpoq Israelikkut kanngunartuliormata, aammali naammagittaatsuunerat taamatulli ajuallaatigitigaa. Biibilimi oqaluttuap takutippaa naammagittaatsut amerlasuut pulateriaarsunnit toqunneqartut. (4 Mosesi 21:6) Siusinnerusukkut naammagittaallutik pikitsitsisut 14.700-nit amerlanerusut toqutaapput. (4 Mosesi 16:49) Taamaattumik Jehovap kamagittarnera misilinngisaannartigu tunniussai pillugit ataqqinninngitsuunitsigut.
21. (a) Paulusi isumassarsisitaalluni qanoq kajussaariva? (b) Jaaku 1:25 naapertorlugu qanoq iliortariaqarpugut pilluassagutta?
21 Paulusip uppeqatini allaffigigamigit mianersoqqussutini naggaserpai ima kajumissaarilluni: „Tamakku tamarmik taakkununnga nalliupput mianersoqqussutaallutik, allassimappullu uatsinnut ullut naggatissaannik angumerinnittunut ilitsersuutaallutik. Taamaattumik kinaluunniit patajaatsuusorisoq mianersorli orloqqunani.“ (1 Korinthimiut 10:11, 12) Israelikkutulli uaguttaaq Jehovamit pilluaqquneqangaartarpugut. Taakkuli assiginagit Guutip uatsinnut ajunngitsuliaasa pingaartinnissaat puiunngisaannartigu. Inuunerup isumakuluutaanit nanertugaagaangatta neriorsuutit nuanningaartut Biibilimiittut eqqarsaatiginissaat iluaqutaasorujussuuvoq. Jehovamut attaveqarnerput erlinnangaartoq eqqarsaatigitigu uatsinnullu suliassiissutigineqartutulli oqaluussiuarta. (Matthæusi 24:14; 28:19, 20) Taamaaliorutta pilluarnermik kinguneqanngitsoornavianngilaq, Biibilimi ima neriorsuuteqarmat: „Kiffaanngissutsilli inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq.“ — Jaaku 1:25. (wE 15/6 01)
Qanoq akissavigit?
• Tusaalluta qanoq puiutunngorsinnaavugut?
• Sooq Guutip naalalluinnarnissaa immikkut pingaaruteqarpa?
• Qanoq ’kinguaassiuutitigut inuunerlunneq nigorsimasinnaavarput’?
• Jehovap uatsinnut tunniussaanut qanoq isiginnittaaseqartariaqarpavut?
[Atuaqqissaarnermi apeqqutit]
[Qupp. 23-mi assiliartaq]
Jehovap tupinnangaartuliai iluaqutigisatik Israelikkut puiorpaat
[Qupp. 24-mi assiliartaq]
Jehovap innuttaasa ileqqussatigut najoqqutassiat qutsissut aalajangiusimajuarumavaat