’Ajunngitsumik ajortumillu immikkoortitsisinnaavit’?

’Naalakkap iluarisassaa sunaasoq misilittarniarsiuk.’ — EVFISUMIUT 5:10.

1. Ullumikkut inuuneq qanoq ajornakusoortigisinnaava, aamma sooq?

„NALUNNGILARA, [Jehova], inuup ingerlavissani nammineq aalajangigassarinngikkaa, angalaartup aalajangigassarinngilaa allorarnermi aalajaatsuutinnissaat.“ (Jeremia 10:23) Jeremiap malugisimasaa pingaarutilik ullumikkut maluginiartariaqarnerungaarpoq. Sooq? ’Ullut atugarliungaarfiusut’ Biibilimi siulittuutigineqartut inuuffigigatsigit. (2 Timotheusi 3:1) Ullut tamaasa aalajangigassaqartarpugut. Aalajangikkavut taakku — pingaaruteqarunik pingaaruteqanngikkaluarunilluunniit — tamarmik inuunitsinnut timikkut, misigissutsikkut anersaakkullu sunniuteqangaarsinnaapput.

2. Aalajangikkat suut soqutaanngippasinnerusinnaappat, kristumiulli tunniulluinnarsimasut tamakku qanoq isigisariaqarpaat?

² Ulluinnarni aalajangikkatta ilarpassui immaqa soqutaannginnerusutut isigiinnarpavut. Assersuutigalugu ullut tamaasa aalajangertariaqarpugut atisavut sorliit atissanerlugit, sutussanerluta, kikkut ilagissanerlugit ilaalu ilanngullugit. Eqqarsaatigivallaarnagit aalajangiinnartarpugut. Aalajangigassalli tamakku pingaaruteqannginneramik? Kristumiunut tunniulluinnarsimasunut atisalersorneq isikkorlu, nerisassat imigassallu, oqaloriaaserput pissusilersornerpullu eqqarsaatigalugit aalajangikkat Jehova Guutimut qutsinnerusaartumut kiffartornermut tamatigut nalunaajaataanissaat pingaaruteqarluinnarpoq. Apustili Paulusip oqaasiisa eqqaasippaatigut: „Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.“ — 1 Korinthimiut 10:31; Kolossemiut 4:6; 1 Timotheusi 2:9, 10.

3. Inuunermi aalajangigassat sorliit pingaaruteqarnerpaappat?

³ Aalajangikkat allat pingaaruteqarnerungaartarput. Assersuutigalugu aalajangeraanni katissalluni katissananiluunniit qularnanngilluinnarpoq tamanna inuunerup annersaanut ataavartumillu sunniuteqarumaartoq. Aap, eqqortumik aappassarsiorneq soqutaanngitsutut isigineqarsinnaanngilaq. * (Ussatit 18:22) Aammattaaq ikinngutissatsinnik, ilagisassatsinnik, ilinniakkatsinnik, suliffissatsinnik, aap, allaat aliikkutassatsinnik sukisaarsarutissatsinnillu  qinersinerput eqqarsaatigalugit anersaakkut peqqissutsitsinnut — taamaattumillu naassaanngitsumik inuunissatsinnut — pingaaruteqarlutillu aalajangiisuusarput. — Romamiut 13:13, 14; Efesosimiut 5:3, 4.

4. (a) Suna piginnaaneralugu ajussanngeqaa? (b) Apeqqutit suut misissortariaqarpavut?

⁴ Tamakku tamaasa eqqarsaatigalugit ajunngitsumik ajortumillu, imaluunniit ajunngissorisanik ajunngilluinnartunillu, immikkoortitsisinnaasariaqarpugut. „Ingerlavik inuup eqqortuusorisaralua tassaasinnaavoq toqumut aqqutaasoq,“ Biibilimi mianersoqqussuteqarpoq. (Ussatit 14:12) Taamaattumik aperisinnaavugut: Ajunngitsumik ajortumillu immikkoortitsisinnaaneq qanoq ineriartortissinnaavarput? Silatuumik aalajangiisariaqartilluta sumi siunnersortissarsiorsinnaavugut? Tamatumunnga tunngatillugu allat siornatigut maannakkullu qanoq iliorsimappat, sumillu kinguneqartumik?

Silarsuup ’ilisimaqqissaarniutai salloqittaataalu piunngitsut’

5. Silarsuaq kristumiut siulliit inuuffigisaat qanoq ittuua?

⁵ Ukiuni hundredelinni siullerni kristumiut silarsuaq Grækerit Romamiullu najoqqutassiaannik anguniagaannillu pingaartitsiffiusoq inuuffigaat. Siullermik Romamiut inooriaasiat pigissaarutinik ilorrisimaarnermillu ilisarnaatilik amerlasuut kajungernartippaat. Aappassaanik taamanikkut ilisimatuut Platonip Aristotelesillu ilisimaqqissaarniutaat, aammalu ilisimaqqissaarniutit nutaanerusut, soorlu epikuræerit stoikerillu eqqarsaataat, pingaartinneqartorujussuusarput. Ajoqersuiartortitatut angalanermi aappaanni apustili Paulusi Athenimut tikikkami ilisimaqqissaarniartut epikuræerit stoikerillu naammattorpai, taakkualu Paulusi ’oqaaserpassualittut’ imminnit pikkorlunnerusutut isigaat. — Apustilit Suliaat 17:18.

6. (a) Kristumiut siulliit ilaat sunik kajungerisaqarpat? (b) Paulusi qanoq mianersoqqusiva?

⁶ Taamaattumik tupinnanngilaq kristumiut siulliit ilaasa avatiminniittut inooriaasiat silassorissooqqusisoq imminullu nuannarisoq kajungerimmassuk. (2 Timotheusi 4:10) Inuiaqatigiinnut akuliusimasut ajunngitsorsiassarpassuaqarpasipput, aalajangigaallu silatusaarpasillutik. Silarsuaq naleqangaartumik tunniussassaqarpasippoq kristumiup tunniulluinnarsimasup inooriaaserinngisaanik. Kisianni apustili Paulusi mianersoqqusivoq: „Mianersoritsi napitinneqaqqunasi ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik.“ (Kolossemiut 2:8) Sooq Paulusi taama oqarpa?

7. Silarsuup matuma ilisimassusia qanoq naleqartigiva?

⁷ Paulusip taama mianersoqquai misigisimagami silarsuarmik kajungerinnittut navianartorsiortut. Oqaatsinik ’ilisimaqqissaarniutinik salloqittaatinillu piunngitsunik’ atuinera immikkut maluginiarnarpoq. Oqaaseq ’ilisimaqqissaarniummik’ nutserneqartoq isumaqavippoq „ilisimassutsimik nuannarisaqarneq noqqaassuteqarnerlu“. Ilisimassuseqalerniarneq ajunngivikkaluarpoq. Tassami, Biibilimi, ingammik Ussatit-ni, eqqortumik ilisimasaqarnerup ilisimassutsillu noqqaassutiginissaannut kajumissaaruteqarpoq. (Ussatit 1:1-7; 3:13-18) Paulusilli ’ilisimaqqissaarniutit’ ’salloqittaatinut piunngitsunut’ atassuteqartippai. Ima paasisariaqarpoq Paulusip ilisimassuseq silarsuup neqeroorutigisaa imaqanngitsutut salloqittaatitullu isigigaa. Ballonngimut pullanneqarsimasumut pullaaruteriaannaasumut assersuunneqarsinnaavoq. Asuleernerussaaq, aap, ajunaarutaassalluni, ajunngitsumik ajortumillu aalajangiiniarnermini silarsuup ’ilisimaqqissaarniutai salloqittaatalu piunngitsut’ pullaaruteriaannaasut tunngavigigaanni.

 „Ajortumik ajunnginneraasut ajunngitsumillu ajorneraasut“

8. (a) Kikkut siunersortissarsiarineqartarpat? (b) Qanoq siunnersuisarpat?

⁸ Ullumikkut allaanerungaanngilaq. Inuit suliniutagaanni tamangajanni immikkut ilisimasalippassuaqarpoq. Aappariinnut ilaqutariinnullu siunnersuisoqarpoq, aviisini apeqquteqarfinni aaqqissuisoqarluni, nammineq piumassutsiminnik sulisunik terapeuteqarluni, ullorissat najoqqutaralugit siulittuisartoqarluni, anersaarsiortoqarluni allarpassuarnillu — akilerneqarlutik — siunnersuisartoqarluni. Qanorliuna siunnersuisartutut? Akutsunngitsumik Biibilip ileqqussatigut najoqqutassiai sumiginnarneqartarput ileqqulersutut oqaatigineqartunik taarserneqartarlutik. Assersuutigalugu naalakkersuisut anguteqatinoortartut arnaqatinoortartullu ’aappariittut’ akueriumanngimmatigik Canadami aviisimi allaaserisami pingaarnermi The Globe and Mail-imi aaqqissuisut allapput: „Eqqumiitsorujussuuvoq ukiumi 2000-imi aappariit asaqatigiittut imminnullu tunniusimalluinnartut kissaatiginerpaasaat akuerineqarsinnaanngimmat tamarmik angutaagamik imaluunniit tamarmik arnaagamik.“ Ullumikkut immerfinnittarneq imaappoq assuarinnani paasinnittuuneq. Amerlasuut isumaqarput suut tamarmik assigiinngitsumik isigineqarsinnaasut, taavalu suup eqqortuuneranik eqqunngitsuuneranillu najoqqutassaaruttoq. — Tussiaat 10:3, 4.

9. Innuttaaqatigiinni ataqqisaagaluartut qanoq iliuuseqarajuppat?

⁹ Allat innuttaaqatigiinni aningaasatigullu iluatsittut — inuit pisuut tusaamasallu — ilaarniartarpaat aalajangigassaqaraangamik. Naak pisuut tusaamasallu ullumikkut ataqqineqartaraluartut, ileqqorinnerit soorlu ilumoorneq tatiginassuserlu oqaasiinnaagajupput. Pissaaneqarusullutik pisuunngorusullutillu amerlasuut nangaanatik ileqqussatigut najoqqutassiat sumiginnartarpaat. Tusaamasanngorniarlutik allanillu iluarineqarniarlutik ilaat ileqqussatigut najoqqutassat akuerisaasut imminiiginnarlugit eqqumiilluinnartumik tupannartumillu pissusilersortarput. Tamatuma kingunerisaanik innuttaaqatigiinni aningaasanik pingaartitsivallaartuni maleruutiasunilu ima oqariaaseqarpoq: ’Suut tamarmik akuerisaapput.’ Tupigusutigissanerparput suup ajunngitsuunera suullu ajortuunera eqqarsaatigalugit inuit paatsiveerullutillu tammartitaammata? — Lukasi 6:39.

10. Esajap ajunngitsoq ajortorlu pillugit oqaasii qanoq uppernarsarneqarpat?

¹⁰ Sumi tamaani siunnersorneqannginnerup kinguneri alianartut takusarpavut — aappariit ilaqutariillu avissaartilertut, ikiaroornartumik imigassamillu atornerluineq, inuusuttut inupilunnut ilaasut nakuusertartut, tamalikanneq kinguaassiuutitigullu nappaatit tunillaattartut, aali ilaminiinnai. Qanorli  pissutsit allaanerusinnaagamik inuit najoqqutassiat tamaasa akueriumanngippatigik suullu ajunngitsuuneranik ajortuuneranillu paasitinneqarusunngippata? (Romamiut 1:28-32) Soorlu pruffiiti Esaja nalunaarsimasoq: „Eqqanaq taakku ajortumik ajunnginneraasut ajunngitsumillu ajorneraasut, taartumik qaamasunngortitsisut qaamasumillu taartunngortitsisut, sungarnitsumik tungusunnitsunngortitsisut tungusunnitsumillu sungarnitsunngortitsisut. Eqqanaq taakku imminnut ilisimasuutittut imminnullu sianisuutittut.“ — Esaja 5:20, 21.

11. Ajunngitsumik ajortumillu immikkoortitsissagutta imminut tatigineq sooq silatusaarnerunngila?

¹¹ Guutip itsaq juutit ’imminnut ilisimasuutittunik’ nassueqqusinera, ajunngitsumik ajortumillu immikkoortitsiniarnitsinni uagut nammineq siuneqassusitsinnik tatiginninnginnissatta pingaaruteqarnera erseqqissarneqarpoq. Ullumikkut inuppassuit isumaqarput ’uummatiminnut tusarnaaginnarsinnaallutik’, imaluunniit ’ajunngitsuusorisaminnik’ iliuinnarsinnaallutik. Tamanna silatusaarnerua? Biibili naapertorlugu taamaanngilaq, toqqaannartumimmi allassimavoq: „Tamanit annerusumik uummat tatigisassaanngitsuuvoq. Katsorsagassaanngilaq; Kiammi inuup uummammiugisai ilisimasinnaavai.“ (Jeremia 17:9) Aalajangernialeruit inuk tatigisassaanngitsoq isumassuisinnaanngitsorlu siunersortissarsiarissaviuk? Soorunami naamik. Tassami, qularnanngitsumik inuup taamaattup siunnersuutaata akerlianik iliorniarputit. Taamaattumik Biibilimi ima peqquneqarpugut: „Silaqassutsiminik tatiginnittoq sianiitsuuvoq, ilisimassusermilli pigisaqarluni inuusoq annaanneqartussaavoq.“ — Ussatit 3:5-7; 28:26.

Guutip suna iluarisarineraa ilinniartariaqarparput

12. Sooq Guutip piumasaa sunaanersoq paasisimanerlugu qulakkeertariaqarparput?

¹² Ajunngitsumik ajortumillu immikkoortitsiniaraangatta silarsuup matuma ilisimassusianut tatiginnittussaannginnatta imminulluunniit tatigisariaqannginnatta, qanoq iliortariaqarpugut? Apustili Paulusip siunnersuutaa paasinarluinnartoq manna malugeriaruk: „Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.“ (Romamiut 12:2) Sooq Guutip piumasaa sunaanersoq paasisimanerlugu qulakkeertariaqarparput? Biibilip taamaaliornissatsinnut pissutissaqartippaatigut: „Soorlumi qilak nunamit qutsinnerusoq, taama aqqutigisakka ilissi aqqutigisassinnit qutsinnerupput pilersaarutikkalu pilersaarutissinnit qutsinnerullutik.“ (Esaja 55:9) Taamaattumik  silaqassutsitta imaluunniit ilumoortuusorisatta tatiginerunissaaninngarnit ’Naalakkap iluarisaa’ sunaanersoq paasiniaqqullugu oqaaqqissaarneqarpugut. — Efesosimiut 5:10.

13. Jiisusip Johannesi 17:3-mi oqaasiisa qanoq takutippaat Guutip iluarisai ilisimasariaqarivut?

¹³ Jiisusi Kristusip tamatuma pingaaruteqarnera erseqqissarpaa oqarami: „Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Oqaaseq ’ilisimanninnermik’ nutserneqartoq isumaqartorujussuuvoq. Vine’s Expository Dictionary naapertorlugu „isumaqarpoq ilisarisimannilersup ilisimannilersulluunniit ilisarisimaligaatalu ilisimaligaasaluunniit ataqatigiinnerat; ilisimaligai ilisarisimannilersumut naleqarput pingaaruteqarlutillu, taamaatumillu attaveqatigiillualerput.“ Allamut qanittumik attaveqarneq kinaaneranik qanorluunniit atugaqarneranik ilisimanninnerinnaanani isumaqarneruvoq. Aamma ilisimasariaqarpai inuup taassuma iluarisai iluarinngisaalu, pingaartitai najoqqutassiaalu — tamakkulu ataqqisariaqarlugit. — 1 Johannesi 2:3; 4:8.

Paasinnissinnaanerput sungiusartariaqarparput

14. Paulusi naapertorlugu anersaakkut naalungiarsuit inersimasunngorluarsimasullu pingaartumik suna allaassutigaat?

¹⁴ Qanorli ajunngitsumik ajortumillu immikkoortitsinnaaneq ilikkarsinnaavarput? Paulusip ukiuni hundredelinni siullerni hebræerinut kristumiunut allagaani tamanna akineqarpoq: „Immummimmi inuussuteqartoq kinaluunniit iluarnermut atasunik misilittagaqarsimanngilaq, naalungiaavormi. Nerisassalli tamuasarissat nerineqartussaapput inersimasunngorluarsimasuni piginnaassutsimik atortuinnarnerisigut sungiussisimasunit ajunngitsumik ajortumillu immikkoortitsisinnaalerlutik.“ Tassani Paulusip ’immuk’, allassimasami siuliani ’Guutip oqaasiini ilinniaqqaagassatut’ eqqartorlugu, ’nerisassat tamuasarissat’ akerliattut taavaa, tamakkulu nerineqartussaapput ’inersimasunngorluarsimasunit’ ’piginnaassutsimik atortuinnarnerisigut sungiussisimasunit ajunngitsumik ajortumillu immikkoortitsisinnaalerlutik’. — Hebræerit 5:12-14.

15. Eqqorluartumik Guutimik ilisarsiniaraanni sooq tamaviaartariaqarpa?

¹⁵ Taamaattumik pingaarnerpaatillugu tamaviaarutigisariaqarparput Guutip najoqqutassiaanik oqaasiani Biibilimi allassimasunik eqqorluartumik paasiniaanissarput. Susinnaanerluta susinnaannginnerlutalu allattukkanik malittarisassaateqanngilagut. Biibili taamaattuunngilaq. Akerlianik Paulusi nassuiaavoq: „Allakkat Guutimit anersaarfigineqartut tamarmik iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut, inuk Guutip pigisaa inerilluinnaqqullugu ajunngitsuliornernut tamanut piginnaanngorsagaalluni.“ (2 Timotheusi 3:16, 17) Ajoqersuineq, uppernarsaaneq ilitsersuinerlu iluaqutigissagutsigik paasinnissinnaanerput eqqarsarsinnaanerpullu atortariaqarpavut. Tamaviaarnartuusinnaavoq,  taamaaliornerulli — inerilluinnarnerup, ajunngitsuliornernut tamanut piginnaanngorsagaanerup — kingunissai imminut akilerluarsinnaapput. — Ussatit 2:3-6.

16. Piginnaassutsimik, paasinnissinnaanermik, sungiussisimaneq qanoq paasisariaqarpa?

¹⁶ Paulusip oqaatigisaatut, inersimasunngorluarsimasut ’piginnaassutsimik atortuinnarnerisigut sungiussisimapput ajunngitsumik ajortumillu immikkoortitsisinnaalerlutik’. Tamanna pingaarnerpaavoq. Oqaatsit ’piginnaassutsit atortuinnarnerisigut sungiussineq’-mik nutserneqartut isumaqavipput ’paasinnissinnaanerup sungiusarneqarnera (eqaarsaartartutut)’. (Kingdom Interlinear Translation) Eqaarsaartartoq sungiussisimalluartoq eqaarsaarnermi atortut assigiinngitsut atorlugit takutitsisinnaavoq, allaat sukkangaarami nusussisimanninnerup nukinganik pinngortitalluunniit inatsisaannik allanik atorunnaarsitserpasilluni. Timini aqulluartuaannarsinnaavaa, nalunngilluinnarpaalu takutitsinermini iluatsitsissaguni qanoq aalariaaseqartariaqarluni. Taamaaliorsinnaavoq tamaviaarluni sungiusartuarsimagami.

17. Qanoq anersaakkut ittumik eqaarsaartartuusinnaavugut?

¹⁷ Uaguttaaq eqaarsaartartutut anersaakkut ittumik sungiusartariaqarpugut, silatusaartumik aalajangiiuartarnissarput qinersiuarnissarpullu qulakkeerniarutsigu. Susoqaraluarpalluunniit malugissutivut timerpullu aqulluinnartariaqarpavut. (Matthæusi 5:29, 30; Kolossemiut 3:5-10) Assersuutigalugu tiingasulersaarutinik isiginnaarnaveersaartarpit, nipilersoriaatsinillu oqaatsinillu ajortunik tusarnaarnaveersaartarlutit? Ilumoorpoq silarsuarmi anersaakkut peqqinnanngitsunik ulikkaartumi inuusugut. Namminerli aalajangertussaavarput tamakku uummatitsinni isummatsinnilu sorlanitsissanerlugit. Tussiaasiortoq ima oqartoq ilaarsinnaavarput: „Iluanngitsuliungaarnermik takusaqarumanngilanga. Inatsisinik unioqqutitsisoq uumigaara, uannut qanillissanngilaq. . . . Uanga illunni ineqassanngillat peqquserluttumik iliortut. Salluliorluni oqaluttoq atassanngilaq isima saanni.“ — Tussiaat 101:3, 7.

Paasinnissinnaanerput atorlugu sungiusartariaqarparput

18. Paulusip ’paasinnissinnaanerup sungiusartuarnissaanik’ nassuiaanera qanoq paasisariaqarpa?

¹⁸ Eqqaamajuk ’atortuinnarneratigut’ paasinnissinnaanerput sungiusarsinnaagipput ajunngitsumik ajortumillu immikkoortitsinissatsinnut. Allatut oqaatigalugu, aalajangigassaqalernerit tamaasa paasinnissinnaanerput atortariaqarparput paasiniarlugu najoqqutassiat Biibilimeersut suut pineqartumut attummassuteqarnersut qanorlu atorneqarsinnaanersut. Atuagassiat Biibililersaarutit ’kiffap ilumoortup silatuullu’ tunniuttagaasa atuaqqissaarnissaat ileqquliuttariaqarparput. (Matthæusi 24:45) Soorunami kristumiunut inersimalluartunut ikiortissarsiorsinnaavugut. Iluaqutigingaassavarpulli Guutip oqaasianik nammineq misissuinerput, Jehovalu siulersorneqarnissamik anersaavanillu qinnuigalugu. — Efesosimiut 3:14-19.

19. Paasinnissinnaanerput sungiussisikkiartuaarutsigu qanoq pilluaqqusaassaagut?

¹⁹ Paasinnissinnaanitta sungiussisikkiartuaarnerata siunertaraa ’meeraajunnaassasugut sianiitsut, tamanut tamaanga nassataritittarunnaarluta malinnit ajoqersuutit suulluunniit anoraannit inuillu immeraammik nalussinerannit, taakkua peqqusersusaarlutik aqqutissaanngitsunut tammarnartunut ingerlakkaangatigut’. (Efesosimiut 4:14) Guutilli najoqqutassiai naapertorlugit aalajangiisarutta, aalajangiinivut silatusaartuussammata iluaqutigissavavut, uppeqatitta ingammillu Ataatatta qilammiusup nuannaarutigissavaat. (Ussatit 27:11) Ulluni makkunani artornartuni pilluaqqusaanassusia illersuutaassusialu! (wE 1/8 01)

[Quppernerup ataani ilanngussaq]

Makku nassuiarsinnaavigit?

• Silatuumik aalajangiisinnaajumalluta sumik piginnaaneqartariaqarpugut?

• Ajunngitsumik ajortumillu immikkoortitsissagutta sooq inuit nuimasut namminerluunniit misigissutsitta tatiginissaat silatusaarnerunngila?

• Sooq paasiniartariaqarparput aalajangiinivut Guutip iluarinerai, qanorlu taamaaliorsinnaavugut?

• ’Paasinnissinnaanerup sungiusarnera’ qanoq paasisariaqarpa?

[Atuaqqissaarnermi apeqqutit]

[Qupp. 10-mi assiliartaq]

Pisuut tusaamasallu siunersortissarsiarinissaat iluaqutaanavianngilaq

[Qupp. 11-mi assiliartaq]

Eqaarsaartartutut timerput malugissutivullu tamaasa aqulluinnartariaqarpavut