Atuartartut apeqqutaat

Danielip ikinngutai pingasut Durap qooruani inuusaliap Nebukadnesarip nappagaata sioraani qeqarmata Danieli sumiippa?

Tamanna Biibilimi nalunaarutigineqanngilaq, Danielilu misilinneqarnerup nalaani sumiinnersoq ullumikkut qularnaatsumik oqaatigineqarsinnaanngilaq.

Ilaasa Danielip Nebukadnesarimit qaffasinnerusumik atorfeqartitaanera imaluunniit Sjadrakimit, Mesjakimit Abed-Negomillu salliutitaanerunera, taamaattumillu pinngitsoorani Durap qooruaniittariaqannginnera tikkuarsimavaat. Danieli 2:49-mi piffissap ilaani ikinngutiminit pingasunit qaffasinnerusumik atorfeqarsimanera ersersinneqarpoq. Inuusalialli sioraani katersuuttunut peqataanngitsoorneranut ilumut pissutaanersoq oqaatigisinnaanngilarput.

Danielip peqataannginnera nassuiarniarlugu ilaasa eqqarsaatersuutigivaat pisortatigoortumik suliassaqarluni aallarsimasinnaasoq imaluunniit napparsimasinnaasoq taamaattumillu peqataasimanani. Tamannali Biibilimi oqaatigineqanngilaq. Qanorluunniilli ikkaluarpat iliuusianut assuarlernissamut pissutissaqanngilaq, pissutissaqarsimasuuppammi Babylonimi naalagaanertat sinngasut qularnanngitsumik unnerluutiginninnissaminnut atorsimassagaluarpaat. (Danieli 3:8) Danielip pisimasup tamatuma siornatigut kingornatigullu unamminiarnartunik sunilluunniit nalaataqaraluarluni assuarnaassutsi ilumoorluni attattuarpaa. (Danieli 1:8; 5:17; 6:5, 11, 12) Danielip Durap qooruani najuutinnginneranut suna pissutaanersoq Biibilimi eqqaaneqanngikkaluartoq, eqqortup akerlianut akuersiinnarani Jehova Guutimut aalajaattuarsimanera qularisariaqanngilarput. — Ezekieli 14:14; Hebræerit 11:33. (wE 1/8 01)