Ineriartornerit tamanit takuneqarsinnaali

„Tamakku tamaasa isumaginiakkit inuuseralugillu ineriartornerit tamanit takuneqarsinnaaqqullugu.“ — 1 TIMOTHEUSI 4:15.

1. Qanoq nalunngissinnaavarput paarnaq inerisimanersoq nerisariaannaanersorlu?

TAKORLOORIARUK paarnaq mamarisat — ferskeni, pære, iipili allaluunniit. Nalussagunanngilat qaqugu inerissimassanersoq nerineqarsinnaalissanersorlu. Tikkata, qalipaataata qanorlu issusiata mamarsassamaartippaatit. Kiiginnarlugu malugissavat qanoq tungusunnitsigalunilu isseqartigisoq. Mamaq!

2. Inersimalluarneq qanoq malugineqarsinnaava, allanullu attaveqarnermut qanoq pingaaruteqarpa?

² Misigillatsiagaq nuannersorli tamanna inuunermi allanut assersuunneqarsinnaavoq. Soorlu paarnap inerissimanera takuneqariaannaasoq, inuup anersaakkut inersimalluarnera aamma takuneqarsinnaajuaannangajappoq. Inersimalluarneq taama ittoq inuup siuneqassusiatigut, paasisaqassusiatigut ilisimassusiatigullu ersertarpoq. (Jobi 32:7-9) Inuit taamaattunik pissusillit ilagalugit suleqatigalugillu nuannerluinnartarpoq. — Ussatit 13:20.

3. Jiisusip inunnik nalimini inuusunik oqaatiginninnerata inersimalluartuuneq pillugu sumik paasitippaatigut?

³ Inuk timikkut inersimalluaraluarluni misigissutsikkut anersaakkullu inersimalluartuusariaqanngilaq, tamannalu oqalunneratigut iliuusiatigullu takuneqarsinnaassaaq. Assersuutigalugu Jiisusi inuit naalasseriitsut nalimini inuusut eqqartoramigit oqarpoq: „Johannesimi tikiummat nerinanilu imigassartornanilu taava oqarput: ’Anersaapiloqarpoq.’ Inuullu Ernera tikiummat nerillunilu imigassartorlunilu, oqarput: ’Takusiuk una nerrersooq imerajuttorlu, ilanngaaserisut ajortuliortullu ikinngutaat!’“ Naak Jiisusip oqaluffigisani inersimasuugaluartut inersimalluanngitsutut, ’meeqqatut’ pissusilersornerarpai, nangillunilu oqarpoq: „Taamaattoq, ilisimassuseq eqqortuutitaavoq suliamigut.“ — Matthæusi 11:16-19.

4. Sutigut siumukarsinnaavugut inersimallualersinnaallutalu?

⁴ Jiisusip oqaasiisa takutippaat ilumoortumik ilisimassuseqaraanni, iliuutsitsigut angusaqarluarnitsigullu takuneqarsinnaassasoq inersimalluartuunermut ersiutaalluni. Tamatumunnga atatillugu Paulusip Timotheusimut siunnersuutaa maluginiaruk. Timotheusip anguniagarisariaqagai tamaasa eqqartoreerlugit Paulusi allappoq: „Tamakku tamaasa isumaginiakkit inuuseralugillu ineriartornerit tamanit takuneqarsinnaaqqullugu.“ (1 Timotheusi 4:15) Aap, kristumiu inersimalluarnissamut siumukaraangat ’takuneqarsinnaasarpoq’. Kristumiutut inersimalluarneq qaamanertut ippoq isertorneqarsinnaananilu. (Matthæusi 5:14-16) Taamaattumik misissorluariartigu qanoq siumukarsinnaallutalu inersimallualersinnaasugut: (1) ilisarsiartornitsigut, paasinnikkiartornitsigut ilisimassuseqariartornitsigullu aammalu (2) anersaap inerititaanik ineriartortitsinitsigut.

Uppernermi ilisarsinermilu ataasiussuseqarneq

5. Inersimalluarneq qanoq nassuiarneqarsinnaava?

⁵ Qinerlerfissiani amerlanerni inersimalluarneq najoqqutassiaq naapertorlugu  ineriartorunnaarnertut, naammalluarnertut inerilluarsimanertullu nassuiarneqartarpoq. Eqqaaneqareersutut paarnaq inerittarpoq ineriartorunnaarluni isikkua, qalipaataa, tikka mamaalu kissaatigisatut ilippata. Tassami, inersimalluarneq isumaqarsinnaavoq pitsaalluinnarneq, naammalluarneq allaallu naammalluinnarneq. — Esaja 18:5; Matthæusi 5:45-48; Jaaku 1:4.

6, 7. (a) Suup takutippaa Jehovap kiffami tamarmik anersaakkut inersimalluarnissaat soqutigingaaraa? (b) Anersaakkut inersimalluarneq sumut attuumassuteqarpa?

⁶ Jehovap soqutigaa imminut pallorfiginnittut tamarmik anersaakkut inersimalluartuussasut. Taamaattumik kristumiut ilagiivi aqqutigalugit pitsaasumik ikiorneqarnissarput isumagisarpaa. Kristumiut Efesosimiittut apustili Paulusip ima allaffigai: „Taassumalu ilaat apustilinngortippai, allat pruffiitinngortillugit, allat iivangkiiliulersaartunngortillugit allallu paarsisunngortillugit ajoqersuisunngortillugillu, illernartut piukkunnarsarumallugit kiffartortuunissamut Kristusip timaa ineriartortinneqassammat, tamatta anngutserluta uppernermi ataasiunissamut Guutillu erneranik ilisarsinissamut tassaalluta inuk inerluarsimasoq, tassa ima alliartorsimasoq Kristusip peqangaassusianut ineqarfiussalluni naammaattunngorluni. Taava meeraajunnaassaagut sianiitsut, tamanut tamaanga nassataritittarunnaarluta malinnit ajoqersuutit suulluunniit anoraannit inuillu immeraammik nalussinerannit, taakkua peqqusersusaarlutik aqqutissaanngitsunut tammarnartunut ingerlakkaangatigut.“ — Efesosimiut 4:11-14.

⁷ Versini taakkunani Paulusip nassuiarpaa Guutip ilaatigut ilagiit anersaakkut ima ikiorluartigigai ilagiinniittut tamaasa (1) ’uppernermi ataasiunissamut ilisarsinissamullu annguteqqullugit’, (2) tassaaqqullugit ’inerluarsimasut’ aamma (3) ’alliartoqqullugit Kristusip peqangaassusianut ineqarfiussallutik naammattunngorlutik’. Taava aatsaat anersaakkut „meeraajunnaassaagut sianiitsut, tamanut tamaanga nassataritittarunnaarluta“ ajoqersuutinit eqqunngitsunit. Paasivarput kristumiutut inersimalluarnissamut siumukarneq „uppernermi ataasiunissamut Guutillu erneranik ilisarsinissamut“ attuumassuteqaqisoq. Paulusip oqaasii arlalinnik pingaartortaqarput malugisariaqakkatsinnik.

8. ’Uppernermi ilisarsinermilu atasiujuassagaanni’ suna pisariaqarpa?

⁸ Siullermik ’ataasiujuartoqartariaqarmat’ kristumiup pingaartumik upperneq ilisarsinerlu eqqarsaatigalugit uppeqatini attaveqarfigalugit isumaqatigilluinnartariaqarpai. Biibilimik paasinninnermut atatillugu nammineq isummani ilungersuutigalugit illersorniassanngilai. Akerlianik sallusuissut Jehovap ernini Jiisusi Kristusi ’kiffarlu ilumoortoq silatoorlu’ aqqutigalugit saqqummersitaa tatigilluinnassavaa. Kristumiut atuagassiaataat, ataatsimiinnerit ataatsimeersuarnerillu aqqutigalugit aalajangersimasumik „piffissaq eqqorlugu“ anersaakkut nerisassiissutigineqartut nerisarutsigit, uppernermi ilisarsinermilu ’ataasiujuarsinnaavugut’. — Matthæusi 24:45.

9. Oqaaseq ’upperneq’ Paulusip Efesosimiunut allakkamini eqqartugaa nassuiaruk.

 ⁹ Aappassaatut ’upperneq’ tassaanngilaq kristumiup nammineq uppernera, tassaallunili upperneq ataatsimut isigalugu, uppernerup ’silissusia takissusialu portussusialu itissusialu’. (Efesosimiut 3:18; 4:5; Kolossemiut 1:23; 2:7) Aap, kristumiu qanoq uppeqatiminut ataasiussuseqassava ’uppernerup’ ilaannaa aalajangersimasoq upperiguniuk akueriguniulluunniit? Taamaattumik Biibilimi ajoqersuutigineqartut tunngaviusut ilisimaannarnissaat sallusuissummilluunniit ilaannakuusumik paasinninneq naammanngiinnassanngilarput. Akerlianik Biibilip atuaqqissaarnissaanut iluaqutaasinnaasut tamaasa Jehovap peqatigiissortani aqqutigalugit pilersitai atorluarusuttariaqarpavut. Sapinngisatsinnik Guutip piumasaanik siunertaanillu eqqorluartumik tamakkiisumillu paasisaqarniartariaqarpugut. Tamanna anguniarlugu Biibilip Biibililersaarutillu atuarnissaat atuaqqissaarnissaallu, Guutip ikiuinissaanik siulersuinissaanillu qinnuiginissaa, kristumiut ataatsimiinnerisa aalajangersimasumik najuuffigisarnissaat, Guutip naalagaaffianik nutaarsiassap nuannersup oqaluussissutigisarnissaa ajoqersuganngortitsinissarlu piffissaqarfigisariaqarpavut. — Ussatit 2:1-5.

10. Efesosimiut 4:13-imi allassimasoq „tamatta anngutserluta“ qanoq paasisariaqarpa?

¹⁰ Aamma soqutiginaateqarpoq Paulusip unnersuussinini ima aallartimmagu: „Tamatta anngutserluta“. Oqaaseq „tamatta“ eqqarsaatigalugu Biibililersaarummi nassuiarneqarpoq isumaqanngitsoq ataasiakkaarluta immikkuutaarluta, isumaqarlunili tamatta ataatsimut’. Allatut oqaatigalugu tamatta immikkut, qatanngutigiit tamarmiusut peqatigalugit, kristumiutut inersimallualernissaq ilungersuutigisariaqarparput. The Interpreter’s Bible-imi allassimavoq: „Inuup kisimiilluni anersaakkut inersimalluarneq angusinnaanngilaa, soorluttaaq timip ilaa ataaseq ineriartorsinnaanngitsoq timi tamarmi ineriartorluanngippat.“ Paulusip kristumiut Efesosimiittut eqqaasippai „illernartut tamaasa peqatigalugit“ uppernerup annertussusii tamaasa paasiniartariaqaraat. — Efesosimiut 3:18.

11. (a) Anersaakkut siumukarneq qanoq paasisariaqarpa? (b) Taamaaliussagutta qanoq iliortariaqarpugut?

¹¹ Paulusip oqaasiisa takutippaat anersaakkut siumukassagaanni isummap ilisarsinermik ilisimasarpassuarnillu immersornissaa naammanngitsoq. Kristumiup inersimalluartup ilisimasani allanut malugeqqusaarutiginianngilai. Akerlianilli Biibilimi allassimavoq: „Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.“ (Ussatit 4:18) Aap, allassimavoq ’aqqusininnguaq’ qaammarissiartuinnartoq, inuit ataasiakkaat pinnatik. Biibilimik Jehovap innuttaminik paasinnikkiartuaartitsineranut ilungersorluta malinnaaniartuaannarutta, anersaakkut siumukassaagut. Tamanna isumaqarpoq siumukartariaqartugut, tamattalu taamaaliorsinnaavugut. — Tussiaat 97:11; 119:105.

„Anersaap inerititai“ ineriartortittariaqarpavut

12. Anersaakkut siumukarniarnitsinni sooq anersaap inerititaasa ineriartortinnissaat pingaaruteqarpa?

¹² Soorlu paasereeripput ’uppernermi ataasiunissaq ilisarsinissarlu’ pingaaruteqartut, inuunermili anersaap inerititaasa ineriartortinnissaat ersersinnissaallu aamma taama pingaaruteqartigaaq. Sooq? Pissutsit taakku allanut ineriartornartuullutillu iluaqutaammata. Soorunami anersaakkut inersimalluarnissaq noqqaassutiginngilarput pissuserinnissarput siunertariinnarlugu. Aap, Guutip anersaavanit siulersorneqaraangatta anersaakkullu  ineriartoraangatta isiginnittaatsikkut ileqqutigullu allanngortarpugut. „Anersaami inuussaasi uinngullu pilerissusii malinnagit,“ apustili Paulusi allappoq. — Galatiamiut 5:16.

13. Allanngoriartorneq suna siumukarnermut uppernarsaataalluarpa?

¹³ Paulusip nangilluni „uinngup suliai“ amerlallutillu ’ilisimaneqarluartut’ eqqaavai. Guutip piumasaqaataa ilisimalinngikkallaratsigu inuunerput silamiut eqqarsariartaasiannit inooriaasiannillu ilusilerneqartarpoq, immaqalu Paulusip eqqaasaasa ilaannit sunnerneqartarluni: „Kinguaassiuutitigut inuunerlunneq, mingunnartuliorneq, ileqqorlunneq, guutipilussiorneq, ilisiinneq, akerariinnerit, saqitsaanneq, sinnganeq, kamajassuseq, namminissarsiorneq, assuariinnerit, immikkoorniarneq, qinngarsuinerit, imerajunneq, inuulluarumatuallaarnerit tamakkualu taamaaqataat.“ (Galatiamiut 5:19-21) Anersaakkulli siumukariartortilluta „uinngup suliai“ tamakku kissaatiginanngitsut ajugaaffigisarpavut ’anersaap inerititaanik’ taarserlugit. Allanngorneq taamaattoq tamanit malugineqarsinnaasoq kristumiutut inersimalluarnissamut siumukarnitsinnut ersiutaavoq. — Galatiamiut 5:22.

14. Oqaatsit ’uinngup suliai’ aamma ’anersaap inerititai’ nassuiakkit.

¹⁴ Oqaatsit ’uinngup suliai’ aamma ’anersaap inerititai’ maluginiakkit. Uinngup suliai Paulusip eqqaasai inuup piaarinerata imaluunniit uinngup ajortiliusup sunniinerata kingunerai. (Romamiut 1:24, 28; 7:21-25) Oqaatsilli ’anersaap inerititai’ pineqaraangata takutinniarneqartarpoq Guutip anersaava sunniuteqarluaraangat pissutsit eqqaaneqartut ineriartortinneqartartut — tassaanngilaq inuup nammineq kinaassutsiminik pissusiminilluunniit ineriartortitsinera. Soorluttaaq orpik paarineqarluartoq inerititaqartartoq, inuk aamma anersaap inerititaanik inerititaqassaaq anersaaq illernartoq inuunerani sunniuteqarluaraangat. — Tussiaat 1:1-3.

15. Sooq pingaaruteqarpa ’anersaap inerititaasa’ tamarmik soqutiginissaat?

¹⁵ Malugiuttaaq Paulusip oqaaseq ’inerititat’ atoraangagu pissutsit kissaatiginartut eqqaasai tamarmik pineqartartut. * Anersaap assigiinngitsunik inerititaqarnera isumaqanngilaq taakkunannga nammineq iluarinerusatsinnik qinersiinnarsinnaasugut. Pissutsit Paulusip eqqartugai — asanninneq, nuannaarneq,  eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq imminullu naalakkersinnaaneq — tamarmik pingaaruteqarput, ineriartortikkutsigillu inuk nutaaq atisinnaavarput. (Efesosimiut 4:24; Kolossemiut 3:10) Immaqa pissutsit inunnguuserisavut pissutsinik allanik ineriartortitsinissatsinnut ajornannginnerutitsissapput, pingaaruteqarporli Paulusip eqqaasai tamaasa soqutigissallugit. Taava Kristusip pissusii malikkuminarnerutissavavut. — 1 Petrusi 2:12, 21.

16. Suna siunertaralugu kristumiutut inersimalluarnissaq anguniarparput, qanorlu taamaaliorsinnaavugut?

¹⁶ Paulusip oqaasii pingaartumik ilinniarfigisinnaavavut: Kristumiutut inersimallualernissap siunertarinngilaa ilisarsingaalernissaq ilisimasaqangaalernerlu imaluunniit inuttut akimarpalunnissaq, siunertaraali inuunitsinni Guutip anersaavata sunniuteqarluarnissaa. Eqqarsaatitsigut iliuutsitsigullu Guutip anersaavanit qanoq siulersorneqartiginerput apeqqutaalluni, anersaakkut inersimallualissaagut. Qanoq tamanna angusinnaavarput? Isumatsinnut uummatitsinnullu Guutip anersaava ammaattariaqarparput. Taamaaliorsinnaavugut kristumiut ataatsimiinneri aalajaalluta najuuffigisarutsigit peqataaffigalugillu. Aamma aalajangersimasumik Guutip oqaasia atuaqqissaarlugulu eqqarsaatigeqqissaartariaqarparput allanullu attaveqarnitsinni aalajangigassaqaraangattalu najoqqutassiaanit siulersortilluta. Taamaaliorutta ineriartornerput qularnanngitsumik allanit takuneqarsinnaassaaq.

Ineriartornerit Guutimut ataqqinaataatiguk

17. Ataatatta qilammiusup ataqqinarsisinnissaanut ineriartorneq qanoq attuumassuteqarpa?

¹⁷ Pingaarnerpaamilli ineriartornerput takuneqarsinnaasoq uagutsinnut ataqqinaataanngilaq, Jehovamulli, Ataatatsinnut qilammiusumut, anersaakkut inersimalluarnissamik periarfissiisumut, ataqqinaataassaaq. Jiisusip toqunissani sioqqullugu unnukkut ajoqersukkani ima oqarfigai: „Inerititaqarluarnissigut uannullu ajoqersuganngornissigut Ataataga naalannarsissaaq.“ (Johannesi 15:8) Ajoqersukkat Jehova ataqqinarsisippaat anersaap inerititaanik ineriartortitsillutik kinguneqarluartumillu kiffartorlutik. — Apustilit Suliaat 11:4, 18; 13:48.

18. (a) Katersuineq nuannersoq suna ullumikkut piva? (b) Katersuinermut atatillugu sumik unamminiarnartoqarpa?

¹⁸ Ullumikkut Jehovap innuttani silarsuaq tamakkerlugu anersaakkut katersukkanik pilluaqqusarpai. Ukiuni arlalinni ukiut tamaasa 300.000-t missaat Jehovamut tunniulluinnarlutik kuisipput. Tamanna nuannaarutigingaarparput qularnanngitsumillu Jehovap uummataa aamma nuannaartinneqartarluni. (Ussatit 27:11) Jehovali nuannaartittuassagunikku ataqqinartittuassagunikkulu nutaat taakku tamarmik ’[Kristusimi] inuujuartariaqarput, taanna sorlaqarfigalugu, taassumani ineriartortinneqarlutik, uppernermi aalajaallutik’. (Kolossemiut 2:6, 7) Tamanna isumaqarpoq Guutip innuttaanut tamanut unamminiarnartoqartoq. Kuiserlaajuguit ineriartornerpit tamanit takuneqarsinnaanissaa noqqaassutigissaviuk? Sivisunerusumillu sallusuissut ilisimagukku nutaat anersaakkut peqqissuutinnissaat noqqaassutigissaviuk? Qanorluunniit atugaqaraluarutta tamatta inersimalluarnissamut ingerlaqqipallattariaqarpugut. — Filippimiut 3:16; Hebræerit 6:1.

19. Sumik immikkut pisinnaatitaaffeqassavit sunillu pilluaqqussaassavit inersimallualernissamut ineriartoruit?

¹⁹ Eqiasuillutik ineriartorumasut tamarmik pilluaqquneqangaarumaarput. Eqqarsaatigikkit Paulusip ineriartornissamut kajumissaarereerami Timotheusimut qiimmaallannartut oqaasii: „Imminut nakkutiginiarit, aamma ajoqersuisutut suliat nakkutiginiaruk aalajangiullugulu, tassami taamaalioruit imminut annaatissagavit tusartitillu annatsillugit.“ (1 Timotheusi 4:16) Eqiasuillutit inersimalluarnissamut ineriartoruit illittaaq Guutip aqqata ataqqinarsisinnissaa immikkut pisinnaatitaaffigissavat taassumanngalu pilluaqqusaallutit. (wE 1/8 01)

[Quppernerup ataani ilanngussaq]

 Eqqaamavigit?

• Anersaakkut inersimalluarneq qanoq takuneqarsinnaava?

• Ilisarsineq paasinninnerlu qanoq ittut inersimalluarnitsinnut takussutissaappat?

• ’Anersaap inerititai’ qanoq anersaakkut ineriartornermut ersiutaappat?

• Inersimallualernissamut ingerlaqqipallatsilluta suna noqqaassutigisariaqarparput?

[Atuaqqissaarnermi apeqqutit]

[Qupp. 15-mi assiliartaq]

Inersimalluarneq malugineqariaannaavoq

[Qupp. 17-mi assiliartaq]

Sallusuissut siumukartoq malinnaaffigigutsigu anersaakkut ineriartorsinnaavugut

[Qupp. 19-mi assiliartaq]

’Anersaap inerititaanik’ inerititaqarutta ineriartornerput takuneqarsinnaassaaq