Inuk toqusuitsumik anersaaqarpa?

„ALLAKKAT Guutimit anersaarfigineqartut tamarmik iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut,“ Paulusi allappoq. (2 Timotheusi 3:16) Aap, Biibili, Jehova Guuti ilumoortumeersoq tassaavoq atuagaq sallusuissutaasoq. — Tussiaat 83:19.

Jehova tamanik pinngortitsisuugami, ilaatigut inunnik, nalunngilaa toqugutta susoqarumaanersoq. (Hebræerit 3:4; Saqqummersitat 4:11) Oqaatsimini isumassarsiarititaasumi Biibilimi toqup kingorna qanoq pisoqartarneranik sallusuissutaasunik naammagisimaarnartunillu akivaatigut.

Anersaaq sunaava?

Oqaatsit Biibilimi „anersaaq“-mik nutserneqartut tunngaviusumik isumaat tassaavoq „anerneq“ imaluunniit „anersaartorneq“. Oqaatsilli anersaartornermit isumaqarnerupput. Assersuutigalugu Biibilimik allattut ilaat Jaaku allappoq: „Timi anersaartunngitsoq toqungasoq.“ (Jaaku 2:26) Tassa anersaaq timimik uumassuseqalersitsisuuvoq.

Uumassuseqalersitsisoq taanna silaannaq ilummut silammullu anersaaruttagarput anersaartornerinnaasinnaanngilaq. Sooq taamaassinnaanngila? Pissutigalugu anersaartorneq unikkaangat timip sananeqaatai suli uumasarmata sivikitsumik — World Book Encyclopedia malillugu „minutsialunni“. Inuup uummarsarneqarsinnaaneranut tamanna pissutaavoq. Kisianni uumassut timip sananeqaataaniikkunnaarpat, uummarsaagaluarnerit tamarmik asuliinnassapput. Anersaartornerup suulluunniit timip sananeqaataa ataaserluunniit uumassuseqalersissinnaassanngilaa. Tassa anersaaq tassaavoq uumassut ersinngitsoq — uumassuseqalaarneq — timip sananeqaataanik uumaannartitsisoq. Uumassut taanna anersaartornikkut atatinneqarpoq. — Jobi 34:14, 15.

Anersaaq taanna taamaallaat inunniippa? Apeqqut taanna Biibilimi akineqarpoq. Kunngi silatooq Salomoni allappoq: „Kia ilisimavaa inuit anersaartornerat uumassutaasoq qummukartarnersoq, aamma nersutit anersaartornerat uumassutaasoq ammukartarnersoq nunap iluanut?“ (Oqaluussisartup oqaasii 3:19-21) Tassa uumasut inuillu anersaaqarput. Qanoq paasisariaqarpa?

 Anersaaq imaluunniit uumassut innaallagissamut maskiinamik atortorissaarummilluunniit ingerlatitsisinnaasumut assersuunneqarsinnaavoq. Innaallagiaq ersinngitsoq assigiinngitsunut atorneqarsinnnaavoq, sakku nukissamik pilersugaa apeqqutaalluni. Assersuutigalugu kissarsuut kissamik pilersuivoq; computerip paasissutissat suliarisinnaavai, fjernsynillu assilissat nipilu pilersittarpai. Innaallagissalli sarfaa pigisatut iluseqalernanilu pissuseqalerneq ajorpoq. Nukiuvoq taamaattuassallunilu. Taamatuttaaq uumassutip pinngortitat isikkuat piginnaassusiilu uumassuseqarneranut ilisarnaataanngillat. Kinaassusiliunngilaq eqqarsarsinnaananilu. Inuit uumasullu ’assigiimmik anersaartortarput uumassutaasumik’. (Oqaluussisartup oqaasii 3:19) Taamaattumik inuk toqugaangat anersaaq anersaatut pissuseqarluni silarsuarmi allami uumaannarneq ajorpoq.

Taava toqusut qanoq pissuseqarpat? Inuk toqugaangat anersaaq qanoq pisarpa?

„Issunngussaatit“

Angutip siulliup Adamip piaaraluni Guutip inatsisai unioqqutimmagit, Jehovap oqarfigaa: „Kiakkiullugu nerisassarsiussaatit issumut uterserlutit, tassannga pigavit. Issumimmi pivutit, issunngussaatillu.“ (1 Mosesi 3:19) Jehovap issumit pinngortinngikkallarmani Adami sumiippa? Sumiinngilaq! Piunngivippoq. Taamaattumik Jehova Guuti oqarami Adami ’issunngussasoq’, Adamip toqunissaa pivaa nunamilu pinngoqqaatinngoqqinnissaa. Adami anersaat silarsuaannukassanngilaq. Toquguni uumassuseeruteqqissaaq, inuujunnaarluni. Toqu — inuuneqanngissuseq — pillaatisiaraa, inuunini silarsuarmi allami ingerlateqqissanngilaa. — Romamiut 6:23.

Toqusummi allat? Toqusut qanoq issusiat Oqaluussisartup oqaasii 9:5, 10-mi erseqqilluinnartumik allaatigineqarpoq: „Toqungasulli sunnguamilluunniit ilisimasaqanngillat! . . . suliassaqanngimmat ataqatigiinneqaraniluunniit ilisimasassanik ilisimassusermilluunniit peqarnani.“ Taamaattumik toqup assigaa piunngissuseq. Tussiaasiortup inuup toqunera allaaseraa: „Anerningerunik kingumut issunngussapput, pilersaarutaallu ulloq taanna maangaannassapput.“ — Tussiaat 146:4.

Tassa toqusut ilisimanngillat. Susinnaanngillat. Ilisimasaqanngillat. Takunnissinnaanngillat, tusaasinnaanngillat oqaloqatiginnissinnaanatillu. Inuusunik ikiuisinnaanatilluunniit ajoqusiisinnaanngillat. Toqungasut qunugisariaqanngilavut. Qanorli paasisariaqarpa inuk toqugaangat anersaaq „qimaguttoq“?

„Anersaaq Guutimut ilumoortumut uterpoq“

Inuup toqunera pillugu Biibilimi allassimavoq: „Anersaartornerlu uumassutaasoq [Anersaaq, NV] Guutimut tunniussisiminut utertinnagu.“ (Oqaluussisartup oqaasii 12:7) Tassa  imaappa anersaatut timilik iluamik oqaatigalugu silaannarsuakkoorluni angalasoq Guutip najugaanukarluni? Naamik. Biibilip oqaatsimik ’uterpoq’-mik atuinera sumiiffimmiit sumiiffimmukarnermik isumaqartariaqanngilaq. Assersuutigalugu Jehova Israelikkunnut ilumuunngitsunut oqarpoq: „Uannut uterniaritsi, taava uanga ilissinnut utissaanga.“ (Malaki 3:7, NV) Tamanna isumaqarpoq Israelikkut suliatik ajortut tunussagaat Guutillu maligassiai ajunngitsut maleqqilerlugit. Jehovallu Israelikkunnut ’uternissaa’ isumaqarpoq innuttani soqutigeqqilerai iluaqutissaannillu iliuuseqarluni. Pisimasuni taakkunani marlunni isumakkut allannguineq pineqarpoq, sumiiffimmit sumiiffimmut angalaneq pineqarani.

Toqunermissaaq anersaaq Guutimut ’uterluni’ nunamit qilammut piviusumik angalaneq ajorpoq. Nukiup taassuma inuk qimakkaangagu, Guutip kisimi inummut utertillugu tunniussinnaasarpaa. ’Anersaaq Guutimut ilumoortumut uterpoq’ imatut inuup taassuma siunissami inuunermik neriuutaa maanna Guutimut aalajangigassanngortoq.

Assersuutigalugu Jiisusip toqunerani qanoq pisoqarnersoq takussavarput. Tamanna Lukasip iivangkiiliumini oqaluttuaraa: „Jiisusilu nipitoorsuarmik nillerpoq: ’Ataataq, anersaara assannut tunniuppara.’ Taama oqareerluni anerningerpoq.“ (Lukasi 23:46) Imaanngilaq anersaami qimammani Jiisusi qilaliartoq. Aatsaat ullut pingajussaanni toqusunit makititaavoq, aammattaaq aatsaat ullut 40-it qaangiummata qilaliarpoq. (Apustilit Suliaat 1:3, 9) Toqugamili Jiisusip tatiginnilluni anersaani Ataataminut paarisassanngortippaa qularinnginnamiuk Jehovap uummarteqqissinnaagaani.

Aap, Guutip kisimi inuk uummarteqqissinnaavaa. (Tussiaat 104:30) Periarfissanik angingaartunik ammaappaatigut.

Neriuut qularnaatsoq

Biibilimi allassimavoq: „Piffissarmi nalliukkumaarpoq ilivermiittut tamarmik [Jiisusip] nipaanik tusarumaarfissaat ilivernillu aniumaarfissaat.“ (Johannesi 5:28, 29) Aap, Jiisusi Kristusi neriorsuivoq Guutip eqqaamasai tamarmik, Guutip puigunngisai eqqaasaaluunniit tamarmik makititaajumaartut, tassa uummarteqqinneqarumaartut. Qularnanngitsumik Jehovap kiffai aqqutikkut naapertuilluartukkut ingerlasimasut akuujumaarput. Millionilippassuilli Guutip maleruaqqusaanik malinninnatik toqusimapput, Jehovap maleruaqqusaanik ilisimasaqanginnerat pissutaasimasinnaavoq imaluunniit allannguinermik iliuuseqarnissaminnut piffissaqarsimanatik. Inuit taamaattut Guutip eqqaamavai, makitinneqarumaarpullu, Biibilimi ima neriorsuuteqarpoq: „taakkunatullu Guutimut neriugisaqarlunga, tassa toqusut makikkumaartut — iluartut iluaatsullu.“ — Apustilit Suliaat 24:15.

Ullumikkut nunarsuaq uumissuinermik, anniaatinik, pinerlunnernik toqoraannernillu, mingutsitsinernik nappaatinillu ulikkaarpoq. Toqusut nunarsuaq taamaattoq makiffigissagunikku inuuffigalugulu inooqqilernerminnut pilluaataat sivikitsuinnaassaaq. Pinngortitsisorsuarpulli neriorsuivoq ungasinngitsukkut pissutsit ajortut Satanip aqutai atorunnaarsikkumaarlugit. (Ussatit 2:21,22; Danieli 2:44; 1 Johannesi 5:19) Innuttaaqatigiit naapertuilluartut — „nunalu nutaaq“ — piviusunngussapput! — 2 Petrusi 3:13.

Piffissami tassani nunami oqartoqassanngilaq: „Napparsimavunga.“ (Esaja 33:24) Allaat toqu peerutissaaq. Guutip ’qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.’ (Saqqummersitat 21:4) ’Iliverniittut’ nuanningaartumik siunissaqarput.

Jehovap nunarsuarmi ajortut piiarunigit naapertuilluartut guutiitsunut ilanngullugit nungutinnavianngilai. (Tussiaat 37:10,11; 145:20) „Inuppassuit amerlangaaramik kisinneqarsinnaanngitsut, inuiaqatigiinnit naggueqatigiinnillu inuiannillu immikkullu oqaasilinnit tamanit pisut“ ullormi annikilliornartumi ullumikkut silarsuaq guutiitsuuffiusoq suujunnaarsinneqalerpat annakkumaarput. (Saqqummersitat  7:9-14) Taamaattumik „amerlangaartut“ iliverniittut tikilluaqqujumaarpaat.

Ilaquttatit ikinngutitillu toqumi annaasimasavit takoqqinnissaat qilanaarisarpiuk? Nunarsuarmi paradiisiusumi naassaanngitsumik inoorusuppit? Taamaappat ilisimassummut eqqortumut Guutip piumasaanut siunertaanullu naleqqussartariaqarputit. (Johannesi 17:3) Jehovap piumasarivaa ’inuit tamarmik annaanneqassasut sallusuissumillu ilisarsissasut’. — 1 Timotheusi 2:3, 4. (wE 15/7 01)

[Qupp. 4-mi assiliartaq]

„Issumit pivutit, issunngussaatillu“

[Qupp. 5-mi assiliartaq]

Anersaaq innaallagissamut assersuunneqarsinnaavoq.

[Qupp. 7-mi assiliartaq]

Makititsineq naassaanngitsumik nuannaalersitsissaaq.