Paasinnittuuit?

PISSUSILUTTOQARTILLUGU kamannikuuit? Ikinngutitit ajortumut sunnerneqalersillugit akuliutipallattarpit?

Ilaatigooriarluni ajortup siaruaannissaa pinngitsoortinniarlugu nangaanani iliuuseqapallattoqartariaqartarpoq. 1400-kkunni ukiunik naatsorsuisarnitta siornatigut, Israelimiut ileqqorlunnernik kanngunartunik mingutsinneqalermata, Pinehasi, Aronip erngutaa, ajortut peerniarlugit iliuuseqapallappoq. „Pinehasip . . . Israelikkunnik kamaassiunnaartippaanga, uanga pillunga ilungersungaarnini akornanni ersersikkamiuk.“ — 4 Mosesi 25:1-11.

Ajortoq siaruartinneqannginniassammat Pinehasi ajunngilluinnartumik iliorpoq. Taavami allat kukkuneri kamaammiutigerujussuarutsigit? Tamakku pillugit qisuariapiloorutta iliuuseqapallallutaluunniit naapertuilluarneq pillugu taamaaliornerunavianngilaq, ingasaassiniartuunitsinnilli takussutaaginnassaaq — allat ajortiliunerannik periarfissaqartinngikkivut. Tamanna pinngitsoorniarlugu suup ikiorsinnaavaatigut?

’Jehovap isumakkeerfigaatigut ajortuliatsinnik tamanik’

Jehova, ’Guutiuvoq ilungersortoq’, ’tunniusimalluinnarfigineqarnissaminik piumasarinnittoq.’ (2 Mosesi 20:5, NV) Pinngortitsisuugami tunniusimalluinnarfigineqarnissaminik piumasaqarsinnaavoq. (Saqqummersitat 4:11) Taammaattorli inuit sanngiissutaat kamagittarfigai. Taamaattumik tussiaasiortup Davip erinalersaarfigaa: ’[Jehova] naakkinnillunilu saammaasuuvoq, kamajaatsuullunilu ilumoorsusermillu peqangaarluni. Unnerluutiginnittanngilaq naassaanngitsumik . . . Iliorfiginngilaatigut ajortuliatta nalissaannik, akilernatalu pinerlunnitta taamaaqataanik’ — Tussiaat 103:3, 8-10.

Jehova inuit ajortiliunerannik paasinnittuugami, peqqissimisunik „unnerluutiginnittanngilaq naassaanngitsumik“. (Tussiaat 51:7; Romamiut 5:12) Akerlianik ajortip naammalluinnanngissutsillu peernissaat siunertaraa. Naammassilluinnalernissatta tungaanut, ’iliorfiginata ajortuliatta nalissaannik’, ajunngissutsiminik Jiisusip Kristusip utertsitsissutaa tunngavigalugu isumakkeerfigaatigut. Jehovap nallittorsimanngitsuuppatigut, arlaannarpulluunniit annanissamut periarfissaqarsimanavianngikkaluarpoq. (Tussiaat 130:3) Taamaattumik qujamasuutigisariaqarparput ataatarput qilammiusoq, tunniussimalluinnarfigineqarnissaminik piumasarinnittoq, Guutiummat nallittuisoq.

Oqimaaqatigiissaarigit

Naalagaq silarsuarmi kisimi oqartussaasoq inunnut naammalluinnanngitsunut paasinnittuummat, uaguttaaq taamaattariaqannginnerpugut? Paasinninneq ima nassuiarneqarsinnaavoq „allat uatsinnit allaanerusunik eqqarsartut iliuuseqartulluunniit kamagittarfigalugit.“ Taamatut isiginnittaaseqarpugut? Ajortuliornerunngikkaluartumik uagut tulluarsorinngisatsinnik allat oqaraangata iliuuseqaraangataluunniit noqissinnaassuseqarlutalu kamagittartuuvugut?

Soorunami akuersaarpallaartuunaveersaartariaqarpugut. Assersuutigalugu upperisarsiornermi oqartussaasut, palasit nukappiaqqanik niviarsiaqqanillu kinguaassiuutitigut atornerluiuarnerat isiginngitsuusaaraangassuk, ajoqusiingaartarpoq. Irlandimi aviisiliortoq allassimavoq: „Meeqqanut pisimasoq oqaluffeqarnermi oqartussat ajortuliatut qaqutigoortutut isigaat, taamaattumillu palasi pisuusoq [allamut] nuutsiinnartarlugu.“ Inummik taamaattumik nuutsitsiinnarneq, paasinnilluartuunermut assersuutissaalluarpa?

 Taamaanngilaq. Takorluulaariaruk nakorsat oqartussaasut, pilattaasartoq mianersuaalliortoq sulisiinnaraat, napparsimavimmiit naapparsimavimmut allamut nuutsiinnarlugu, naak nakorsagaata toquneranut innarluuteqalerneranulluunniit pisuugaluartoq. „Akuersaaginnarneq“ taamaattoq nakorsaqatigiit akornanni aalajaaffigeqatigiinnissamik paatsuuinermik pissuteqarsinnaavoq. Taakkumi, nakorsap mianersuaalliornera pinerliineraluunniit pissutigalugu inuunerminik annaasaqarsimasut innarlerneqarsimasullu?

Aammali ingasattajaartoqarsinnaavoq. Jiisusi nunamiikkallarami, juutit ilaat zelotinik taaneqartartut suliatik ingasattajaartut illersorniarsaaraat Pinehasip iliuusaanut innersuussinermikkut. Zelotit pissusiisa ingasattajaartut ilaat atortagaat tassa, „Jerusalimmimi nalliuttorsiornerni assigisaanilu inuppassuarnut akuliuteriarlutik akeqqatik sumik isumaqanngitsut savimmik kapisarlugit“.

Soorunalimi kristumiutut, inunnut nuannarinngisatsinnut zelotikkutut peqqarniitsigisumik iliornavianngilagut. Kisiannili, paasinnikkusunnginnitta nuannarinngisatsinnut allatut saassusitissinnaavaatigut — soorlu ajortumik oqaluuserineratigut? Inuttut paasinnittuugutta, oqaatsit ineriartornanngitsut taamaattut atornavianngilagut.

Ingasaassiniartut allat tassaapput ukiuni hundredilinni siullerni farisæerit. Allat ajornerarpaat inuttullu naammalluinnanngissusermik periarfissiiniaratik. Farisæerit pingaarniartut ajungaarlutik inuinnaat nikagalugit ’perloqqusatut’ oqatigisarpaat. (Johannesi 7:49) Jiisusip pissutissaqarluarluni angutit imminnut pingaartittut ajorai oqarluni: „Eqqanaq ilissi allakkanik ilisimasut farisiiarillu, ilumoortuusaartusi! Myntit dildillu kumaasallu pissarsiassi qulingi tunniuttarpasi, sumiginnartarpasili inatsisini pingaarnerutitat: naapertuilluarneq nallittuinerlu ilumoorsuserlu. Pisariaqarpoq tamakku naammassinissaat allallu sumiginnannginnissaat.“ — Matthæusi 23:23.

Tassuuna Mosesip inatsisaasa maleruarneqarnissaasa pingaaruteqassusiat Jiisusip suusupaginngilaa. Takutinniaannarpaali inatsisini „pingaarnerutitat“ ingasaassinianngitsumik nallittuisumillu atorneqarnissaat piumasarineqartoq. Jiisusi ajoqersugaalu farisæerinit zelotinillu ingasaassiniartunit allaanerulluinnarput.

Jehova Guutip Jiisusi Kristusilluunniit ajussuseq akuersaanngilaat. Ungasinngitsumi ’aggiutissavaa pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut.’ (2 Thessalonikamiut 1:6-10) Naapertuilluarnermilli ilungersuussinermini, Jiisusip Ataatani qilammiusoq kamajuissusiagut, nallittuineratigut, ajunngitsuliorusuttunullu tamanut asattuusineratigut assiginiartuartarpaa. (Esaja 42:1-3; Matthæusi 11:28-30; 12:18-21) Uagutsinnut Jiisusi maligassaalluarpoq.

Immitsinnut kamageqatigiittariaqarpugut

Naak immaqa eqqortunut ilungersuussisuugaluaqaluta, apustili Paulusip unnersuussutaa maleruartigu: ’Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi.’ (Kolossemiut 3:13; Matthæusi 6:14, 15) Kukkugaangatta isumakkeerfigiqatigiittarneq, silarsuullu matuma naammalluinnanngissusiinut kamagittarneq, paasinnittuunermut ilaapput. Allanut piumaffiginninnitsinnik ingasaassiniartuussanngilagut — Filippimiut 4:5.

Paasinnittuuneq isumaqanngilaq, sulianut kukkunernut isiginngitsuusaarinermilluunniit akuersaarneq. Assersuutigalugu, imaasinnaavoq uppeqat Jehovap najoqqutassiaanut tulluarpallaanngitsumik isiginnittaaseqarluniluunniit ileqqoqartoq. Immaqataama pissuseqarnera, suli ima ajortiginngilaq Guutimit narrunarsisimalluni, pissutsiminilli allannguisariaqarneranut mianersoqqussutaasinnaavoq.  (1 Mosesi 4:6, 7) Asanninneruvoq anersaakkut pigisallip qanilaarluni unioqqutitsisoq ikiorniarsarippagu. (Galatiamiut 6:1) Ikiuinerali aatsaat kinguneqarluarsinnaavoq isumassuerusussuseqarluni ikiorniarpagu, ajorinninniaannarani.

’Qanilaartumik mianerinnittumillu’

Qanoq annertutigisumik, inuit allamik upperisallit paasinninnermik takutitsivigissavavut? Allaaserisami 1831-imi, Irlandimi atuarfiit ilaanni nivinngarneqarsimasumi ima allassimasoqarpoq: „Jiisusi Kristusip peqqarniillisaarluni inuit allat upperisaminik sunnerniarneq ajorpai. . . . Inoqatit assortuuteqatigalugit innarlerlugilluunniit nammineq eqqortumik oqaluttuunerarluni kukkunerarlugillu uppernarsarniarneqarsinnaanngilaq. Uppernarsaannarneqarsinnaavoq kristumiut anersaavat piginngikkini.“

Jiisusip ajoqersueriaasiata pissusiatalu, Guutip oqaasianut inuit palligunnissaannut kajungilersippai. (Markusi 6:34; Lukasi 4:22, 32; 1 Petrusi 2:21) Inuttut naammalluinnartutut, immikkut ittumik guutitut ilisimassuseqartutut, inuit ataasiakkaat qanoq uummammioqarneri takusinnaavai. Pisariaqaraangat, Jehovap akerai sakkortuumik assuaralugit isummani annittarpaa. (Matthæusi 23:13-33) Taamaaliornermigut ingasattajanngilaq.

Akilerlianilli, uagut Jiisusitulli inuit uummammiui takusinnaanngilavut. Taamaattumik apustili Petrusip maleruagassiaa malittariaqarparput: „Naalagarli Kristusi uummatissinni illernartissiuk, piareersimajuaritsilu neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit.“ (1 Petrusi 3:15) Jehovap kiffaatut upperisarput illersortariaqarparput, Guutip oqaasianik tunngaveqarluarmat. Taamaaliussaagulli allanut upperisaannullu ataqqinnilluta. Paulusi allappoq: „Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.“ — Kolossemiut 4:6.

Qaqqami oqaluutsimini tusaamasaasumi Jiisusi oqarpoq: „Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12) Taamaattumik, kamakkumaarnertuulluta kamageqatigiitta, tusarliussassamillu nuannersumik oqaluussiffigisavut ataqqillugit. Naapertuilluarnermut ilungersuussinerput, paasinnittuunissatsinnik Biibilip kajumissaarutaanik oqimaaqatigiissaarutsigu, Guuti Jehova iluarisimaartissavarput, eqqortumillu oqaatigalugu ingasaassiniannigitsutut oqaatigineqarsinnaalluta. (wE 15/7 01)

[Qupp. 30-mi assiliartaq]

Farisæerit ingasaassisumik isiginnittaasiat assiginiaqinagu

[Qupp. 30-mi assiliartaq]

Jiisusip ataatami paasinnittuunera ilaarpaa. Illimmi?