’Pilluaqqusaanerit iluartunut pisarput’

„INUUSUTTUUSIMAVUNGA utoqqalisimallungalu maanna, takusimanngisaannarpungali iluartumik qimagaasumik qitornaanilluunniit nerisassanik qinnuuloortunik,“ Daavi utoqqaatilluni tussiaatimi ilaanni taamak oqarpoq. (Tussiaat 37:25) Jehovap iluartut asallugit asannittumik isumassortarpai. Oqaatsimini pallorfiginnittut ilumoortut kajumissaarpai iluarsuseq noqqaassutigeqqullugu. — Sefania 2:3.

Biibili naapertorlugu iluartoq tassaavoq Guutip najoqqutassiaanik eqqortuliortoq. Ussatit kapitali 10-mi kajumissaarneqarpugut Guutip piumasaa maleruaqqullugu, anersaakkullu pilluaqqussutit kinguneriumaagai eqqaaneqarput. Pilluaqqussutit ilaat tassaapput anersaakkut inuussutissat naammangaartut pikkunartullu, nalerisimaarnartumik suliaq asuliinnaanngitsoq, Guutimut inunnullu attaveqarluarneq. Taamaattumik Ussatit 10:1-14-mut misissoriartigu.

Pissutissaalluartoq

Kiap ussatit makku oqaatigisimanerai kapitalip aallaqqaataani qularutissaanngilaq. Qulequtaa imaappoq: „Salomop ussatai.“ Versimi siullermi Israelimi kunngiusup silatuup Salomop eqqortuliornissamut pissutissaalluartoq tikkuarpaa oqarami: „Erneq ilisimasoq ataataminut nuannaarutaasarpoq, ernerli sianiitsoq anaanaminut isumakuluutaalersarpoq.“ — Ussatit 10:1.

Angajoqqaanut isumakuluutaasinnaavoq imaluunniit alianartorujussuusinnaavoq qitornaasa ilaata Guuti ilumoortoq pallorfigiunnaarpagu. Ussatit-ni anaanaasup isumakuluutaa ingammik eqqaaneqarpoq immaqa ersersinniarlugu ataataasumit aliasunnerusartoq. Dorisimut taamaappoq. * Oqaluttuarpoq: „Ernitta 21-nik ukiullip sallusuissut qimammagu uannut uinnullu, Frankimut, alianartorujussuuvoq. Ingammik uannut sakkortuvoq. Maanna, ukiut 12-t qaangiuttut, ikeq suli maminngilaq.“

Tassa ataataasup nuannaarnermik anaanaasllu aliasunnermik misiginissaannut qitornat sunniuteqarsinnaapput. Qanortoq ilisimassuseqarta angajoqqaavullu nuannaartillugit tamanillu annermik ataatarput qilammiittoq Jehova.

’Iluartoq qaarsillartarpoq’

„Iluaqutaanngillat erlinnartuutit peqquserlunnikkut pissarsiat,“ Salomo oqarpoq, „iluarnerli toqumit annatsitsisarpoq.“ (Ussatit 10:2) Uagutsinnut, naggatissap naggataani inuusunut, oqaatsit taakku pingaaruteqangaarput. (Danieli 12:4) Guutiitsut silarsuaata suujunnaarsitaanissaa qanittuararsuuvoq. Inuit qimarravigisinnaasaat sunaluunniit — pigisaagaluaruni, aningaasaagaluaruni sakkutooqarnermulluunniit tunngasuugaluaruni — ’annikilliortitaangaarnermi’ illersuisinnaassanngilaq. (Saqqummersitat 7:9, 10, 13, 14) Soorlu allami allassimasoqartoq: „Peqqusersuitsummi nunami najugaqassapput, assuarnaatsut kisimik tassaniilissapput.“ (Ussatit 2:21) Taamaammat ’Guutip naalagaaffia iluarneralu ujaqqaartuartariaqarpavut’. — Matthæusi 6:33.

Jehovamulli kiffaasut pilluaqquneqarnissaminnut silarsuassaq nutaaq utaqqisariaqanngilaat. „Iluartoq [Jehovap] kaatsittarinngilaa, iluanngitsulli piumasaannik itigartittarpai.“ (Ussatit 10:3) Jehovap „kiffaq ilumoortoq silatoorlu“ aqqutigalugu anersaakkut inuussutissat naammangaartut isumagisimavai. (Matthæusi 24:45) Taamaattumik iluartoq pissutissaqarluarluni ’uummammi iluunngaanit qiimmattassaaq’. (Esaja 65:14) Ilisimasaqarneq  nuannaraa. Anersaakkut erlinnartuutit ujarusuppai. Guutiitsoq taamaanngilaq.

’Eqiasuitsoq pisuunngorpoq’

Iluartoq aamma allatigut pilluaqquneqarpoq. „Suliamini eqiasuttoq piitsunngortussaavoq, assaalli eqiasuitsut pisuunngortitsisarput. Silatuuvoq erneq aasaanerani eqqanaarsartartoq, kanngusuttariaqarporli katersuiffiup nalaani siniinnartoq.“ — Ussatit 10:4, 5.

Kunngi Salomop oqaasii ingammik katersuisunut pingaaruteqarput. Sininnissamut piffissaanngilaq. Eqiasuitsuusariaqarpoq sivisuumillu sulisariaqarluni suliaq nukinginnarmat.

Karrinik katersuineq pinnagu inunnilli katersuineq eqqarsaatigalugu Jiisusip ajoqersukkani oqarfigai: „Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq [Jehova Guuti] qinnuigisiuk katersuisussanik aallartitseqqullugu.“ (Matthæusi 9:35-38) Ukiumi 2000-imi 14 millionit sinnerlugit Jiisusip toquneranik eqqaaniaalluni nalliuttorsiorneq najuuffigaat — Jehovap Nalunaajaasuisa amerlassusiisa marloriaataannit amerlanerupput. Kiap miserratigiumavaa ’narsaatit qaqortissimasut katersuiffigeriaannanngorlutik’? (Johannesi 4:35) Pallorfiginnittut ilumoortut katersuinermi naalagaasoq qinnuiginiarpaat katersuisussanik amerlanerusunik aallartitseqqullugu, qinnutitillu naapertorlugit nammineq eqiasuillutik ajoqersuganngortitsiniarput. (Matthæusi 28:19, 20) Ilungersornerallu Jehovap pilluaqqungaarsimavaa. Ukiumi kiffartorfiusumi 2000-mi 280.000-nit amerlanerusut kuisipput. Taakkuttaaq Guutip oqaasianik allanut ajoqersueqataapput. Qanortoq tamatta ajoqersuganngortitsiniaanermi tamakkiisumik peqataasa taamaalillutalu nuannaarneq nalerisimaarnerlu katersueqataanermit pisut pigilerlugit!

’Pilluaqqusaanerit iluartup niaquanut pisartut’

„Pilluaqqusaanerit iluartup niaquanut pisarput,“ Salomo nangilluni oqarpoq, „iluanngitsulli qarnaniippoq nakuuserneq.“ — Ussatit 10:6.

Uummatimigut iluartoq assigiinngitsorpassuartigut naapertuilluarnermik takutitsisarpoq. Inussiarnersumik ineriartornartumillu oqaluttarpoq, tukkortuuvoq ikiuisarlunilu. Allat taanna peqatigalugu nuannaraat; akuunera qujamasuutigaat ajunngitsumillu oqaatigisarpaat — pilluaqqullugulusooq.

Guutiitsorli uumissuisuuvoq isumapiloqarlunilu allanillu ajoqusiiniartuulluni. Tusaruminartunik oqalussinnaasaraluarpoq, ’qarnaniipporli nakuuserneq’ uummatimini toqqorsimasoq naggataatigullu nakuusernikkut oqaatsikkulluunniit saassussinikkut ersertartoq. (Matthæusi 12:34, 35) Oqaatsit taakku aamma ima nutserneqarsinnaapput: „Nakuusernerup guutiitsup qarna matussavaa.“ (Ussatit 10:6; NV, quppernerup ataani ilanngussaq) Isumaqarpoq guutiitsup allanut qanoq  iliuutsini, tassa akeqqersimaarneq, nammineq atorumaarai. Taamaalilluni qarna matuneqarpoq nipangersinneqarlunilu. Inuk taamaattoq allanit pilluaqquneqarnissaminik qanoq neriugisaqalersinnaassava?

„Pilluaqqusaanerni iluartup aqqa taaneqartarpoq, iluanngitsulli aqqa asiusarpoq,“ kunngi Salomo allappoq. (Ussatit 10:7) Iluartoq allanit eqqaamaneqarluartarpoq, aamma Jehova Guutimit. Jiisusi toqu tikillugu aalajaappoq, taamaattumillu ’atermik inngilit aqqinit annerungaartumik kingornussaqarpoq’. (Hebræerit 1:3, 4) Angutit arnallu aalajaatsut Kristusi sioqqullugu inuusut ullumikkut kristumiunit ilumoortunit maligassaalluartutut eqqaamaneqarput. (Hebræerit 12:1, 2) Guutiitsut aqqannit asiulersutut maajunnartumit allaanerulluinnassusia! Aap, „tusaamasaalluarneq pisuussuterpassuarnit pingaarneruvoq, nuannarisaaneq sølviuteqarnermit kuultiuteqarnermillu pitsaaneruvoq.“ (Ussatit 22:1) Qanortoq Jehovami inoqatitsinnilu tusaamasaalluarta!

„Assuarnaalluni inuusoq aarlerinani inuusarpoq“

Salomop oqaasiini tulliuttuni silatuup sianiitsullu assigiinngissutaat ersersinneqarpoq: „Ilisimassusermik uummammioqartup inassutit ilassisarpai, qarluminili sianiissuseqartoq orlusussaavoq.“ (Ussatit 10:8) Silatuup nalunngilaa „inuup ingerlavissani nammineq aalajangigassarinngikkaa“. (Jeremia 10:23) Nalunngilaa Guutimit unnersuunneqarnissaq pisariaqartuusoq, kajumillunilu Guutip peqqussutai maleruarpai. Qarluminili sianiissuseqartup tamanna paasisinnaanngilaa. Oqaasiisa siuneqanngitsut naaffeqanngitsullu ajunaartippaat.

Iluartup aamma toqqissisimaneq guutiitsup ilisimanngisaa pigaa. „Assuarnaalluni inuusoq aarlerinani inuusarpoq, sangujoraartumilli ingerlaveqartoq paasisoortittussaavoq. Uisorersarluni usseraasoq ajoqusiisarpoq, qarlumini sianiissuseqartoq orlusussaavoq.“ — Ussatit 10:9, 10.

Assuarnaatsoq unneqqarillunilu tatiginartuuvoq. Allanit ataqqineqarpoq tatigineqarlunilu. Suleqataalluartuugami pingaartinneqarpoq, akisussaaffimmillu annerusumik tunineqartarpoq. Unneqqarissutut tatiginartutullu tusaamaneqarami allaat suliffissaaleqisoqaraangat suliffeqartarpoq. Unneqqarissusiata tatiginarneratalu aamma angerlarsimaffini nuannersunngortippaa eqqissisimasunngortillugulu. (Tussiaat 34:14, 15) Ilaquttani tamarmik attaveqarluarmata toqqissisimasutut misigivoq. Ersarippoq toqqissisimaneq assuarnaassutsimut atassuteqartoq.

Namminissarsiortumik peqquserlukkaanni allaassaaq. Unneqqarissuunngitsup immaqa peqquserlunnini oqalunnermigut pissusilersornermigulluunniit toqqorterniartarpaa. (Ussatit 6:12-14) Ajortumik peqquserluttuliornermilluunniit siunertaqarluni ʹuisorersaraangamiʹ peqquserlunnerminit eqqorneqartunut annikilliornerpassuarnut peqqutaasinnaasarpoq. Qaqugukkulluunniilli qulaarneqarumaarpoq. Apustili Paulusi allappoq: „Inuit ilaasa ajortuliaat erseqqingaaramik eqqartuunneqareertarput, allalli ajortuliaat malinnaasarput. Taamatuttaaq ajunngitsuliat tamanut saqqumiinnartarput, ajunngitsuliallu saqquminngikkallaraluartut isertugaasinnaanngillat.“  (1 Timotheusi 5:24, 25) Kinaluunniit pineqaraluarpat — ataataasoq, anaanaasoq, aappaasoq, ikinngutaasoq ilisarisimasarluunniit — peqquserlunnera naggataatigut ersersinneqarumaarpoq. Kiap peqquserluttutut tusaamaneqartoq tatigiumavaa?

„Qarna puilasuuvoq inuunartoq“

„Iluartup qarna puilasuuvoq inuunartoq,“ Salomo oqarpoq, „iluanngitsulli qarnaniittoqarpoq nakuusernermik.“ (Ussatit 10:11) Oqaatsit nakorsaataasinnaapput ajuallatsitsisinnaallutilluunniit. Nakussatsinnarsinnaallutillu qiimmassaataasinnaapput, kisianni aamma nikallornarsinnaapput.

Misigissutsit oqaatsinut pissutaasut pillugit kunngi Salomo ima oqarpoq: „Uumissuineq saqitsaannermik pilersitsisarpoq, asanninnerulli unioqqutitsinerit tamaasa matoortarpai.“ (Ussatit 10:12) Uumissuineq inuit akornanni saqitsaatitsilertarpoq. Jehovamut asannittut uumissuineq isummaminnit peertariaqarpaat. Qanoq ilillutik? Asanninnermik taarserneratigut. ’Asanninnerup ajorterpassuit matoortarpai’. (1 Petrusi 4:8) Asanninneq „tamatigut naammagittartuuvoq“ imaluunniit „tamanik matoorisarpoq“. (1 Korinthimiut 13:7; Kingdom Interlinear) Guutitut asannissuseqaraanni inunnit naammalluinnanngitsunit naammalluinnassuseq naatsorsuutigineqarneq ajorpoq. Allat kukkussutaannik tamanut oqaatiginninnissamut taarsiullugu asanninnerup takunngitsuusaaritittarpaatigut, ajortorujussuarmik unioqqutitsinerit pineqanngippata. Allaat oqaluussinermi, suliffimmi atuarfimmiluunniit ajortumik pineqaraangatta asanninneq pissutigalugu atukkavut naammagisarpavut.

Kunngi silatooq nangilluni oqarpoq: „Silassorissup qarluiniippoq ilisimassuseq, sianiitsorli qatiggamigut anaalerneqassaaq.“ (Ussatit 10:13) Silassorissup ilisimassusiata alloriarneri siulersussavai. Oqaatsit qarluaneersut ineriartornartut allat iluartut aqqutaatigornissaannut ikiussavaat. Nammineq tusarnaartuiluunniit eqqortumut siulersorneqarnissaminnut pinngitsaaliineq — tassa unataat anusinngorsaataasoq — pisariaqartinngilaat.

’Ilisimasassanik katersuigit’

Suup qarloqalersissinnaavaatigut ilisimassutsimik suunngitsunik oqaluinnaavissuutinnata? (Ussatit 18:4) Salomo akivoq: „Ilisimasut ilisimasassanik katersuisarput, sianiitsup oqaasii ajunaartitsisarput.“ — Ussatit 10:14.

Siullermik isumarput ilisimassummik Guutimeersumik ulikkaartariaqarpoq. Ilisimassut taamaattoq aalajangersimasumik ataasiinnarmit pineqarsinnaavoq. Apustili Paulusi allappoq: „Allakkat Guutimit anersaarfigineqartut tamarmik iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut, inuk Guutip pigisaa inerilluinnaqqullugu ajunngitsuliornernut tamanut piginnaanngorsagaalluni.“ (2 Timotheusi 3:16, 17) Ilisimassut Guutip oqaasiani ujartortariaqarparput erlinnartuutitullusooq ujarlugu assaalluta isumatsinnilu toqqorlugu. Suliaavoq soqutiginartoq imminullu akilersinnaasoq.

Ilisimassutsimik oqalussinnaassagutta ilisimassut Guutimeersoq uummammiuliuttariaqarparput toqqorlugulu. Jiisusip tusarnaartini oqarfigai: „Inuup ajunngitsup uummatimi toqqorsivianit ajunngitsumit ajunngitsut saqqummertarpai, inuullu ajortup toqqorsivimminit ajortumit ajortut saqqummertarpai. Uummatimmi ulikkaarutaanik qaneq oqaluttaraaq.“ (Lukasi 6:45) Taamaattumik ileqqoq ajunngitsoq ineriartortittariaqarparput ilisimassullu pigiliussarput eqqarsaatigisarlugu. Atuaqqissaarneq eqqarsaatiginneqqissaarnerlu ilumummi ilungersornarsinnaapput, akilersinnaappulli. Anersaakkut pisuunngornarput. Ajunaarutaasariaqanngilaq isumaalluni oqaluttarneq.

Aap, silatooq Guutip isaani eqqortuliortarpoq, allanullu sunniuteqarluarpoq. Anersaakkut inuussutissarpassuarnik tunineqarpoq Naalakkamilu suliassaqangaarluni. (1 Korinthimiut 15:58) Assuarnaakkami aarlerinani inuusarpoq Guutimillu iluarisaalluni. Iluartoq ilumut pilluaqquneqangaarpoq. Taamaammat iluarneq noqqaassutigisigu eqqortumik eqqunngitsumillu Guutip maleruaqqusaanik malinninnitsigut! (wE 15/7 01)

[Quppernerup ataani ilanngussaq]

[Qupp. 25-mi assiliartaq]

Unneqqarissutsip ilaqutariittut pilluarneq kingunerisarpaa

[Qupp. 26-mi assiliartaq]

„Ilisimasut ilisimasassanik katersuisarput“