Uppernerit qularnermit aserorneqanngikkili

Ullut ilaanni peqqipputit ajoquteqarnallu, aqaguanili peqqiilliorlutit. Nukeeruteriataarputit inuummarippasikkunnaarlutillu. Niaqorlupputit saannerillutillu. Susoqarsimasoruna? Tappiorannartut napparsimalissutaasinnaasut timip akiuussutai timillu pisataanik pingaartunik ajoqusiisimapput. Katsorsarneqanngikkuit tappiorannartut timi akiuussinnaajunnaartissinnaavaa — aap, immaqa allaat toqussutaasinnaallutik.

TUNILLANNEQARNERUP nalaani peqqiillioruit soorunami akiuussutissakinnerussaatit. Assersuutigalugu nerisalunnerup timip akiuussinnaanera „ima sanngiillisitsigisinnaatigaa allaat tunillatsilaarneq toqussutaasinnaalluni“, nakorsanut atuagassiisartoq Peter Wingate oqarpoq.

Taamatut pisoqartillugu nammineq piumassutsiminnik nerinaveersaartoqarnissaa takorlooruminaappoq. Akerlianik sapinngisaq tamaat peqqinnartunik nerisassapput peqqittuujuarniarlutik. Aamma tunillatsinnaveersaassagunarput. ’Uppersutsikkut peqqissuujuarnissat’ eqqarsaatigalugu taamatut mianersortigaat? (Titusi 2:2) Malunnanngitsumik qulaleriartuaarsinnaaneq eqqumaffigaajuk? Eqqarsaatit taamaattut isumanniileriaannaapput uummatinniileriaannaallutillu, upperunnaartillutit Guutimullu attaveqarnerit aserorsinnaallugu. Ilaasa taamatut navianartorsiulersinnaanertik eqqumaffigigunanngilaat. Anersaakkut nerinaveersaarput taamaattumillu qulaleriaannaallutik. Illit aamma taamaappit?

Qularneq tamatigut ajoqutaava?

Soorunami qularneq tamatigut ajoqutaanngilaq. Pineqartup paasilluarnissaata tungaanut isummernaveersaartoqartariaqarpoq. Upperisarsioqatigiippassuarni qularani uppernissaq kaammattuutigineqarpoq, taamaaliornerli ulorianarpoq tammarsaataallunilu. Biibilimi allassimagaluarpoq asannittoq ’tamatigut uppertartoq’. (1 Korinthimiut 13:7) Mannalu tikillugu tamatigut tatiginarsimasut kristumiutut tatigeriaannaavavut. Kisianni „oqaaserineqartut suut tamaasa“ tatiginissaannut Guutip oqaasiani mianersoqquneqarpugut. (Ussatit 14:15) Inuup iliuuserisimasaa apeqqutaalluni tatiginnginnissaanut pissutissaqarluarsinnaavugut. Biibili imatut mianersoqqusivoq: Salloqittaagajuttoq „saamasumik nipeqarluni oqalukkaluarpat uppereqinagu“. — Ussatit 26:24, 25.

 Aamma Apustili Johannesip kristumiut uppiasooqqunagit mianersoqquvai: „[Oqaatsit isumassarsiarititaasut, NV] suulluunniit upperiinnaqinasigit, misilissigilli anersaat Guutimit pisuunersut.“ (1 Johannesi 4:1) „Oqaaseq“, ajoqersuut isumarluunniit immaqa Guutimeersoorpasippoq. Guutimeersuuvali? „Peqquserluttummi silarsuarmut aallarsimasut amerlaqaat,“ apustili Johannesi oqarpoq. (2 Johannesi 7) Taamaattumik uppilertortannginneq imaluunniit isumminngikkallarneq illersuutigisinnaavarput.

Qularneq tunngavissaqanngitsoq

Ilumoortoq paasiniaraanni ilumoortumik paqumisunngitsumillu pisimasuinnik misissuinissaq pisariaqakulasarpoq. Isumakkut uummatikkullu tunngaveqanngitsumik ajoqutaasumillu qulaleriartuaarnermit allaaneruvoq — qularneq upperluarunnaartitsisinnaasoq Jehovamullu attaveqarnermik aseroriartortitsisinnaasoq. Qularneq taamaattoq sumik upperisaqarnissamik qanorlu isumaqarnissamik nalorninertut nassuiarneqarsinnaavoq, nalornineq aalajangiinermut sunniuteqakulasoq. Saatanip Jehovap tatiginassusianik qanoq ililluni Eva nalornilersikkaa eqqaamaviuk? Saatani aperivoq „ilumut Guuti oqarpa naatsiiviup orpii neriffigissanngikkisi?“ (1 Mosesi 3:1) Saatanip ajortumik isumaqarunarpasinnani apeqqutaa nalornilersitsisoq, Evap aalajangerneranut sunniuteqarpoq. Tamanna Saatanip periaaserigajuppaa. Mamarliigajuttuuvoq aamma tusangiasaarinernut, ilumoortortalinnut salluliornermullu pillammaalluni. Saatani taamatut periaaseqarluni kristumiorpassuit Jehovamut qanittumik tatiginnittumillu attaveqarunnaartissimavai. — Galatiamiut 5:7-9.

Ajoqersukkap Jaakup qularnerup taamaattup qanoq aserorsaataasinnaanera paasilluarsimavaa. Misilinneqarnermi Guutimut qinusinnaanitta immikkut pisinnaatitaafferujussuunera eqqartoreerlugu, Jaaku mianersoqqusivoq: „Upperlunili qinussaaq, qularnani.“ Guutimut attaveqarnerput qularnartoqarpat ’immap malinga anorip aalatitaa qaraartitaalu’ assigilissavavut. Tassaalissaagut ’isummamigut saqittuartoq inuuserisatigullu allanngorartuartoq’. (Jaaku 1:6, 8) Aalajangiiniarnitsinni uppernikkut nakimalissaagut nalornilerlutalu. Kingunerissavaa Evatut inngilipiluit ajoqersuutaannut isumaliutersuutaannullu tamanut uppiassuseq.

Anersaakkut peqqissuujuarit

Qularnermut aserorsaataasumut qanoq illersorsinnaavugut? Akissutaa paasiuminarpoq: Satanip tammartitsiniarneri tamaasa itigartittuarneratigut Guutillu ilinniartitsineranik atuilluarnikkut ’uppernikkut aalajaallissaagut’. — 1 Petrusi 5:8-10.

Nammineerluta anersaakkut nerisarnissarput pingaarnerpaavoq. Atuagassiisartoq Peter Wingate siusinnerusukkut eqqaaneqartoq ima nassuiaavoq: „Timi nukissalersorneqartuartariaqarpoq allaat qasuersaarnermi kemiikkut pisaannartut timillu pisatai inuunermut pingaaruteqartut sulijuartuummata. Timip ipiutaasarpassui taarserarneqartuarputtaaq.“ Anersaakkut qanoq innitsinnut tunngatillugu assingusumik pisoqartarpoq. Anersaakkut nerisanngikkutta, timi inuussutissalersorneqanngitsoq sanngiilliartortartoq naggataatigullu toqusartoq assigalugu uppernikilliartussaagut. Jiisusi Kristusip tamanna ima erseqqissarpaa: „Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.“ — Matthæusi 4:4.

Qangaanerusoq upperluarnermik qanoq ineriartortitsinersugut eqqarsaatigilaaruk. Apustili Paulusi allappoq: „Upperneq tusakkanit pilersinneqartarpoq.“ (Romamiut 10:17) Paulusi erseqqissaavoq Guutip oqaasianik anersaakkut nerisarnikkut Jehovamut, neriorsuutaanut, peqatigiiffianullu uppissuseqalerluta tatiginnilersimasugut. Soorunami uppialluta tusakkavut tamaviisa upperinngilavut. Berøamiutut iliuuseqarpugut. ’Ullullu tamaasa Allakkat misissuiffigisarpagut paasiniarlugu ilumut taamaannersut’. (Apustilit suliaat 17:11) ’Sianigaarput sunaasoq Guutip piumasaa: ajunngitsoq, iluarinartoq,  naammalluinnartoq’, tusakkavullu ilumoornersut qulakkeerlugu. (Romamiut 12:2; 1 Thessalonikamiut 5:21) Kingornatigut uppernerput suli aalajaallisaqqissimassavarput, Guutip oqaasia neriorsuutaalu qammuinnartanngitsut uppernarsiartortillugit. — Josva 23:14; Esaja 55:10, 11.

Anersaakkut perlilernaveersaarit

Kristumiunngoreerluni uppertuarnissaq qularsaarillutillu Jehovamut peqatigiiffianullu tatiginninnitsinnik sanngiillisitsiniartut ingalassimanissaat unamminiarnartuuvoq. Taamaaliussagaanni Biibili ullut tamaasa atuarneqartariaqarpoq. Apustili Paulusi mianersoqqusivoq ’ullussani kingullerni inuit ilaat uppernermik tunussiumaartut, tassa naalakkamikkit anersaat tammartitsisut anersaapiluillu ajoqersuutaat’. (1 Timotheusi 4:1) Oqaatsit ajoqersuutillu tammartitsiniutit ilaannut qulalissutaasarput Guutimullu ungasillisitsisinnaallutik. Qanoq imminut illersorsinnaavugut? ’Uppernerup ajoqersuutillu ajunngitsup oqaasertai maleruarsimasatit pissatsissutigiuarneratigut’. — 1 Timotheusi 4:6.

Anersaakkut inuussutissat peqqinnartut tamanut ammaanneqaraluartut ajoraluartumik ilaat ’uppernerup ajoqersuutillu ajunngitsup oqaasertaanik’ pissatsinneqarusunngillat. Ussatit-ni allassimavoq anersaakkut inuussutissanik peqqinnartunik, aap anersaakkut nerisassanik nalliuttorsiutissanik, avatangiiseqartoqarsinnaasoq nerinagilli aqajaqqumiluunniit uunnagit. — Ussatit 19:24; 26:15.

Tamanna ulorianarpoq: Peter Wingate oqarpoq: „Timi proteinissamaatiminik atuileraangat, peqqiilliornermik kinguneqartarpoq.“ Perlilertoqartillugu timip ikummatissamaatit timimeereersut atulertarpai. Taakkua nungukkaangata timip proteinit, alliartortuarnissamut timillu ipiutaasartaasa nutartertuarnissaanut pisariaqartut, atulertarpai. Timip pisatai pingaarutillit sanngiilliartuaalissapput, peqqiillipallassutaasumik.

Kristumiut ilagiivini siullerni anersaakkut ittumik taamatut pisoqarpoq. Anersaakkut pigeriikkat kisiisa inuussutiginiarsaraat. Nammineq atuaqqissaarnissartik sumiginnarsimagunarpaat, anersaakkut sanngiillissutigalugu. (Hebræerit 5:12) Apustili Paulusip Hebræerit kristumiut tamatuma navianartortaanik allaffigai: „Uatsinnut tusarliunneqartut sianigilluaqqissaarniartariaqarpavut sarfaanneqartutut qimakkiartoqqunatigit.“ Nalunngilaa qanoq ajornanngitsigisumik sungiussipilussinnaasugut „soqutaatinngikkutsigu annaanneqarneq ima angitigisoq“. — Hebræerit 2:1, 3.

Inuup nerisaluttup nerisakilliortulluunniit tamatigut saluttuusannginnerata peqqiippaluttannginnerataluunniit maluginissaa soqutiginarpoq. Assingusumik inuup anersaakkut perlilernera arajutsineqarsinnaavoq. Anersaakkut nerisaluttoq anersaakkut peqqippasissinnaavoq — sivikitsuinnarmilli. Avaqqussassaanngitsumik anersaakkut sanngiillissaaq, tunngaveqanngitsumik qulalerluni upperisarlu ilungersuutigisinnaajunnaarlugu. (Judasi 3) Taamaannera arajutsineqarsinnaavoq, namminerli nalunngilat anersaakkut qanoq nerisartiginerlutit.

Nammineq atuaqqissaartarnerit pingaarnerutingaartuartariaqarpat. Tamaviaarlutit qularneq akioruk. Tunillatsinneq soqutaanngitsoorpasissoq soqutiginngikkaanni — qularnerit eqqissiunnaartitsisut eqqarsaatiginaveersaaraanni — ajorluinnartumik kinguneqarsinnaavoq. (2 Korinthimiut 11:3) ’Ilumut ulluni kingullerni inuuvugut? Biibilimi allassimasut tamarmik tatigineqarsinnaappat? Jehovap peqatigiissortarinerai qularutiginngilluinnarsinnaavara?’ Satanip qulalersikkunisit iluatsitsinini nuannaarutigingaassavaa. Anersaakkut nerisarnermut qarsupittumik isumaqarlutit sallusumik ajoqersuutaanut pututikkuminartuuteqinak. (Kolossemiut 2:4-7) Timotheusimut siunnersuutigineqartoq maliguk. Eqiasuillutit „Allakkat Illernartut“ misissoqqissaakkit, ’ilinniarsimasatit nakimaatsumillu upperilersimasatit aalajangiussinnaaqqullugit’. — 2 Timotheusi 3:13-15.

Taamaaliornissamut ikiorneqarnissaq pisariaqarsinnaavoq. Peter Wingate nangippoq:  „Perlilerujussuarnermi vitamininik pisariaqartunillu allanik amigaateqarnerup nerisat aqqutaat ima ajoqusersinnaatigai allaat inuussutissat nerisassanit nalinginnaasuneersut iluaqutigineqarsinnaajunnaarlutik. Taamaakkaanni piffissap ilaani kimikitsunik nerisoqartariaqarpoq.“ Perlilernerup kingunerinik katsorsaassagaanni immikkut ilisimasaqartariaqarpoq. Nammineq Biibilimik atuaqqissaartanngitsoq anersaakkut nererusussuseqalerteqqinniarlugu qiimmassarneqangaartariaqarpoq ikiorneqangaartariaqarlunilu. Illit taamatut atugaqaruit ikiortissarsiortariaqarputit anersaakkullu peqqisseqqinnissamut nakussatseqqinnissamullu tapersersuinerit tamaasa qujaruttariaqarlugit. — Jaaku 5:14, 15.

’Uppinngissutsimi qulanngikkisa’

Ataataanerpaap Abrahamip atugai eqqarsaatigigaanni, isumaqartoqarsinnaavoq qularnissamut pissutissaqartoq. Paasinarluinnassaq — Guuti neriorsuereeraluartoq — ’inuiaqatigiippassuarnut ataataalernissaminut neriuuteqannginnerarluni’ isummersimasuuppat. Sooq? Inuit isumaat malillugu neriunarpallaanngimmat. Biibilimi allassimasutut Abrahamip ’misigisimavaa timini toqujartulereersoq Sarallu illiaa toqungasoq’. Taamaakkaluartoq qularnerup isumamini uummatiminilu sorlaninnissaa nakimaalluni akueriumanngilaa. Apustili Paulusip allaaseraa ’uppissutsimigut sanngiillinngitsoq’ imaluunniit ’uppinngissutsimi qulanngitsoq’. Abrahamip ’nakimassutiginngilluinnarpaa Guuti pissaaneqartoq neriorsuutini naammassissallugu’. (Romamiut 4:18-21) Ukiorpassuit ingerlanerini Jehovamut nukittuumik tatiginnittumillu attaveqarnini ineriartortissimavaa. Qularnerit taassumunnga qanittumik attaveqarnerminut sanngiillissutaasinnaasut tamaasa tunuartittarpai.

Illit aamma taamaaliorsinnaavutit anersaakkut peqqinnartunik nerisarnikkut ’tusakkatit peqqissinartut pigiuaannarukkit’. (2 Timotheusi 1:13) Qularnerup navianaatai eqqumaffigikkit. Satani anersaakkut tuniluussinnaasut atorlugit sorsuttarpoq. Nammineq Biibilimik atuaqqissaartanngikkuit kristumiullu ataatsimiinnerinut peqataasanngikkuit, saassussinernut illersuutissaqassanngilatit. ’Kiffap ilumoortup silatuullu’ piffissaq eqqorlugu anersaakkut inuussutissarpassuarnik pilersuinera atorluartaruk. (Matthæusi 24:45) ’Naalakkatta Jiisusi-Kristusip oqaasiinik peqqissinartunik’ aalajangiussiuarit, ’uppersutsikkullu peqqissuujuarit’. (1 Timotheusi 6:3; Titusi 2:2) Uppernerit qularnermit aserorneqanngikkili. (wE 1/7 01)

[Qupp. 23-mi assiliartat]

Anersaakkut qanoq nerilluartigisarpit?