Ajunngitsuliorneq qatsuteqinatigu

„Ajunngitsuliorneq qatsuteqinatigu, piffissarmi nalliuppat katersuiumaarpugut qasunngikkutta.“ — GALATIAMIUT 6:9.

1, 2. (a) Guutimut kiffartornermi sooq nikallujuittariaqarpugut? (b) Aaperaat qanoq nikallujuissimava, taamaaliornissaminullu suna iluaqutigaa?

NUANNAARUTIGAARPUT Jehovap Nalunaajaasuisut Guutip piumasaatut iliornerput. Nuannaarutigaarputtaaq Kristusip ajoqersugaasut ’nammaatsernerput’, tamannalu nukissaqaleqqinnarpoq. (Mattæusi 11:29) Kiffartornerpulli oqitsuujuaannanngilaq. Tamanna apustili Paulusip uparuarpaa uppeqatini kajumissinartumik ima allaffigigamigit: „Nikallujuissuseq atorfissaqartipparsi  Guutip piumasaa iliuuserisinnaajumallugu neriorsuutigisaalu pissarsiaralugu.“ (Hebræerit 10:36) Aap, Guutimut kiffartorneq unamminiarnartuusinnaammat nikallujuittariaqarpugut.

² Aaperaap inuunerata tamanna uppernarsarpaa. Aaperaat ajornartorsiorajuppoq aalajangeruminaatsunillu aalajangigassaqartarluni. Urimi inuuneq ilorrisimaarnartoq Jehovap qimaqqummagu aallaqqaataannaavoq. Sivitsunngitsoq kaannersuaqalerpoq. Aaperaap nuliani annaangajavippaa, akeqqersimaartunik eqqaamioqarluni, eqqarliminik iluarineqarnani sorsunnermilu peqqarniiserfigineqarluni. Sulilu atugarliornartoqangaassaaq. Aaperaali ajunngitsuliornissaminut qatsussinngisaannarpoq. Tamanna maluginiarnartuuvoq ullumikkutulli Aaperaap Guutip oqaasia tamaat piginngikkaa eqqarsaatigalugu. Qularutissaanngilarli Guutip siulittuutaa siulleq nalunngikkaa: „Akerariissikkumaarpassi illit arnarlu, illit kinguaassat taassumalu kinguaassaa.“ (1 Mosesi 3:15, NV) Kinguaassaq neriorsuutigineqartoq Aaperaakkut saqqummertussaammat soorunami Saatanimit saassunneqartarpoq. Qularnanngilaq tamatuminnga paasinninnerata nuannaarluni atugarliutaanit aniguisinnaanngortissimassagaa.

3. (a) Ullumikkut Jehovap kiffaasa sooq atugarliornissartik ilimagisariaqarpaat? (b) Galatiamiunut allakkat 6:9-mi qanoq kajumissaarneqarpugut?

³ Ullumikkut aamma Jehovap kiffai atugarliuuteqarnissartik ilimagisinnaavaat. (1 Petrusi 1:6, 7) Saqqummersitat 12:17-imi ilisimatinneqarpugut Saatanip tanitat sinneruttut ’sorsuffigilerai’. ’Savat allat’ tanitat qanimut suleqatigigamikkik Saatanip kamannera aamma malugaat. (Johannesi 10:16) Kristumiut oqaluussinermi akerlilersorneqarnermik saniatigut aamma inuttut inuunerminni tatineqarsinnaapput atugarliorlutillu. Taamaattumik Paulusip ima kajumissaarpaatigut: „Ajunngitsuliorneq qatsuteqinatigu, piffissarmi nalliuppat katersuiumaarpugut qasunngikkutta.“ (Galatiamiut 6:9) Saatanip upperunnaartinniaraluaraatigut, uppernikkut aalajaalluta assortortariaqarparput. (1 Petrusi 5:8, 9) Aalajaannerput qanoq kinguneqassavaa? Jaaku 1:2, 3-mi allassimavoq: „Qatanngutikka, tamalaanik misilinneqartarnisi nuannaarutigiinnartassavasi; nalunngilarsimi uppernersi  misilinneqaraangami nikallujuitsunngortitsisartoq.“

Saassussinerit toqqaannartut

4. Saatanip Guutip kiffai assuarnaakkunnaartinniarlugit qanoq toqqaannartumik saassuttarpai?

⁴ Aaperaap inuunerata takutippaa Guutip kiffai ’tamalaanik misilinneqartassasut’. Jornguni Loti Sinearimit saassunneqarmat akuliuttariaqarnera assersuutigisinnaavarput. (1 Mosesi 14:11-16) Tupaallannanngilaq Saatanip malersuilluni suli toqqaannartumik saassussisarnera. Sorsunnersuup aappaata kingornali nunarpassuarni Jehovap Nalunaajaasuisa kristumiutut ilinniartitsinerat naalakkersuisunit inerteqqutigineqartarsimavoq. Jehovas Vidners Årbog 2001-imi oqaluttuarineqarpoq Angolami kristumiut akeqqanit nakuuserfigineqartarnerat. Nunanili taamaattuni qatanngutivut Jehovamut tatiginnillutik upperisaminnik aalajangiusimannipput. Nakuusertanngillat pikitsitsisarnatilluunniit, malugitinnaveersaarlutilli oqaluussiinnarlutik. — Mattæusi 24:14.

5. Kristumiut inuusuttut atuarfimmi qanoq malersorneqarsinnaappat?

⁵ Malersuinerli nakuusernerusariaqanngilaq. Aaperaat naggataagut pilluaqqusaavoq ernertaarluni marlunnik — tassa Iisaaq Ismaelilu. Mosesimik allakkat siulliit 21:8-12-imi allassimavoq ilaanni Ismaelip Iisaaq „pinnguaqatigigaa“. Paulusip Galatiamiunut allakkamini takutippaa meeqqat akornanni pinnguarnerinnaasimanngitsoq, allappormi Ismaelip Iisaaq qinugigaa. (Galatiamiut 4:29) Taamaattumik atuaqatinit illaruaatigineqarneq akerliusunillu oqaatsinik saassunneqarneq eqqortumik malersuinertut taaneqarsinnaapput. Inuusuttup kristumiup Ryanimik atillip atuaqatimi erloqisitsiuarnerat puiunngisaannassavaa: „Atuarfimmiit atuarfimmullu bussernerput 15 minutsiinnaavoq, nalunaaquttap-akunnerpassuitulli misigaakka. Mitaatigineqartarpunga, pappiaqqanullu kiggitsissut ikittaammik kissariarlugu uutartarpaannga.“ Sooq naalliutsippaat? „Teokratii tunngavigalugu perorsarneqarnerma atuarfimmi inuusuttunit allanit allaanerutippaanga,“ oqarpoq. Angajoqqaaminilli tapersersorneqarluni nikallujuippoq aalajaallunilu. Inuusuttut, atuaqatinit qinngasaarneqartarassi aamma ilissi nikallortoortarpisi? Uniinnaqinasi! Aalajaakkussi Jiisusip oqaasiisa ilumoornerat misigissavarsi: „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik.“ — Mattæusi 5:11.

Ulluinnarni isumakuluutit

6. Uppeqatit akornanni ullumikkut qanoq sukanganarsisoqarsinnaava?

⁶ Ullumikkut misilinneqaatitta amerlanersaat ulluinnarni nalinginnaasumik isumakuluutaapput. Aaperaap savaatimi paarsisuisa Lotillu savaataasa paarsisuisa saqitsaannerat aaqqiissutissarsiortariaqarpaa. (1 Mosesi 13:5-7) Tamatumunnga assingusumik inuttut assigiinngissutit sinngatuallaalaarnerlu ullumikkut inuit akornanni pissutsinik sukanganarsisitsisinnaapput allaallu ilagiinni eqqissiunnaartitsilersinnaallutik. „Sinnganeqaraangat imminullu angisuutikkumaneqarluni tassaniittarputtaaq tavanneq ajortullu allat tamarmik.“ (Jaaku 3:16) Uniinnannginnissatta pingaarniarnermillu eqqissiviilliortitsilinnginnissatta, Aaperaatulli allat soqutigisaannik noqqaassutiginninnissatta pingaaruteqassusiat. — 1 Korinthimiut 13:5; Jaaku 3:17.

7. (a) Uppeqammit narrujuummisinneqaraanni qanoq iliortoqassava? (b) Aaperaat allanut attaveqarluaannarnermigut qanoq maligassiuia?

⁷ Uppeqammit naapertuilluanngitsuliorfigineqarsorigaanni eqqissiqatiginissaa sapernarsinnaavoq. Ussatit 12:18-imi allassimavoq: „Eqqarsariaqqaarnani oqaaserisat panatut kapisisarput.“ Eqqarsariaqqaarnani oqaaserisat annernangaarsinnaapput, ajortumilluunniit siunertaqarnani oqaasiugaluarpata. Annernarneruvorlu mamarlerneqarsorigaanni ajortumilluunniit oqaatissuarneqaraanni. (Tussiaat 6:7, 8) Kristumiulli narrujuumminini  uniinnassutigisariaqanngilaa! Taamatut atugaqaruit ajuallatsitsisoq inussiarnersumik oqaloqatigalugu pissutsit aaqqinniarlugit siulliullutit iliuuseqarit. (Mattæusi 5:23, 24; Efesosimiut 4:26) Isumakkeerfiginneriaannaagit. (Kolossemiut 3:13) Ajuallatsitsinertut isiginngikkutsigit narrujuummisinneqarnivut qaangersinnaavavut qatanngutitsinnullu attaveqarlualeqqilluta. Aaperaat Lotimut puttarsinngilaq. Loti ilaqutaalu ikiortariaqalermata Aaperaap ingerlaannaq ikioriartorpai. — 1 Mosesi 14:12-16.

Nammineq pisuulluni atugarliuutit

8. (a) Kristumiu qanoq ’imminut amerlasuunik erloqissutissiorsinnaava’? (b) Aaperaat sooq pigisanut oqimaaqatigiissumik isiginnittaaseqarsinnaava?

⁸ Ilumoorpoq atugarliuutit ilaat nammineq pisuussutigineqartartut. Assersuutigalugu, Jiisusi ajoqersukkaminut oqarpoq: „Erlinnartuutinik nunami katerseqinasi, tassanimi qillaalaat oquillu aseruisarmata tillinniallu nakuuserlutik illumut iserlutik tillittarmata.“ (Mattæusi 6:19) Taamakkaluartoq qatanngutit ilaat ’imminnut amerlasuunik erloqissutissiorput’ Naalagaaffiup soqutigisaanit pigisat soqutiginerugamikkik. (1 Timotheusi 6:9, 10) Aaperaat Guutimut iluarisaajumalluni pigisani ilorrisimaarnartut pilliutigeriaannaavai. „Uppernikkut nunami neriorsuutigisami takornartatut ittumi nunassippoq tupernilu ineqarluni Iisaaq Jaakulu neriorsuutigisamik kingornusseqataasussat peqatigalugit; utaqqivaami illoqarfik aalajaatsunik toqqavilik sanasua pinngortitsisualu tassaasoq Guuti.“ (Hebræerit 11:9, 10) Aaperaap ’illoqarfissamik’, Guutip nalakkersuineranik, upperisaqarnini pisuussutinik isumalluuteqannginnissaminut iluaqutigaa. Maligassiuinera malikkutsigu silatusaarnerussanngila?

9, 10. (a) Nuimarusuttuuneq qanoq misilinneqaataasinnaava? (b) Qatanngut angut ’minnerusutut’ ullumikkut qanoq pissuseqarsinnaava?

⁹ Allamut tunngasoq takoriartigu. Biibilimi aamma toqqaannartumik ima allassimavoq: „Imminut pingaartuusorisoq, uffa taamaannani, taanna imminut salloqittarpoq.“ (Galatiamiut 6:3) Aammattaaq kajumissaarneqarpugut ’namminissarsiorneq imminulluunniit angisuutinneq tunngavigalugit iliuuseqartaqqunata, makitajuitsuunitsigulli allat uagutsinnit anneruteqqullugit’. (Filippimiut 2:3) Ilaasa siunnersuut tamanna sumiginnarlugu imminut isumakuluutissittarput. Nuimarusunneq ’pingaartorujussuarmik’ suliaqarusunnerunngitsoq kajumississutigigamikku, ilagiinni piumasamittut immikkut pisinnaatitaaffeqalinngikkaangamik nikallortarput naammagittaalerlutillu. — 1 Timotheusi 3:1.

¹⁰ Aaperaat maligassaalluarpoq ’imminut pingaartinnginnami pisariaqartumit annerusumik’. (Romamiut 12:3) Guutimit salliutinneqaraluarluni Melkisedekimit pingaarnerusorinngilaq. Akerlianik palasitut qutsinnerusumik inissisimanera akueraa pissarsiami qulerarterutaat Melkisedekimut tunniuttarlugit. (Hebræerit 7:4-7) Ullumikkut kristumiu ’minnerpaasutut’ pissusilersortariaqarpoq takoqqusaartuunanilu. (Lukasi 9:48) Ilagiinni siuttuusut immikkut pisinnaatitaaffilernissat nangaassutigippassuk ilumoorlutit imminut misissortariaqarputit paasiniarlugu kinaassutsit pissutsinilluunniit iliuuseqarfiginnittarnerit qanoq pitsanngorsarsinnaanerlugu. Aalajangersimasumik immikkut pisinnaatitaaffeqalinnginnerit narrujuummissutiginagu, suliassareriikkat suliarilluaannaruk — tassa allat Jehovamik ilisarsinissaannik ikiorlugit. Aap, ’Guutip assaata pissarsuup ataani qanilaartuugit, taava taassuma piffissaq nalliuppat akitsisissavaatit’. — 1 Petrusi 5:6.

Takussaanngitsunut upperisaqarneq

11, 12. (a) Ilagiinniittut ilaasa piffissakillereersoq sooq upperiunnaarpaat? (b) Aaperaat Guutip neriorsuutaanik upperinninnermigut qanoq maligassiuilluarpa?

¹¹ Misilinneqarneq alla tassaasinnaavoq pissutsit  aaqqissuussaanerata matuma ajortup naggatissaata kissaatigisatsitut takkutiaartiginnginnera. Petrusip allagaasa aappaat 3:12 naapertorlugu kristumiut ’Guutip ullussaata nalliunnissaa utaqqissavaat piaarnerusumillu nalliunnissaa ilungersuutigalugulu’. Inuppassuilli ulloq taanna ukiorpassuarni, immaqa allaat ukiuni qulikkuutaani arlalinni, utaqqisimavaat. Taamaattumik ilaat nikallortarput piffissakillereersorlu upperiunnaarlugu.

¹² Aaperaap maligassiuinera misissoqqitsigu. Guutip neriorsuutaanik upperinninni inuunermini qitiutippaa inuutilluni tamarmik eqquussinnaanngilluinnaraluartut. Ilumoorpoq toqutinnani erni Iisaaq perortoq takugaa. Ukiulli hundredellit qaangiuppata aatsaat Aaperaap kinguaavisa amerlassusii ’qilaap ulloriaanut sioqqanulluunniit sissamiittunut’ assersuunneqarsinnaalissapput. (1 Mosesi 22:17) Taamaattoq Aaperaat narrujuumminngilaq nikallornaniluunniit. Apustili Paulusip Aaperaat ataataanerpaallu allat ima allaatigai: „Taaneqartut tamakku tamarmik uppersuseqarnertik pigalugu toqupput neriorsuutit suli eqquutinngitsut. Eqquunnissaat kisiat ungasianit takusinnaasimavaat ilassisimallugulu, nassuerpullu nunami takornartaallutik allamiuullutillu.“ — Hebræerit 11:13.

13. (a) Kristumiut ullumikkut ’allamiuusut’ qanoq paasisariaqarpa? (b) Sooq Jehovap pissutsit aaqqissuussaanerat manna atorunnaartissavaa?

¹³ Guutip neriorsuutaanik, siunissami ungasissumi eqquuttussanik, Aaperaap upperinninni inuunermini qitiutissinnaappagu, ullumikkut eqquuffissaasa qaninnerungaarfianni inuusugut taamaaliornissatsinnut pissutissaqarnerunnginnerpugut? Aaperaatulli Saatanip aaqqissuussaani ’allamiutut’ tassaniiginnartussaanngitsutullu imminut isigisariaqarpugut nammineq kissaatigisatsitut inuulernata. Soorunami kissaatigaarput ’tamarmik naggatissaat’ qaniinnarnani maannakkut tikiutissasoq. (1 Petrusi 4:7) Immaqa ilungersunartumik peqqiilliuuteqarpugut aningaasalluunniit tungaatigut nanertuuteqarluta. Eqqaamassavarpulli pissutsinit nuanniitsunit anigusinniaannarluta Jehovap naggatissaq tikiutitissanngikkaa, aqqili illernarsisissallugu tikiutitissagaa. (Ezekieli 36:23; Mattæusi 6:9, 10) Naggatissaq piffissami uagut iluarisatsinni nalliuttariaqanngilaq, Jehovalli siunertaanut piffissaalluarnerpaami.

14. Guutip erinitsajuinnera ullumikkut kristumiunut qanoq iluaqutaava?

¹⁴ Aammattaaq eqqaamajuk Jehovap ’neriorsuutigisani paamaarutinngikkaa, naak ilaat isumaqaraluartut paamaarussinerarlugu; ilissinnulli erinitsajuittoq kimilluunniit tammaqqusinnginnami, tamaasalu allamik isumataarnissamut periarfissikkumagamigit’. (2 Petrusi 3:9) Malugiuk Guuti „ilissinnut erinitsajuittoq“ — tassa kristumiut ilagiivinut ilaasortaasunut. Qularnanngilaq ilaqartugut allannguinissaminnut iluarsisaqarnissaminnullu ’taassumunnga minguitsunngornissaminnut assuarnaatsunngornissaminnullu eqqissillutik’ piffissaqartariaqartunik. (2 Petrusi 3:14) Guutip erinitsajuinneranut qujamasuttariaqannginnerpugut?

 Akornuteqaraluarluni qanoq nuannaartoqarsinnaasoq

15. Jiisusi atuagarlioraluarluni qanoq nuannaarsinnaava, ullumikkullu kristumiut malikkunikku qanoq iluaqutigissavaat?

¹⁵ Ullumikkut kristumiut Aaperaat ilinniarfigingaarsinnaavaat. Uppertuuginnanngilaq, aammattaarli erinitsajuippoq, silassorissuulluni qunusuitsuulluni namminissarsiunngitsumillu asannilluni. Jehovamut pallorfiginninneq inuunermini salliutippaa. Eqqaamasariaqarparpulli Jiisusi Kristusi malitassatta pingaarnersarigaat. Aamma taanna atugarliuuterpassuaqarpoq misiligaangaartarlunilu, nuannaarunnaanngisaannarporli. Sooq? ’Nuannaarnissaq siunerminiittoq’ nakkutigiuaramiuk. (Hebræerit 12:2, 3) Taamaattumik Paulusi ima qinuvoq: „Guutip nikallujuitsuutitsisup tuppallersaasullu tunilisi isummamik taannaasumik ataasiusumik Kristusi-Jiisusip piumasaa malillugu.“ (Romamiut 15:5) Eqqortumik isiginnittaaseqarutta Saatanip akornusersorniaraluaraatigut nuannaarsinnaavugut.

16. Ajornartorsiutit artornartikkaangatsigit qanoq iliorsinnaavugut?

¹⁶ Ajornartorsiutit artornartikkukkit, imminut eqqaasissinnaavutit Jehovap asagaatit, Aaperaamut asanninnermisulli. Aalajaannissat nikallujuinnissallu kissaatigaa. (Filippimiut 1:6) Jehova tatigilluinnaruk ’akuersaarumanngikkaa artukkannik usserneqarnissat, kisianni usserneqarnermut ilagitillugu aniguiffissaq pilersissagaa artorsartitaaqqunak’. (1 Korinthimiut 10:13) Guutip oqaasia ullut tamaasa atuartaruk. (Tussiaat 1:2) Qinujuarit nikallujuinnissannullu Jehovamut ikioqqugit. (Filippimiut 4:6) ’Imminut qinusut Anersaamik Illernartumik tuniumaarpai.’ (Lukasi 11:13) Anersaakkut ikiorniarlutit Jehovap pilersitai, soorlu atuagassiat atuakkallu Biibililersaarutit, tamaasa atortakkit. Aammattaaq „qatanngutit“ tapersersortissarsiorfigisakkit ikiortissarsiorfigalugillu. (1 Petrusi 2:17) Aalajaallutit kristumiut ataatsimeeqatigiuakkit, tassanimi nikallujuinnissannut pisariaqartumik kajumissaarneqassaatit. (Hebræerit 10:24, 25) Nuannaarutigiuk nalunnginnakku nikallujuinnerit Guutimit iluarisaassutigissagit aalajaannerillu nuannaarutigissagaa! — Ussatit 27:11; Romamiut 5:3-5.

17. Sooq kristumiut isumatsassimaarneq nikalluutigissanngilaat?

¹⁷ Guutip Aaperaat ’ikinngutimisut’ asavaa. (Jaaku 2:23) Taamaattoq Aaperaat misilinneqartarpoq atugarliortarlunilu. Kristumiut maanna „ullussani kingullerni“ taamatut atugaqartarnissartik aamma ilimagisariaqarpaat. Aammami Biibilimi ilisimatinneqarpugut ’inuit ajortut peqquserluttullu ajortumut nakkaakkiartuinnartussaasut’. (2 Timotheusi 3:1, 13) Isumatsassimaarneq nikalluutigiinnarnagu paasisariaqarparput atugarliuutivut Saatanip pissutsinik aaqqissuussinerata ajortup naggatissaata qaninneranut nalunaajaataasut. Jiisusilli eqqaasippaatigut ’naggatissamut nikallujuitsuusoq annaanneqassoq’. (Mattæusi 24:13) Taamaattumik „ajunngitsuliorneq qatsuteqinatigu“. Aaperaat maliguk, ’uppernikkullu nikallujuinnikkullu Guutip neriorsuutigisaanik kingornussisussanut’ ilaagit. — Hebræerit 6:12. (wE 15/8 01)

Makku malugaagit?

• Ullumikkut Jehovap kiffaasa sooq atugarliornissartik misilinneqarnissartillu ilimagisariaqarpaat?

• Saatani toqqaannartumik qanoq saassussisinnaava?

• Kristumiut akunnerminni saqitsaannerit qanoq aaqqissinnaavaat?

• Pingaarniarneq namminissarsiornerlu qanoq misilinneqaataasinnaappat?

• Guutip neriorsuutaasa eqquunnissaannik utaqqinermini Aaperaat qanoq maligassiuilluarpa?

[Atuaqqissaarnermi apeqqutit]

[Qupp. 24-mi assiliartaq]

Kristumiut inuusuttorpassuit atuaqatiminnit qinngasaarneqarlutik malersugaasarput

[Qupp. 27-mi assiliartaq]

Aaperaap nalaani Guutip neriorsuutaasa eqquuffissaat ’ungasippoq’ taamattoq inuunermini qitiutippai