Atuagaq inuusuttut amerlanerit soqutiginngisaat

„QANOQ ilillunga nalussannginnakku Biibili ilumut Guutip oqaaserigaa? Atuagaannaavoq — soqutiginngilara,“ arnaq inuusuttoq Beatemik atilik oqarpoq.

Tysklandimi, Beatep najugaqarfigisaani, inuusuttut amerlanerit taamatuttaaq isumaqarput taamaattumillu Biibilimik atuarneq pingaaruteqarpallaanngitsutut isigaat. Qanittukkut misissuinerup takutippa, Tysklandimi inuusuttut 1 procentiinnaasa Biibili akulikitsumik atuartaraat, 2 procentiisa akuttunngitsunik, 19 procentiisa qaqutigut, 80 procentingajaasalu atuanngisaannaraat. Nunani allani amerlasuuni aamma taamaappoq, immaqa aamma illit najugarisanni. Aap, ersarippoq Biibili atuagaasoq inuusuttut amerlanersaannit soqutigineqanngitsoq.

Taamaattumik inuusuttut Biibilimik ilisimasaqarpallaannginnerat tupinnanngilaq. Ukiumi 2000-imi fberuaarimi aviisip Lausitzer Rundschau-ip misissuineq qassit Inatsisinik Qulinik ilisimasaqarneranik najoqqutaqarneranillu ersersitsisoq allaaseraa. Apersorneqartunit 60-t sinnerlugit ukioqartut 67 procentiisa inatsisit ilisimavaat najoqqutariniarsaralugillu, 30-t inorlugit ukiulinni 28 procentiinnaallutik. Aap, Biibili inuusuttorpassuarnit ilisimaneqanngilaq.

Biibilimik allatut isiginnittaasillit

Nunarsuaq tamakkerlugu millionilinnik inuusuttoqarpoq Guutip oqaasiata illernangaassusianik paasinnissimasunik. Asersuutigalugu Alexanderip 19-nik ukiullip Biibili ullaat tamaasa suliartunnginnermini atuartarpaa. „Ulloq allatut pitsaanerusumik aallartissallugu takorloorsinnaanngilara,“ oqarpoq. Sandrap ileqquliussimavaa unnuit taamaasa Biibilimiit atuartarneq. „Ullut tamaasa pisassannut ilaalersimavoq,“ nassuiaavoq. Juliallu, 13-niinnarnik ukiullip, Biibilimi kapitali ataaseq innannginnermini atuartarpaa. „Nuannareqaara siunissamilu taamaaliortuaannassaanga.“

Biibilimut isiginnitaaseq qanoq ittoq pigissallugu silatusaarnerua? Ilumut Biibili atuassallugu pingaaruteqarpa? Inuusuttunut pingaaruteqarpa? Illit qanoq isumaqarpit?