Ileqqup pissaanerata ilinnut ajunngitsussaq naammassiliuk

ANGUT ukiuni 12-ni illorpassuaqarfiup eqqaani Athenimi najugaqarsimasoq, suliffimminit angerlaraangami aqqut ataasinnaaq aqqutigisarsimavaa. Illoqarfiup illua’tungaanut nuuppoq. Ullut ilaanni angerlartilluni paasilerpaa najugaqarfikumi eqqannguaniilluni. Ileqquliutiinnarsimasaminik kukkusimik ingerlasimavoq.

Aap, ileqqoq pissaaneqaqaaq inuunitsinnilu sunniisinnaassuseqarluni. Innermut assersuunneqarsinnaavoq. Ikumatitaq taartumi qaammaqqutaalluarsinnaavoq, kissalaartitsisarpoq nerisassiorfiusinnaallunilu. Innerli aamma akeraasinnaavoq inuunermik pigisanillu suujunnaarsitsisoq. Ileqqut aamma taamaapput. Ajunngitsunik ileqquliussigutta iluaqutigingaarsinnaavarput. Ileqqulli aamma aserornarsinnaapput.

Angummut siuliani taaneqartumut ileqqup pissaanera illoqarfimmi biilinik angallaffioqisumi piffissaajaatiginerulaaginnarpaa. Pingaarnerusut pineqaraangata ileqqut pingaarutilerujussuanngortarput — inuunermik  ajunngitsumik ajortumilluunniit sunniuteqarsinnaapput. Biibilimi assersuutinit ersersinneqarpoq ileqqup kristumiutut inuunitsinni Guutimullu attaveqarnitsinni qanoq iluaqutaasinnaanersoq akornutaasinnaasorluunniit.

Ileqqunik ajunngitsunik ajortunillu assersuutit Biibilimeersut

Noa, Jobi Danielilu Guutimut attaveqarluarsimapput. Biibilimi nersualaarinnippaluttumik eqqartorneqarput ’iluarsuseqarmata’. (Ezekieli 14:14) Inooriaasiisa takutippaat ajunngitsumik ileqquliussisimasut.

Noa umiarsualioqquneqarsimavoq, umiarsuaq arsaattarfissuarmit anginerusoq illorsuartullu tallimanik quleriinnik portutigisoq. Suliarujussuaq taamaattoq itsaq umiarsualiortunut mersernarsimassaqaaq. Noa ilaqutaalu arfineq marluk nutaalianik atortorissaaruteqaratik umiarsualiorput. Saniatigut Noa inoqatiminut oqaluussiuarpoq. Qularissanngilarput ilaquttani anersaakkut timikkullu pilersornissaat isumagisimassagaa. (2 Petrusi 2:5) Tamakku tamaasa anguniarlugit Noa ajunngitsunik ileqqoqarsimassaaq. Biibilimi eqqaaneqarpoq ’Noap Guuti inooqatigigaa Guutillu peqqusineratorluinnaq iliortoq’. (1 Mosesi 6:9, 22; 7:5) Biibilimi ’assuarnaatsutut’ eqqaaneqarami Ulersuaqareernerup Babelimilu Jehovamut pikisitsisoqareernerup kingorna Guuti saqeqatigiuarsimavaa. Aap, toqussi tikillugu Guuti saqeqatigisimavaa, 950-nik ukioqalernissami tungaanut. — 1 Mosesi 9:29.

Jobip ’assuarnaatsuunissaminut peqqusersersuitsuunissaminullu’ ileqqut ajunngitsut iluaqutigisimavai. (Jobi 1:1, 8; 2:3) Ileqquliussimavaa tamatigut meeqqani qassimiuaaqatigeeraangata sinnerlugit ilaqutariinni palasitut pilliisarnissani. „’Immaqa’, Jobi oqarpoq, ’ernikka ajortuliorsimassapput uummatimikkullu Guuti perloqqusimallugu’. Jobi tamatigut taamaaliortarpoq.“ (Jobi 1:5) Ersarippoq Jobip ilaqutaani Guutimut pallorfiginninneq aalajangiusimaneqartoq.

Danieli eqqaaneqarpoq inuunini naallugu Guuti ’guutisiorfigiuarsimagaa’. (Danieli 6: 16, 20) Anersaakkut ileqqui ajunngitsut suusimappat? Siullermik aalajangersimasumik Jehovamut qinusarpoq. „Ullormut pingasoriarluni seeqqummerluni Guutini qinnuigalugulu unnersiutigisarpaa siornatigut ileqqoriuakkamisut“ naak kunngimit inerteqqutaagaluartoq. (Daniel 6:10) Inuunini navianartorsiortinneqaraluarpalluunniit Guutimut qinunissani pinngitsoorsinnaanngilaa. Qularnanngitsumik ileqqoq taamaattoq Danielip Guutimut assuarnaattuaannarnissaanut iluaqutaavoq. Aappassaanik, atuaqqissaartarsimanissaa Guutillu neriorsuutaanik nuanningaartunik eqqarsaatiginneqqissaartarsimanera qularnanngilaq. (Jeremia 25:11, 12; Danieli 9:2) Ileqqut ajunngitsut aalajaannissaanut aalajaallunilu inuunini inuunermik nalilik naammassinissaanut iluaqutigisimavai.

Akerlianilli Dina ileqqupalaaqarnini pissutigalugu ajortumeerpoq. ’Dina nunap tikitami arnartaanut pulaarniarluni anisarsimavoq’, Jehovamut pallorfiginninngitsunut. (1 Mosesi 34:1) Ileqqoq ulorianaateqarpasinngikkaluartoq ajunaarnermik kinguneqarpoq. Siullermik angummit inuusuttumit ’ataatami inoqutaanit tamanit ataqqisaanerpaasumit’ Sikemimit pinngitsaalineqarpoq. Kingornalu qatanngutaasa marluk akiniaallutik illoqarfimmi angutit tamaasa toqorarpaat. Ajortumik ileqqoqarnerup kingunipiloqarnerata alianassusia! — 1 Mosesi 34:19, 25-29.

Qanoq qulakkeersinnaavarput ileqqugut ajoqutiginagit iluaqutigisinnaagivut?

Ileqqup pissaanera atoruk

„Ileqqutit siunissannut aalajangiisuupput“, isumaliutersortartoq allassimavoq. Ajortumilli kinguneqartariaqanngilaq. Biibilip erseqqissumik takutippaa ileqqut ajortut soraarusinnaagivut ajunngitsullu ineriartortillugit.

Ajunngitsunik ileqqoqaraanni, kristumiutut anguniakkat angujuminarnerusarput.  Alex, qatanngut Grækenlandimeersoq oqarpoq: „Angusassannik pilersaarusiannik malinninnissara ileqquliussimavara, taamaalillunga piffissaajartanngilanga.“ Theophilusip, utoqqaanertap, pilersaarusiorneq isumagisassaminik naammassinninnissaanik iluaqutaasartoq eqqaavaa. Oqarpoq: „Pilersaarusiorneq ileqquliussimanngikkaluarukku kristumiutut pisussaaffimma angumerinissaat ajornakusoornerutissimassagaluarpara.“

Kristumiutut kajumissaarneqarpugut ’ornigarput toraaginnassagipput’. (Filippimiut 3:16) ’Toraaginnassagipput’ isumaqarpoq ileqquliutiinnarlugu iliuuserisaq. Uagutsinnut ajornannginnerujussuussaaq ulluinnarni aalajangersimasumik iliuuseqartarutta imaluunniit ileqqoqarutta — imaappoq unilluta eqqarsaatigeqqaartariaqassanngilarput sussanerluta. Pitsaanerusorisarput iliuuserereertarparput uagutsinnullu aalajangersimasumik ileqquullualertarpoq. Ileqqut taamaattut eqqarsaatigeqqaarnagu iliuuseqartittarpaatigut. Soorlu isumannaatsumik biilernerup ajutoortoqartillugu aquttoq eqqortumik qisuariapallatsissinnaagaa, ileqqut ajunngitsut kristumiutut inuunitsinni eqqortumik aalajangiipallannissatsinnut iluaqutigisinnaavavut.

Ajunngitsunik ileqqoqarutta, angusaqarnerunissarput ajornannginnerussaaq. Aalajangersimasumik oqaluussisarneq ileqquliussimagutsigu oqinnerutissavarput nuannernerutillugulu. Ajoqersukkat pillugit allassimasoqarpoq: „Ullut tamaasa ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq. “(Apustilit Suliaat 5:42; 17:2) Akerlianilli ilaannikkuinnaq oqaluussisarutta, annilaangalersinnaavugut, tamatigullu kristumiutut suliap pingaartup ileqquliunnissaa nuannaarutigilernissaalu sivisusinnaalluni.

Kristumiutut inooriaatsit assigiinngitsut aamma taamaapput. Assersuutigalugu iluaqutaassaaq ’[Jehovap] inatsisaanik ullukkut unnuakkullu aalajangersimasumik eqqarsaatiginnittarneq’ ileqquliukkaanni. (Josva 1:8; Tussiaat 1:2) Qatanngut angut oqaluttuarpoq 20-30 minutsit innarnissani sioqqullugu Biibilimi atuartarluni. Naak qasugaluaqaluni Biibilimi atuaqqaartinnani sinilersinnaaneq ajorpoq. Makittariaqartarpoq anersaakkullu pisariaqartitani matussuserlugit. Taamatut ileqqorilluni ukiuni arlalinni ukiup ataatsip ingerlanerani Biibili tamaat atuarsinnaasimavaa.

Maligassarsuarput, Jiisusi Kristusi, Biibilimut tunngasunik ataatsimiigiartarnissani ileqquliussimavaa. „Sabbataagaa pisarnermisut synagogimut iserpoq, nikuipporlu atuaajumalluni.“ (Lukasi 4:16) Joe utoqqaanertaavoq ilaquttanilu pilersorniarlugit suleruluttariaqarluni. Ileqqulli pissaanera, kristumiut ataatsimiinneranut pisariaqartitsinermik tamanullu najuuttarnissaanut iluaqutigaa. Oqarpoq: „Ataatsimiigiartarnissannut ileqquliussinerma ingerlaannartippaanga anersaakkullu nukissannik pisariaqarteqisannik tunisarpaannga unamminiarnartut ajornartorsiutillu nalaattakkama qaangernissaannut.“ — Hebræerit 10:24, 25.

Ileqqut taamaattut kristumiunut pinngitsoorneqarsinnaanngillat. Nalunaarusiami nunami Jehovap innuttaanik malersugaaffiusumi allassimavoq: „Anersaakkut ajunngitsunik ileqqullit sallusuissummillu paasisimasaqarluartut, misilinneqarnerminni aalajaannissartik ajornartorsiutiginngilaat; „qanoq ilisukkulluunniit“  ataatsimiigianngikulasut, aalajangersimanngitsumik oqaluussiisartut annikitsualutigullu akerlilersuisut, ’innermillusooq misilinneqarnermi’ nakkartarput.“ — 2 Timotheusi 4:2.

Ileqqut ajortut ingalassimakkit, ajunngitsut atorluakkit

Oqartoqarsimavoq ’ileqquliukkusutat kisiisa ineriartortinneqassasut’. Ileqqut ajortut ajorluinnarsinnaapput, ileqqoriunnaarneqarsinnaappulli.

Stella fjernsynerumaatuujusimavoq. „Ileqqupalaarilersimasakka tamarluinnarmik ulorianaateqarpasinngitsutut aallartipput.“ Fjernsynerpallaartalernera aamma taamaassimavoq. Imminut oqarfigisarsimavoq „qasuersilaaginnarniarluni“ „sukisaarsaarutigilaaginnarniarluguluunniit“. Akunnerpassuarnilli fjernsynerneq ileqqoriartulerpaa. „Paasilerpara ileqqupalaaq taamaattoq anersaakkut siumukarniarninni akornutigalugu,“ oqarpoq. Aalajangernermigut fjernsynerpallaarunnaarpoq aallakaatitanillu immikkoortitsinerisalerluni. „Imminut eqqaaseqattaartarpunga sooq tamanna ileqqoqarunnaarnerlunga,“ Stella oqarpoq, „tatigilluinnarpara Jehovap ikiuineratigut aalajangiusimajuarsinnaassallugu.“

Qatanngut Charalambosimik atilik oqaluttuarpoq isumagisassaminik kinguartitsisarneq ileqqorisimallugu — anersaakkullu siumukarniarnermini akornutigisimallugu. „Paasilerakku ileqquliussara qanoq navianaateqartiginersoq, iliuuseqarniarsarilerpunga. Imminut angusassikkaangama, pilersaarusiortarpunga qaqugorpiaq qanorpiarlu aallartissanerlunga. Pilersaarusiorneq, aalajangersinnaaneq iliuuseqarnissarlu pisariaqarsimapput, ileqqorlu taanna ajunngitsoq aalajangiusimavara.“ Aap, ileqqut ajortut ajunngitsunik taarseraanni pitsaanerpaavoq.

Ilagisartakkagut aamma aalajangiisorujussuupput. Ileqqut ajunngitsut ajortutulli tuniluussinnaatigipput. Soorlu ’ikinngutipalaaqarneq ileqqorikkaluartunut aseruutissiisartoq’ taamatuttaaq ajunngitsunik ilagisartagaqarneq ileqqunik iluaqutaasunik kajumilersitsisinnaapput. (1 Korintumiut 15:33) Pingaarnerpaasorli tassaavoq ileqqutta Guutimut attaveqarnerput nukittorsarsinnaammagu sanngiillisissinnaalluguluunniit. Stella oqarpoq: „Ajunngitsunik ileqqoqarutta, Jehovamut kiffartornerput oqinnerussaaq. Ajortunik ileqqoqarutta anguniakkagut angujuminaannerussapput.“

Ileqqut ajunngitsut ineriartortikkit taakkunanngalu aqunneqarit. Inuuninni iluaqutigalugulu nukittoqqutigisinnaavat. (wE 1/8 01)

[Qupp. 8-mi assiliartaq]

Ileqqut innertulli iluaqutaasinnaallutillu aseruisinnaapput

[Qupp. 10-mi assiliartaq]

Jiisusi Guutip oqaasii atuarneqartillugit pisarnermisut sabbatimi synagogimiittarpoq

[Qupp. 11-mi assiliartaq]

Anersaakkut ileqqut ajunngitsut Guutimut attaveqarnitsinnut nakussassaataapput