Inuusutsillutit ajunngitsumik inuuneqarit

NUNAMI Europamiittumi inuit suna kissaatigineruneraat aperineqarput: pinnissuseq, pisuujuneq inuusuttuunerluunniit. Amerlanerit inuusuttuuneq qinerpaat. Nalunanngilaq tamarmik inuusuttuuneq immikkut ittutut isigigaat inuusuttullu inuusuttuunermiit inersimasunngornerminni nuannersumik misigisaqarnissaat kissaatigigaat. Qanorli tamanna pisinnaava?

Biibili ikiuisinnaava? Aap, tamanna qularutissaanngilaq. Biibilip ingammik marlutsigut inuusuttunut iluaqutaasinnaanera takoriartigu, immaqalu taakkua allanit iluaqutiginerusinnaavaat.

Allat qanoq peqatigilluarneqarsinnaasut

Tyskit misissuinerat tunngavigalugu, inuusuttut isiginnittaasii, najoqqutassiaat pissusiilu pillugit Jugend 2000 allagaavoq. Misissuinerit takutippaat inuusuttut amerlanerit sunngiffimminni — nipilersuutinik tusarnaaraangamik, timersoraangamik eqqissisimaaraangamilluuniit allanik ilaqartartut. Inuusuttuulluni inuunerup ilaanut naleqqiullugu ikinngutinik peqateqarnissaq pisariaqarnerusimagunarpoq. Nuannaarluni inuusuttuunermi allanik peqateqarluarsinnaaneq isertugaatit ilagaat.

Tamatigulli ajornanngitsoqarpa? Naamik, inuusuttorpassuit nassuerput ilagisartakkaminnik ajornartorsiuteqakulasarlutik. Tassani Biibili iluaqutaasinnaavoq. Guutip oqaasia inuusuttut ikinngutigiinneq qanoq ineriartortissinnaaneraat siunnersuutinik tunngaviusunik imaqarpoq. Qanoq allassimava?

Ikinngutigiinnermi tunngavissaq pingaartoq ’maleruagassami atortuujuaannartumiippoq’: „Inunnut qanorluunniit iliorfigeqqugussi ilississaaq taamatut iliorfigisigit.“ Allat ataqqinnittumik inussiarnersumillu pissusilersorfigigukkit assinganik pissusilersorfigiumalissavaatsit. Inussiarnisaarneq uippakajaarunnaarsitsisarlunilu kamakkunnaarsitsisarpoq. Qajassuussisutut ilisarisimaneqaleruit qularutissaanngitsumik allanit nuannarineqalissaatit. Allanit nuannarineqarnerit iluarinngiliuk? — Matthæusi 7:12.

Biibilimi allassimavoq „tullit ilittut asassavat.“ Tamanna isumaqarpoq imminut paarisariaqartutit imminullu naleqquttumik ataqqillutit. Ingasaassinngitsumik annikippallaanngitsumillu. Sooq tamanna iluaqutaassava? Imminut iluarinngikkuit, ingasattumik isornartorsioqqajaassaatit tamannalu allanik peqateqarluarsinnaanernut akornutaassaaq. Imminut naleqassutsimik tulluartumik isigineq ikinngutigiillualernissamut tunngaviliisuuvoq. — Matthæusi 22:39.

 Ikinngutigiit ikinngutigiiginnassagunik tamarmik iliuuseqartariaqarput. Ikinngutigiinneq piffissaqarfigigukku nuannaalissaatit, imaakkami „tunisineq pilluarnarneruvoq tigusinermit.“ ’Tunisineq’ ilaatigut isumaakkeerfiginninneruvoq, tassa kukkunerit annikitsut isiginngitsuusaarsinnaallugit allallu naammalluinnartuunissaat naatsorsuutiginagu. Biibilimi allassimavoq: „Qanilaarsusersi ilisimaneqalerli inunnit tamanit“ taamaattumik „ilissi aalaajangiisuusinnaagussi inuit tamaasa eqqisseqatiginiarsigit.“ Taavami ikinngutivit arlaata kukkussutinnik nalunaarfigippatit? Qanoq qisuariassagaluarpit? Biibilip siunnersuutai pitsaasut eqqarsaatigikkit: „Kamaammernaveersaartarniarit,“ pissutigalugu „Ikinngutaalluartoq unataagaangami ajunngitsumik siunertaqartarpoq.“ Eqqarsartaatsitit, oqaluttarnitit pissutsitillu ilagisartakkannik sunnerneqartarnerat ilumoorpoq, ilaa? Taamaattumik Biibilimi mianersoqqussuteqarpoq: „Ikinngutipalaaqarneq ileqqorikkaluartunut aseruutissiisarpoq.“ „Ilisimasunik peqateqartoq ilisimassuseqalersarpoq.“ — Apustilit Suliaat 20:35; Filippimiut 4:5; Romamiut 12:17, 18; Oqaluussisartup oqaasii 7:9; Ussatit 13:20; 27:6; 1 Korintumiut 15:33.

Angut inuusuttoq Marcomik atilik, inuusuttut sinnerlugit oqaluppoq oqarami: „Biibilip najoqqutassiai allanik peqateqarluarsinnaanermut iluaqutaasorujussuupput. Nalunngisaqarpunga imminnuinnaq soqutigisatillu kisiisa eqqarsaatigalugit inuusunik. Biibililli ilinniartippaatigut immitsinnuinnaq eqqarsaatigivallaarnata allat eqqarsaatigissallugit, takusinnaasattullu ikinngutitaarnissamut tamanna tunngavissatsialaavoq.“

Inuusuttut Marcotut ittut Biibilimit ilikkakkatik massakkuinnaq iluaqutigissanngilaat, aammali siunissami. Siunissarlu eqqarsaatigalugu aamma Biibilip inuusuttut allatut ikiorsinnaavai.

Siunissamut isumakulunneq

Inuusuttut apeqqutissarpassuaqartuaannarput. Immaqa allanit tamanit susoqarnersoq aammalu sooq paasissallugu soqutigineruaat. Biibililu atuagatuaavoq silarsuarmi pissutsit taamaannerannik siunissamilu pisussanik nassuiaatissaqartoq. Taakkorpiaapput inuusuttut paasiumasaat. Qanoq tamanna qulakkeersinnaavarput?

Aap, naak isumaqartoqartaraluartoq inuusuttut siunissaq eqqarsaatiginagu inuusut, misissuinerit ilaat allatut takutitsipput. Tikkuarpaat inuusuttut avatangiisiminni susoqarnera maluginiakulasorujussuugaat inuunerullu qanoq ineriartornissaa nammineq isummerfigisarlugu. Inuusuttut angutit arnallu sisamaagaangata pingasut siunissaq eqqarsaatigi’kulavaat’ imaluunniit eqqarsaatigi’kulasupilussuuaat’. Naak inuusuttut nalinginnaasumik isumalluartuugaluartut amerlanerit aamma susoqarumaarnera isumakuluutigaat.

Soorli isumakuluppat? Kinguaariit tulliuttut inersimasortaat amerlasuut pinerluttuliornernik, persuttaanernik ikiaroornartunillu atornilluinernik ajornartorsiuteqareeqaat. Inuusuttut aamma inuiaqatigiit akornanni unammillerfioqisumi aalajangersimasumik suliffittaarnissartik  isumakuluutigaat. Misigipput atuarfimmi angusarissaartariaqarlutik sulifimmilu iluatsitsiniartariaqarlutik. Niviarsiaraq 17-nik ukiulik maalaarpoq: „Erloqinartumi namminissarsiorfioqisumilu inuuvugut. Tamarmik iluanaarutissatik kisiisa eqqarsaatigaat. Tassa kisiat piginnaasanik uppernarsaaniarsaraluni, tamanna qatsutiivippara.“ Angut inuusuttoq 22-nik ukiulik oqarsimavoq: „Inuunerminni iluatsitsisimasut atugarissaarlutik inuupput, iluatsitsisimanngitsulli arlaatigulluunniit malinnaasinnaanngitsut ilaginnarneqarlutik.“ Sooruna inuuneq taama unammillerfiutigisoq? Taamaattuaannassava?

Nassuiaat tunngaveqarluartoq

Inuusuttut pissutsini ineriartorneq isumakuluutigigunikku — ilisimanagu ilisimalluguluunniit — Biibili isumaqatigaat. Guutip oqaasiisa takutippaat ’pissutsit peqqarniitsut namminissarsiorfioqisullu’ piffimmut aalajangersimasumut ilisarnaataasut. Apustili Paulusi angummut inuusuttumut Timothæusimut allakkamini nalerput pillugu ima allappoq: ’ullussani kingullerni nalliukkumaarput ullut atugarliungaarfissat.’ Soorliuna ullut atugarliorfiussappat? Pissutigalugu ’inuit tassaalerumaarmata namminissarsiortut,  aningaaserituut, usorsitsaartut, anneruniartut, . . . qujasuitsut, asanniuitsut, . . . mamarliisut’. Ullumikkut inuppassuit qanoq ittuunerannik allaatigineqarnera eqquulluavippoq ilaa? — 2 Timotheusi 3:1-3.

Biibilimi allassimavoq inuiaat allannguiffigineqannginneranni ullut taakku atugarliorfiusut „ullussani kingullerni“ nalliukkumaartut. Allannguineq kikkunnut tamanut eqquiumaarpoq, inuusuttunut utoqqarnullu. Susoqassagami? Naalagaaffiup qilammiittup qanittumi nunarsuaq tamaat aquttussanngussavaa, naalagaaffimmullu innuttaasut tamarmik ’pilluangaarnertik nuannaarutigissavaat’. „Iluartut nuna kingornutissavaat najugaqassallutillu tassani naassaangitsumik.“ Isumakulunnerit ersinerillu tamarmik qanganngoreersimassapput. — Tussiaat 37:11, 29.

Biibilip kisimi siunissaq pillugu paasissutissanik tutsuiginartunik tunisinnaavaatigut. Inuusuttuulluni ukiuni tulliuttuni siunissaq nalunngereerlugu piareersarfigineqarsinnaavoq, taamaalilluni inuuneq aaqqissugaalluarnerussaaq. Uippakajaarneq ernumanerlu taamaalillutik millisinneqarsinnaapput. Avatangiisiminni susoqarneranik siunissamilu susoqarumaarneranik Biibilip taamaalilluni inuusuttut paasissallugit pisariaqartilluinnagaat matussuserpaa.

Inuusutsilluni ajunngitsumik inuuneq

Inuusutsilluni ajunngitsumik inuunerup suna ilisarnaatigaa? Qaffasissumik ilinniagaqarneq, pigisaqarneq ilagisartagarpassuaqarnerlu? Amerlasuut taamatut isumaqarunarput. Inuusuttuuneq inuunerup sinneranut aallarnisarfiulluartariaqarpoq. Allatut oqaatigalugu inuusuttuunerup pitsaassusia siunissami qanoq atugaqalernissamut tikkuussisinnaagunarpoq.

Takoriikkatsitut Biibilip inuusuttut pillualernissaannut ikiorsinnaavai, soorlu amerlasuut misigereeraat. Guutip oqaasia ullut tamaasa atuartarpaat ilikkakkatillu atorlugit. (Takuuk „Jehovamut kiffartortumit inuusuttumit siunnersuut pitsaasoq,“ Qupperneq 6.) Aap, Biibili ullumikkut inuusuttunut atuagaavoq, ikiorumavaalu ’inerilluinnaqqullugit ajunngitsuliornernut tamanut piginnaanngorsagaaqqullugit’ — 2 Timotheusi 3:16, 17. (wE 15/8 01)

[Qupp. 6-mi issuagaq]

Nuannaarluni inuusuttuunermi allanik peqateqarsinnaaneq isertugaatit ilagaat

[Qupp. 7-mi issuagaq]

Inuusuttut immaqa allanit tamanit susoqarnersoq aammalu sooq paasissallugu soqutigineruaat

[Qupp. 6, 7-mi ungalusaq]

Jehovamut kiffartortumit inuusuttumit siunnersuut pitsaasoq

Alexander 19-nik ukioqarpoq. Ilaqutariinni Jehovamut Nalunaajaasuni peroriartorsimavoq upperisanilu uummammik tamakkiisumik pimoorullugu. Taamaattuaannarsimanngilarli. Alexander oqaluttuarpoq:

„Upperiumanngikkukku upperissanngilat. Ukiuni arfineq marlunni kuisissimananga Jehovap Nalunaajaasuisa ataatsimiinnerinut peqataasarpunga. Piffinni taakkunani pallorfiginninnera ilaannakuuvoq sungiutiinnagaallunilu. Qanoq ittuuninnik imminut qiviarnissara merserisimagunarpara.“

Alexanderilli isiginnittaasia allanngorpoq. Oqaluttuarpoq:

„Angajoqqaama ikinngutimalu ilagiinniittut kajumissaartuarpaannga ullut tamaasa Biibilimik atuartaqqullunga namminerlu Jehova ilisareqqullugu. Naggataatigut aalajangerpunga misilinniarlugu. Fjersynerpallaarunnaarpunga ullaallu tamaasa Biibilimik atuartalerlunga. Kiisami aatsaat Biibilip imaa paasilerpara. Paasivara inuttut qanoq ikiorsinnaagaanga. Aamma — tamanik pingaarnermik — paasivara Jehovap kissaatigigaa ilisarilissagiga. Tamanna paasilerakku aatsaat qanimut attaveqarfigilerpara ilagiinniittunullu qatanngutinut ikinngutigiittut attaveqarneq sakkortunerulerluni. Biibilip inuunera allanngortilluinnarpaa. Inuusuttut tamarmik Jehovamut kiffaasut siunnersorumavakka Biibili ullut tamaasa atuartaqqullugu.“

Nunarsuaq tamakkerlugu inuusuttut millionilippassuit Jehovap Nalunaajaasui ilagisarpaat. Taakkua ilagaatsit? Ullut tamaasa Biibilimik atuarneq iluaqutigerusuppiuk? Soormi Alexanderip maligassiaa malikkukku? Pingaaruteqannginnerusut immikkoortitikkit Biibilimillu atuarneq ullut tamaasa pisassatut ilaatilerlugu. Qularutissaanngitsumik iluaqutigissavat.