Unittoorutitit ajugaaffigikkit!

BIILINIK aallarsaraluaravit nikinngitsoorputit. Biilit ajorpa? Naamik, ujarassuulliuna assakaasunnit aporit. Ingerlasinnaassaguit ujarassuaq peertariaqarpat.

Jehovap Nalunaajaasuinik Biibilimik atuaqqissaaqatigineqartartut ilaat assingusumik misigisaqartarput. Anersaakkut siumukarniarnerminni arlaannik akornusersorneqartarput. Jiisusi mianersoqqusisimavoq „isumakuluutit pisuussutillu nakutitsisarnerisa oqaaseq ipitittaraat inerititaqanngitsoortillugu“. — Matthæusi 13:22.

Ilaasa ileqquliutiinnarsimasatik sanngiiffigisatilluunniit siumukarniarnerminnut unissutigisarpaat. Angutip Japanimiup Yutakamik atillip Biibilip oqariartuutaa nuannarisimavaa, aningaasanoortarnerli ajornartorsiutigalugu. Ileqqupalaani qaangerniartarsimagaluarpaa, iluatsitsinanili. Aningaasanuunngitsoorsinnaajunnaarnera akisusimaqaaq, pingasoriarluni angerlarsimaffini annaavaa ilaquttaminillu ataqqineqarunnaarluni. Aamma imminut ataqqisinnaajunnaarpoq. Unittoorutini qaangersinnaassanerpaa kristumiunngorlunilu?

Arnaq Keikomik atilik eqqaariartigu. Biibili ikiortigalugu guutipilussiortarunnaarluni, kinguaassiuutitigut kanngunartuliortarunnaarluni siulittuiniartarunnaarsimavoq. Taamaakkaluartoq nassuerpoq: „Pujortarunnaarnissara ajornartorsiutiginerpaasimavara. Arlaleriarlunga pujortarunnaarniarsarigaluarpunga iluatsitsinangali.“

 Immaqa aamma illit siumukarniarninni arlaannik ajugaaffigisinnaanngisannik unittooruteqarputit. Suugaluarpalluunniit qularutigisariaqanngilat Guuti ikiortigalugu unittoorutit ajugaaffigisinnaagakku.

Ilaanni Jiisusip ajoqersugaasa noqartartumit anersaapiluk aniseriaraluarpaat. Taamaaliorsinnaanngillalli. Soormiuna Jiisusi taamaaliorsinnaasoq? Ima oqarluni akivai: „Siinuppip naatsiiassartaatut atsigisumik uppersuseqaraluarussi qaqqaq una oqarfigisinnaassavarsi: Uanngaanniit ikunga nuugit! taava nuussagaluarpoq. Sunaluunniillu ilissinnut ajornassanngikkaluarpoq.“ (Matthæusi 17:14-20; Markusi 9:17-29) Aap, uagut ajornartorsiut qaqqarsuartut angitigisorisinnaasarput Pinngortitsisorsuatsinnut mikisinnaavoq. — 1 Mosesi 18:14; Markusi 10:27.

Unittoorutivit suminngaanneernera paasiniaruk

Unittoorutit ajugaaffigissagukku paaseqqaartariaqarpat suna akornutiginerlugu. Qanoq ilillutit taamaaliorsinnaavit? Immaqa ilagiinneersoq utoqqaanertaq imaluunniit atuaqatigisartakkat maluginiagaqarsimapput. Siunnersorneqarnerit ajuallassutigisariaqanngilat maniguuttumilli ’ajoqersuut naalaarniaruk ilisimasunnguutigalugulu’. (Ussatit 8:33) Ilaanneeriarluta atuaqqissaarnitsinni sanngiissutigut maluginiartarpagut. Aap, Guutip oqaasia ’uumavoq sunniissuseqarlunilu’. (Hebræerit 4:12) Biibilimik biibililersaarutinillu atuarnitsigut eqqarsaatigut, misigissutsigut iliuutsigullu ersersinneqartarput. Jehovap maligassiaanut naleqqiunnikkut imminut naliliisinnaanissatsinnut iluaqutigissavarput. Taamaalilluta anersaakkut siumukarniarnitsinni suna akornutiginerlugu paasisinnaalissavarput. — Jaaku 1:23-25.

Takorlooriaruk Biibilimik atuartalersoq kinguaassiuutitigut atoqatigiinnermut tungasunik eqqarsaqqajaasartoq. Sukkut ajortortaqarsinnaanera takusinnaanngilaa, imatut paasillugu kukkusumik iliuuseqannginnami. Atuaqqissaartillunili allassimaffik Jaaku 1:14, 15 takuaa: „Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.“ Maanna paasilerpaa taamatut ingerlaannaruni siumukarnissaminut qanoq navianaateqartiginersoq. Unittoorutini taanna qanoq qaangersinnaavaa? — Markusi 7:21-23.

Unittoorutit qanoq qaangerneqarsinnaasut

Iliuuserineqarsinnaasut ilagaat kristumiutut inersimalluartumut ikiortissarsiornissaq. Tamanna Biibilimi qanoq allaaserineqarnersoq paasinerujumallugu Register til Vagttårnets publikationer * misissuiffigisinnaavaat. Assersuummi eqqaaneqareerneratut qupperneqarsinnaavoq „Tanker“ (eqqarsaatit) allaaserisanik assigiinngitsunik naleqqiussisuusoq eqqarsaatit navianartut qanoq ajugaaffigineqarsinnaanerannik tunngasunik. Allaaserisat taakkua allassimaffiit Biibilimeersut nassuiarpaat, assersuutigalugu Filippimiut 4:8, allassimasoq: „Pingaartissigit suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.“ Eqqarsaatit kanngunartut eqqarsaatinik minguitsunik, ineriartornartunik taarserneqartariaqarput.

Atuaqqissaarnermini qularnanngitsumik Biibilimi najoqqutassianik allanik ajornartorsiutimi ajornerulinnginnissaannut iluaqutaasinnaasunik naammattoorsisassaaq. Tassaasinnaapput Ussatit 6:27 aamma Matthæusi 5:28, eqqarsaatinut atoqatigiinnermut tungasunut mianersoqqussutinik imallit. „Isikka alartikkit sallunermit,“ tussiaasiortoq qinusimavoq. (Tussiaat 119:37) Soorunami Biibilimi atuartarneq naammannavianngilaq. „Iluartoq oqalulersinnani qamuuna eqqarsaqqaartarpoq,“ angut sianisooq oqarpoq. (Ussatit 15:28) Jehovap pissutsinut isiginneriaasianik ilisimassummik sianissusermillu itinerusumik paasisaqassagaanni, naammanngilaq sumik piumasaqarneranik ilisimanninneq, aamma sooq taamaaliornersoq eqqarsaatigineqartariaqarpoq.

Siumukarniarnermini unittoorutiminik ajugaaniarluni assoruuttoq Jehovamut ikiorneqaqqulluni sassarnissaminut tunuarsimaartariaqanngilaq. Ilisarisimalluinnarpaatigut, nalunngilaalu naammalluinnarnatalu pujualaasugut. (Tussiaat 103:14) Guutimut ikioqqulluta qinujuaannarutta atoqatigiinnermullu tungasunik eqqarsaateqarnaveersaarluta ilungersorutta, kissaatigisatsitut kinguneqassaaq: ilerasuutaarulluinnarneq. — Hebræerit 9:14.

Tunniutiinnaqinak

Ajornartorsiut sunaluunniit assoroorutigigukku, nakkaqqittoornissannut piareersimasariaqarputit. Taamaattoqassagaluarpat pakatsinermik aliasunnermilluunniit misigineq pissusissamisuuginnarpoq. Oqaatsilli Galatiamiut 6:9-miittut makku eqqaamaniakkit: „Ajunngitsuliorneq qatsuteqinatigu, piffissarmi nalliuppat katersuiumaarpugut qasunngikkutta.“ Jehovamut aalajaallutik kiffartortut soorlu Daavi aamma Petrusi nikallornartumik artorsarsimapput, nakkaannarsimanngillalli. Maniguullutik siunnersuutit tusarpaat, pisariaqartumillu allannguuteqarlutik Guutimullu kiffartornermut salliutitsillutik aalajaannertik ingerlatiinnarlugu. (Ussatit 24:16) Naak Daavi kukkussuteqaraluartoq, Jehovap ima oqaatigaa: „Angut uummatima iluarisaa; taassuma piumasakka tamaasa naammassissavai.“ (Apustilit Suliaat 13:22) Aamma Petrusi kukkussuteqartaraluarluni ingerlaannarsimavoq — kristumiullu ilagiivini sukaalerluni.

Ullumikkuttaaq amerlasuut unittoorutiminnik ajugaaffiginninniarnerminni assingusumik iluatsitsisimapput. Yutakap, siusinnerusukkut eqqaaneqartup, Biibilimik atuaqqissaaqateqartalernissani akueraa. Oqaluttuarpoq: „Siuarialaarnerni tamani Jehovap pilluaqqusinera tapersersuineralu misigisarpara taassumalu aningaasanuunngitsoorsinnaajunnaarnerma ajugaaffiginissaanut ikiorpaanga. Jiisusip oqaasiisa ilumoorneranik misiginera nuannaarutigeqaara — uppernikkut ’qaqqaq nuutsissinnaallugu’“. Kingusinnerusukkut Yutaka kristumiut ilagiivini kiffartortussatut toqqarneqarpoq.

Keiko tupamik pinngitsuuisinnaajunnaarnermik ajornartorsiortoq, qanormita ingerlasimava? Qatanngutip arnap atuaqqissaaqatigisartagaata siunnersuutigisimavaa allaaserisanik Iteritsi!-meersunik tupamik pinngitsuuisinnaajunnaarnermut tunngasunik atuartaqqullugu. Keiko biiliminut allagartaarannguamik ilisisarpoq oqaatsit Korintumiunut allakkat aappaat 7:1-miittut Jehovap isaani minguitsooqqusisut eqqaasarniarlugit. Taamaakkaluartoq pujortarunnaarsinnaasimanngilaq. „Inuuninnik naammagisimaarinnikkunnaangaarama imminut aperisalerpunga sunarpiaq kissaatiginerlugu. Jehovamut kiffartorusunnerlunga imaluunniit Saatanimut?“ Aalajangerami Jehovamut kiffartorusulluni qamannga pisumik ikioqqulluni qinuvoq. Nangippoq: „Tupaallaatigeqisannik ajornanngitsumik pujortartarunnaarpunga. Siusinnerusukkut iliuuseqarsimannginnera peqqissimissutigiinnarpara.“

Illit aamma unittoorutitit ajugaaffigisinnaavatit siumukaqqilerlutillu. Eqqarsaatitit, kissaatitit, oqaatsitit iliuutsitillu Biibilip najoqqutassiaanut naleqqussarnerujartortillugit imminut tatigineruleriartussaatit. Anersaakkut qatanngutivit, ilaquttavillu najoraangamitsit kaammattuutigisassavaat nakussatsissutigalugulu. Jehovamulli attaveqarlualernerit pingaarnerpaavoq. Neriorsuisimavoq Saatanimit assortorneqarlutik assoruuttut ’innuttami aqqutissaanni akornutaasinnaasut piiassallugit’. (Esaja 57:14) Qularutigisariaqanngilat sapinngisat tamaat anersaakkut siumukarniarninni unittoorutitit ajugaaffiginiarsarigukkit Jehovap pilluaqqussagaatit. (wE 1/8 01)

[Quppernerup ataani ilanngussaq]

[Qupp. 29-mi assiliartaq]

Jiisusip ajoqersorpaatigut uppernerup ’qaqqaq nuutsissinnaagaa’

 [Qupp. 31-mi assiliartaq]

Biibilimik atuaqqissaartarnerup anersaakkut sanngiissutitta qaangernissaanut assoruunnitsinni nakussatsissinnaavaatigut