Amaruugaluarpugut — savanngorpugulli!

Sakinalu niviarsiaraangallaratta sanileriilluta najugaqarpugut. Sakina angilluni nerinnattuusoq, uanga mikisuullunga saluttuuvunga. Assortuutikulavugut, ullulli ilaanni kamaativissorpugut. Ulloq taanna aallarnerfigalugu oqaloqatigiissaarpugut immitsinnullu ilassissaarluta. Ullut ilaanni tamatta nuuppugut, attaveqatigiikkunnaavippugullu.

1994-mi Jehovap Nalunaajaasui Biibilimik atuaqqissaaqatigisalerpakka, inuttullu pissusera allanngoriartuaalerpoq. Ukiut sisamat qaangiuttut Bujumburami Burundimiittumi immikkut ataatsimeersuaarartuniillunga Sakina naaperiataarakku tupigusutsappunga. Najuunnera nuannaarutigaara, immitsinnulli ilasserpianngilagut. Ulloq taanna kuisittussat akornanniittoq takugakku upperiuminaatsippara. Allanngorluinnarsimavoq. Tassaajunnaarsimavoq niviarsiaraq paannikkumatooq assortuuteqatigisarsimasara. Nuanneqaaq takullugu Guutimut tunniulluinnarsimanini tamanut saqqummiullugu kuisimmat!

Kuisereermat tungaanut arpappunga eqitaarlugulu, isussuppungalu: „Kamaattarnigut eqqaamavigit?“ „Aap,“ oqarpoq, „eqqaamavakka, kisianni taamanikkuuvoq. Maannakkut inuttut allanngorluinnarnikuuvunga.“

Sallusuissut Biibilimeersoq inunnik kattutsitsisartoq marluulluta nassaarisimagatsigu pilluaqaagut, amarutullu pissuseqarunnaarluta, Paarsisumit annermit, Jehova Guutimit pigineqarluta savanngoratta. Aap, sallusuissutip Biibilimeersup inuit allanngortissinnaavai.