Arlaannik ataasiussuseqalersitsisoqarsinnaava?

INUIT qanorluunniit upperisaqaraluarunik, amerlanerit isumaqarput upperisarsiortuni tamani sallusuissummik ujarlersoqartoq. Hindut, katuullit, juutit allallu akornanni ilumoortuuneq pingaartinneqangaarpoq, ilumoornermillu ujarlerusussuseqartoqarluni. Taamaattoq upperisarsiorneq avissaartuutaarpasippoq. Allaat ilaat siunertapiloqarlutik upperisarsiortarput. Inuit ilumoorusuttut upperisarsiortunit tamaneersut ajunngitsunik ilumoortunillu nuannarisallit qaquguluunniit ataasiussuseqalersinnaappat, arlaannillu kattusseqatigiillutik?

Ernumaammernarpoq takullugu upperisarsiorneq qanoq avissaartuutaajartuinnartigisoq. Eqqarsaatigeriakkit Sri Lankami hindut Buddhasiortullu sorsuunnerat naaggaartullu, katuullit juutillu akerleriinnerpassuarni toqutsisarnerat. Bosniami, Tjetjeniami, Indonesiami Kosovomilu „kristumiut“ muslimit sorsuffigaat. Marsi 2000-imi ulluni marlunni Nigeriami upperisarsiortut akerleriissuteqarneranni Nigeriamiut 300-t toqupput. Aap, upperisarsiornikkut uumissuinerup akerleriissuteqarnerni taakkunani amiilaarnartut sakkortusisippai.

Upperisarsiornerup aqqani ajortuliornerpassuit tamaasa inunnit ilumoorusuttunit annilaarutigineqartarput. Assersuutigalugu naalagiartartorpassuit annilaarutigaat meeqqanik kinguaassiuutitigut atornerluisunik palaseqarnera oqaluffeqarfimmit ajorineqannginnera. Uppertut allat eqqissiunnaarutigaat upperisarsiortuni kristumiuunerartuni anguteqatiminoortarneq naartuersittarnerlu avissaartuutaalernerat. Erseqqippoq upperisarsiornerup inuiaat ataasiussuseqalersinngikkai. Misigisalli tulliuttut takutippaat upperisarsioqatigiippassuarni inoqartoq ilumoorusuttunik sallusuissummillu nuannarisaqartunik.

Sallusuissut nanerusuppaat

Fidelia katuuliuvoq ilumoortoq aallussilluartorlu Boliviami La Pazimi San Franciscop oqaluffiani naalagiartartoq. Mariap assingata saani seeqqummertarpoq sanningasullu siornanut pisiassanik pitsaanerpaanik naneruusertarluni. Sapaatip-akunneri tamaasa nerisassarpassuit palasit piitsuunut agguaatassaat tunniuttarpai. Tallimanik qitornaqarpoq, sisamalli kuisinnatik toqupput. Palasip oqaluttuummani tamarmik limbop taartuaniittut, eqqarsarpoq: ’Guuti ajunngitsuuppat, taava sooq tassaniippat?’

Tara nakorsaavoq Nepalimilu Kathmandumi hindutut peroriartorluni. Siuaasami ukiuni hundredelikkuutaani ileqqutoqai malippai, hindullu naalaffiini guutit angerlarsimaffimminilu guutiliat pallorfigisarlugit. Taralli apeqqutit makku eqqarsaatigai: Sooq taama naalliunnartoqartigaa? Sooq toqusarpugut? Upperisaata apeqqutit taakku naammaginartumik akissutissaqartinngilai.

Panya Thailandimi Bangkokimi Buddhasiortutut peroriartorpoq. Ilinniarsimavaa naalliuutit siusinnerusukkut inuuserisimasami iliuuserisimasamit pissuteqartut, naalliuutaarunniarlunilu  piumatuujunnnaarluinnartariaqartoq. Buddhasiortutut ilumoorusuttutut allatulli mattutut sungaartunik atisallit ullaat tamaasa qinnuulooriartortartut ataqqingaarnissaat ilikkarsimavaa. Eqqarsaatiginneqqissaartarpoq Buddhallu assinginik katersilluni illersuutigissasorigamigit. Ajutoornerup kingorna uppatimigut nukillaarami Buddhasiortut naalaffianukarpoq tupinnartuliornikkut ajorunnaarsinneqarnissani neriuutigalugu. Ajorunnaarsinneqanngilaq anersaakkulluunniit qaammarsagaanani. Akerlianilli anersaarsiornermik sunnerneqarpoq sammisarilerlugulu.

Virgil USA-mi inunngorpoq ilinniarnertuunngorniarnerminilu Muslimit Qernertormiut ilannguffigalugit. Allagaataannik, qaamasumik amilinnik Diaavuluuneraasunik, agguaassineq aallutaraa. Muslimit Qernertormiut isumaqarput qaamasumik amillit Diaavuluugamik qernertormiunut amiilaarnartuliortartut. Virgil upperisaminik ilumoorusserusuppoq, apeqqutilli arlallit eqqissiunnaarutigilerlugit: Qaamasumik amillit tamarmik ajortuuppat? Sooruna Muslimit Qernertormiut aningaasanik taama pingaartitsitigisut?

Charo alliartorpoq Amerika Kujallermi, tamaani amerlanerit katuuliupput, namminerli naaggaartuuvoq ilumoorusuttoq. Eqqamini guutipilussiornernut akuliusimanngilaq, sapaammili oqaluffimmi killitsisimaarnartumik naalagiaqataaneq nuannaraa. Tassani nipituumik „Hallelujaartortarpoq“ kingornatigullu upperisarsiuutinik erinarsoqataasarluni qiteqataasarlunilu. Charop upperilluinnarpaa ’annareerluni’ ’ernioqqissimallunilu’. Isertitami qulerarterutaat oqaluffimmut tunniuttarpai. TV-kkut oqaluussisartoq nuannarinerusani Afrikami meeqqanut tunissuteqaqqusigaangat aningaasanik nassittarpaa. Guuti asannittoq tarninik anniarfimmi sooq naalliutsitsisarnersoq palasimut apeqqutigigamiuk paasivaa naammaginartumik akissutissaqanngitsoq. Kingusinnerusukkut aamma paasivaa tunissutini Afrikami meeqqanut atorneqarneq ajortut.

Inuit tallimat taakku tunuliaqutaat assigiinngitsorujussuugaluarlutik, assigiissuteqarput: Sallusuissut nuannaraat apeqqutitillu ilumoorlutik akissutissarsiorlugit. Upperisamili ilumoortumi ilumut ataasiussuseqalersinnaappat? Tamanna allaaserisap tulliani sammineqarpoq.

[Qupp. 4-mi assiliartaq]

Inuit assigiinngitsunik tunuliaqutallit ilumut ataasiussuseqarlersinnaappat?

[Suminngaanneernera]

G.P.O., Jerusalem