’Eqqissineq ujarlugulu noqqaassutigiuk’

„Ajornanngippat — ilissi aalaajangiisuusinnaagussi — inuit tamaasa eqqisseqatiginiarsigit.“ — ROMAMIUT 12:18.

1, 2. Inuit ataavartumik eqqissisitsisinnaannginnerannut pissutaasut ilaat taakkit.

TAKORLOORIARUK illu qajannartumik tunngavilik, aasimasunik paakkarutilik qaliatalu qaava nakkaatilersoq. Taamaattumi najugaqarusussagaluarpit? Ilimanarpallaanngilaq. Qalipanneqaqqikkaluaruni illu qajannaatsunngornavianngilaq. Qularnanngitsumik qaqugulluunniit nakkaateriaannaavoq.

² Silarsuarmi maani eqqissineq anguneqarsinnaasoq sunaluunniit illumut taamaattumut assersuunneqarsinnaavoq. Qajannartumik tunngaveqarpoq — inuit „annaassisinnaanngitsut“ neriorsuutaannik pilersaarutaannillu tunngaveqarami. (Tussiaat 146:3) Inuiaat oqaluttuarisaanerat tassaavoq inuiaqatigiit naggueqatigiillu sorsuunnerinik akersuunnerinillu oqaluttuaq. Ilumoorpoq piffissani sivikitsuni eqqissineqartarmat, eqqissinerli qanoq ittoq? Inuiaqatigiit marluk sorsoreerlutik eqqisseqatigiinniarlutik isumaqatigiissuteqarpata, arlaat ajorsarmat paasigunikkuluunniit sorsuunnaraluarunik iluaqutaanngitsoq, eqqissineq qanoq ittuua? Uumissuineq, tatiginninnginneq sinnganerlu sorsunnermut pissutaasut suli atuupput. Qalliinnakkut eqqissineq, ’qalipaat’ uumissuinermik qalipaasoq, ataavartumik eqqissinerunngilaq. — Ezekieli 13:10.

3. Sooq Guutip innuttaasa akornanni eqqissineq eqqissinermit inuit pilersitaannit allaanerussuteqarpa?

³ Taamaattoq silarsuarmi sorsuttoqarfiusumi maani piviusumik eqqissisoqarsinnaavoq. Sumi? Kristumiut ilumoortut Jiisusimik malinnittut akornanni. (1 Korinthimiut 11:1; 1 Petrusi 2:21) Naak ammip qalipaataatigut, naggueqatigiissutsikkut, innuttaaqatigiinni inissisimaffitsigut inuiaqatigiissutsikkullu assigiinngitsunik tunuliaqutaqaraluarlutik, kristumiut ilumoortut akornanni eqqissineq piviusuuvoq Guuti eqqisseqatigigamikku, tamannalu Jiisusip Kristusip utertitsisutitut pilliutaanik uppernerannik tunngaveqarpoq. Eqqissinerat Guutimit tunissutaavoq, inunnit pilersitaanngilaq. (Romamiut 15.33; Efesosimiut 6:23, 24) ’Eqqissinermut Naalakkamut’ Jiisusi Kristusimut naalatsigitikkamik, Jehovamillu ’Guutimik asannittumik eqqissisitsisumillu’ pallorfiginnittuugamik eqqisseqatigiipput. — Esaja 9:5; 1 Korinthimiut 13:11.

4. Kristumiup eqqissineq qanoq ’noqqaassutigisinnaavaa’?

⁴ Inuit naammalluinnanngitsut akornanni isumaminik eqqisseqatigiilertoqarnavianngilaq. Taamaattumik Petrusi oqarpoq kristumiut tamarmik immikkut ’eqqissineq ujassagaat noqqaassutigissagaallu’. (1 Petrusi 3:11) Qanoq taamaaliorsinnaavugut? Itsaq siulittuummi akineqarpoq. Esaja aqqutigalugu Jehova oqarpoq: „Ernitit tamarmik [Jehovamit] ajoqersorneqarsimassapput, ernitit iluanaangaarumaarput.“ (Esaja 54:13; Filippimiut 4:9) Aap, Jehovamit ajoqersorneqartut piviusumik eqqississapput. Aammattaaq eqqissineq Guutip anersaavata illernartup inerititaanut ’asanninnermut, nuannaarnermut, . . . kamajasuunnginnermut, inussiarnisaarnermut, ajunngitsuunermut, unneqqarissusermut, qanilaarnermut imminullu naalakkersinnaanermut’ ilaavoq. (Galatiamiut 5:22, 23) Inuit asanninngitsut, nuannaanngitsut, naammagittaatsut, inussiarniitsut, ajortut,  unneqqarissuunngitsut, kamaateqqajaasut imminulluunniit naalakkersinnaanngitsut eqqissisisinnaanngillat.

„Inuit tamaasa eqqisseqatiginiarsigit“

5, 6. (a) Eqqissisimaneq eqqissisitsinerlu qanoq allaassuteqarpat? (b) Kristumiut kikkut eqqisseqatiginiarsaraat?

⁵ Eqqissineq sorsuuttoqanngiffiusutut isumakuluuteqanngiffiusutullu nassuiarneqarsimavoq. Nassuiaat tamanna akerleriissuteqanngitsorpassuarnut naleqquppoq. Allaat toqungasut eqqissisimasutut oqaatigineqarsinnaapput. Eqqissinerli piviusoq tassaaginnanngilaq nammineq eqqissisimasuuneq. Jiisusi qaqqami oqaluutsimini oqarpoq: „Pilluarput eqqisseqatigiissitsisut, taakkumi Guutip qitornaanik taaneqassapput.“ (Matthæusi 5:9) Tassani Jiisusip Guutip anersaakkut qitornariligassai qilammilu toqujuitsuujumaartut oqaluffigai. (Johannesi 1:12; Romamiut 8:14-17) Uppertut tamarmik qilaliarnissamilli neriugisaqanngitsut, siunissami Guutimut qitornaalissapput ’kiffaanngissuserlu Guutip qitornaasa naalannarsiffissami pisassaat pigilerlugu’. (Romamiut 8:21) Eqqissisitsisut kisimik taama neriugisaqarput. Eqqissisimaneq, eqqissisimasumik isiginnittaaseqarneq eqqissisitsinerlu assigiinngillat. Eqqissisitsisup nammineq iliuuseqarluni eqqissineq siuarsartarpaa; eqqissineqarfiunngitsumi eqqissitsisisarpoq.

⁶ Tamanna eqqarsaatigalugu apustili Paulusip Romamiunut siunnersuutaa misissoriartigu: „Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit.“ (Romamiut 12:18) Paulusip Romamiut siunnersuinnanngilai eqqissisimasumik isiginnittaaseqaqqullugit, naak tamanna iluaqutaasinnaagaluartoq. Eqqisseqatigeeqqullugit kajumissaarpai. Kikkut eqqisseqatigissagamikkik? „Inuit tamaasa“ — ilaquttatik, uppeqatitik allaallu uppeqatiginngisatik. Romamiut kajumissaarpai ’aalajangiissuusinnaanertik’ naapertorlugu allat eqqisseqatigeqqullugit. Kissaatiginngilaa eqqissineq anguniarlugu upperisaminnut akerliusumik iliussasut, allalli ajattornagit eqqissisimasumik isiginnittaaseqarlutik ilassisariaqarpaat. Tamanna kristumiunut atuuppoq iliuuseqarfigisamik ilagiinniittuunerat ilagiinniinngitsuuneralluunniit apeqqutaatinnagu. (Galatiamiut 6:10) Tamatumunnga naapertuuttumik Paulusi allappoq: „Noqqaassutiginiarsiuk akornassinni tamanullu ajunngitsuliornissaq.“ — 1 Thessalonikamiut 5:15.

7, 8. Kristumiut qanoq uppeqatiginngisatik eqqisseqatigisinnaavaat, sunalu pillugu taamaaliortarpat?

⁷ Qanoq uppeqatiginngisavut, immaqalu allaat assortuisut, eqqisseqatigisinnaavavut? Ilaatigut taamaaliorsinnaavugut taakkunannga pitsaanerusorinata. Assersuutigalugu allat nikagalugillu assuarigutsigik eqqissineq siuarsarneqarnavianngilaq. Jehovap peqatigiiffinnut eqimattanullu assigiinngitsunut eqqartuussutini saqqummiussimavaa, uagulli pisussaaffiginngilarput inuit ataasiakkaat eqqartuunneqareersutut eqqartornissaat. Allat, uagutsinnulluunniit assortuisut, eqqartuunnissaat uagut suliassarinngilarput. Paulusip Titusi oqaluttuutereeramiuk kristumiut Kretamiittut nunami oqartussaasunut qanoq pissuseqassanersut, nangilluni oqarpoq Titusip Kretamiut eqqaasissagai „inoqatiminnut mitallersooqqunagit saqitsaassiumatooqqunagillu, saamasooqqullugilli  inoqatitillu tamaasa qanilaartumik pissuseqarfigeqqullugit“. — Titusi 3:1, 2.

⁸ Uppeqatiginngisatsinnik eqqisseqateqarnerput sallusuissummut kajumissaarutaaluassaaq. Soorunami ’ileqqorikkaluartunut aseruutissiisunik’ ikinngutissarsiorumanngilagut. (1 Korinthimiut 15:33) Inussiarnersuusariaqarpugulli allallu asannittumik ataqqinnittumillu iliorfigisarlugit. Apustili Petrusi allappoq: „Guutimik nalusut akornanni ajunngitsumik inuugitsi, tamatumuunarpiaq taakkua . . . takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.“ — 1 Petrusi 2:12.

Oqaluussinermi eqqisseqatigiinneq

9, 10. Paulusi uppeqatiginngisani eqqisseqatiginiarlugit qanoq maligassiuilluarpa?

⁹ Ukiuni hundredelinni siullerni kristumiut nakimaassusertik tusaamasaassutigaat. Tusarliussartik kimikillisissimanngilaat, assortorneqaraangamillu Guuti naalakkamissut inunnit naalannerujumallugu aalajangiusimavaat. (Apustilit Suliaat 4:29; 5:29) Nakimaassuserli sorraannermut paarlaatinngilaat. Malugiuk Paulusi kunngimut Herodesi Agrippa II-mut uppernini illersoramiuk qanoq periaaseqartoq. Herodesi Agrippap najani Berenike kinguaassiuutitigut inuunerloqatigaa. Paulusilli  Agrippa ileqqussatigut najoqqutassiat pitsaasut pillugit ajoqersulinngilaa. Akerlianik isumaqatigiissutigisinnaasartik pingaartinneruaa, allaat Agrippa juutit ileqqulersuutaannik immikkut ilisimasalittut pruffiitinillu upperinnittutut eqqartorlugu. — Apustilit Suliaat 26:2, 3, 27.

¹⁰ Paulusip kiffaanngissuseqartitsisisinnaasoq qujanarniarfiginerpaa? Naamik. Paulusi nammineq siunnersuutini malillugu ilumoortumik oqaluppoq. Herodesi Agrippamut oqaasii tamarmik ilumoorput. (Efesosimiut 4:15) Paulusili eqqiseqateqarusuppoq ilisimavaalu qanoq ’kikkut tamaasa peqatiginiarsinnaallugit’. (1 Korinthimiut 9:22) Jiisusi pillugu oqaluussisinnaatitaanini illersorusuppaa. Ilinniartitsillaqqilluni Agrippalu isumaqatigiissutigisinnaasartik eqqartorpaa, taamaalillunilu Paulusip kunngi inuunerluttoq kristumiussutsimik ajunnginnerusumik isiginnilersillugu. — Apustilit Suliaat 26:28-31.

11. Oqaluussinitsinni qanoq eqqisseqateqarsinnaavugut?

¹¹ Oqaluussigaangatta qanoq eqqisseqateqarsinnaavugut? Paulusitut oqallinnerit pinngitsoorniartariaqarpavut. Ilaannikkut sapiilluta upperisarput illersorlugu ’ersiornata Guutip oqaasia oqaluussissutigisariaqarparput’. (Filippimiut 1:14) Amerlanertigulli nutaarsiassap nuannersup oqaluussissutiginera pingaarnerutittariaqarparput. (Matthæusi 24:14) Inuup Guutip siunertai pillugit sallusuissut ilisimaleruniuk, ajoqersuutit eqqunngitsut iliuutsillu minguttuut taamaatissinnaavai. Ajornanngikkaangat tusarnaartitta kajumississutigisinnaasaat erseqqissartarutsigu isumaqatigiissutigisinnaasarpullu aallartissutigisarutsigu kinguneqarluartassaaq. Inussiarnersumik saaffiiginnittuugutta tusarnaarusussinnaasuugaluit sorraalluta ajuallatsikkutsigit siunertaasup akerlianik sunniuteqassaaq. — 2 Korinthimiut 6:3.

Ilaqutariinni eqqisseqatigiinneq

12. Ilaqutariinni qanoq eqqisseqatigiissinnaavugut?

¹² Paulusi oqarpoq katittut ’ulluinnarni inuunerminni ajornartorsiorumaartut’. (1 Korintumiut 7:28) Assigiinngitsunik ajornartorsiuteqalerumaarpoq. Ilaannikkut aappariit isumaqatigiinngissuteqarsinnaapput. Tamakku qanoq iliuuseqarfigineqarsinnaappat? Eqqissisimasumik iliuuseqarfigineqarsinnaapput. Eqqisseqateqarusukkaanni isumaqatigiinnginneq pinaveersaartinneqartarpoq. Qanoq ililluni? Pingaartumik oqqap mianersuutigineratigut. Tusangiasaarilluni ajuallannartunik oqaaseqartoqaraangat paasinarsisarpoq ’oqaq ajortumeeriniartuartuusoq toqunartumillu toqussutaasartumik ulikkaarluni’. (Jaaku 3:8) Eqqisseqateqarumasup oqqani aserorterisuutinnagu ineriartornartuutittarpaa. — Ussatit 12:18.

13, 14. Oqaatitsigut kukkugutta puffaqqajaaleruttaluunniit qanoq eqqissisimaannarsinnaavugut?

¹³ Tamatta naammalluinanngitsuugatta ilaannikkut peqqissimissutigisatsinnik oqaaseqartarpugut. Taamaappat erniinnaq iliuuseqartariaqarpugut eqqissisitsillutalu. (Ussatit 19:11; Kolossemiut 3:13) ’Oqallinnerit assortuunnerillu’ ’suunngitsunillu assortuussuteqarnerit’ unittoorfiginaveersaakkit. (1 Timotheusi 6:4, 5; takuuttaaq Ny Verden-Oversættelsen-imi quppernerup ataani nassuiaat.) Akerlianik tunuliaqutaasoq takuniarsariuk aapparpillu misigissusii paasiniarsarikkit. Aappat ingasaginartumik oqaaseqarpat assinganik akeqinagu. Eqqaamajuk ’akissut sallaatsoq kamannaveersaartitsisartoq’. — Ussatit 15:1.

¹⁴ Ilaannikkut Ussatit 17:14-imi siunnersuut malittariaqartarpoq: „Nipangiinnartarit saqitsaattoqalinnginnerani!“ Ajornerulernissaa pinngitsoortiguk. Eqqissiimigussi isumaqatigiinngissut qularnanngitsumik aaqqiissutissarsisinnaassaaq. Ilaannikkut silatusaarnerussarunarpoq kristumiumut nakkutilliisumut inersimalluartumut ikioqqunissaq. Utoqqaanertaq misilittagaqarluartoq paasinnittorlu aappariinnermi eqqissineq ’anorersuarmit’ aserorneqaqqajaalerpat oqquiffiussinnaavoq. — Esaja 32:1, 2.

Ilagiinni eqqisseqatigiinneq

15. Kristumiut siulliit ilaat sumik ajortumik anersaaqalerpat, sunalu pillugu ’nunamut, qaasunnermut anersaapilunnullu’ atasutut oqaatigineqarsinnaava?

¹⁵ Ajoraluartumik ukiuni hundredelinni siullerni kristumiut ilaat sinngasarsimallutillu assortuiumatuusarsimapput — eqqisseqatiginninnerup akerlianik. Jaaku oqarpoq: „Ilisimassuseq taamaattoq pavannga pinngilaq, atasuullunili  nunamut tarnimullu anersaapilummullu. Sinnganeqaraangat imminullu angisuutikkumaneqarluni tassaniittarputtaaq tavanneq ajortullu allat tamarmik.“ (Jaaku 3:14-16) Grækerit oqaasiat ’angisuutikkumassutsimik’ nutserneqartoq isumaqarpoq namminissarsiortumik ataqqineqarumanermik, ’nuimasumik inissisimaffeqarniarsarinermik’. Pissutissaqarluarluni Jaakup anersaaq taanna ’nunamut tarnimullu [imaluunniit: qaasuttutut ittumut, quppernerup ataani nassuiaat] anersaapilunnullu atasutut’ allaatigaa. (Jaaku 3:14-16) Inuiaat oqaluttuarisaaneranni silarsuarmi pissaanilissuit imminnut uumasutut qaasuttutut sorsuuttarsimapput. Ilumoorpoq angisuutikkumassuseq ’nunamut tarnimullu’ atammat qaasunnerummalluunniit. Aammattaaq anersaapilunnut ataneruvoq. Anersaaq taanna inngilimit pissaaneqarusuttumit Jehovamut pikitsitsisumit, Saatanimit, inngilipiluit naalagaannit, pilerfeqarpoq.

16. Ukiuni hundredelinni siullerni kristumiut ilaat qanoq Saatanip anersaavanut assingusumik anersaaqarpat?

¹⁶ Jaakup kristumiut kajumissaarpai angisuutikkumassuseq ingalassimaqqullugu, tamannami eqqissinerup akerlianik sunniuteqarmat. Ima allappoq: „Sooq akornassinni sorsunneqalersarpa saqitsaanneqalersarlunilu? Imaanngila pileritsannisi avatini timissinniittuni akiuuttarmata?“ (Jaaku 4:1) ’Pileritsanneq’ tassaasinnaavoq pigisalerituungaarneq imaluunniit nuimasumik atorfeqarusunneq pissaaneqarusunnerluunniit. Qularnanngitsumik ilagiinniittut ilaat, Saatani assigalugu, allanit nuimanerorusoqaat, ’minnerpaajujumanatik’, Jiisusip ajoqersukkaminut peqqussutaa malinnagu. (Lukasi 9:48) Anersaap taamaattup ilagiit eqqissiunnaarsissinnaavai.

17. Ullumikkut kristumiut ilagiinni qanoq eqqissisitsisinnaappat?

¹⁷ Ullumikkut uaguttaaq pigisanik pingaartitsivallaarneq, sinnganeq angisuutikkumanerlu ingalassimasariaqarpavut. Ilumut eqqisseqatigiikkumagutta ilagiinniittut ilaat arlaatigut uagutsinnit pikkorinneruppata aarlerisariaqanngilagut, allallu pissutiginiagaat qularalugit nikassartariaqarnagit. Immikkut piginnaassuseqarutta allanit ajunnginneruniassutigissanngilavut isumaqartitsiniarluta pikkorinnerinnarput ilisimasaqarinnarpullu ilagiit ingerlalluassutigigaat. Anersaaq taamaattoq eqqissisitsinani avissaartuutaavoq. Eqqissisitsiniartut piginnaassutsitik usorsissimaarutigiumanngilaat, sallaallutilli qatanngutiminnut iluaqutaatinniarpaat Jehovamullu ataqqinaataatinniarlugit. Nalunngilaat kristumiutut ilumoortutut ilisarnaat tassaasoq asanninneq, tassaananilu pikkorissuseq. — Johannesi 13:35; 1 Korinthimiut 13:1-3.

„Eqqissineq ilinnut naalaganngortissavara“

18. Utoqqaanertat qanoq eqqisseqatigiissinnaappat?

¹⁸ Ilagiit utoqqaanertaat eqqissisitsiniarlutik siuttuupput. Jehova innuttani eqqarsaatigalugit ima siulittuivoq: „Eqqissineq ilinnut naalaganngortissavara, iluarnerlu naalakkersortigissavat.“ (Esaja 60:17) Siulittuummut tamatumunnga naapertuuttumik kristumiut paarsisut savaatillu akunnerminni eqqissineqartitsiniarput. Utoqqaanertat eqqisseqatigiissinnaapput takutillugu ’ilisimassuseqarlutik pavannga pisumik’ eqqissinermik nuannarisaqartumik saamasumillu. (Jaaku 3:17) Utoqqaanertat tunuliaqutaat inuunermilu misilittagaat assigiinngitsuummata, ilaannikkut isumaat assiigiinngissinnaapput. Tamanna saqitsaassutaassava? Eqqortuliorpata taamaannavianngilaq. Eqqisseqateqarumasut anneruniajuillutik isumartik oqaatigissavaat, ataqqinnillutillu allat tusarnaassallugit. Nammineq isummani aalajangiusimaannarnagu eqqisseqateqaannarumasup qinunikkut qatanngummi isiginnittaasia soqutigissavaa. Najoqqutassiaq Biibilimeersoq unioqqutinneqartinnagu  amerlanertigut assigiinngitsunik isumaqartoqarsinnaavoq. Isumaqatigiinngittoqarpat eqqisseqateqaannarniarluta amerlanerussuteqartut aalajangernerat akuerisariaqarparput tapersersorlugulu. Taamaalilluta takutissinnaavarput ingasaassiniarnata. (1 Timotheusi 3:2, 3) Nakkutilliisut misilittagaqarluartut nalunngilaat eqqisseqateqaannarnissaq piumasamik akuersisitsiniarneq pingaaruteqarnerusoq.

19. Utoqqaanertat ilagiinni eqqissineq qanoq siuarsarpaat?

¹⁹ Utoqqaanertat savaatit akornanni eqqissineq siuarsarpaat ilagiinniittunik ataasiakkaanik tapersersuinermikkut isornartorsiuinaveersaarnermikkullu. Soorunami ilaat unioqqutitsereerlutik ingerlaqqinniarnerminni ikiorneqartariaqarput. (Galatiamiut 6:1) Kristumiulli nakkutilliisut perorsaatissiineq pingaarnerpaatut suliassarinngilaat. Nersualaarigajupput. Utoqqaanertat asannittut nalunngilaat uppeqatitik tamaviaartartut, tatigaallu sapinngisartik tamaat iliorniartartut. — 2 Korinthimiut 2:3, 4.

20. Ilagiit tamarmik eqqisseqateqaannarniarunik qanoq iluaqutigissavaat?

²⁰ Ilaqutariinni, ilagiinni uppeqatiginngisatsinnullu eqqisseqateqaannarniartussaavugut. Eqqissinermik siuarsaagutta eqqisseqateqaannarniaruttalu ilagiinni anersaap ajunngitsuutinniisaanut taperseeqataassaagut. Tamannalu assigiinngitsorpassuartigut illersuutigissavarput nakussatsissutigalugulu, soorlu allaaserisap tulliani sammissagipput. (wD 1/9 01)

Makku eqqaamavigit?

• Eqqissisitsineq qanoq paasisariaqarpa?

• Oqaluussiffigisavut qanoq eqqisseqatigisinnaavavut?

• Ilaqutariinni eqqissineq qanoq siuarsarneqarsinnaava?

• Utoqqaanertat ilagiinni eqqissineq qanoq siuarsarsinnaavaat?

[Atuaqqissaarnermi apeqqutit]

[Qupp. 9-mi assiliartaq]

Eqqisseqatigiikkumasut allanit ajunnginnerusutut misigisanngillat

[Qupp. 10-mi assiliartaq]

Kristumiut oqaluussinermi, angerlarsimaffimmi ilagiinnilu eqqissiseqatigiittarput