Kristusip eqqissisitsinera qanoq uummatitsinni aalajangiisuusinnaava?

„Kristusip eqqissisitsinera uummatissinni aalajangiisuuli, tamatumunngami qaaqqusaavusi timimut ataasiusumut avataasutut.“ — KOLOSSEMIUT 3:15.

1, 2. „Kristusip eqqissisitsinera“ kristumiut uummataanni qanoq aalajangiisuusariaqarpa?

KRISTUSIP eqqissisitsinerata uummatitsinni aalajangiisuunissaanut Paulusip kajumissaarutaa tusaratsigu qanoq eqqarsarpugut? Immaqa eqqarsaqqaarpugut eqqissinerup tamatuma uummaterput sunnerluinnassagaa. Tamannalu ilumoorpoq. Paasiniarsinnaavarpulli oqaatsip ’aalajangiisuuli’-mik nutserneqartup isumavia misissorlugu. Isumaqarpoq „naalakkersuivoq“, „naalagaaffigaa“. Tamannali isumaqarpa nammineq aalajangiisinnaanngitsugut, piumasatsinnik iliorsinnaatitaanata?

² Paulusip Kolossemiut allaffiginngilai piumasaminnik iliorsinnaajunnaaqqullugit. Grækerit oqaasiat Kolossemiunut allakkat 3:15-imi ’aalajangiisuuli’-mik nutserneqartoq oqaatsimit ’timersornermi dommerimut’ nutserneqartumit naggueqarpoq. Grækenlanditoqqami dommerip unamminerni ajugaasup akissarsiassaa tunniuttarpaa. Timersortartut unamminermi maleruagassiat iluanni kiffaanngissuseqartarput, dommerili inaarutaasumik aalajangiisuusarpoq kikkut maleruaqqusat maleruarsimaneraat unamminermilu kikkut ajugaanersut. Tamatumunnga assingusumik uaguttaaq inuunermi aalajangigassarpassuarnut kiffaanngissuseqarpugut, taamaalioraangattali Kristusip eqqissisitsinera uummatitsinni ’aalajangiisuusariaqarpoq’ — imaluunniit Edgar J. Goodspeedip Biibilimik nutsikkamini allanneratut ’najoqqutassiatut aalajangiisuusariaqartoq’.

3. „Kristusip eqqissisitsinera“ suua?

³ „Kristusip eqqissisitsinera“ suua? Tassaavoq eqqissineq qamannga pisoq Jiisusimut ajoqersuganngoraangatta misigisartagarput, Jehovamit erneranillu asaneqarluta iluarineqalutalu misiginerput. Jiisusip ajoqersukkani qimaleramigit oqarfigai: „Eqqissinermik qimatsivigaassi. . . . Uummatisi annilaanngikkilit sapiissuseerunnatillu.“ (Johannesi 14:27) Ukiuni 2000-ingajanni tanitat aalajaatsut Kristusip timaata ’avataasa’ eqqissineq tamanna nuannaarutigaat, ullumikkullu taakkua suleqataasa, ’savat allat’ aamma eqqissineq tamanna misigisarpaat. (Johannesi 10:16) Eqqissineq tamanna uummatitsinni ’aalajangiisuusariaqarpoq’. Misilinneqarutta eqqissineq tamanna iluaqutigalugu annilaanganermik qirattaannassanngilagut ernumavallaassanataluunniit. Misissoriartigu naapertuilluanngitsuliorfigineqarutta, annilaangassuteqaruttalu ernumassuteqarutta aammalu ajukkukkutta eqqissineq tamanna qanoq sunniuteqassanersoq.

Naapertuilluanngitsuliorfigineqaraangatta

4. (a) Jiisusi qanoq naapertuilluanngitsuliorfigineqarsimava? (b) Kristumiut naapertuilluanngitsuliorfigineqaraangamik qanoq pisarsimappat?

⁴ Kunngi Salomoni oqarpoq: „Ilaannikkut inuit ilaat ataaseq inoqatiminnut ajoqutaasumik pissaaneqarpallaartarpoq.“ (Oqaluussisartup oqaasii 8:9) Jiisusip nalunngilaa oqaatsit taakku ilumoortut. Qilammiitilluni inuit imminnut naapertuilluanngitsuliorfigisarneri takusarpai. Nunarsuarmiikkallaramilu nammineq tamanit naapertuilluanngitsuliorfigineqarnerpaavoq  inuttut ajortiliunani Guutimik mitalliisutut unnerluutigineqarluni pinerluttuliortutullu toqutaagami. (Matthæusi 26:63-66, Markusi 15:27) Ullumikkut suli naapertuilluanngitsuliortoqangaartarpoq, kristumiullu ilumoortut immikkut naalliutsinneqartarsimapput, ’inuiannit tamanit uumissorneqartaramik’. (Matthæusi 24:9) Nazistilli toqoraaffiini Sovjetunioniusimasumilu tigusanut inissiarsuini Gulaginik taaneqartuni annilaanganaqisunik misigisaqartaraluarlutik, inupalaanillu saassunneqartaraluarlutik, eqqunngitsunik unnerluutigineqartaraluarlutik salluliuutigineqartaraluarlutillu, Kristusip eqqissisitsinera uummammiugigamikku aalajaattuarsimapput. Jiisusi malippaat, apustili Petrusi taanna pillugu oqarmat: „Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq; pineqarninili naapertuilluartumik eqqartuussisumut isumagisassanngortippaa.“ — 1 Petrusi 2:23.

5. Ilagiit iluanni naapertuilluanngitsuliortoqarsimaneranik tusagaqarutta, suna eqqarsaatigeqqaartariaqarparput?

⁵ Aamma ilagiinni kristumiuni ilaat naaper- tuilluanngitsuliorfigineqalaartarsimassapput. Pissutsini taamaattuni Paulusituttaaq misigisarsimassagunarpugut: „Kina tammartitaasoq anniaatigilinnginnerpara?“ (2 Korinthimiut 11:29) Qanormi iliorsinnaavugut? Siullermik imminut aperisinnaavugut: ’Ilumut naapertuilluanngitsuliornerua?’ Amerlanertigut pisimasumut atatillugu annikitsualuit tamaasa ilisimasanngilavut. Immaqa pissutsinik ilisimasaqarsorisoq tusarnaaratsigu kamalerpugut. Pissutissaqarluartumik Biibilimi allassimavoq: „Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.“ (Ussatit 14:15) Taamaattumik mianersortariaqarpugut.

6. Isumaqarutta ilagiinni naapertuilluanngitsoqartoq qanoq iliorsinnaavugut?

⁶ Namminermi naapertuilluanngitsuliorfigineqarsorigutta? Kristusip eqqissisitsineranik uummammiugisaqartoq qanoq qisuariassava? Immaqa misigivugut naapertuilluanngitsuliorsorisarput oqaloqatigisariaqarlugu, immaqalu tusarusuttut tamaasa pisimasumik oqaluttuukkusukkaluarpavut. Soormi pisimasoq qinunikkut Jehovamut tunniutiinnarnianngilarput tatigalugu taassuma naapertuilluartuliortoqarnissaa isumagiumaaraa? (Tussiaat 9:11; Ussatit 3:5) Taamaaliorutta aalajangersinnaavugut pisimasoq uummammiugiinnarniarlugu ’nipangersimallutalu’. (Tussiaat 4:5) Amerlanertigut Paulusip oqaaqqissaarutaa maleruarsinnaavarput: „Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi.“ — Kolossemiut 3:13.

7. Naapertuilluanngitsuliorfigineqarsorigutta suna eqqaamajuartariaqarparput?

⁷ Qanorluunniit iliorniarlutta aalajangeraluarutta eqqaamasariaqarparput pisimasoq allanngortissinnaanngikkaluarlugu qanoq qisuariassanerluta nammineq aalajangissagatsigu. Naapertuilluanngitsuliorfigineqarsoraluta ingasappallaartumik periaaseqarutta qamuuna eqqissisimanerput naapertuilluannginnermit akornusertiinnarsinnaavarput. (Ussatit 18:14) Ima ajuallatsigisinnaavugut, isumarput naapertorlugu  naapertuilluartoqalernissaata tungaanut, allaat ilagiit ornissaarlugit. Tussiaasiortoq allappoq Jehovap inatsisaanik nuannarinnittunut ’naakkiuffissaqanngitsoq’. (Tussiaat 119:165) Tamatta arlaatigut naapertuilluanngitsuliorfineqartarpugut. Misigisalli nuanniitsut taamaattut Jehovamut kiffartornitsinni akornutaatinngisaannartariaqarpavut. Kristusilli eqqissisitsinera uummatitsinni aalajangiisittariaqarparput.

Isumakuluuteqarlutalu ernumassuteqarutta

8. Isumakuluutit ernumassutillu sunik pissuteqarsinnaappat, misigissutsillu taamaattut sumik kinguneqarsinnaappat?

⁸ Ulluni ’kingullerni’ makkunani isumakuluutit ernumassutillu inuunerup ilagai. (2 Timotheusi 3:1) Jiisusi oqarsimavoq: „Inuuneq isumakuluutigeqinasiuk, suna nerissagissi imaluunniit timissigut suna atissagissi.“ (Lukasi 12:22) Isumakuluutilli tamarmik pigisanik pissuteqanngillat. Loti Sodomami ajortunngorsimanermit ’atugarliortitaavoq’. (2 Petrusi 2:7) Paulusip ’ilagiit tamaasa pillugit ernumassutini’ nanertisimassutigisarpai. (2 Korinthimiut 11:28) Jiisusi toqunissi aqaguttoq unnukkut ima annilaangasimatigaaq ’kiagunneri soorlu aap kuserneri nunamut nakkaasut’. (Lukasi 22:44) Paasinarpoq isumakuluutit ernumassutillu tamatigut uppernikinnermut ersiutaasariaqanngitsut. Sunaluunniilli pissutaagaluarpat misigissutsit taamaattut sakkortugunik ataavartuugunillu isummatigut eqqissiunnaartissinnaavaatigut. Ilaat allaat ima isumakuluuteqartigilersimapput Jehovamut kiffartornerminni akisussaaffiqarsinnaajunnaarlutik. Biibilimi allassimavoq: „Isumakuluuteqarnerup inuup uummataa artorsaatissittarpaa, qiimmassaallunili oqaaserisat nuannaalersittarpaat.“ (Ussatit 12:25) Taama misigigutta qanoq iliorsinnaavugut?

9. Ernumassutit isumakuluutillu ajugaaffiginiarlugit ilaannikkut qanoq iliorsinnaavugut, pissutaasulli suut peerneqarsinnaanngikkallarpat?

⁹ Immaqa arlaannik iliuuseqarsinnaavugut. Peqqiilliornerput pissutigalugu isumakuluuteqarutta iliuuseqarfiginissaa silatusaarnerussaaq,  namminerli tamanna aalajangissavarput. * (Matthæusi 9:12) Akisussaaffeqarpallaarutta ilaat immaqa allanut tunniunneqarsinnaapput. (2 Mosesi 18:13-23) Angajoqqaammi allallu allanut tunniunneqarsinnaanngitsunik akisussaaffillit? Kristumiumi sallusuissummut assortuisumik aappaqaruni? Imaluunniit ilaqutariit aningaasatigut ajornartorsiungaarpata sorsuuttoqarfimmiluunniit inuuppata? Soorunami pissutsinik aaqqissuussinermi matumani ernumassutit isumakuluutillu tamaasa anigorsinnaanngikkallarpavut. Kristusilli eqqissisitsinera uummammiugiinnarsinnaavarput. Qanoq?

10. Periaatsit marluk suut atorlugit kristumiup isumakuluutini anigorniarsinnaavai?

¹⁰ Ilaatigut Guutip oqaasia tuppallersaatigineqarsinnaavoq. Kunngi Daavi allappoq: „Eqqarsaatima eqqissiviilliortileraangannga tuppallersaanerpit nuannaalersittarpaanga.“ (Tussiaat 94:19) Biibili Jehovap tuppallersaaneranik imaqarpoq. Atuagaq isumassarsiarititaasoq taanna aalajangersimasumik atuartarutsigu Kristusip eqqissisitsinerata uummammiugiuarnissaa ajornannginnerussaaq. Biibilimi ima kajumissaarneqarpugut: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ (Tussiaat 55:23) Paulusilu tamatumunnga naapertuuttumik allappoq: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ (Filippimiut 4:6, 7) Aalajangersimasumik ilungersortumillu Jehova qinnuigisarutsigu isumakkut eqqissinissatsinnut iluaqutigissavarput.

11. (a) Jiisusi qinuneq eqqarsaatigalugu qanoq maligassaalluarpa? (b) Qinuneq qanoq isigisariaqarparput?

¹¹ Tamanna eqqarsaatigalugu Jiisusi maligassaalluarpoq. Arlaleriarluni Ataatani qilammiusoq nalunaaquttap-akunnerpassuarni qinnuigisarpaa. (Matthæusi 14:23; Lukasi 6:12) Qinuneq iluaqutigalugu misilinneqarnerit artornarnerpaartaanni nikallujuippoq. Toqunissi aqaguttoq unnukkut Jiisusi erloqissuteqangaarpoq. Qanoq iliorpa? „Ilungersornerulluni qinulerpoq.“ (Lukasi 22:44) Aap, Guutip ernerata naammalluinnartup qinuneq qimarravigaa. Uagut ajoqersugaalluta naammalluinnanngitsut qinuneq ileqqorinerusariaqarparput! Jiisusip ajoqersukkani qasusuilluni ’qinuttuinnariaqarnerannik’ ilinniartippai. (Lukasi 18:1) Qinuneq Jehovamut attaveqarnitsinni pingaartuuvoq, taannalu uagut pilluta ilisimasaqarneruvoq. (Tussiaat 103:14) Kristusip eqqissisitsinera uummammiugiuassagutsigu ’qinuttuinnartariaqarpugut’. — 1 Thessalonikamiut 5:17.

Killeqaraluarluta qanoq iluatsitsisinnaasugut

12. Sooq ilaat misigippat Jehovamut kiffartornertik naammanngitsoq?

¹² Jehovap kiffani tamaasa ’erlinnartutut’ isigai. (Haggaji 2:7) Inuppassuilli tamanna paasiuminaatsippaat. Ilaasa utoqqalinertik, ilaquttaminnut akisussaaffeqangaarnertik peqqiilliornertilluunniit nikallussutigaat. Allat peroriartornerminni pilluaakkamik atugarliortutut misigipput. Allallu kukkussutigisimasatik ilerasuutigaat, Jehovamillu isumakkeerfigineqarnissartik qularalugu. (Tussiaat 51:5) Taamaappat qanoq iliortoqarsinnaava?

13. Imminut naammaginngitsut Biibilimi qanoq tuppallersarneqarpat?

¹³ Kristusip eqqissisitsinerata qularunnaarsissavaatigut Jehovap asagaatigut. Uummatitsinni eqqissineq tamanna pigilersinnaavarput Jiisusip oqaasii naapertorlugit iliuusivut allat iliuusiinut naleqqiullugit nalilerneqarneq ajortugut eqqarsaatigigutsigu. (Matthæusi 25:14, 15; Markusi 12:41-44) Jiisusip erseqqissarpaa ilumoortuassasugut, ajoqersukkani ima oqarfigigamigit: „Naggatissamulli nikallujuitsuusoq annaanneqassaaq.“ (Matthæusi 24:13) Jiisusi nammineq inunnit ’nikanartitaavoq’, qularisariaqanngilaali  Ataatami asagaani. (Esaja 53:3; Johannesi 10:17) Ajoqersukkanilu oqarfigai asaneqartuttaaq. (Johannesi 14:21) Tamanna erseqqissarniarlugu oqarpoq: „Qupaloraarsuit marluk skillingimik akilersillugit tunineqartannginnerpat? Taakkua ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput. Taamaattumik erseqinasi, ilissi qupaloraarsuppassuarnit pingaarneruvusi.“ (Matthæusi 10:29-31) Jehovap uagutsinnik asanninneranut qulakkeerutaavoq nuanningaartoq!

14. Sooq qularisariaqanngilarput Jehovap tamatta pingaartikkaatigut?

¹⁴ Jiisusi aamma oqarpoq: „Kinaluunniit uannut ornigussinnaanngilaq Ataatap uannik aallartitsisup kajungilersinngippani. Orniguttorlu ullut naggatissaanni makitikkumaarpara.“ (Johannesi 6:44) Jehovap Jiisusimut malinnittuunissatsinnut kajungilersippaatigut annaanneqarnissarput kissaatigigamiuk. Jiisusip ajoqersukkani oqarfigai: „Ataatassi qilanniittup piumasarinngilaa minninnguit ukua ilaannik ataatsimilluunniit tammartoqassasoq.“ (Matthæusi 18:14) Taamaattumik Jehova uummatikkut iluunngarlutit kiffartorfigigukku ajunngitsuliornitit nuannaarutigisinnaavatit. (Galatiamiut 6:4) Kukkussutigisimasatit ilerasuutigigukkit, qularisariaqanngilat Jehova ’isumakkeerfiginnittuartartoq’ ajortuliorsimanitit ilumoorlutit peqqissimissutigigukkit. (Esaja 43:25; 55:7) Allamik nikallungassuteqaruit, eqqaamajuk ’Jehovap qanikkai sequmissimasumik uummatillit, annaattarai aserortersimasumik anersaallit’. — Tussiaat 34:19.

15. Saatanip qanoq eqqissiunnaarsinniartarpaatigut? (b) Jehova qanoq tatigisinnaavarput?

¹⁵ Saatanip eqqissiunnaarnissarput kissaatiginerpaavaa. Ajortiliussutsip inunnguusitta tamatta akiortariaqakkatta taanna pilerfigaa. (Romamiut 7:21-24) Misigitikkumavaatit naammalluinnanngitsuunerit pillugu kiffartornerit Guutip iluarinngikkaa. Diaavululli nikallungalersinngisaannarlisit! Pilersaarutai eqqumaffigikkit, tamakkuninngalu ilisimanninnerpit aalajaattuartillisit. (2 Korinthimiut 2:11; Efesosimiut 6:11-13) Eqqaamajuk ’Guuti uummatitsinnit annerusoq suullu tamaasa ilisimallugit’. (1 Johannesi 3:20) Jehovap unioqqutitsinivut kisiisa isiginngilai. Pissutiginiakkavut siunertavullu aamma malugisarpai. Taamaattumik tussiaasiortup oqaasii tuppallersaatigikkit: „Ajattussanngilaami [Jehovap] innuttani, imminiiginnassanagillu pigisani.“ — Tussiaat 94:14.

 ’Kristusip eqqissisitsinerani’ ataasiussuseqarpugut

16. Aalajaalluta akiuunnitsinni sooq kisimiinngilagut?

¹⁶ Paulusi allappoq Kristusip eqqissisitsinera uummatitsinni aalajangiisittariaqaripput ’tamatumunnga qaaqqusaagatta timimut ataasiusumut avataasutut’. Kristumiut tanitat Paulusip allaffigisai Kristusip timaanut avataasussatut qaaqqusaapput, ullumikkullu tanitat sinneri aamma taamaapput. Suleqatitik, ’savat allat’ ilagalugit ataasiussuseqarput tassaallutillu „savaatit katersat ataatsit“ ’paarsisup ataatsip’, Jiisusi Kristusip, ataani. (Johannesi 10:16) Nunarsuaq tamakkerlugu ’savaatitut’ millionilikkuutaallutik, tamarmik Kristusip eqqissisitsinera uummatiminni aalajangiisippaat. Kisimiinnata nalunnginnatsigu aalajaannissatsinnut iluaqutigingaarparput. Petrusi allappoq: „Uppernikkut aalajaallusi [Saatani] assortorsiuk, ilisimavarsimi qatanngutisi silarsuarmiittut taamatuttaaq atugarliortitaasartut.“ — 1 Petrusi 5:9.

17. Kristusip eqqissisitsinerata uummatitsinni aalajangiinissaanut suup killittarpaatigut?

¹⁷ Qanortoq tamatta eqqissineq, Guutip anersaavata inerititaa erlinnartoq, ineriartortittuartigu. (Galatiamiut 5:22, 23) Jehovamut minguitsuullutik assuarnaatsuullutillu eqqissisut tamarmik naggataatigut nunarsuarmi paratiisiusumi iluassutsip najugarisassaani naassaanngitsumik inuunermik pilluaqquneqassapput. (2 Petrusi 3:13, 14) Kristusip eqqissisitsinerata uummatitsinni aalajangiinissaanut pissutissaqarluarpugut. (wE 1/9 01)

[Quppernerup ataani ilanngussaq]

Makku eqqaamavigit?

• Kristusip eqqissisitsinera suua?

• Naapertuilluanngitsuliorfigineqaraangatta Kristusip eqqissisitsinera qanoq uummatitsinni aalajangiisinnaava?

• Kristusip eqqissisitsinera iluaqutigalugu ernumaneq isumakuluutillu qanoq anigorsinnaavavut?

• Naleqanngitsutut misigigutta Kristusip eqqissisitsinera qanoq tuppallersaatigisinnaavarput?

[Atuaqqissaarnermi apeqqutit]

[Qupp. 15-mi assiliartaq]

Unnerluussisiminut sassartinneqarami Jiisusi Jehovamut tunniulluinnarpoq

[Qupp. 16-mi assiliartaq]

Ataatatut asannittutut qitornaminik tuppallersaasutut Jehovap isumakuluutivut ernumassutivullu millissisinnaavai

[Qupp. 18-mi assiliartaq]

Nikallujuinnerput Jehovap isaani naleqangaarpoq