Guutip naalagaaffianik oqaluussissutiginninnermit nutaarsiassat

Naapikkuminaatsut angujumallugit immikkut suliniuteqarneq

JEHOVAP NALUNAAJAASUISA Naalagaaffimmik tusarliussaq tamanut tusarliunniarsaraat. Naapikkuminaatsulli anguniarlugit immikkut suliniuteqartariaqartarpoq. (Markusi 13:10) Amerikami kujallermi specialpioneeriusup tamanna ilisimalluarpaa.

„Ullut ilaanni nuliaralu paasilerparput guvernøri angalaartarfitsinnut tikeraarniartoq. Naapikkuminaatsut ilagigunarmassuk allaffigalugu biibililersaarutinik ukuninnga nassippara, Guutip sumik piumaffigaatigut?, Menneskets søgen efter Gud (kalaallisuunngortitaanngitsoq) aammalu Ilisarsineq inuunermut naassaanngitsumut sammisoq. Allakkanni atuagassiaatitta siunertaanik nassuiaappara.

Atuagassiaatitsinnut qisuariarnissaa pissanngatigaara naapinnissaanillu qinnuigalugu. Sapaatip-akunnialuit qaangiummata akivaanga. Naapikkumavaanga. Piffissaq iluatsillugu videofilmi Jehovas Vidner og deres organisation nassarpara. Akunnerit marluk missaanni oqaloqatigiippugut. Videofilmi isiginnaareeratsigu guvernøri qanoq isumaqarneranik aperaara. Akivaanga: ’Peqatigiiffissi nalissaqanngilaq. Silarsuarmi sumiluunniit assingusoqanngilaq. Naalakkersuisunut tunngasunik suliaqarninni ilissitut ittunik sulisoqassagaluarama.’ Kingorna aperivaanga peqatigiiffitta allaffeqarfissua New Yorkimi Brooklynimiittoq takusimaneriga. Akivara 14-nik ukioqarlungali anguniagarisimagaluarlugu suli takusimanagu. Anguniagara piviusunngorsinnaanngitsutut isikkoqarpoq. Isigeqqissaariarlunga oqarpoq tamanna misigisariaqaringa. Pappialat pisariaqartut isumagai, billetsissatsinnillu tunilluta.

Maanna Guvernørip Napasuliaq Alapernaarsuiffik Iteritsi!-lu pisartagarivai. Neriuppugut qanittukkut Biibilimik atuaqqissaaqatigisinnaalissallugu.“ (wE 1/10 01)