Qanoq aalajangiilluartoqarsinnaasoq

NAMMINEQ piumasamik iliorsinnaaneq tassaavoq tunissut Guutimeersoq. Taamaattoqarsimanngikkaluarpat robottitungajak pissusilersussagaluarpugut; iliuuserisagut aqussinnaanagit. Namminerli piumasamik iliorsinnaaneq unamminiarnartortaqarpoq. Nammineq piumasamik iliorsinnaanerup inuunitsinni aalajangigassarpassuaqartippaatigut.

Soorunami aalajangigassat ilarpassui pingaanngitsuupput. Allalli, assersuutigalugu sumi sulilernissaq, katinnissamullu tunngassuteqartut nammineq siunissannut sunniuteqarsinnaapput. Aalajangigassat ilaat inunnut allanut sunniuteqarsinnaapput. Assersuutigalugu angajoqqaat meeqqaminnut pingaaruteqangaalersussanik aalajangiisariaqartarput. Aalajangiinittalu ilarpassuinut Guutimut nassuertussaavugut. — Romamiut 14:12.

 Ikiorneqartariaqarneq

Inuit aalajangiisarneri pitsaanerpaasarsimanngillat. Aalajangeeqqaarnerit ilaat ilisimariigarput ajunaarutaavoq. Eva aalajangerpoq paarnaq Guutip inunnut erseqqissumik nereqqunngisaa neriniarlugu. Namminissarsiorluni aalajangiigami uinilu Guutip inassutaanik unioqqutitsipput, inuillu tamarmik naalliuuterpassuaqalerneranik kinguneqarpoq. Inuit amerlasuutigut aalajangiisarneri suli namminissarsiortuupput najoqqutassianit eqqortunit tunngaveqaratik. (1 Mosesi 3:6-19; Jeremia 17:9) Annertuunik aalajangigassaqaraangatta pisinnaasatta killeqarnerat nassuerutigikulasariaqartarparput.

Taamaammat tupinnanngilaq amerlasuut pingaarutilinnik aalajangiiniartillutik inunnit pissaaneqarnerusumut ikiortissarsiortarmata. Kunngi Nebukadnezarip sorsukkiartortilluni aalajangigassaqarnera Biibilimi oqaluttuarineqarpoq. Kunngiugaluarluni „pisussanik ilimasaariumavoq“, tassa anersaanik siunersiuilluni. Imatut oqaluttuarineqarpoq: „Qarsut immeraatit aalaterpai, guutiliat illumiititat siunersiorpai, pilliutigineqartup tingua misissorpaa.“ (Ezekieli 21:21) Ullutsinnittaaq siulittuisartunut saaffiginnittorpassuaqartarpoq, ullorissat najoqqutaralugit siulittuisartunut allanullu, anersaapilunnit ikiorneqarumallutik. Siunersuisartulli taamaattut peqquserluttuupput tammartitsisarlutillu. — 3 Mosesi 19:31.

Tutsuiginarluinnartoqarporli oqaluttuarisaanerup ingerlanerani inuit silatuumik aalajangiinissaannut ikiuisarsimasumik. Tassaavoq Jehova Guuti. Assersuutigalugu itsaq Guutip Urimi Tummimilu innuttaminut Israelimut tunniuppai. Immeraatit illernartuugunarput inuit ilungersunartunik ajornartorsiortillugit igeriunneqartartut. Jehovap Urimi aamma Tummimi aqqutigalugit apeqqutit toqqaannartumik akisarpai Israelillu utoqqaanertaasa aalajangiineri piumasaminut naapertuunnersut qulakkeertarlugit. — 2 Mosesi 28:30; 3 Mosesi 8:8; 4 Mosesi 27:21.

Assersuut alla takulaariartigu. Gedioni Midjanip sorsuffiginissaanut Israelip sakkutuuinut siulersuisooqquneqarami, immikkut pisinnaatitaafferujussuaq akuerissanerlugu aalajangertariaqarpoq. Gedionip Jehovamit tapersersorneqarnini qulakkeerusullugu tupinnartuliornikkut nalunaaqummik takujumavoq. Qinnutigaa savap meqqui unnuami isugutsersimassasut nunali eqqaaniittoq isugutannani panertuussasoq. Unnuap tulliani savap meqquisa panertuunissaat nunalu eqqaaniittoq tamarmi kanermit isugutsersimanissaa qinnutigaa. Jehovap kajumilluni Gedioni nalunaaqutinik piumasaanik tunivaa. Taamaalilluni Gedioni eqqortumik aalajangiivoq Guutillu ikiuineratigut Israelip akeraanut ajugaarujussuarpoq. — Eqqartuussisut 6:33-40; 7:21, 22.

Ullutsinnimi?

Jehovap kiffani ullutsinni pingaarutilinnik aalajangigassaqartillugit ikiorumavaattaaq. Qanoq ililluni? Jehovap qanoq iliussanersugut takutinniassammagu uagut Gideonitut  ’savap meqquinik misiliissaagut’? Aappariit Naalagaaffimmik oqaluussisartunik pisariaqartitsiffiunerusumut nuunnissartik isumaliutersuutigaat. Aalajangiiniarnerminnut iluaqutaasussamik misiliinialerput. Illortik aalajangersimasumik akeqartillugu tuniniarpaat. Illu ullormi aalajangersimasumi aalajangersimasumik akigitinniakkamut akisunerusumilluunniit tunineqassappat, nuunnissaminnik Guutip kissaateqarneranut nalunaaqutaatinniarpaat, illuli tunineqanngippat, Guutip nuunnissartik kissaatiginngikkaa.

Illu tunineqanngilaq. Guutip aappariit taakku pisariaqartitsiffiunerusumut nuunnissaannik kissateqannginneranut nalunaaqutaava? Soorunami Jehova kiffaminut qanoq iliortarnersoq iliortannginnersorluunniit aalajangersimalluinnartumik oqaatigisinnaanngilarput. Ullumikkut oqarsinnaanngilagut Jehovap piumasani takutinniarlugu akuliutinngisaannartoq. (Esaja 59:1) Annertuunik aalajangigassaqartilluta, aalajangigassatsinnik Guutimut tunniussiinnarneq akuliunnissaanillu ilimasunnissaq pissusissamisuussanngilaq. Gedioni aamma inuunermi annerpaartaani Jehovamit tupinnartuliorfigineqarani aalajangiisartussaasimavoq.

Bibilili malillugu Guutimit siunnersorneqarsinnaavugut. Nalerput Biibilimi imatut siulittuutigineqarpoq:„Nammineq siutinnik tusassavat tununnit oqaaseq: ’Aajuna aqqusineq, taanna ingerlavigissavarsi!’ — Talerpimmukarumavusimi saamimmukarumallusilu.“ (Esaja 30:21) Pingaarutilinnik aalajangigassaqaraangatta, aalajangigarput Guutip piumasaanut naapertuunnersoq ilisimassusianillu ersersitsinersoq qulakkiissallugu pissusissamisuussaaq. Qanoq ililluta taamaaliorsinnaavugut? Oqaasianut siunersiuilluta ’oqaasii isikkatsinnut naneruaralugit, aqqutitsinni qaammaqqutigalugit’. (Tussiaatit 119:105; Ussatit 2:1-6) Aatsaat taamaaliorsinnaavugut ilisimassummik eqqorluartumik Biibilimeersumik ilinniarnitsinni ileqquliussilluta ineriartortitsigutta. (Kolossemiut 1:9, 10) Aalajangigassaqarutta najoqqutassiat Biibilimeersut tamaasa misissoqqissaartariaqarpavut. Taamaalilluta ’suna pingaartittariaqarnersoq paasisinnaassavarput’. — Filippimiut 1:9, 10.

Qinunikkullu tusarnaarneqarnissarput tatigalugu Jehovamut saaffiginnittariaqarpugut. Guutitsinnut asannittumut isumalluarluta aalajangigassarput qinigassallu sorliit eqqarsaatiginerlugit nassuiarsinnaavagut. Taava tatiginnilluta eqqortumik aalajangiinissatsinnik siunnersorneqaqqulluta qinusinnaavugut. Arlalitsigut anersaap illernartup najoqqutassianik naleqquttunik Biibilimeersunik eqqaasittassavaatigut allassimaffimmilluunniit massakkorpiaq atukkatsinnut attuumassuteqartumik paasisaqarnerulersilluta. — Jaaku 1:5, 6.

Jehovap aamma ilagiinni qatanngutinik angutinik inersimalluartunik aalajangigassagut pillugit oqaloqateqarsinnaanissarput isumagisimavaa. (Efesosimiut 4:11, 12) Allanullu siunersiuigaangatta tusarusutamik  tusarnissaata tungaanut assigiinngitsunut saaffiginnittaqattaartartut assigissanngilagut. Aamma Rehabeamip maligassiaa mianersoqqussutaasoq eqqaamasariaqarparput. Pingaarutilimmik aalajangigassaqartilluni angutinit utoqqaasunit ataatamini kiffartorsimasunit siunnersorluarneqarpoq. Akerlianilli angutit inuusuttut alliartoqatigisimasami siunnersuutaat malippaa. Siunnersuutaat malikkamiuk silatusaanngitsumik aalajangiinerata kinguneranik naalagaaffimmi ilarujussua annaavaa. — 1 Kunngit 12:1-17.

Siunnersorneqarnissamik pisariaqartitsigaanni inuunermi misilittagalimmik, Bibilimik ilisarsilluarsimasumik najoqqutassiaanillu ataqqinnittumut saaffiginninnissaq silatusaarnerussaaq. (Ussatit 1:5; 11:14; 13:20) Ajornanngippat najoqqutassiat naleqqulluartut paasissutissallu pissarsiarineqartut eqqarsaatigeqqissaarneqartariaqarput. Pissutsit Guutip oqaasianut naapertuunnerat takusinnaaleraanni, eqqortumik aalajangiinissaq qularnanngitsumik erseqqinnerulissaaq. — Filipimiut 4:6, 7.

Aalajangiisarnivut

Aalajangigassat ilaat aalajangeruminartuupput. Apustilit ajoqersuinissaminnut inerterneqaramik Jiisusi pillugu nalunaajaajuartariaqarnertik nalunngilaat, erngerlutillu Guutimut inunnit naalattariaqarnerunerminnik aalajangernertik Killisiuisoqatigiinnut oqaatigaat. (Apustilit Suliait 5:28, 29) Biibili sammisamut tunngatillugu toqqaannartumik ilitsersuuteqanngikkaangat aalajangigassat ilaat eqqarsaatigeqqissaarneqartariaqarsinnaapput. Najoqqutassiaqartarporli Biibilimeersunik pitsaanerpaamik aalajangiinissamut paasititsisunik. Assersuutigalugu ullutsinni assigiinngitsorpassuarnik aliikkutassaqarpoq Jiisusip nalaani takussaanngitsunik, sunali Jehovamit iluarisaanersoq iluarisaannginnersorlu erseqqissumik Biibilimi oqaatigineqarpoq. Kristumiu nakuusernissamut, ileqqorlunissamut imaluunniit pikitsitsinissamut kajumissaarisunik aliikkusersuuteqartoq  aalajangiinerlussimavoq. — Tussiaat 97:10; Johannesi 3:19-21; Galatiamiut 5:19-23; Efesosimiut 5:3-5.

Aalajangiinerit marluk ilaannikkooriarlutik eqqortuusinnaasarput. Assersuutigalugu pisariaqartitsiffiunerusumi kiffartorneq pilluaqquneqangaartartoq, immikkut pisinnaatitaaffiuvoq nuanningaartoq. Arlaanilli pissuteqartumik tamatuminnga toqqaanngikkaanni nammineq ilagiinni ilaaffigisami sulilluartoqarsinnaavoq. Ilaannikkut Jehovamut asanninnitsinnik inuunitsinnilu sumik salliutitsinerluta ersersitsinissatsinnut takutitsisinnaasumik aalajangassaqalertarpugut. Taamaalilluni Jehovap uummatitta qanoq-issusivianik ersersitsinissamut nammineq piumasamik iliorsinnaanerput atorsinnaatippaa.

Aalajangikkatta ilarpassui allanut sunniuteqassapput. Assersuutigalugu ukiuni hundredelinni siullerni kristumiut Inatsisinit killilersugaajunnaarnertik nuannaarutigaat. Ilaatigut nerisassat Inatsisip ataani minguttuujugaluartut piumagunik nerisinnaalerpaat. Taamaakkaluartoq kiffaanngissutsip taassuma atornissaanut aalajangiiniarnerminni allat nalunngeqatiginnissusiannik qajassuussinissamut kajumissaarneqarput. Aalajangigassarpassuatta ilaannut Paulusip tamatumunnga tunngatillugu oqaasii atorneqarsinnaapput: „Mamiatsatsitsiniaqinasi.“ (1 Korintumiut 10:32) Allanik mamiatsatsitsinnginnissamik kissaateqarnerup amerlasuutigut eqqortumik aalajangiinissatsinnut ikiorsinnaavaatigut. Aamma inatsisini annerusup tullia tassaavoq tullitsinnut asanninnissaq. — Matthæusi 22:36, 39.

Aalajangiisarnitta kinguneri

Nalunngeqatiginnissutsip ajoqersorluarneqarsimasup Biibilillu najoqqutassiai tunngavigalugit aalajangiinerit, siunissaq ungasinnerusoq eqqarsaatigalugu ajunngitsumik inerneqartuassapput. Siunissaq qaninnerusoq eqqarsaatigalugu soorunami inuttut pilliuteqartariaqarpoq. Apustilit Jiisusi nalunaajaatigiuarniarlugu Killisiuisoqatigiinnut oqaatigimmassuk, iperartorneqariarlutik aniguisitaapput. Hebræerit pingasut Sjadraki, Mesjaki aamma Abed-Nego Nebukadnezarip inuusaliaanik kuultiusumik pallorfiginikkumanatik aalajangeramik, inuunertik navianartorsiortippaat. Aalajangiinertik toqussutaasinnaasoq ilisimalluinnarpaat. Guutimilli akuerisaanissartik pilluaqqusaanissartillu nalunngilaat. — Danieli 3:16-19.

Nalunngeqatiginnissuseq malillugu aalajangernerup kingorna ajornartorsiuteqalertoqarpat, isumaqartoqartariaqanngilaq eqqunngitsumik aalajangiisimaneq tamatumunnga pissutaasoq. Pitsaanerpaamilluunniit siunertaqarsimagaluaraanni, „piffissaq nalaatsornerlu“ aalajangiinerup iluatsinngitsoorneranut pissutaaqataasinnaapput. (Oqaluussisartoq 9:11) Jehovap aamma uummammik tamakkiussinersugut misilinniarlugu akerlilersorneqarnerput akuerisinnaavaa. Jaakup pilluaqqusaaniarluni inngili unnuk naallugu paavaa. (1 Mosesi 32:24-26) Eqqortulioraluarluta immaqa akerlilersuinerit unamminiartariaqartassavagut. Aalajangiinigulli Guutip piumasaanut naapertuuppata, tatigisinnaavarput Jehovap nikallujuinnissatsinnut ikiussagaatigut naggataatigullu pilluaqqulluta. — 2 Korintumiut 4:7.

Pingaarutilinnillu aalajangigassaqaraangatta nammineq ilisimassuserput tatigisariaqanngilarput. Najoqqutassianik Biibilimeersunik naleqquttunik ujarlernissaq, qinunikkut pisumik Jehovamut saqqummiussinissaq ajornanngippallu uppeqatinik inersimalluartunik oqaloqateqarnissaq pitsaanerpaassaaq. Taamaalioreerutta sapiilluta nammineq piumasamik iliorsinnaanerput Guutimeersoq akisussaassuseqarluta atortariaqarparput. Ajunngitsunik aalajangiigutta uummatitta Jehovamut ilumoortuunera takutissavarput. (wE 1/9 01)

[Qupp. 20-mi assiliartaq]

Pingaarutilinnik aalajangiitinnak Guutip oqaasianik siunersiuisarit

[Qupp. 21-mi assiliartat]

Aalajangigassatit qinunikkut Jehovamut saqqummiutikkit

[Qupp. 22-mi assiliartaq]

Aalajangigassatit annertuut pillugit kristumiut inersimalluartut oqaloqatigisinnaavatit