Inuusuttut qimagutilersut qanoq ikiorneqarsinnaappat?

„Maanna nalliuttorsiortariaqarpugut nuannaarlutalu . . . tammaraluarluni nanisaammat.“ — LUKASI 15:32.

1, 2. (a) Jehovap Nalunaajaasuini inuusuttut ilaat qanoq pisimappat? (b) Taamatut pisoqartillugu angajoqqaat meqqaallu qanoq misigigajuppat?

„JEHOVAMUT nalunaajaasoorusukkunnaarpunga!“ Angajoqqaanut Guutimik mianerinnittunut qitornaminnik kristumiutut perorsaasunut taama oqarfigineqarneq tupannassaaq. Inuusuttut allat ‘sarfaanneqartutut qimaguttarput’ suniarnerlutik toqqaannartumik oqaatiginagu. (Hebræerit 2:1) Taakku ilarpassui assingupput ernermut tammaraluartumut Jiisusip assersuutaanut, angummi illuanik qimatsisumut nunamilu ungasissumi kingornussaminik nungulussinnaasumut. — Lukasi 15:11-16.

² Qujanartumik Jehovap Nalunaajaasuisa amerlanersaat taamatut ajornartorsiuteqanngillat, taamatulli ajornartorsiutilinnut oqaaseqanngilaq tuppallersaasinnaasumik aliasunnerannik qaangiisitsilluinnarsinnaasumik. Aamma isiginngitsuusaartariaqanngilaq inuusuttut sallusuissummik qimatsisut ilarpassui pilluaatsuusut. Immaqa qamuuna ilerasuuteqarput. Jiisusip assersuutaani erneq tammaraluartoq kiisami ‘silattuaqilerpoq’, angutaatalu nuannaarutigaa. Angajoqqaat ilagiinniittullu allat inuusuttut sallusuissummik qimatsisut qanoq ‘silattuaqitissinnaavaat’? — Lukasi 15:17.

Sooq inuusuttut ilaasa sallusuissut qimattaraat

3. Inuusuttut kristumiut ilagiivinik qimatsisarnerannut suut pissutaaqataappat?

³ Inuusuttut hundredetusindilikkuutaat kristumiut ilagiivini Jehovamut kiffartornertik nuannaarutigaat, taavami sooq inuusuttut allat ilagiit qimattarpaat? Immaqa silarsuup neqeroorutigisaanik arajutsisaqarsorigamik. (2 Timotheusi 4:10) Immaqaluunniit Jehovap Nalunaajaasuini illersugaanertik killiliivallaarsoraat. Aammattaaq inuusuttut ilaasa ilerasunneq, arnaagaanni angummut angutaagaannilu arnamut soqutiginnippallaarneq kammalaatinilluunniit akuerineqarusunneq Jehovap ilagiissaanit qimagussutigisarpaat. Immaqa aamma Guutimut kiffartorunnaartoqartarpoq angajoqqaatik kristumiulluunniit allat ilumoortuusaarsorigamikkik.

4. Inuusuttut qimagutilernerannut suna pissutiviugajuppa?

⁴ Meeqqap pikitsitsiumatunera pissusilersorneraluunniit anersaakkut sanngiitsuuneranut malunniutaagajuppoq uummammiugisaanullu  takussutissaalluni. (Ussatit 15:13; Mattæusi 12:34) Inuusuttup qimagutilerneranut sunaluunniit pissutaagaluarpat pissutiviugajuttoq tassaavoq eqqortumik ‘sallusuissummik ilisimanninnginnerat’. (2 Timotheusi 3:7) Inuusuttut Jehovamut pallorfiginninneq taamaattussaannartut isiginagu qanimut attaveqalernissaat pingaaruteqarpoq. Taamaaliornissaannut suna iluaqutaasinnaava?

Guuti qaninniarsiuk

5. Inuusuttut Guutimut qanillissappata suna pingaaruteqarpa?

⁵ „Guuti qaninniarsiuk, taava taanna ilissinnut qanillissaaq,“ ajoqersugaq Jaaku allappoq. (Jaaku 4:8). Inuusuttut Guutimut qanillissagunik Guutip oqaasianik ‘ussiisinneqartariaqarput’. (Tussiaat 34:9) ‘Immuttoqqaartariaqarput’ — Biibilimi ajoqersuutit tunngaviunerusut ilinniaqqaartariaqarpaat. Guutilli oqaasianik atuarusunnerujartortillutik ‘nerisassallu tamuasarissat’ — anersaakkut ajoqersuutit itisuut — mamarsisikkiartortillugit anersaakkut inersimallualissapput. (Hebræerit 5:11-14; Tussiaat 1:2) Inuusuttup silarsuarmit tiguartisimanerminit nassuertup anersaakkut ittut pingaartilerpai. Suup allamik isumataartippaa? Biibilip naallugu atuarnissaanik siunnersorneqarami Biibili aalajangersimasumik atuartalerpaa. Aap, Jehovamut qanillissagaanni Guutip oqaasia aalajangersimasumik atuartariaqarpoq.

6, 7. Angajoqqaat qitornatik Guutip oqaasianik nuannarinnilersillugit qanoq ikiorsinnaavaat?

⁶ Pingaaruteqangaarpoq angajoqqaat qitornaminnik Guutip oqaasianik nuannarinnilersitsinissaat. Arnaq inuusuttuaraq ilaqutariittut atuaqqissaarneq peqataaffigisaraluarlugu pinerluttunik ikinnguteqarnerarpoq. Ilaqutariittut atuaqqissaartarnertik ima oqaatigaa: „Ataataga apeqquteqaraangat qiviarnagu akissut atuaannartarpara.“ Angajoqqaat silatuut ilaqutariittut atuaqqissaaraangamik atuaannarnaveersaartariaqarput, ilinniartitsillaqqissunngornissartilli sulissutigisariaqarlugu. (2 Timotheusi 4:2) Inuusuttut atuaqqissaarneq nuannarissagunikku peqataaffigisariaqarpaat imminnullu attuumassuteqarnera misigalugu. Soormi qanoq isumaqarnersut apeqqutigigukku? Sammineqartup sutigut atorneqarsinnaanera eqqarsaatigeqqujuk. *

⁷ Biibilimik sammisaqarneq sapinngisamik uummaarissuutiguk. Periarfissaqaraangat meeqqat inuusuttullu Biibililersaarummik isiginnaartitsisinnaapput. Sammineqartut sumi pisimanerinik takorluuisinnaatilerlugit ikiukkit. Nunap assingi assilissallu iluaqutaasinnaapput. Aap, isumassarsiulaaginnarnikkut ilaqutariittut atuaqqissaartarneq pissanganartunngorsinnaavoq assigiiaarunnaarlunilu. Aammattaaq angajoqqaat namminneq Jehovamut attaveqarnertik misissortariaqarpaat. Namminneq Jehovamut qaninnerulerunik, qitornatik taamaaliornissaannut ikiorsinnaassavaat. — 5 Mosesi 6:5-7.

8. Inuusuttut qinunikkut Guutimut qanimut qanoq attaveqalersinnaappat?

⁸ Aamma inuusuttut qinunikkut Guutimut qaninnerulersinnaapput. Niviarsiaqqap inuusuttuaranngulerami kristumiut inooriaasiat uppeqatiginngisanilluunniit ikinnguteqarusunneq sorleq aalajangiutissanerlugu nalornigami eqqissiunnaarutigaa. (Jaaku 4:4) Tamanna qanoq iliuuseqarfigaa? „Aatsaavissuaq Jehovamut qamannga pisumik qinuvunga qanorlu misiginerlunga oqaluttuulllugu,“ nassuerpoq. Qinnutini akineqarsoraa ilagiinni kristumiuni uummammiugisaminik oqaluttuussinnaasaminik arnamik ikinngutitaarami. Jehovamit ikiorneqarnini malugigamiuk tassunga qanittumik attaveqarnissani sulissutigilerpaa. Angajoqqaat qinnutimik pitsaanerulersinneratigut qitornatik  ikiorsinnaavaat. Ilaqutariittut qinunermi angajoqqaat uummammiugisatik oqaatigisinnaavaat, qanittumik Jehovamut attaveqarnertik meeqqanit malugineqarsinnaatillugu.

Naammagittarit, aalajaallutilli

9, 10. Israelikkut naammagittarfiginerisigut Jehova qanoq maligassiuiva?

⁹ Inuusuttoq qimagukkiartulersoq imminut mattunniarsinnaavoq angajoqqaamilu anersaamut tunngasunik oqaloqatiginninniarnerinut akerlilersuilluni. Taamaattoqartillugu angajoqqaat qanoq iliorsinnaappat? Jehovap itsaq Israelikkunnut qanoq iliornera eqqarsaatigiuk. Israelikkut ‘naalasseriitsut’ ukiut 900-t sinnerlugit naammagittarfigereerlugit aatsaat imminiiginnarpai. (2 Mosesi 34:9; 2 Nalunaarsuutit 36:17-21; Romamiut 10:21) ‘Misilinniartuartaraluaraanni Guutip naakkinnittuliorfigisarpai’. „Qasseerpassuariarluni kamassani nunusarpaa uumitsangaarnissanilu pitsaalisarlugu.“ (Tussiaat 78:38-42) Guuti Israelikkunnut iliuuseqarnermini assuarnaappoq. Angajoqqaat asannittut Jehova ilaartariaqarpaat ilungersuutitik ingerlaannaq kinguneqanngippata naammagittarlutik.

¹⁰ Erinitsajuinneq naammagittarnerluunniit imaaginnanngilaq sivisuumik pissutsinik ajorinninnaveersaarneq; aamma imaappoq pissutsit pitsanngorsinnaanerinik neriuutaarutinnginneq. Jehovap maligassiuinermini takutippaa naammagittartut qanoq iliussasut. Siulliulluni iliuuseqarpoq aallartitani aqqutigalugit Israelikkut ‘mianersoqqujuarlugit’. Jehovap ‘innuttani asattuunniarpai’ naak ‘Guutip aallartitai mitaatigisaraluaraat, Guutillu oqaasii asiginnartarlugit’. (2 Nalunaarsuutit 36:15, 16) Israelikkut kajumissaarpai ima oqarluni: „Saanniaritsi tamassi immikkut ingerlavissinnit ajortunit.“ (Jeremia 25:4, 5) Najoqqutassianili qasukkanngilai. Israelikkut Guutimut aqqutigeqqusaanullu ‘saaqquneqarput’.

11. Angajoqqaat qitornarminnut sallususissummik qimatsisimasumut qanoq aalajaallutik nammagittarsinnaappat?

¹¹ Jehovap erinitsajuinnera angajoqqaat ilaarsinnaavaat qitornartik qimagutilersoq nikalluutiaarpallaarnagu. Neriuutaaruttariaqanngillat  ammasumilli attaveqaannarniarlutik attaveqaqqilerniarlutilluunniit siulliullutik iliuuseqarlutik. Najoqqutassiat naapertuilluartut aalajangiusimaatigalugit meeraq sallusuissummut utersartuarsinnaavaat.

Nukangasoq ilagiinnit anisitaappat

12. Nukangasoq najugaqatigisartik, ilagiinnilli anisitaasoq, angajoqqaat qanoq akisussaaffigaat?

¹² Taavami nukangasoq angajoqqaamini najugaqartoq sualuttumik ajortuliornermut akuliusimasoq peqqissiminngitsorlu ilagiinnit anisitaappat? Meeraq angajoqqaamini najugaqarmat ilinniartitaanissaa Guutillu oqaasia naapertorlugu perorsarnissaa angajoqqaavisa suli akissussaaffigaat. Qanoq iliorsinnaappat? — Ussatit 6:20-22; 29:17.

13. Angajoqqaat qitornamik qimagussimasup uummataa qanoq anguniarsinnaavaat?

¹³ Meeraq angerlarsimaffimmi atuaqqissaaqatigineqartarsinnaavoq, tamannalu pitsaanerpaassaaq. Angajoqqaat qitornamik manngertissutigisaat uummammiugisaallu paasiniartariaqarpaat. Anersaakkut qanoq sanngiitsigaa? (Ussatit 20:5) Uummataata sunnerneqarsinnaasortaa anguneqarsinnaava? Allassimaffiit suut atorneqarluarsinnaappat? Apustili Paulusi ima isumalluarsaarivoq: „Guutip oqaasia uumavoq sunniisinnaassuseqarlunilu panamillu illuttut kiinalimmit ipinnerulluni. Magguttarpoq avissaartillugu tarneq anersaamit taamatullu aamma pateq saanermit, uummatip eqqarsaatai isumaalu eqqartuuttarlugit.“ (Hebræerit 4:12) Aap, angajoqqaat qitornatik ajortulioqqissanngitsut oqarfigiinnassanngilaat. Peqqissiartulernissaq aallarnisarlugulu siuarsarsinnaavaat.

14. Meeqqap unioqqutitsisup Jehovamut ajunngitsumik attaveqaqqilerniartup suna iliuusereqqaartariaqarpaa, taamatullu iliuuseqartinniarlugu angajoqqaat qanoq ikiuisinnaappat?

¹⁴ Inuusuttup qimagussimasup Jehovamut ajunngitsumik attaveqaqqilernissani pisariaqartippaa. Iliuuserisassaq siulleq tassaasariaqarpoq ‘allamik isumataarneq saannerlu’. (Apustilit Suliaat 3:19; Esaja 55:6, 7) Angajoqqaat qitornartik najugaqatigisartik allamik isumataartinniaraangamikku imminnut noqittariaqarput meerarlu sallusuissummut akerliusoq ‘saamasumik periaaseqarlutik avoqqaarisariaqarlugu’. (2 Timotheusi 2:24-26) Biibilimut naapertuuttumik meeraq ’ilitsersortariaqarpaat’. Grækerit oqaasiat ‘ilitsersuutissavaa’-mik nutserneqartartoq aamma „nalujunnaarsissavaa“-mik nutserneqarsinnaavoq. (Saqqummersitat 3:19; Johannesi 16:8) Taamaattumik angajoqqaat ilitsersuinerminni qitornartik eqqunngitsuliorneranik nalujunnaarsilluartariaqarpaat. Ilumoorpoq tamanna oqitsuinnaanngitsoq. Periarfissaqartillugu Biibilimut akerliunngitsut tamaasa angajoqqaat meeqqamut kajumissaarutiginiarsinnaavaat. Paasitissavaat ‘ajortoq uumigineqartariaqartoq ajunngitsorlu nuannarineqartariaqartoq’. (Amosi 5:15) Immaqa meeraq silattussaaq Diaavulullu napiaaniutaanit aniguisinneqarluni.

15. Unioqqutitsisup Jehovamut ajunngitsumik attaveqaqqilernissaanut qinuneq qanoq pingaaruteqartigaa?

¹⁵ Jehovamut ajunngitsumik attaveqaqqilissagaanni qinuneq pisariaqarluinnarpoq. Soorunami kialuunniit qinnutissanngilaa kristumiut ilagiivinut ilaasortaajunnaartoq sualuttumik ajortuliortoq, peqqissiminanilu ajortuliortuaannartoq allamillu isumataanngitsoq. (1 Johannesi 5:16, 17; Jeremia 7:16-20; Hebræerit 10:26, 27) Pissutsinili taamaattuni angajoqqaat Jehova ilisimassummik qinnuigisinnaavaat. (Jaaku 1:5) Inuusuttoq ilagiinnit anisitaaqqasoq allamik isumataarneranik malunnaateqarpat, ‘Guutimulli nakimappat’, angajoqqaat Jehova qinnuigisinnaavaat, inuusuttup ajortuliaasa isumakkeerfiginissaanut tunngavissaqartikkunigit, piumasaata pinissaa. (1 Johannesi 3:21) Inuusuttup qinnutit taamaattut tusarunigit Jehovap  Guutitut naakkinnittuunera paasisinnaassavaa. * — 2 Mosesi 34:6, 7; Jaaku 5:16.

16. Nukangasup ilagiinnit anisitaasup ilaqutai qanoq ikiorsinnaavavut?

¹⁶ Oqaluussisartoq inuusuttoq kuisimasoq ilagiinnit anisitaappat naatsorsuutigineqarpoq ilagiinni ilaasortaasut ‘ilagisarunnaassagaat’. (1 Korinthimiut 5:11; 2 Johannesi 10, 11) Ilagineqartarunnaarnini ‘silattuaqissutigisinnaavaa’ Guutillu savaataanut illersugaasunut uterluni. (Lukasi 15:17) Uterpat utinngikkaluarpalluunniit ilagiinni ilaasortaasut ilaqutaanik qiimmassaasinnaapput. Pissutsini taamaattuni ‘misiginneqataanissamut nallittuinissamullu’ tamatta periarfissarsiorsinnaavugut. — 1 Petrusi 3:8, 9.

Allat qanoq ikiuisinnaasut

17. Ilagiinni ilaasortat inuusuttumik qimagussimasumik ikiuiniarnerminni suna eqqarsaatigisariaqarpaat?

¹⁷ Inuusuttormi ilagiinnit anisitaanngikkaluarluni uppernikillippat? Apustili Paulusi allappoq: „Avat ataaseq naalliukkaangat avatit tamarmik naallioqatigisarpaat.“ (1 Korinthimiut 12:26) Anersaakkut sanngiitsumut allat soqutiginnillutik iliuuseqarsinnaapput. Soorunalimi mianersortariaqarpoq inuusuttummi anersaakkut sanngiitsup inuusuttoqatini ajortumik sunnersinnaavai. (Galatiamiut 5:7-9) Ilagiinni inersimasut ajunngitsumik isumaqarlutik inuusuttut anersaakkut sanngiitsut ikiorniarlugit katerisimaarnermut popimik nipilersornertalimmut qaaqquvaat. Inuusuttut ingerlaannaq piumagaluarlutik unnussiuaaqatigiittarnitillu nuannarigaluarlugit, inuusuttut imminnut sunnerlutik piffissap ingerlanerani ilagiinnut attaveqarunnaarput. (1 Korinthimiut 15:33; Judasi 22, 23) Inuusuttut anersaakkut sanngiitsut ikiorneqassappata anersaamut tunngasortaqanngitsumik inuttut isumagineqarneq naammanngilaq, katerisimaaqatigiinnerli anersaakkut eriagisassanik takunnilersitsisariaqarpoq. *

18. Jiisusip assersuutaani ernerup tammaraluartup angutaatut isummeriartaaseqarluta qanoq takutissinnaavarput?

 ¹⁸ Inuusuttoq ilagiinnit qimagussimasoq naalagaaffilersaarfimmut ataatsimeersuarnermulluunniit ataatsimiigiaruni qanormita misigissava? Jiisusip assersuutaani ernerup tammaraluartup angutaa assigalugu tikilluaqqussannginnerparput? (Lukasi 15:18-20, 25-32) Inuusuttuaraq ilagiinnit qimaguttoq kingusinnerusukkullu ataatsimeersuaqataasoq oqarpoq: „Isumaqaraluarpunga tamarmik takunngitsuusaassagaannga, qatanngutilli ornillunga tikilluaqquaannga. Killitseqaanga.“ Biibili atuaqqissaartaleqqippaa kingusinnersukkullu kuisilluni.

Nikalluussinak!

19, 20. Meeraq sallusuissummik qimatseqqasoq sooq isumalluarfigiuartariaqarparput?

¹⁹ Meeraq qimaguteqqasoq ‘silattuaqilersinniaraanni’ erinitsajuittariaqarpoq angajoqqaanullu allanullu unamminiarnartuusinnaalluni. Nikalloqinalli! „Naalakkap neriorsuutigisani paamaarutinngilaa, naak ilaat isumaqaraluartut paamaarussinerarlugu; ilissinnulli erinitsajuippoq kimilluunniit tammaqqusinnginnami, tamaasalu allamik isumataarnissamut periarfissikkumagamigit.“ (2 Petrusi 3:9) Biibilimi isumalluarsaarneqarpugut Jehovap inuit tamarmik allamik isumataarnissaat inuuginnarnissaallu kissaatigigaa. Inuit saammaanniarlugit siulliulluni iliuuseqarpoq. (2 Korinthimiut 5:18, 19) Erinitsajuinnerata inuit millionillit silattornissaannut periarfissippai. — Esaja 2:2, 3.

²⁰ Angajoqqaat qitornartik nukangasoq silattortinniarlugu Biibilimut akerliunngitsut tamaasa iliuuserisariaqanngilaat? Jehova ilaarsiuk erinitsajuillusilu aalajangersimarpalullusi qitornarsi Jehovamut saatsinniarlugu iliuuseqaraangassi. Biibilimi najoqqutassiat maleqqissaarsigit Jehovallu pissusii ilaarniarlugit: asanninnera, naapertuilluarnera ilisimassusialu, ikioqqullusi qinuutigalusi. Inuusuttorpassuit manngertiinnaqqasut Jehovap asannittumik uteqqusinera ilassivaat. Aamma qitornarsi savaatinut utersinnaavoq illersuutaaneralu iluaqutigilerlugu. — Lukasi 15:6, 7. (wE 10/1 01)

[Quppernerup ataani ilanngussat]

Eqqaamavigit?

• Inuusuttut ilagiinnik qimatsisarnerannut suna pissutiviugajuppa?

• Inuusuttut Jehovamut attaveqalersinniarlugit qanoq ikiorneqarsinnaappat?

• Angajoqqaat meeqqamik sallusuissummik qimatsisumik ikiuiniaraangamik sooq aalajaallutik erinitsajuittariaqarpat?

• Ilagiinni ilaasortaasut inuusuttoq qimagussimasoq utertinniarlugu qanoq ikiorsinnaavaat?

[Atuaqqissaarnermi apeqqutit]

[Qupp. 16-mi assiliartaq]

Guutip oqaasiani atuarneq Jehovamut qanimut attaveqalernissamut pingaaruteqarluinnarpoq

[Qupp. 16-mi assiliartaq]

Angajoqqaat Jehovamut qanimut attaveqarnerat qamannga pisumik qinnutaanni qitornaasa malugisinnaavaat

[Qupp. 18-mi assiliartaq]

’Silattuaqisoq’ ilassisiuk asannittumik

[Qupp. 19-mi assiliartaq]

Qitornat Jehovamut saatsinniarlugu aalajangersimarpaluttumik iliuuseqarit