Meeqqannik perorsaaninni Jehova ilaartaruk

„Angajoqqaat tamarmik meeqqatik perorsartannginnerpaat?“ — HEBRÆERIT 12:7, Contemporary English Version.

1, 2. Sooq angajoqqaat ullumikkut meeqqaminnik perorsaanerminni ajornartorsiuteqartarpat?

JAPANIMI ukiualuit matuma siorna misissuinermi inersimasut apersorneqartut affaasa missaat oqarput isumaqarlutik angajoqqaat meeqqatillu oqaloqatigiinngippallaartut, angajoqqaallu meeqqaminnut maleruutiavallaartut. Japanimi misissuinermi allami apersorneqartut sisamararterutingajaasa nassuerutigaat meeqqanut attaveqarfiginninneq nalullugu. Asiamiinnaanngitsoq nunani allani aamma taamaappoq. The Toronto Star-imi allassimavoq: „Angajoqqaat Canadamiut amerlasuut oqartarput angajoqqaajulluarneq nalullugu.“ Silarsuaq tamakkerlugu angajoqqaat misigisimavaat meeqqanik perorsaaneq erloqinartuusoq.

² Sooruna taama erloqinartigisoq? Pissutaasut pingaarnerit ilagaat „ullussani kingullerni“, aamma ‘ulluni atugarliungaarfiusuni’ inuugatta. (2 Timotheusi 3:1) Tamatumunnga ilaavoq Biibilimi allassimasutut ‘inuit inuusunnerminniit ajortuinnarmik eqqarsaateqarnerat’. (1 Mosesi 8:21) Aamma inuusuttut Saatanimit saassunneqarnerusarput, taanna misilittagakitsunik ‘løvitut uiannisaartutut angalasarmat iisassarsiorluni’. (1 Petrusi 5:8) Angajoqqaat kristumiut ajornartorsiuterpassuaqarsinnaasarput qitornaminnik ‘perorsaagaangamik anusinngorsaallutik oqaaqqissaarillutillu [Jehovamit] pisumik’. (Efesosimiut 6:4) Angajoqqaat meeqqatik ‘ajunngitsumik ajortumillu immikkoortitsisinnaasutut’ peroriartornissaannut kristumiutullu inersimasunngornissaannut qanoq ikiorsinnaavaat? — Hebræerit 5:14.

3. Angajoqqaat meeqqaminnik perorsaalluarnissaat ajoqersuilluarnissaallu sooq taama pingaaruteqartigaa?

³ „Sianiissuseq nukappissap uummataanut qilersugaavoq,“ kunngi silatooq Salomo oqarpoq. (Ussatit 13:1; 22:15) Sianiissuseq tamanna inuusuttut uummataannit peerneqarsinnaassappat, angajoqqaaminnit asannittumik sernissorneqartariaqarput. Inuusuttulli siunnersorneqarnertik nuannariuaannanngilaat. Amerlanertigummi siunnersorneqarneq iluarivallaartanngilaat. Taamaattumik angajoqqaat ‘nukappiaqqap ingerlavissamigut ingerlaannarnissaanut kajumissaarnissaa’ ilinniartariaqarpaat. (Ussatit 22:6) Meeqqat ajoqersorneqarnertik perorsarneqarnertilluunniit ilassigunikku inuussutigisinnaavaat. (Ussatit 4:13) Taamaattumik angajoqqaat ilisimasariaqarpaat meeqqaminnik perorsaassagaangamik suut pisariaqartinnerlugit.

Perorsaaneq suua?

4. Oqaaseq ‘perorsaaneq’ Biibilimi atorneqartoq qanoq isumaqavippa?

⁴ Angajoqqaat ilaasa meeqqaminnik perorsaanissartik tunuarsimaarfigaat timikkut, oqaatsikkut misigissutsikkulluunniit naalliutsitsisutut unnerluutigineqarnissartik ernumassutigalugu. Ernumanissamulli pissutissaqanngilaq. Oqaaseq ‘perorsaaneq’ Biibilimi atorneqaraangat naalliutsitsineq eqqarsaatigineqartanngilaq. Grækerit ‘perorsaanermut’ oqaasiat pingaartumik isumaqarpoq ilinniartitsineq, ajoqersuineq, sungiusaaneq ilaannikkullu  aalajangersimasumik asannittumilli naqqiineq.

5. Jehovap innuttaminik ajoqersuinerata misissornissaa sooq iluaqutaassava?

⁵ Perorsaaneq eqqarsaatigalugu Jehova Guuti maligassiuilluarnerpaavoq. Apustili Paulusip Jehova ataatamut nunamiusumut assersuutigalugu ima allappoq: „Ernerusoqarnerpami ataataminit anusinngorsarneqartanngitsumik? . . . Siuaasatta iluarisaminnik sivikitsuinnarmik anusinngorsarsimavaatigut, Guutili taamaaliorpoq iluaqutissatsinnik illernassutsiminik pissarseqataaqqulluta.“ (Hebræerit 12:7-10) Aap, Jehovap innuttani perorsartarpai illernartooqqullugit minguitsooqqullugilluunniit. Jehovap innuttaminik ajoqersuinera misissorutsigu meeqqanik perorsaaneq pillugu ilikkagaqangaarsinnaavugut. — 5 Mosesi 32:4; Matthæusi 7:11; Efesosimiut 5:1.

Asanninneq kajumississutaasariaqarpoq

6. Sooq angajoqqaat Jehovap asanninnera ilaaruminaatsissinnaavaat?

⁶ „Guuti tassaavoq asanninneq,“ apustili Johannesi allappoq. Taamaattumik Jehova asannittumik ajoqersuiuaannarpoq. (1 Johannesi 4:8; Ussatit 3:11, 12) Tamanna ima paasisariaqarpa angajoqqaat pissusissamisoortumik qitornaminnik asannittut Jehova tamatumani ilaaruminartissagaat? Taamaattariaqanngilaq. Guutip asanninnera najoqqutassianit aallaaveqarpoq. Biibilimik misissueqqissaartartup grækerisoornermik ilisimasallip erseqqissarpaa asanninneq najoqqutassianik tunngavilik ‘pissutsinut inunnguutsinut ilanngukkuminartuujuaannanngitsoq’. Guuti killitsiasuunngilaq. Tamatigut innuttami iluaqutissaannik iliortarpoq. — Esaja 30:20; 48:17.

7, 8. (a) Asanninneq najoqqutassianik tunngavilik eqqarsaatigalugu Jehova qanoq maligassiuilluarpa? (b) Angajoqqaat Jehova qanoq ilaarsinnaavaat meeqqatik Biibilimi najoqqutassianik maleruaanissaannut ikioraangamikkik?

⁷ Jehovap Israelikkunnut asanninnera eqqarsaatigiuk. Mosesip assersuusiullaqqilluni Jehovap inuiaqatigiinnut pilersinneqaqqammersunut Israelikkunnut asanninnera ima allaatigaa: „Soorlu nattorallip piaqqani tingitittarai ulluminit qulaannilu timmioraartarluni, taamatut suluni siaarpai qaqitillugulu amakkiullugulu ingerlallugu. [Jehovap] kisimi [Jaaku] ingerlappaa allamiut guutiannik ilaqarnani.“ (5 Mosesi 32:9, 11, 12) Nattorallip isaqqilalluni piaqqani timminermik ilinniartsinniarlugit ulluniit ‘tingitinniartarpai’. Piaqqat ilaata ullut qaqqami qutsisumiikkajuttut kiisami qimakkaagagit ‘qulaani timmioraartarpoq’. Piaraq tingisinnaarpasinngikkaangat arnaa ataanut aarsaapallattarpoq ‘amakkiullugulu ingerlallugu’. Taamatut Jehovap asannilluni inuiaqatigiit pilersinneqaqqammersut Israelikkut isumagai. Innuttani inatsisiminik tunivai. (Tussiaat 78:5-7) Tamatumalu  kingorna inuiaqatigiit ilungersorluni nakkutigai, ajornartorsiuteqaleraangatalu ikioriaanaasarlugit.

⁸ Angajoqqaat kristumiut Jehovap asanninnera qanoq ilaarsinnaavaat? Siullermik meeqqatik najoqqutassianik maleruagassanillu Guutip oqaasianiittunik ajoqersortariaqarpaat. (5 Mosesi 6:4-9) Biibilimi najoqqutassianut naapertuuttumik inuusuttut aalajangiisinnaanngortinnissaat siunertaavoq. Angajoqqaat asannittut taamaalioraangamik meeqqamik qulaanni ‘timmioraartarpullusooq’ malugisarlugulu najoqqutassiat uummamiuliutsissimasatik qanoq atorneraat. Meeqqat alliartortillugit kiffaanngissuseqarneruleriartortillugillu, angajoqqaat isumaginnilluartut ikiuiartupallariaannaasarput qaqugukkulluunniillu navianartorsiortoqaleqaraangat ‘amakkiullugit ingerlakkumallugit’. Suut navianartuusinnaappat?

9. Navianartoq suna angajoqqaat asannittut pingaartumik eqqumaffigisariaqarpaat? Assersuummik taasaqarit.

⁹ Jehova Guutip Israelikkut ilagisartakkanut ajortunut kingunerinullu mianersoqquai. (4 Mosesi 25:1-18; Esra 10:10-14) Ullumikkuttaaq ajortunik ilagisartagaqarneq navianarsinnaavoq. (1 Korinthimiut 15:33) Angajoqqaat kristumiut Jehova ilaartariaqarpaat meeqqatillu navianartunut mianersoqqullugit. Niviarsiaqqap 15-inik ukiullip Lisamik atillip nukappiaraq, ilaquttamisut ileqqussatigut anersaakkullu naleqartitanik pingaartitsinngitsoq, soqutigilerpaa. „Angajoqqaama erniinnaq malugaat allanngortunga, ernumalerlutillu,“ Lisa oqaluttuarpoq. „Ilaannikkut avoqqaarisarppaannga, ilaannikkullu asannittumik kajumissaartarlunga.“ Lisa angajoqqaavisa naamagittarlutik tusarnaartarpaat, taamaalillutillu ajornartorsiutivia paasitillugu — ilagisartakkaminit akuerineqarusunneq. *

Attaveqarluaannarit

10. Jehovap Israelikkut qanoq attaveqarfigisarpai?

¹⁰ Meeqqaminnik perorsaanerminni iluatsitsissagunik angajoqqaat sapinngisannguaminnik iliuuseqartariaqarput attaveqafigilluaannarniarlugit. Jehovap kajumissaartarpaatigut imminut attaveqarluaanarnissatsinnut, uummammiugisavut nalunngikkaluarlugilluunniit. (1 Nalunaarsuutit 28:9) Israelikkut inatsisiminik tunereeramigit Levikkut toqqarpai Israelikkut Inatsisini allassimasunik ajoqersoqqullugit, pruffiitinilu aallartittarpai  oqaloqatiginnittussatut avoqqaarinnittussatullu. Aamma paasitippai qinnutaat tusarusullugit. — 2 Nalunaarsuutit 17:7-9; Tussiaat 65:3; Esaja 1:1-3, 18-20; Jeremia 25:4; Galatiamiut 3:22-24.

11. (a) Angajoqqaat meeqqaminnut qanoq attaveqarluaannarsinnaappat? (b) Sooq angajoqqaat meeqqaminnik oqaloqateqaraangamik tusarnaarluartariaqarpat?

¹¹ Angajoqqaat meeqqaminnik attaveqarfiginninnerminni Jehova qanoq ilaarsinnaavaat? Pingaarnerpaamik piffissaqarfigisariaqarpaat. Aamma eqqarsaqqaarnani oqaatsit meeqqat ajornartorsiutaannik suusupaginnippaluttut pinngitsoorneqartariaqarput, soorlu makku: „Tassa? Isumaqarlunga pingaaruteqarnerusoq pilerit!“; „Sianiippallaarnak!“; „Tupinnanngilarmi suli meeraagavit!“ (Ussatit 12:18) Silatusaarnerussaaq angajoqqaat tusarnaarnermut sungiusarunik, meeqqanut ammarnissaq ajornannginnerussammat. Angajoqqaat meeqqaminnik mikisuuneranni sumiginnaasut, meeqqat inersimasunngorpata immaqa namminneq sumiginnarneqassapput. Jehova innuttaminut tusarnaarusuttuaannarpoq. Maniguullutik imminut qinusut tusarnaartarpai. — Tussiaat 91:15; Jeremia 29:12; Lukasi 11:9-13.

12. Angajoqqaat pissusii suut meeqqat angajoqqaaminnut saaffiginninnissaannut ajornannginnerulersitsisinnaappat?

¹² Guutip pissusiisa ilaat pissutigalugit innuttaasa nakimaallutik saaffigiuminarnerutippaat. Assersuutigalugu eqqaasinnaavarput Israelikkut kunngiat Daavi Batsebamut kinguaassiuutitigut ajortuliungaartoq. Daavi aamma allatigut unioqqutitsingaarpoq, taamaattorli Jehova saaffigiuarpaa isumakkeerfigeqqulluni perorsaqqullunilu. Qularutissaanngilaq Jehovap ilumoorluni tunniusimanera nallittuineralu Daavip Jehovamut uternissaanut ajornannginnerulersitsisoq. (Tussiaat 103:8) Jehovap misiginneqataaneranik nallittuineranillu angajoqqaat ilaarsiniarpata, meeqqat qimagukkiartulissagaluarpata ammasumik attaveqatigiittuartoqarnissaanut iluaqutaassaaq. — Tussiaat 103:13; Malaki 3:17.

Inorsiinasi

13. Ingasaassiniannginneq qanoq paasisariaqarpa?

¹³ Angajoqqaat meeqqaminnut tusarnaaraangamik inorsiinatik ‘ilisimassuseq pavannga pisoq’ maleruartariaqarpaat. (Jaaku 3:17) „Qanilaarsusersi ilisimaneqalerli inunnit tamanit,“ apustili Paulusi allappoq. (Filippimiut 4:5) ‘Qanilaarsuseq’ qanoq paasisariaqarpa? Grækerit oqaasiat ‘qanilaarsutsimik’ nutserneqartoq ilaatigut ima nassuiarneqarpoq: ‘Inatsisit oqaasertaannik pingaartitsivallaannginneq’. Angajoqqaat Guutip najoqqutassiaanik maleruaajutigalutik qanoq ingasaassinianngitsuusinnaappat?

14. Jehovap Loti qanoq ingasaassinianngitsumik iliorfigaa?

¹⁴ Ingasaassiniannginneq eqqarsaatigalugu Jehova maligassiuilluarnerpaavoq. (Tussiaat 10:17) Loti ilaquttanilu Jehovap tuavisaarmatik illoqarfik eqqartuunneqartussaq sodoma qimaqqullugu, Loti ‘piumaataalerpoq’. Kingusinnerusukkut Jehovap inngiliata Loti qaqqamut isumannaatsumukaqqummani, Loti oqarpoq: ‘Qaqqanili isumannaatsumik inissiffissaqanngilanga . . . Aajinnga illoqarfik [Soari], qanittuararsuummat tassunga aniguiniarsinnaavunga isumannaatsumut pillunga, mikeqaarmi. Taanna annanniarfiginiarlara; mikeqaarmi!’ Jehova qanoq akiva? „Tamatumuunattaaq qinnutit tusarpara, illoqarfik taanna oqaatigisat nungutissannginnakku.“ (1 Mosesi 19:16-21, 30) Jehovap Lotip qinnutaa tusaarusuppaa. Soorunami ullumikkut angajoqqaat najoqqutassiat Jehova Guutip oqaatsimini Biibilimi allatsitai maleruartariaqarpaat. Ajornanngippalli meeqqamik kissaatigisaat soqutigisariaqarpaat, Biibilimi najoqqutassianut akerliunngippata.

15, 16. Esaja 28:24, 25-mi assersuusiaq angajoqqaat qanoq ilinniutigisinnaavaat?

¹⁵ Ingasaassiniannginneq aamma ima  oqaatigineqarpoq meeqqat uummataat siunnersuutinut akuersaalersillugit. Esajap Jehova naasorissaasumut assersuuppaa oqarami: „Siaruarteriffissaminik assallatserisup nunaanni mumisitertuartarnerpaa manissartuartarlugulu? Naamik, manissarneqareerpat siaruarterissaaq dildinik nakkalatserillunilu kumaasanik, qajuusiassassanik hirsissanillu suaasiassanillu narsaammi siaruarterissaaq, qajuusiassanillu nujaasartaqanngitsunik narsaatip avammut killinganut.“ — Esaja 28:24, 25.

¹⁶ Jehova ‘siaruarteriffissaminik assallatserisarpoq’ ‘nunaannilu mumisitertuartarpaa manissartuartarlugulu’. Tamanna isumaqarpoq innuttami uummataat piareersartarai perorsartinnagit. Angajoqqaat meeqqamik uummataat qanoq ‘assallatsersinnaavaat’ naveeraangamikkit? Ataataasup Jehova ilaarpaa ernini sisamanik ukiulik sanilimi erneranik unataasoq naveeramiuk. Siullermik ataataasoq kamagittarluni ernermi nassuiaaneranut tusarnaarpoq. Uummataa piareersarlugu nukappiarannguamik oqaluttuaq imminit annerusumit qunutinneqarlunilu unatarneqartoq oqaluttuaralugu. Oqaluttuaq erneranut sunniuteqarpoq, oqarlunilu nukappiaraq anneq pillarneqartariaqartoq. Ataataasup taama periaaseqarluni ernini eqqunngitsuliorsimasoq oqaluttuamilu nukappiaqqap annerup iliorsimaneratut iliortoq paasitippaa. — 2 Samueli 12:1-4.

17. Angajaoqqaat Esaja 28:26-29-mut meeqqaminnik perorsaaneq perorsaatissiinerlu eqqarsaatigalugit qanoq ilinniarfigisinnaavaat.

¹⁷ Esajap aamma assersuuppaa Jehovap perorsaanera nunalerinermi suliassamut allamut, tassa karrertaajaanermut. Biibilip nalaani naasorissaasoq karrertaajaalluni assigiinngitsunik atortoqartarpoq, karrit qalipaasalu qanoq ittuussiat apeqqutaatillugu. Kumaasanut qernertunut qajannartunut ajaappiaq atortarpaa, kumaasanulli nalinginnaasunut ajaappiaq takkajaaq, karrilli ilaannut mattunerusunik qalipalinnut karrertaajaat qamutilluunniit assakaasuat atortarlugu. Naasorissaasulli karrit manngernerusut ima anaalertigisanngilai  aserorlugit. Jehovap innuttami kissaatiginanngitsortai piaaraangamigit, aamma taamatut periaaseqartarpoq pisariaqartitanut pissutsinullu naapertuuttumik. Piaaraluni naakkitaatsuliunngisaannarpoq, sukanninngisaannarluni naqisimanninngisaannarluniluunniit. (Esaja 28:26-29) Meeqqat ilaat angajoqqaaminnit qivialaanginnagassaapput, allamillu naamik. Allat arleriarlutik eqqaasinneqartariaqarput, allallu ilungersunarnerusumik oqaaqqissaarneqartariaqarlutik. Angajoqqaat ingasaassinianngitsut meeqqat tamaasa immikkut naleqquttumik perorsassavaat.

Ilaqutariittut atuaqqissaarneq nuannersuutiguk

18. Angajoqqaat ilaqutariittut aalajangersimasumik atuaqqissaaqatigiittarneq qanoq piffissaqarfigisinnaavaat?

¹⁸ Meeqqanik ajoqersueriaatsit pitsaanerpaat ilaat tassaavoq ilaqutariittut aalajangersimasumik atuaqqissaaqatigiinneq ullullu tamaasa ullormut allassimaffiup oqaloqatigiissutigisarnera. Ilaqutariittut atuaqqissaaqatigiinneq pissarsiffiulluarnerusarpoq aalajangersimasuugaangami. Nalaatsornerinnakkut aalajangeriataarnikkulluunniit aatsaat atuaqqissaartoqartarpat aalajangersimanngittuaannalissaaq. Taamaattumik angajoqqaat atuaqqissaarnermut ‘piffissaqqissoq atorniartariaqarpaat’. (Efesosimiut 5:15-17) Piffissamik aalajangersimasumik tamanut naleqquttussarsiornissaq unamminiarnartuusinnaavoq. Ilaqutariinni ittuusup paasivaa meeqqat alliartortillugit ilaqutariit katersorniartarnerat ilungersunarnerujartuinnartoq, tamarmik immikkut pilersaaruteqartarmata. Unnunnili ilagiinni ataatsimiiffiusuni ilaqutariit ataatsimoortuaannarput, taamaattumik ataataasoq pilersaarusiorpoq unnuit taakkua ilaat atuaqqissaarfiussasoq. Tamanna iluaqutaavoq, meeqqallu pingasut tamarmik maanna Jehovamut kiffaapput kuisimasut.

19. Angajoqqaat ilaqutariittut atuaqqissaaqatigiinneq aqukkaangamikku Jehova qanoq ilaarsinnaavaat?

¹⁹ Atuaqqissaaqatigiinnermili Biibilimut tunngasuinnarnik sammisaqarnissaq naammanngilaq. Jehovap Israelikkut nunagisaminnut utertut ajoqersortarpai palasit ikiortigalugit, taakkua Inatsisit ‘nassuiarmatigik atuakkatillu inunnut paasinartunngorlugit’. (Nehemia 8:8) Ataataasoq meeqqaminik arfineq-marlunnik Jehovamut asanninnissaannik ikiuisimasoq, ilaqutariit atuaqqissaaqatigiinnerat sioqqullugu tamatigut allaffimminut isertarpoq piareersarniarluni atuagassallu naleqqussarlugit meeqqat tamarmik immikkut pisariaqartitaat naapertorlugit. Atuaqqissaaqatigiinneq meeqqaminut nuannersuutittarpaa. „Atuaqqissaarneq nuannersuujuaannarpoq,“ ernerisa inersimasut ilaat oqaluttuarpoq. „Silatitsinni arsartilluta ilaqutariitut atuaqqissaalernerarneqaraagatta, arsaq qimaannarlugu isipallattarpugut. Tassaavoq sapaatip-akunnerani unnuit nuannernerpaat ilaat.“

20. Meeqqanik perorsaanermi suna ajornartorsiutaalersinnaava?

²⁰ Tussiaasiortoq oqarpoq: „Ernerit tassaapput [Jehovap] tunissutai, illissap inerittui tassaapput akissarsiarititaasut.“ (Tussiaat 127:3) Meeqqanik perorsaanissamut piffissaqartariaqarlunilu nukissaqartariaqarpoq, eqqortumilli perorsaagaanni meeqqat naassaanngitsumik inuusinnaapput. Akissarsiassaq nuanningaartoq! Taamaattumik Jehovap maligassiaa maleruarsinnaajumallugu qanortoq sapinngisatsinnik iliorta meeqqatsinnik perorsaagaangatta! Angajoqqaat ‘[Jehovamit] pisumik [meeqqaminnik] perorsaanerminni’ akisussaaffimminnik sapinngisaminnik eqqortitsigaluarlutik, iluatsissanersoq qulakkeersinnaanngilaat. (Efesosimiut 6:4) Allaat pitsaanerpaamik perorsarneqaraluarluni meeraq pikitsitsisinnaavoq Jehovalu kiffartuukkunnaarlugu. Taama pisoqartillugu qanoq iliuuseqartoqarsinnaava? Tamanna allaaserisap tulliani sammineqarpoq. (wE 10/1 01)

[Quppernerup ataani ilanngussaq]

Qanoq akissavit?

• Jehovap asanninnera Mosesimik allakkat tallimaat 32:11, 12-mi allaatigineqartoq angajoqqaat qanoq ilaarsinnaavaat?

• Jehovap Israelikkunnut attaveqarfiginnittarnera qanoq ilinniarfigaajuk?

• Jehovap Lotip qinnutaanut tusarnaarnera qanoq ilinniarfigisinnaavarput?

• Esaja 28:24-29-mut meeqqanik perorsaaneq pillugu sumik ilikkagaqarfigaajuk?

[Atuaqqissaarnermi apeqqutit]

[Qupp. 9-mi assiliartaq]

Mosesip Jehovap innuttaminut ajoqersuinera nattorallip piaqqami timminissaannik ilinniartitsineranut assersuuppaa

[Qupp. 10-mi assiliartaq]

Angajoqqaat meeqqatik piffissaqarfigisariaqarpaat

[Qupp. 12-mi issuagaq]

„Sapaatip-akunnerani unnuit nuannernerpaat ilaat“