Jehovap iluarisaanik uummateqalerit

„Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga.“ — TUSSIAAT 51:12.

1, 2. Uummatitta qanoq innera sooq soqutigisariaqarparput?

ANGISUUJUVOQ isikkorissuullunilu. Pruffiitip Samuelip takujuminartingaaramiuk isumaqarluinnarpoq angut inuusuttoq taanna, Isajip ernera angajulleq, kunngi Saulip kingoraartissaatut Guutip toqqagarigaa. Jehovali oqarpoq: „Isikkua angissusialuunniit aalajangiisuutissanngilatit uanga taanna narrugigakku. . . . Inuimmi isiminnut saqqumisuinnaat isigisarpaat, [Jehovalli] inuup uummataa isigisarpaa.“ Paasinarsivoq Jehovap toqqagaa tassaasoq Isajip ernera nukarleq, Daavi — ’angut Jehovap uummataata iluarisaa’. — 1 Samueli 13:14; 16:7.

² Inuup uummammiugisai Guutip atuarsinnaavai. qingusinnerusukkut oqarpoq: „Uanga, [Jehova], uummatit misissuiffigisarpakka tartullu misilittarlugit, kinaluunniit pisassaanik pitikkumallugu inuuserisaa suliaalu missiliuutigalugit.“ (Jeremia 17:10) Aap, „uummatinik misiliisartoq tassaavoq [Jehova].“ (Ussatit 17:3) Jehovalliuna suut misilittarai? Qanorlu iluarisaanik uummateqalersinnaavugut?

’Uummammi, inummi isertugaq’

3, 4. Oqaaseq „uummat“ Biibilimi amerlanertigut qanoq isumaqartinneqarpa?

³ Biibilimi oqaaseq ’uummat’ tusindit missaanni atorneqarpoq. Amerlanertigut assersuutaasumik isumaqartinneqarluni. Assersuutigalugu Jehova pruffiitimut Mosesimut oqarpoq: ’Israelip kinguai oqaluffigikkit: tunissummik ilioragassamik tigusissasut uannut; angutit uummatimik kajumissaagaat tamaasa tigusiffigissavasi uannut tunissutaasumik ilioragassamik.’ Tunisiartortullu ’uummatimikkut pileripput’. (2 Mosesi 25:2; 35:21) Tamatumani paasinarsivoq uummat assersuutaasoq iliuuseqarnissamut kajumissaarisuusoq. Aammattaaq uummatip assersuutaasup ersersippai misigissutsivut, qanoq misiginivut, kissaativut soqutigisavullu. Uummat kamangaarsinnaavoq sioorangaarsinnaalluniluunniit, aliasungaarsinnaavoq nuannaangaarsinnaalluniluunniit. (Tussiaat 27:3; 39:3; Johannesi 16:22; Romamiut 9:2) Makitasuujusinnaavoq maniguuttuusinnaalluniluunniit,  asanningaarsinnaavoq uumissuingaarluniluunniit. — Ussatit 16:5; Matthæusi 11:29; 1 Petrusi 1:22.

⁴ Tassa uummat pissutiginiakkatsinnut misigissutsitsinnullu atassuserneqarajuppoq, isumali sianissutsimut atassuserneqarnerusarluni. Oqaatsit ’uummat’ aamma ’isuma’ Biibilimi ataatsikkut atorneqartillugit taamatut paasineqartassapput. (Matthæusi 22:37; Filippimiut 4:7) Uummalli isumalu taamatut isumaqartinneqartuaannanngillat. Assersuutigalugu Mosesip Israelikkut ima kajumissaarpai: ’Uummammiuliutissavat [Jehova] Guutiummat.’ (5 Mosesi 4:39) Jiisusillu allakkanik ilisimasut toqutsiniartut ima oqarfigai: „Sooq uummatissigut ajortunik eqqarsarpisi?“ (Matthæusi 9:4) Tassa eqqaamannissinnaaneq eqqarsarsinnaanerlu, aamma silaqassuseq ilisarsinerlu, uummammut atassuserneqarput. (1 Kunngit 3:12; Ussatit 15:14; Markusi 2:6) Taamaattumik uummatitsinnut assersuutaasumut ilaasinnaavoq sianissuserput — eqqarsaativut silaqassuserpullu.

5. Uummat assersuutaasoq suua?

⁵ Qinerlerfissiaq naapertorlugu uummat assersuutaasoq tassaavoq: „Nalinginnaasup qeqqa, ilua, taamaattumillu inuuseq ilorleq iliuusiini tamani malunnartoq, kissaataani, misigissusiini, qanoq misiginerani, soqutigisaani, siunertaani, eqqarsaataani, paasinnittaasiani takorluuineranilu, ilisarsinerani ilisimassuseqarneranilu, piginnaasaani, isumaani isumaliortaasianilu, eqqaamannissinnaanerani sianissusianilu.“ Pineqartoq tassaavoq qamuuna qanoq ittuunerput, ’uummammi, inummi isertugaq’. (1 Petrusi 3:4) Taannaavoq Jehovap misilittagaa. Taamaattumik Daavi ima qinusinnaavoq: „Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga!“ (Tussiaat 51:12) Qanoq minguitsumik uummateqalersinnaavugut?

 Guutip oqaasia ’uummammiuliussiuk’

6. Mosesip Israelikkut Moabip narsaataani tammaarsimatillugit qanoq oqaaqqissaarpai?

⁶ Mosesip Israelikkut nunamut neriorsuutigisamut isertinnagit Moabip narsartaani ima oqaaqqissaarpai: ’Uummamiuginiarsigik oqaatsit tamaasa ullumi ilissinnut nalunaajaatigisakka, qitornassinnut inassutigissagassigik maleruaqqullugit, inatsisit makkua oqaasii tamaasa naammasseqqullugit.’ (5 Mosesi 32:46) Mosesip oqaasii Israelikkut ’uummammiuliuttussaavaat’. Guutip inassutaanik ilisimannilluarnerinnarmikkut qitornaminnut puiuikkiutsitsisinnaapput. — 5 Mosesi 6:6-8.

7. Guutip oqaasia qanoq uummammiuliunneqartarpa?

⁷ Minguitsumik uummateqalissagaanni Guutip piumasaanik siunertaanillu eqqortumik ilisarsisoqaqqaartariaqarpoq. Ilisarsisitsisinnaasoq ataasiinnaavoq: Guutip oqaasia isumassarsiarititaasoq. (2 Timotheusi 3:16, 17) Silaqassutsikkuinnarli ilisarsineq Guutip iluarisaanik uummateqalersitsisinnaanngilaq. Ilisarsinerup qamuuna sunnerluassappatigut ilikkakkavut aalajangiuttariaqarpavut, isummatsinniitilivillugit. (5 Mosesi 32:46) Qanoq taamaaliortoqarsinnaava? Tussiaasiortoq Daavi oqarpoq: „Ullut itsarsuarnitsat eqqaavakka, naammassisatit tamaasa eqqarsaatigaakka isumaliutigeqqissaarlugillu assappit suliaat.“ — Tussiaat 143:5.

8. Atuaqqissaaraangatta apeqqutit suut eqqarsaatigeqqissaatariaqarpavut?

⁸ Aammattaaq qujamasulluta Jehovap iliuusii tamaasa isumaliutigeqqissaartariaqarpavut. Biibilimi atuagassianiluunniit Biibililersaarutini atuaraangatta apeqqutit imaattut eqqarsaatigisariaqarpavut: Jehova pillugu suna ilikkarpara? Jehovap pissusii sorliit ersersinneqarpat? Allaaserisami matumani Jehovap suna iluarineraa sunalu iluarinnginneraa qanoq oqaluttuaarineqarpat? Jehovap nuannarisaanik uumigisaanilluunniit iliuuseqarneq qanoq kinguneqartarpa? Massakkut ilikkakkakka nalunngeriikkakkalu imminnut qanoq attuumassuteqarpat?’

9. Atuaqqissaarneq ilikkakkanillu eqqarsaatiginninneq qanoq pingaaruteqartigaat?

⁹ Lisa * 32-nik ukiulik oqaluttuarpoq aalajangersimasumik siunertaqarluni atuaqqissaarnerup eqqarsaatiginninnerullu pingaaruteqarneri qanoq paasiartulerlugit: „1994-imi kuisinnerma kingorna ukiut marluk missaanni suliniuteqartorujussuuvunga. Ataatsimiigiartuaannarpunga, qaammammut nalunaaquttap-akunneri 30-t 40-llu missaanni oqaluussisarlunga uppeqatikkalu ilagisarlugit. Qimagukkiartulerpungali. Nakkaatingaarama allaat Guutip inatsisai unioqqutippakka. Qujanartumilli silattuaqivunga minguitsumillu inuuniarlunga aalajangerlunga! Imatut aperikulavunga: ’Sooq qimaguppunga?’ Eqqarsaatinni takkuttuartoq tassaavoq aalajangersimasumik siunertaqarlunga atuaqqissaartannginnera atuakkannillu eqqarsaatiginnittannginnera. Biibilip sallusuissutai uummammiuliussimanngilakka. Maannamiit atuaqqissaartarneq atuakkannillu isumaliutiginneqqissaartarneq inuuninnut ilaalluinnalissapput.“ Tassa pingaaruteqarluinnarpoq Jehovamik, erneranik oqaasianillu ilisarsinerujartortilluta ilikkakkatitsinnik isumaliutiginneqqissaarnissap piffissaqarfiginissaa!

10. Atuaqqissaarnissap atuakkatsinnillu isumaliutigeqqissaarnissap piffissaqarfiginissaat sooq pingaaruteqarpa?

¹⁰ Silarsuarmi ulapiffiusumi matumani atuaqqissaarnissap atuakkatsinnillu isumaliutiginneqqissaarnissap piffissaqarfiginissaa unamminiarnartuuvoq. Ullumikkulli nunap neriorsuutigisap — Guutip silarsuassaata nutaap naapertuilluartup — alloriusaaniippugut. (2 Petrusi 3:13) Pisussat amiilaarnangaartut, soorlu ’Babylonersuup’ aserorneqarnissaa Jehovallu innuttaasa ’Gogimit Magogimeersumit’ saassunneqarnissaat, qanillilluinnarput. (Saqqummersitat 17:1, 2, 5, 15-17; Ezekieli 38:1-4, 14-16; 39:2) Pisussat taakkua Jehovamut asanninnitsinnut misilinneqaataassapput. Pisariaqarluinnarpoq piffissaqqissumik atuinissarput Guutillu oqaasianik uummammiuliussinissarput. — Efesosimiut 5:15, 16.

 Guutip oqaasiata paasiniarnissaanut uummatit piareersaruk

11. Uummat issumut qanoq assersuunneqarsinnaava?

¹¹ Uummat assersuutaasoq issumut sallusuissutsip naatsiiassaanik ikkussuiffiusinnaasumut assersuunneqarsinnaavoq. (Matthæusi 13:18-23) Naatsiiassat naalluarnissaat qulakkeerniarlugu issoq piareersarneqartarpoq. Taamatulli uummat piareersarneqarsinnaavoq Guutip oqaasianut akuersaarnerulersillugu. Palasip Ezrap ’aalajangiussimavaa [Jehovap] inatsisai paasiniarluarniarlugit maleruarniarlugillu’. (Ezra 7:10) Uummaterput qanoq piareersarsinnaavarput?

12. Atuaqqissaalertinnata uummaterput qanoq piareersarsinnaavarput?

¹² Uummat Guutip oqaasianik ilassinninnissaanut piareersarniarlugu iliuuserisinnaasat ilagaat Jehovamut ilumoorluni qinuneq. Kristumiut ataatsimiinneri qinunermik aallarnerneqarlutillu naggaserneqartarput. Taamatulli naleqqutissaaq Biibilimik atuaqqissaartinnani qamannga pisumik qinunissaq taavalu atuaqqissaarnermi uummat ammatiinnarlugu akuersaartuutiinnarlugulu.

13. Jehovap iluarisaanik uummateqalerniarluta qanoq iliortariaqarpugut?

¹³ Uummat assersuutaasoq suliarineqartariaqarpoq isummat aalajangiuteriikkat taamaatinneqassappata. Jiisusip nalaani upperisarsiornikkut siuttut taamaaliorusunngillat. (Matthæusi 13:15) Jiisusip arnaata, Mariap, sallusuissutit tusakkani „uummamminut toqqorpai eqqarsaatigalugillu“. (Lukasi 2:19, 51) Jiisusimut ajoqersuganngorpoq aalajaatsoq. Lydiap Tyatirameersup Paulusi tusarnaarpaa Jehovallu „taassuma uummataa ammarpaa Paulusip oqaasiinik pigiliussisillugu.“ Aamma taanna uppertunngorpoq. (Apustilit Suliaat 16:14, 15) Isummavut upperisarsiornikkulluunniit ajoqersuutit aalajangiusimasavut uteriilluta aalajangiusimaannarnagit, aalajangiuttariaqarparput ’Guuti sallusuitsuusoq, inuillu tamarmik sallutuujusut’. — Romamiut 3:4.

14. Kristumiut ataatsiminnerini tusarnaarnissamut uummaterput qanoq piareersarsinnaavarput?

¹⁴ Kristumiut ataatsimiinnerini tusarnaarnissamut uummatitta piareersarnissaa ingammik pingaaruteqarpoq. Tusarnaarunnaarluta eqqarsaativut allamut sangutinneqariaannaapput. Ullormut pisimasut aqagumulluunniit pisussat eqqarsaatigigutsigik ataatsimiinnermi tusakkavut iluaqutigingaarnavianngilavut. Allassimaffiit nassuiarneqartut paasissagutsigik aalajangiusimasariaqarparput tusarnaarnissarput ilikkagaqarnissarpullu. — Nehemia 8:5-8, 12.

15. Maniguunnerup qanoq ilinniarumatulersissinnaavaatigut?

¹⁵ Inerititassat naalluartinniarlugit issup naggorissaasersorneqartarneratulli maniguunnerup, anersaakkut ittunik pingaartitsinerup, tatiginninnerup, Guutimik mianerinninnerup Guutimullu asanninnerup uummaterput assersuutaasoq pisuunngortissinnaavaa. Maniguunnerup uummat aqilisittarpaa ilinniarumatunerulersittarlutalu. Jehova Judap kunngianut Josijamut oqarpoq: „Uummatikkut qussalagavit [Jehovallu] kiinaata saani nikanartillutit tusarakkit . . . sioorasaarutikka . . . kiinnamalu saani qiallutit, taava qinnutit tusarumavara.“ (2 Kunngit 22:19) Josijap uummataa maniguuttuuvoq akuersaartuullunilu. Aamma maniguunnerup Jiisusip ajoqersugai, „inuinnaasut immikkut ilinniagaqarsimanngitsut“, anersaakkut sallusuissutinik, ’ilisimasut sianisuullu’ paasisinnaanngisaannik, paasinnissinnaalersippai atuisinnaalersillugillu. (Apustilit Suliaat 4:13; Lukasi 10:21) Taamaattumik ’Guuterput maniguuffigisariaqarparput’ Jehovap iluarisaanik uummateqalerniaatigaluta. — Ezra 8:21.

16. Sooq anersaakkut nererusussuseqarneq suliniutigisariaqarparput?

¹⁶ Jiisusi oqarpoq: „Pilluarput anersaakkut piitsut.“ (Matthæusi 5:3) Inuit tamarmik anersaakkut ittunik pingaartitsisinnaapput. Silarsuulli ajortup matuma tatisinerata eqiasoqqajaanerullu ima aramatigilersissinnaavaatigut pisariaqartitsinermik tamatuminnga paasinninngitsoortilluta. (Matthæusi 4:4) Taamaattumik anersaakkut nererusussuseqalerniartariaqarpugut.  Biibilimik atuarneq atuaqqissaarnerluunniit aallaqqaammut nuannarinngikkaluarutsiguluunniit piffissap ingerlanerani ’ilisimasaqarnerup nuannaalersissavaatigut’ atuaqqissaarnissarlu qilanaarisalissavarput. — Ussatit 2:10, 11.

17. (a) Sooq Jehova tatigilluinnarneqartariaqarpa? (b) Guuti qanoq tatigilersinnaavarput?

¹⁷ Kunngi Salomo oqarpoq: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu!“ (Ussatit 3:5) Uummatip Jehovamik tatiginnittup nalunngilaa oqaatsimini iliuusereqqusai peqqussutaaluunniit iluaqutaajuaannartut. (Esaja 48:17) Jehova tatigilluinnarneqartariaqarpoq. Aalajangikkani tamaasa naammassisinnaavai. (Esaja 40:26, 29) Aqqa isumaqarpoq „-nngortippoq (-tippaa)“, tamatumalu tatiginnilersippaatigut neriorsuutiminik piviusunngortitsissasoq. „Iluartuuvoq [Jehova] ingerlavimmini tamani, qanoq iliornermini tamani ilumoortuuvoq.“ (Tussiaat 145:17) Jehova tatigilissagutsigu soorunami ’ussertariaqarparput takullugulu ajunngitsuusoq’. Taamaaliorsinnaavugut Biibilimi ilikkakkavut inuunitsinni atorlugit iluaqutaanerallu eqqarsaatigalugu. — Tussiaat 34:9.

18. Guutimik mianerinninnerup taassuma siulersuineranut qanoq akuersaarnerulersippaatigut?

¹⁸ Salomop pissuseq suli alla uparuarpaa Guutip siulersuineranut uummatitsinnik akuersaartitsisoq. Oqarpoq: „[Jehova] mianeruuk ajortorlu nigorsimallugu.“ (Ussatit 3:7) Itsaq Israelikkut pillugit Jehova oqarpoq: „Qanortoq mianeriuaannarlinnga uummatimikkut peqqussutikkalu tamaasa maleruarlugit inuunertik tamaat! Taava taakku qitornatillu inuunerminni tamatigut ajunngitsunik atugaqassapput.“ (5 Mosesi 5:29) Aap, Guutimik mianerinnittut taanna naalattarpaat. Jehovap ’uummatimikkut iluunngarlutik imminik tunaarinnittut pissaanermigut’ ikiortarpai naalanngitsullu pillartarlugit. (2 Nalunaarsuutit 16:9) Jehovap iluarinngisaanik iliunnginnissatsinnut mianerinninnerup iliuutsivut, eqqarsaatigut misigissutsivullu tamaasa siulersorligittoq.

’Jehova uummatikkut iluunngarlutit asajuk’

19. Jehovap siunnersuutaanut uummatitta akuersaartunngortinnissaanut asanninneq qanoq pingaaruteqartigaa?

¹⁹ Asanninnerup uummaterput pissutsinit allanit tamanit Jehovap siunnersuutaanut akuersaarnerulersippaa. Uummatip Guutimut asanningaartup Guutip suna iluarineraa sunalu iluarinnginnera ilikkarusulluinnartarpaa. (1 Johannesi 5:3) Jiisusi oqarpoq: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ (Matthæusi 22:37) Guuti asanerulersinnaavarput ajunngissusianik isumaliutiginneqqissaarluta, qanimut ikinngutitut aalajangersimasumik oqaloqatigisarlugu kajumillutalu allanut eqqartortarlugu.

20. Jehovap iluarisaanik qanoq uummateqalersinnaavugut?

²⁰ Naatsumik uteqqiilluta ima oqarsinnaavugut: Jehovap iluarisaanik uummateqalerniarluta Guutip oqaasia ilutsinni, uummammi, inummi isertugaasumi, sunniuteqartittariaqarparput. Pingaaruteqarluinnarpoq Biibilip siunertaqartumik atuaqqissaartarnissaa pingaartitsillutalu ilikkakkatsinnik isumaliutiginneqqissaartarnissarput. Taamaaliussagutta uummaterput piareersartariaqarparput — isummat aalajangiusimasat taamaatillugit uummaterpullu ilinniarusussuseqartillugu. Aap, Jehovap ikiuineratigut ajunngitsumik uummateqalersinnaavugut. Uummaterpulli paariniarlugu qanoq iliorsinnaavugut?

[Quppernerup ataani ilanngussaq]

Qanoq akissavit?

• Uummat assersuutaasoq Jehovap misilittagaa suua?

• Guutip oqaasia qanoq ’uummammiuliussinnaavarput’?

• Guutip oqaasiata paasiniarnissaanut sooq uummaterput piareersartariaqarparput?

• Allaaserisaq una eqqarsaatigereerlugu qanoq iliuuseqarusulerpit?

[Atuaqqissaarnermi apeqqutit]

[Qupp. 12-mi assiliartaq]

Daavi pingaartitsilluni anersaamut tunngasut isumaliuutigeqqissaartarpai. Illimmi?

[Qupp. 13-mi assiliartaq]

Uummatit Guutip oqaasiata atuaqqissaarnissaanut piareersaruk