’[Jehovap] pilluaqqusinera pisuunngortitsisarpoq’

PILLUAQQUNEQARNEQ Ordbog over det Danske Sprog naapertorlugu ’pilluarnermut aamma atugarissaarnermut iluaqutaavoq’, ’iluaqut nuannaalersitsisartoq, iluarusulersitsisartoq nalerisimaalersitsisartorlu’. Tamanna eqqarsaatigalugu kia kissaatigingilaa pilluaqquneqarnissani, ingammik Jehovamit? „Tunissutit ajunngitsut naammalluinnartuusullu tamarmik“ taassumanngaanneermata, oqartoqarsinnaavoq pilluaqqussut sunaluunniit piviusoq ataavartorlu taassumanngaanneersoq, Pingortitsisumit asannittumit. (Jaaku 1:17) Inuit tamaasa pilluaqqusarpai, allaat ilisarisimannitsiginngikkaluani. Jiisusi ataatani pillugu oqarpoq: „Taassumammi seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu.“ (Matthæusi 5:45) Jehovalli asannitsinni immikkut isumassortarpai. — 5 Mosesi 28:1-14; Jobi 1:1; 42:12.

Tussiaasiortoq allappoq: „Assuarnaallutik inuusut sumik ajunngitsumik erliguutissanngilai.“ (Tussiaat 84:12) Taamaattumik Jehovamut kiffaasut, imaqangaartumik siunertaqarluartumillu inuupput. Nalunngilaat ’[Jehovap] pilluaqqusinera pisuunngortitsisartoq, suleruloorneq pisuunerulersitsisanngitsoq’. Aamma allassimavoq ’[Jehovap] pilluaqqusaasa nuna kingornutissagaat’. (Ussatit 10:22; Tussiaat 37:22, 29) Pilluaqqusaangaarneq!

Qanormi Jehovamit pilluaqqusaasinnaavugut? Pingaarnertut iluarisaanik pissuseqarnissaq nuannarilerniartariaqarparput. (5 Mosesi 30:16, 19, 20; Mika 6:8) Tamanna takusinnaavarput qanga Jehovamut kiffaasimasuni pingasuni.

Jehovap kiffani pilluaqquai

Noa Guutimut kiffartornermigut nersornarsivoq. Mosesimik allakkat siulliit-ni 6:8-mi allassimavoq: „Noa [Jehovap] isaanut saammaannarsivoq.“ Sooq? Guuti naalakkamiuk. Taanna pillugu allassimavoq: „Noap Guuti inooqatigaa.“ Noap Jehovap najoqqutassiai naapertuilluartut maleruarpai peqqussutaalu naalallugit. Nunarsuaq tamarmi nakuusertoqangaartoq ajussuseqangaartorlu „Noa Guutip peqqusineratorluinnaq iliorpoq“. (1 Mosesi 6:9, 22) Jehovap Noa sanaqquaa ’umiarsuarmik inoqutimi annaffissaannik’. (Hebræerit 11:7) Taamaalillutik Noa ilaqutaalu — tamatumuunalu inuiaat tamarmik — ajunaarnersuarmit annapput. Noa toquvoq neriugisaqarluni makitinneqarnissaminik nunamilu paratiisiusumi naassaanngitsumik inuunissaminik neriugisaqarluni. Ila pilluaqqusaanngaarneq!

Abrahami aamma pissuseqarpoq Jehovap nuannarisaanik. Pingaarnersaavoq uppernera. (Hebræerit 11:8-10) Abrahamip Urimi kingornalu Karanimi inuuneq ilorrisimaarnartoq sussakkeerpaa upperigamiuk kinguaassani inuiassuanngortikkumallugit nunarsuarmilu kinguaariinnut tamanut pilluaqqussutaatikkumallugit Jehovap neriorsuutaa. (1 Mosesi 12:2, 3) Ukiorpassuarni misilinneqareerluni uppernera akilerneqarpoq Iisaaq inunngormat. Taanna aqqutigalugu Abrahami nagguinngorpoq Guutip innuttaanut qinigaasunut, Israalikkunnut, kingornalu Messiassimut. (Romamiut 4:19-21) Aammattaaq ’uppertunut tamanut ataatanngorpoq’, ’[Jehovallu] ikinngutaanik’ taaneqarluni. (Romamiut 4:11; Jaaku 2:23; Galatiamiut 3:7, 29) Taamaalilluni siunertaqarluartumik inuuvoq pilluaqqusaangaarlunilu.

 Taava Mosesi aalajaatsoq tullinnguupparput. Pissusiisa ilaat ilisarnaatigisaa immikkut taaneqarsinnaavoq anersaakkut nalilinnik pingaartitsinera. Egyptenimiut pisuussutaat tamaasa sussakkeerpai ’takussaanngitsumimmi isigisaqarlunilusooq pinertusaarami’. (Hebræerit 11:27) Ukiuni 40-ni Midjanimeereerluni Egyptenimut uterpoq 80-inik ukioqarluni Faraomullu, taamani angummut pissaaneqarnerpaamut, sapiilluni sassarluni Israelikkut iperagaatinniarlugit. (2 Mosesi 7:1-7) Egyptenimiut perlunnik qulinik perlussiortitaanerannut, Immap Aappalaartup avissaartinneqarneranut Faraollu sakkutuuisa suujunnaarsinneqarnerannut takunnittuuvoq. Jehovap atorpaa Israelikkunnut inatsisiminik aatsisoralugu akunnermiliuttoralugulu angerfigisaminut inuiannut pilersinneqarlaanut, ukiunilu 40-ni Israelikkut inoqajuitsumi siulersorlugit. Inuunera siunertaqarluarpoq imaqarluarlunilu, Jehovamillu suliassanik pingaarutilinnik pilluaqqusaangaarneq akissarsiaralugu.

Ullutsinni pilluaqqussutit

Siuliani taaneqartut takutippaat Guutimut kiffaasut inuunerat siunertaqarluartartoq. Naalannerujartortillutik, uppernerujartortillutik anersaakkullu nalilinnik pingaartitsinerujartortillutik Guutimit pilluaqqusaasarput.

Uagummi ullumikkut inuusugut qanoq pilluaqqusaavugut? Aap, kristumiuunerartut millionillit anersaakkut kaatsillugit, Jehovap ajunngissusia ’qiimmattaatigisinnaavarput’. (Jeremia 31:12) Jiisusi Kristusi aamma „kiffaq ilumoortoq silatoorlu“ aqqutigalugit ’inuussummut isaaffimmiiginnaqqulluta’ Jehovap naammattunik anersaakkut nerisassaqartippaatigut. (Matthæusi 7:13, 14; 24:45; Johannesi 17:3) Pilluaqqussutit taakkua ilagaat kristumiutut qatanngutigiinneq. Ataatsimiinnerni, ataatsimeersuarnerni katerisimaarnernilu allani uppeqatitsinnik asannittunik aamma ’inuttaamik’ atisiniarlutik ilumoorlutik ilungersuuteqartunik peqateqartarnerput nuannaarutigaarput. (Kolossemiut 3:8-10; Tussiaat 133:1) Nuannaarnerli pilluaqquneqarnerlu annerpaaq angusinnaavarput Jehova Guutimut qanimut attaveqarutta erneratalu Jiisusi Kristusip tumai atuarutsigit. — Romamiut 5:1, 8; Filippimiut 3:8.

Pilluaqqussutit taakkua eqqarsaatigalugit Jehovamut kiffartornerput qanoq naleqartiginersoq paasissavarput. Niuertumik sapannganik kusanartunik ujarlersumik Jiisusip assersuusiaa eqqarsaatigissagunarparput. Taanna pillugu Jiisusi oqarpoq: „Nassaarigamiullu sapangaq ataaseq akisoorujussuaq pigisani tamaasa akigiartorpai taannalu pisiaralugu.“ (Matthæusi 13:46) Qularutissaanngilaq Guutimut attaveqarnitsinnut, kiffartornissamut piginnaatitaaffimmut, kristumioqatinik peqateqarnermut, kristumiutut neriuutitsinnut uppernitsinnullu tunngatillugu pilluaqqussaanerpassuarnut tunngatillugu taamatut misigisugut. Inuunitsinni taama naleqartigisoqanngilaq.

Jehova akillugu tuniuk

Paasigaangatsigu tunissut ajunngitsoq sunalunniit Jehovameersoq, uummatitsigut qujamasunngaalertarpugut pingaartitsinittalu ersersinnissaa kissaatigingaalertarlugu. Qanoq ililluta taamaaliorsinnaavugut? Ilaatigut taamaliorsinnaavugut pilluaqqussuterpassuarnik tamakkuninnga allat avitseqatigalugit. (Matthæusi 28:19) Nunani 230-nit amerlanerusuni Jehovap Nalunaajaasui tamanna siunertaralugu ulappupput inoqatitik pulaartarlugit. Piffissartik, nukitik aningaasaatitillu allat ’sallusuissummik ilisarsitinniarlugit’ atortarpaat. — 1 Timotheusi 2:4.

Assersutitut taaneqarsinnaapput aappariit pioneerit Californiami Glendalemi najugallit. Arfininngornerit ullaat tamaasa 50 kilometerit biilertarput paarnaarussivimmiittut pulaarniarlugit. Nalunaaquttap-akunnialuinnai pulaartaraluarlutik misigipput ilungersulussinnarnatik. Nuliaasoq oqarpoq: „Qiimmaallannarpoq oqaluussiffigisartakkami nalinginaanngitsumi tassani oqaluussilluni, nuannaarlutalu taamaaliorpugut.“ Nangippoq: „Soqutiginnittut amerlangaarmata tamaasa isumagisinnaanngilavut. Maannakkut tallimat atuaqqissaaqatigisarpavut, sisamallu utaqqillutik.“

 Oqaluussisartut kristumiut aallussilluartut nuannaarutigaat kiffartornerminni akeqanngitsumik neqeroornertik. Paasivaat suliartik inuunermik annaassiniarnerusoq. Jiisusitut eqqarsartaaseqarput, taanna oqarmat: „Akeqanngitsumik tunineqarpusi, akeqanngitsumik tunisigitsi.“ (Matthæusi 10:8) Nunarsuaq tamakkerlugu inuit millionillit kiffartorneq namminissarsiunngitsoq taamaattoq ulapputigaat, tamatumalu kinguneraa eqqortuliorusuttorpassuit ajoqersuganngornerat. Ukiuni kingullerni tallimaannarni 1,7 millionilingajaat Jehovamut tunniulluinnarput. Amerliartortuarnerup tamatuma pisariaqalersippaa Biibilinik atuagassianillu Biibililersaarutinik naqiterinissaq, naalagaaffilersaarfinnillu ataatsimeersuartarfinnillu sanaartornissaq. Tamakku tamarmik sumit aningaasassaqartinneqarpat? Kajumissutsimit tunissutinit.

Nunarsuarmi sumiiffiit ilaanni aningaasaqarniarnikkut pissutsit ajortut pissutaallutik imminut ilaquttanullu inuussutissarsiorneq inuppassuarnut ilungersunarpoq. Atuagassiaq New Scientist naapertorlugu inuit milliardit ilaquttariit isertitaasa ataatsimut katinnerisa minnerpaamik 70 procentii nerisassanut atortarpaat. Qatanngutivut kristumiut amerlasuut taama atugaqarput. Uppeqatitik ikiuinngikkaluarpata atuagassiat Biibililersaarutit naalagaaffilersaarfiilluunniit atussaasut akissaqartissanngikkaluarpaat.

Tamannali isumaqanngilaq namminneq nammatassamik allanut nammakkiunnissaat naammagisimaaraat, ikiorneqartariaqarpulli. Mosesip Israelikkut Jehovap pilluaqqusineranut qujassutitut pigisatigut tunissuteqaqqullugit kajumissaaramigit, oqarpoq: „Kinaluunniit pisinnaasani naapertorlugu tunniussissaaq [Jehovap]  pilluaatissiissutaanut naapertuuttumik.“ (5 Mosesi 16:17) Jiisusip uillarneq takugamiuk naalaffiup nakkaatitsivianut ’aninngasaannguanik marlunnik ikisisoq’, pingaaruteqartutut ajoqersukkaminut eqqaavaa. Sapinngisani naapertorlugu ikisivoq. (Lukasi 21:2, 3) Taamatulli ullumikkut kristumiut piitsut sapinngisartik naapertorlugu tunisisarput. Aningaasakillioraangata kristumioqataasa pissaqarnerusut tunissutaasa tunisinikinnerat soqutaajunnaarsittarpaat. — 2 Korinthimiut 8:13-15.

Taamatut nammineq tunissutisiat akiniarlugit Guutimut tunisigaanngatta, pissutiginiakkatta eqqortuunissaa pingaaruteqarpoq. (2 Korinthimiut 8:12) Paulusi oqarpoq: „Kinaluunniilli tunisissaaq uummammigut aalajangiisimanermisut, pinaasernani pinngitsaalineqarnaniluunniit; kajumittumimmi tunisisoq Guutimit nuannarineqartuuvoq.“ (2 Korinthimiut 9:7) Tukkorluta uummammillu pisumik tunisigaangatta, maannakkut amerliartorneq tapersersortarparput nuannaarnerulertarpugullu. — Apustilit Suliaat 20:35.

Marlunnik periarfissaqarpugut Jehovap pilluaqqusinerata akinissaanut, tassa oqaluusseqataanitsigut kajumissutsimillu tunissuteqarnitsigut. Ilaa nuanneq nalunagu Jehovap suli amerlanerusunik — allaat imminut suli ilisarsinngitsunik — pilluaqqusinissaa. (2 Petrusi 3:9) Taamaattumik eqqortuliorusuttut ujarlugit kiffartornermi atorsinnaasavut atortuartigit, naalannerulernissaannullu, uppernerulernissaannut pingaartitsinerulernissaannullu ikiorniarlugit. Taava ’[Jehovap] ajunngitsuuneranik ussiititsinerup takunnitsitsinerullu’ nuannersua misigissavarput. — Tussiaat 34:9. (wE 11/1 01)

[Qupp. 25, 26-mi ungalusaq]

Nunarsuaq tamakkerlugu suliamut qanoq ililluni kajumissutsimit tunissuteqartoqartartoq

AMERLASUUT aningaasanik naatsorsuutiminni nakkaatitsivimmut „Tunissutit Naalagaaffiup sulineranut — Matthæusi 24:14“-imik allagartalimmut nakkartitassaminnik immikkoortitsisarput. Tunissutigineqarsimasut qaammatip naanerani ilagiinnit Napasuliaq Alapernaarsuiffiup Peqatigiiffianut nassiunneqartarput.

Tunissutit:

Aningaasat kajumissutsimit tunissutit toqqaannartumik nassiunneqarsinnaapput uunga: Vatttårnet, Stenhusvej 28, 4300 Holbæk, giru 640-3468. Pinnersaatit nalillillu allat aamma tunissutigineqarsinnaapput. Tunissutaanerat allakkatigut ilanngullugu nassiunneqartukkut nalunaarutigineqartariaqarpoq.

Sillimmasiissutit: ’Imminut sillimmasiissutit’ utoqqalinersiutissatulluunniit nammineq katersukkat Napasuliaq Alapernaarsuiffiup Peqatigiiffianut pisassanngortinneqarsinnaapput. Taamaalisoqarniartillugu tamatigut Peqatigiiffik ilisimatinneqaqqaartariaqarpoq.

Bankkontot, pappialat nalillit pigisallu aalaakkaasut: Bankkontomi uninngatitat, pappialat nalillit pigisallu aalaakkaasut tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Taamaalisoqarniaruni aamma Peqatigiiffik ilisimatinneqaqqaassaaq.

Kingornussassat: Aningaasaatit inatsisitigut atuuttumik testamentiliornikkut Napasuliaq  Alapernaarsuiffiup Peqatigiiffianut kingornussassanngortinneqarsinnaaput. Pitsaassaaq Peqatigiiffik immaqalu ilagiit tamatuma kopiianik tunissallugit. Ilisimatitsissutigisinnaavarput Vatttårnets Bibel- og Traktatselskab kingornussat akileraarutaannut akiliineq ajormat.

Periarfissat allat (pisussaasutut nalunaarutit allallu): Ilagiinni ilaaffigisanni utoqqaanertat tunissuteqarnissamut periarfissanik allanik paasiniaaffigisinnaavatit.

Jehovap Nalunaajaasuisa sulinerat kajumissutsimit tunissutaannarnik tapersersorneqarpoq soorlu ataani issuarneqartumi takuneqarsinnaasoq: „[Tamakku] . . . tamarmik kajumissutsiminnik sulisunit akissarsiaqarneq ajortunit suliarineqartarput, taamaalilluni aningaasartuutit sapinngisamik appasitsinneqarlutik. Illumiit illumut angalaarluni oqaluussisarneq atuagassianillu agguaassineq Jehovap Nalunaajaasuisa akissarsiaqaratik suliarisarpaat. Tamarmik [aningaasartuutitik] namminneq akilertarpaat. Utoqqaanertat ilagiinnik nakkutilliisut ilagiinnilu kiffartortut akissarsiaqaratik kiffartuussisarput. Kiffartuussinerminni aningaasartuutit tamaasa namminneq akilertarpaat.

Siulersuisoqatigiinni ilaasut allallu Biibilinik atuakkanillu Biibilimut ilinniutaasunik piareersarnermik naqiterinermillu taamaaqataanillu suliaqartut tamarmik allanik akissarsiaqanngillat kisianni akeqanngitsumik nerisaqarlutillu inigisaqarput namminerisaminnillu pisariaqartitaminnut anginngitsumik [ajunngitsorsiassaqartitaallutik]. Aammattaaq allamik atorfeqaratik nakkutilliillutik angalasartut taama ittumik isumagineqartarput. . . .

Jehovap Nalunaajaasuisa ataatsimiititsinerini tamani, ilagiissiminni aammattaaq ataatsimeersuarnerni, aningaasanut nakkaatitsiveqarpoq tunisiumasut nakkartitsiffigisinnaasaannik. Aningaasanik katersuisitsisoqarneq ajorpoq. Pissarsiamik qulerarterutaannik akileraartaqqusaanngillat ilagiinnullu ilaasortatut akiliummik akileeqqusaanatik.“ — Atuagassiaaqqamit Jehovap Nalunaajaasui — Ataasiussuseqarlutik Guutip peqqusaanik silarsuarmi tamarmi naammassinnittut-mit, quppernermi 28-mit, issuagaq.