Noap uppernerata silarsuaq eqqartuuppaa

ANGUT Guutimik mianerinnittoq, ulersuullu nalaani inuit uumasullu annassutissaannik umiarsualiortoq Noa pillugu oqaluttuaq tusaamaviuk? Qangarsuarnisaagaluartoq inuit millionilippassuit ilisimavaat. Noalli inuunerata uatsinnut pingaaruteqarnera inuppassuit ilisimanngilaat.

Oqaluttuaq ukiunik tuusintinik arlalinnik pisoqaassusilik sooq soqutigissavarput? Pissutsit Noap atugai uagullu atukkavut assigiissuteqarpat? Assigiissuteqarpata Noamik oqaluttuaq qanoq ilinniarfigisinnaavarput?

Noap nalaani inuuneq

Biibilimi ukiunik naatsorsueriaaseq malillugu Noa ukiumi 2970-imi u.n.s. inunngorpoq – Adamip toquneranit ukiut 126-t qaangiuttut. Noap nalaani nunarsuaq nakuusernersuaqangaarpoq, Adamillu maligassiuinerlunnera kinguaavisa amerlanerit malippaat. Taamaattumik Jehovap takuaa „inuit ajussusiat angeqisoq ullorlu tamaat iliuuserisimasaat pilersaarusiaallu ajortuinnaasut“. — 1 Mosesi 6:5, 11, 12.

Jehovalli iluarinninnginneranut inuit pikitsitsiumatussusiat pissutituaanngilaq. Mosesimik allakkat siulliit-ni ima nassuiarneqarpoq: „Guutit ernerisa inuit panii isigilerpaat pinnaralugit pileritsaassatillu nulissiuttarlugit. . . . Taamani guutit ernerisa inuit panii innaattarallarmatigit qitornartaarfigalugillu — kingornalumi aamma — nunarsuarmi inorujussuaqartarpoq. Tassaapput pissarsuit itsarsuarli tusaamasat.“ (1 Mosesi 6:2-4) Versit taakku apustili Petrusip allagaani siullerni oqaatigineqartumut naleqqiullugit paasinarsivoq ’guutip erneri’ taakku tassaasut inngilit naalasseriitsut. Inorujussuit taakku (aamma nefiliminik taaneqartartut) tassaapput inuit arnartaasa inngilillu tunussisut imminnut inuttut timeqalersittut pissusissamisuunngitsumik attaveqaqatigiillutik kinguaavi. — 1 Petrusi 3:19, 20.

„Nefilim“ isumaqarpoq „killuisoq“ taamatullu taaneqartarput allanik tunussititsisaramik. Naalagaaniartuupput soqqusaatsut, angutaasalu ajortuliaat Sodomami Gomorramilu ajortuliarineqartartunut kanngunartunut assersuunneqarlutik. (Judasi 6,7) Erneriit nunarsuarmi ajussuseqarnerujussuanut pisuupput.

 ”Naligisami akornanni assuarnaatsumik inuuseqartoq”

Ajussuseq siaruarsimangaarmat Guutip inuit nungutikkumallugit aalajangiuppaa. Oqaluttuamili isumassarsiarititaasumi ima oqaatigineqarpoq: „Noa [Jehovap] isaanut saammaannarsivoq. . . . Noa angutaavoq iluartoq naligisami akornanni assuarnaatsumik inuuseqartoq. Noap Guuti inooqatigaa.” (1 Mosesi 6:8, 9) Silarsuarmi piuneerutitaasariaqartumi guutiitsumi qanoq ’Guuti inooqatigineqarsinnaava’?

Qularnanngitsumik angunni uppertoq Lemeki, Adamip nalaani inuusoq, Noap ilinniarfigaa. Ernini Noamik („qasuersaarfik“-mik imaluunniit „tuppallersaat“-mik isumaqarunartumik) atseramiuk ima siulittuivoq: „Taassuma erloqilluta nunaammi [Jehovap] perloqqusaani suleruloornitsinni oqilisaakkumaarpaatigut.“ Guutip nuna perloqqusaajunnaarsimmagu oqaatsit taakku eqquupput. — 1 Mosesi 5:29; 8:21.

Uppertunik angajoqqaaqaannarluni Guutimik mianerinnittunngortoqarneq ajorpoq, inuimmi ataasiakkaat Jehovamut attaveqarnertik nammineq ineriartortittussavaat. Guutip iluarisaa naapertorlugu inuugami Noap ’Guuti inooqatigaa’. Guuti pillugu ilinniakkani Taassumunnga kiffartorusulissutigai. Guutip ’ulersuartitsinermigut anersaartornermik uumassutaasumik peqartut qilaap ataaniittut tamaasa’ nungutinniarai tusaramiuk Noa uppernermigut sanngiilliunngilaq. — 1 Mosesi 6:13, 17.

Aatsaat taama ingasatsigisumik ajunaarnersuaqarnissaa Noap upperilluinnarpaa. Taamaattumik Jehovap peqqussutaa naalappaa: „Illit qisuk goferi atorlugu umiarsualiorit initalersorlugu, iluagut qaavagullu usserillugu.“ (1 Mosesi 6:14) Guutip ilitsersuutai malillugit sananissaa oqitsuinnaanngilaq. Taamaakkaluartorli „Noa Guutip peqqusineratorluinnaq iliorpoq“. (1 Mosesi 6:22) Nuliani erninilu, Semi, Kami Jafetilu, taakkualu nuliai ikiortigalugit suliassaq Noap suliaraa. Uppernerat pillugu Jehovap pilluaqquai. Kiffartornerat ullumikkut ilaqutariinnut maligassaalluarpoq!

Umiarsualiorneq sunik nassataqarpa? Jehovap Noa oqarfigaa karserujussuartut ittumik quleriinnik pingasunik initalimmik, imermillu pitarneqarsinnaanngitsumik umiarsualiussasoq, umiarsuarlu 133 meterit missaattut takitigissasoq 22 meterisut silitsigissasoq 13 meterisullu portutigissasoq. (1 Mosesi 6:15, 16) Umiarsuaq taama angitigisoq usisinnaasani tamaasa usitillugit Titanic-isut umiiartutut oqimaatsigaaq. Umiarsuarniittulli inuunertik annaappaat.

Suliarujussuuvoq! Orpinnik tuusintilikkuutaanik killuisariaqarsimassapput umiarsualiorfimmukaassoriarlugillu sallilikkiarineqarlutik paakkarusiarineqarlutillu. Ikaajusaliorsimassapput, qisunnik kikiaasanik sanasimassallutik, umiarsuup ussissaatissaanik orsussarsiorsimassallutik imiisiviliorsimassallutik sannatinillu sanasimassallutik il.il. Niuertut isumaqatigiissuteqarfiginiarsimasinnaavaat, nioqqutissat sullissinerillu akilertariaqarsimasinnaallugit. Paakkarutit inissilluassagaanni umiarsuarlu  qajannaatsumik sanassagaanni sanasut suliaannik ilisimasaqarluartariaqarpoq. Eqqarsaatigeriassagillu — qularnanngitsumik ukiuni 50-60-ini umiarsualiorsimassapput!

Taava Noap ilaquttani uumasullu naammattunik nerisassaqarnissaat isumagisariaqarpaa. (1 Mosesi 6:21) Uumasorpassuit katersortussaavai umiarsuarmullu siulersorlugit. Noa Guutip peqqusineratorluinnaq iliorluni suliassani naammassivaa. (1 Mosesi 6:22) Jehova pilluaqqusigallartillugu suna tamarmi naammassineqarpoq.

„Iluarnermik nalunaariartortitaq“

Umiarsualiornermi saniatigut Noa ulersuarnissaq pillugu mianersoqqusivoq ’iluarnermillu nalunaariartortitatut’ Guuti aalajaalluni kiffartuullugu. Inuilli ’aatsaat paasisaqalerput ulersuaq nalliummat tamaasalu nungutillugit’. — 2 Petrusi 2:5; Matthæusi 24:38, 39.

Anersaakkut ileqqorissaarnikkullu taamanikkut pissutsit qanoq ajortigisut eqqarsaatigigaanni takorlooruminarpoq Noa ilaqutaalu saniliisa uppinngitsut qanoq quiassuaatigisimatigissagaat. Qularnanngitsumik mitaatigalugillu asissorsimassavaat. Silaarussimasorisimassavaat. Noali nuliaminut, erniminut ukussaminullu anersaakkut qiimmassaataallunilu annertoqqutaavoq, arlaannaatalluunniillu sanilimik guutiitsut nakuusernerat, ileqqorlunnerat pikitsitsiumatunerallu ilaanngillat. Noap oqaatsimigut iliuutsimigullu uppernermik ersersitsilluni nalimini inooriaaseq eqqartuuppaa. — Hebræerit 11:7.

Ulersuarmit annatsitaavoq

Sialussuarnissaa sapaatip-akunneranik sioqqullugu Guutip Noa umiarsuarmut maanna piareeqqasumut ikeqquaa. Noa ilaquttani uumasullu ilagalugit umiarsuarmut ikimmata Jehovap ’matu matuaa’, maannalu asissuerpaluttumik suaartarnerit tusaasinnaajunnaarpaat. Ulersuaqalermat inngilit naalasseriitsut inuttut timeqarunnaaramik piuneerutitaanngillat. Allammi qanoq pippat? Uumassusillit umiarsuarmiinngitsut tamarmik, aamma nefilimit, toqupput. Noa ilaqutaalu kisimik annapput. — 1 Mosesi 7:1-23.

Noa ilaqutaalu ukioq ataaseq sinnilaarlugu umiarsuarmiipput. Uumasunik nerlersuineq, immitsineq eqqiaanerlu ulapputigaat. Aamma ullut ingerlaneri nalunaarsorpaat. Ulersuup qanoq ingerlaneranik ullulersuilluni, umiarsuarmi pissutsinik nalunaarsuisarnertulli, nalunaarsuinera Mosesimik allakkat siulliit-ni atuarneqarsinnaavoq. — 1 Mosesi 7:11, 17, 24; 8:3-14.

Qularnanngilaq umiarsuarmiitillutik Noap ilaquttani anersaakkut ittunik sammisaqarnermi Guutimullu qujalluni qinunermi siulersortarsimassagai.  Ulersuaq sioqqullugu oqaluttuarissaaneq Noa ilaqutaalu aqqutigalugit puiutsaalineqarsimagunarpoq. Oqaluttuarsiat tutsuiginartut imaluunniit oqaluttuarisaaneq pillugu allakkiat Noakkut pigisaat ulersuup nalaani ineriartuutaasumik eqqartueqatigiinnissamut tunngavissaalluarput.

Noa ilaquttanilu qanoq nuannaarsimatigissappat nunamut panertumut tummaqqissinnaaleramik! Noap suliareqqaagaa tassaavoq pilliiviliorneq Guutimullu annaassisiminnut pilliinermigut ilaquttaminut palasiusineq. — 1 Mosesi 8:18-20.

„Soorlu Noap ulluini ittoq“

Jiisusi Kristusi ima oqarsimavoq: „Soorlu Noap ulluini ittoq, taamatuttaaq Inuup Ernerata tikiuffissaa ikkumaarpoq.” (Matthæusi 24:37) Kristumiut ullumikkut aamma iluarneq oqaluussissutigaat inuillu allamik isumataanissaannik kajumissaarlugit. (2 Petrusi 3:5-9) Taamatut naleqqiussigatta immaqa isumaliutigilerparput ulersuup siorna Noa qanoq eqqarsartarsimanersoq misigisimanersorlu. Oqaluussineq asuli piffissaajaataannaasorisimavaa? Qasusarsimassava? Tamakku Biibilimi eqqartorneqanngillat. Noa Guutip peqqusineratut iliorsimaneranik paasitinneqaannarpugut.

Noap atugarisai qanoq ilinniarfigisinnaagivut takusinnaaviuk? Assortorneqaraluarluni ajornartorsiuteqaraluarlunilu Jehova naalappaa. Taamaattumik Jehovap naapertuilluartuunerarpaa. Qaqugorpiaq Guuti ulersuaqartitsissanersoq Noap ilaqutaasalu naluaat, nalunngilaalli ulersuaqalerumaartoq. Noap Guutip oqaasiinut uppernerata ukiorpassuarni suleruloorfiusuni kinguneqarpasinngitsumillu oqaluussinermi aalajaattuartippaa. Ima oqaatigineqarpoq: „Uppernikkut Noa ilimasaarneqarpoq suli takussaanngitsunik, Guutimillu mianerinnittuugami umiarsualiorpoq inoqutimi annaffissaannik. Uppernermigut tamatumuuna silarsuaq eqqartuuppaa namminerlu iluarneq uppernikkut kingornussassarilerlugu.“ — Hebræerit 11:7.

Noa qanoq ililluni taama uppertigilersimava? Jehova pillugu ilisimasaminik eqqarsaatiginneqqissaarnissaminut imminut piffissaqartittarsimagunarpoq, ilisarsinermillu tamatuminnga siulersortittarsimagunarluni. Qularnanngilluinnarpoq Guuti qinunikkut oqaloqatigisarsimagaa. Aap, ima Jehovamut qanitsigisumik attaveqalerpoq allaat ’inooqatigalugu’. Ilaquttariinnut qullersaasutut ilaquttami asannittuliorfiginissaannut soqutiginissaannullu nuannaarluni piffissaqarfigisarpai. Taamaaliussaguni nuliami, ernimi pingasut ukussamilu anersaakkut pisariaqartitaat matussusertussaavai.

Pissutsit aaqqissuussaanerat guutiitsoq maanna atuuttoq Jehovap atuukkunnaarsissagaa kristumiut ilumoortut ullumikkut nalunngilaattaaq. Qanoq ilisukkut takkutissasoq naluarput, nalunngilarpulli ’iluarnermik nalunaariartortitap’ Noap uppernera naalanneralu ilaarutsigit ’tarnitta annaanneqaatigissagaa’. — Hebræerit 10:36-39. (wE 11/15 01)

[Qupp. 30-mi ungalusaq]

Ilumut ulersuaqarsimava?

Inuiaqatigiit inuusaasiannik kulturiannillu ilisimatuut naggueqatigiit inuiaallu tamangajammik ulersuaqarsimaneranik oqaluttuaataannik 270-init ikinnerunngitsunik nalunaarsuisimapput. „Ulersuaqarsimaneranik oqaluttuaq nunarsuarmut tamarmut siaruarsimavoq, pinngortitaanermik oqaluttuatulli kulturitsinnut tunngaviusumut ilaavoq,“ misissueqqissaartartoq Claas Westermann oqaluttuarpoq. „Ilumut tupaallannarpoq: Nunarsuarmi sumiluunniit itsarsuaq ulersuaqarsimaneranik oqaluttuaqarpoq.“ Tamanna qanoq nassuiarneqassava? Biibilimik nassuiaasartup Enricu Galbiatip ima nassuiarpaa: „Inuianni assigiinngitsuni immikkoorluinnartunilu kinguaariikkuutaat ulersuaqarsimaneranik oqaluttuaateqarisa takutippaat ilumut taamatut pisoqarsimasoq.“ Misissueqqissaartartulli isumaat kristumiunut pingaarnerunngillat. Pingaarneruvorli nalunnginnatsigu Jiisusip ulersuaq inuiaat oqaluttuarisaaneranni pisimasuittut isigigaa. — Lukasi 17:26, 27.

[Qupp. 31-mi ungalusaq]

Nefilimit upperisapalaani?

Guutit inuillu akornanni attaveqarnerinik — attaveqarnerillu taamaattut kingunerisaanik „heronik“ imaluunniit „affarmik guutinik“ inunngortoqartarneranik — oqaluttuat Grækerit, Egyptenimiut, Ugaritimiut, Hurritimiut Mesopotamiamiullu qanga guutisiorneranni takornartaanngillat. Grækerit mytologianni guutit inuttut timillit pinnersorujussuupput. Nerisarput imertarlutillu, sinittarput, kinguaassiuutitigullu atoqateqartarlutik, oqqattarput paasarlutillu, kinguaassiuutitigut inuunerlutsitsisarput pinngitsaaliillutillu arneriffiginnittarlutik. Naak illernartutut isigineqaraluarlutik peqquserluttuliorsinnaallutillu pinerluttuliorsinnaapput. Herot Akillesitut ittut guutinit inummillu pinngorfeqartutut inunnillu piginnaaneqarnerusutut isigineqarput, toqujuitsutulli isigineqaratik. Taamaalilluni oqaluttuatoqqat taakkua sumik tunngaveqarsimasinnaanerat tunngaveqarunarluinnarnerallu Mosesimik allakkat siulliit-ni inorujussuit nefilimit pillugit oqaluttuap paasissutissippaatigut.