Silarsuaq pitsaanerulersissinnaavarput?

„Qanga inuiaqatigiinni ataqatigiissutaasimasut politikki iluaqutigalugu pilerseqqinneqarsinnaanngillat. Ileqqussatigut najoqqutarisimasanik pilersitseqqissalluni politikki naleqqutinngilaq. Naalakkersuillaqqinnerpaalluunniit aappassiartaarnermut aappariinnermilu ileqquusimasunik pilersitseqqissinnaanngillat, ataataasut meeqqaminnut akisussaaffeqalersissinnaanngilaat, inuillu qangatut mamiatsatseqqittalersinnaanagillu kanngusutseqqittalersinnaanngilaat . . . Ileqqussatigut ajornartorsiutivut amerlanerit inatsisitigut aaqqinneqarsinnaanngillat.“

NAALAGAAFFIIT peqatigiit naalakkersuisuini siunnersortaasimasoq isumaqatigaajuk? Ullutsinni ajornartorsiuterpassuatsinnut piumatussutsip, ilaqutariinni tunniussimannginnerup, inuunerlunnerup, paasisimasaqannginerup pissutsillu allat inuiaqatigiit aaqqissuussaanerannut aserorterisut kingunerinut suna aaqqiissutissaava? Amerlasuut isumaqarput aaqqiissutissaqanngitsoq, taamaattumik inuunertik atorluarniarsaraat. Allat neriuutigaat ullut ilaanni killiisinnaasumik naammassinnissinnaasumillu, immaqa upperisarsiortumik ilorraap tungaanut siulersuisinnaasumik saqqummertoqarumaartoq.

Ukiut 2 tusindit matuma siornatigut Jiisusi Kristusi kunngissamissut piukkuppaat, paasigamikku Guutimit aallartitaasoq siulersuillaqqissisinnaasorlu. Jiisusilli paasigamiuk qanoq siunertaqartut, qimagutipallappoq. (Johannesi 6:14, 15) „Uanga naalagaaffiga silarsuarmit matumannga pinngilaq,“ romamiut naalagaatitaanut kingusinnerusukkut oqarpoq. (Johannesi 18:36) Ullumikkulli Jiisusitut isiginnittaasillit amerlanngillat — allaat upperisarsioqatigiit siuttuini Jiisusimik malinninnerartuni naamik. Ilaasa silarsuaq pitsaanerulersinniartaraluarsimavaat siulersuisunik sunniiniarnermikkut namminnerluunniit politikkimut tunngasunik atorfinillutik. Tamanna uppernarsarsinnaavarput 1960-kkunut 70-kkunullu qiviarutta.

Upperisarsiorneq aqqutigalugu silarsuamik allannguiniarnerit

1960-kkut naalernerani Latinamerikami teologit arlallit piitsut naqisimaneqartullu pillugit suliniuteqalerput. Tamanna siunertaralugu upperisarsiorneq tunngavigalugu aniguisitsiniaaneq pilersikkiartuaarneqarpoq. Taanna naapertorlugu Kristusi Biibilimi oqaatigineqarneratut annaassisuinnaanngilaq aammali politikki aningaasaqarniarnerlu eqqarsaatigalugit anaassisuuvoq. USA-mi oqaluffinni pisortat ileqqussat tungaatigut ernumatsangaarsimasut, peqatigiiffimmik Det Moralske Flertal-imik taaguutilimmik pilersitsipput. Politikkikkut sunniuteqaqataalernissartik ilaqutariittullu inuunermik illersuisinnaasumik inatsisiliornissartik siunertaraat. Taamatorluinnaq musliimit nunaanni eqimattat, inuunerlunneq inuulluataapilunnerlu annikillisarniaraluarpaat Koranimik maleruaaqqusinermikkut.

Isumaqarpit ilungersornerit tamakkua silarsuaq pitsaanerulersissimagaat? Sumiluunniit uppernarsaatissaqarpoq ileqqussatigut najoqqutassat atorneqarunnaaraluttuinnartut aammalu pisuut piitsullu imminnut ungasilliartuinnartut, allaat nunani upperisarsiorneq tunngavigalugu aniguisitsiniaasoqarfiusimasumi.

Det Moralske Flertal-imik tunngaviliisup, Jerry Falwellip peqatigiiffik 1989-mi atorunnaarsippaa siunertavia USA-mi  suliniutigineqanngimmat. Kingorna peqatigiiffiit allat taarserlugu suliniuteqalerput. Paul Weyrich, oqaatsimik „Det Moralske Flertal“-mik nassaartoq, atuagassiamut Christianity Today-imut allappoq: „Politikkikkut sunniuteqaleraluaruttaluunniit pingaarnerutitavut tamatigut angujuaannarneq ajorpavut.“ Aamma allappoq: „Inooriaaserput nakkaakkiartuinnavippoq. Oqaluttuarisaanermi piorsarsimassutsikkut aatsaat taama nakkaassimatigaagut allaat politikki aqutsillaqqinnerpaallu soriarsinnaajunnaavissimallutik.“

Ilanngutassiortup atuakkiortullu Cal Thomasip, politikki aqqutigalugu inuiaqatigiinnik iluarsartuusseriaraluarnermi ajornartorsiutiviusoq tikkuarpaa: „Inuit ataasiakkaat uummataanni allanngorneqartariaqarpoq, politikkikkut siuariarnikkuunngitsoq, ajornartorsiuterpiagummi tassaapput anersaakkut ileqqussatigullu, aningaassatiguunngitsoq aamma politikkikkuunngitsoq.“

Qanormi ililluni silarsuarmi immikkoortitsisinnaassuseqarfiunngitsumi, inunnilu immikkut tamarmik eqqortuusorisaminnik eqqunngitsuusorisaminnillu aalajangeerusussusilinni, anersaakkut ileqqussatigullu ajornartorsiutit aaqqinneqarsinnaappat? Inuit ajunngitsumik isumallit sunniuteqarluartullu — upperisarsiortuugunik upperisarsiortuunngikkunilluunniit — silarsuaq pitsaanerulersissinnaanngippassuk, suummi taava allanngortissinnaavaa? Soorlu allaaserisami tulliuttumi takussagipput, akissutissaqarpoq. Tassani erserpoq suna tunngavigalugu Jiisusip naalagaaffini silamit matumannga pinnginneraraa.

[Suminngaanneernera]

Meeqqat: UN photo; nunarsuaq: Mountain High Maps® Copyright © 1997 Digital Wisdom, Inc.