Silarsuarmik pitsaanerulersitsisinnaasoq

„Inuk pissaaneqarnerpaaq inuusimasoq — ukiuni kingullerni 2 tusindiniinnaanngitsoq inuiaalli oqaluttuarisaaneranni tamani — tassaavoq Jiisusi Nazaretimiu,“ atuagassiaq Time allappoq. Jiisusi nunamiikkallarmat inuit ilumoorusuttut malugaat inutsialaannaanngitsoq aammali allanut isumassuisuusoq. Taamaattumik tupinnarpallaanngilaq inuit kunnginngortikkumammassuk. (Johannesi 6:10, 14, 15) Kisianni soorlu allaaserisami siuliani eqqaaneqartoq Jiisusi politikkimut akuujumanngilaq.

JIISUSIP isumaanut tunngaviusut minnerpaamik pingasuupput: ataataata, inuiaat, ilaatigut nunami naalakkersueriaatsit eqqarsaatigalugit aqunneqarumanngissusiannut isiginnittaasia; pitsaanerpaamik aqutsiniarlutik ilungersoraluartunut pissaanilissuarnut, nukinnut ersinngitsunut, ajoqusersuisoqarneranut; taavalu Guutip siunertaanut, tassa naalagaaffiup qilammiusup nunarsuarmi tamarmi aqutsinissaanik ilisimasaqarnera. Sooq inuit silarsuarmik pitsaanerulersitsiniarnerigaluat iluatsissimanngitsoq paasiniarlugu, pitsaanerulersinniarlugulu qanoq iliortoqartariaqarneranik immikkoortut taakkua pingasut misissornerussavavut.

Inuit Guuteqaratik aqutsisinnaappat?

Guutip inuit pinngortikkamigit uumasunut naalaganngortippai, namminnerli Guutip naalakkersuineranut naalattussaapput. (1 Mosesi 1:26) Aappariit siulliit Guutimut naalatsigitinnertik takutittussaavaat orpimmit aalajangersimasumit, ’orpiup ajunngitsumillu ajortumillu ilisimalersitsisup’ paarnaanik nerinatik. (1 Mosesi 2:17) Adamip Evallu nammineq aalajangiisinnaatitaanertik atornerluppaat Guutimullu naalanngillutik. Paarnamik inerteqqutaasumik tigusineq tillinnerinnaanngilaq; Guutip kisimi oqartussaassusianut pikititsineruvoq. The New Jerusalem Bible-mi, 1 Mosesi 2:17-imi Adamip Evallu suliaat pillugu  ima allassimasoqarpoq: „Ileqqussatigut oqartussaaffigineqarusunnginnermini inuup pinngortitaanini itigartippaa . . . Ajortuliaq siulleq Guutip kisimi oqartussaassusianut saassussineruvoq.“

Ileqqussatigut apeqqutaalersinneqartut pissutigalugit, Guutip Adami Evalu taakkualu kinguaavi nammineq qanoq inoorusunnersut aalajangiisippai. Imaappoq, suup eqqortuuneranik suullu eqqunngitsuuneranik nammineq najoqqutassiussapput. (Tussiaat 147:19, 20; Romamiut 2:14) Taamaalilluni inuit Guutimut attaveqaratik aqutsiniaraluarnerat aallartippoq. Iluatsilluarpa? Ukiuni tusindilinni qaangiuttuni takusimasavut eqqarsaatigalugit naameertariaqarpugut. Oqaluussisartup oqaasiini 8:9-mi allassimavoq: „Inuit ilaat ataaseq inoqatiminut ajoqutaasumik pissaaneqarpallaartarpoq.“ Tamatuma ilumoornera Jeremia 10:23-mi uppernarsarneqarpoq: ’Nalunngilara, [Jehova], inuup ingerlavissani nammineq aalajangigassarinngikkaa, angalaartup aalajangigassarinngilaa allorarnermi aalajaatsuutinnissaat.’ Oqaluttuarisaanerup takutippaa inuit nammineq aqutserusunnerat ajunngitsumik kinguneqarsimanngitsoq.

Jiisusi aamma taama isumaqarpoq. Nammineq Guutimut attaveqannginnissani eqqarsaatigisinnaanngilaaluunniit. ’Isumannik iliorneq ajorpunga’, oqarpoq. ’Tamatigut iluarisaanik iliortarpunga.’ (Johannesi 4:34; 8:28, 29) Jiisusi inunnit kunnginngortinniarneqarnermini Guutimit pisussaatitaannginnami periarfissaq eqqarsaatigerianngilaaluunniit. Imaanngilarli nunaqqatini ikiorusunngikkai. Pisinnaasanili tamaat atorpaa taamani siunissamilu pillualernissaanik ikiorniarlugit. Allaat inuiaat pillugit inuunini tunniuppaa. (Matthæusi 5:3-11; 7:24-27; Johannesi 3:16) Jiisusilli nalunngilaa ’suut tamarmik aalajangersimasumik piffissaligaasut’, ilaatigut Guutip piffissaa inuiannut kisimi oqartusaanerminik atulersitsinissaminut. (Oqaluussisartup oqaasii 3:1; Matthæusi 24:14, 21, 22, 36-39) Puiussanngilarput angajoqqaavut siulliit Edenimi anersaamut ajortumut pulateriaarsuk aqqutigalugu oqaluttumut naalatsigitimmata. Tamatuma Jiisusip politikkimut akuliukkusunnginneranut pissutaasa aappaannik paasitissavaatigut.

Silarsuup naalagaa takussaanngitsoq

Soorlu Biibilimi oqaluttuarineqartoq Saatanip „silarsuarmi naalagaaffiit tamaasa taakkualu alutornassusiat“, ataasiarluni pallorfigineqarnissamut taarsiullugit Jiisusimut tunniunniarpai. (Matthæusi 4:8-10) Eqqortumik oqaatigalugu silarsuarmut tamarmut naalakkersuisussatut Jiisusi neqeroorfigineqarpoq — aatsaalli Diaavullip  piumasaqaataanut naapertuuppat. Jiisusi ussernartumut tamatumunnga tunniutiinnanngilaq. Usserniarneqarami? Saatani taamannak neqeroorsinnaagami? Aap, Jiisusip oqarneratut ’silarsuup naalagaraa’ apustilillu Paulusip ’silarsuup matuma guutiatut’ allaatigaa. — Johannesi 14:30; 2 Korinthimiut 4:4; Efesosimiut 6:12.

Soorunami Jiisusip nalunngilaa inuit soqutigisaat Diaavulup soqutiginngikkai. Saatani ’toqutsisutut’ ’sallumullu ataataasutut’ taavaa. (Johannesi 8:44) Paasinarpoq silarsuarmi ’ajortumut naalatsigitittumi’ inuiaat pillualivissinnaanngimmata. (1 Johannesi 5:19) Naassaanngitsumilli Diaavulu piumasaminik iliuuseqartitaassanngilaq. Jiisusip, maanna pissaanilissuulluni anersaajusup, ungasinngitsukkut Saatani sunniineralu suujunnarsissavai. — Hebræerit 2:14; Saqqummersitat 20:1-3.

Saatanip nalunngilaa silarsuup naalagaatut suujunnaarsinneqangajalerluni. Taamaattumik uippallerluni nukini tamaasa atulerpai inuiaat ajortunngorsarniarlugit, Noap nalaani ulersuup siornatigut iliorsimanermisut. (1 Mosesi 6:1-5; Judasi 6) „Eqqanarli nuna imarlu“, Saqqummersitat 12:12-mi allassimavoq. „Diaavulu ilissinnut aqqarmat kamattorsuulluni, piffissakissutsi nalunnginnamiuk.“ Biibilimi siulittuutigineqartut silarsuarmilu pisartut takutippaat ’piffissakiffiup’ tamatuma naggataata tungaani inuusugut. (2 Timotheusi 3:1-5) Maanna pitsaanerusumik siunissaqalerpoq.

Naalagaaffik pillualersitsisoq

Jiisusip politikkimut akuliukkusunnginneranut pissutaasa pingajuat tassa, nalunnginnamiuk Guutip piffissarititaa nallerpat qilammi naalagaaffik nunamut naalagaassussaq pilersikkumaaraa. Naalagaaffik taanna Biibilimi taaneqarpoq Guutip naalagaaffianik, taannalu Jiisusip oqaluussineranut qitiuvoq. (Lukasi 4:43; Saqqummersitat 11:15) Jiisusip ajoqersukkani ajoqersorpai Naalagaaffik tikiuteqqullugu qinusassasut, naalagaaffiummi taassuma taamaallaat aqutsineratigut ’Guutip piumasaa qilammisut nunamissaaq pissaaq’ (Matthæusi 6:9, 10) Immaqa eqqarsalerputit: ’Naalagaaffik nunarsuarmi tamarmi naalakkersuissappat, naalagaaffiit inuit pilersitaat’ qanoq pineqassappat?

Tamanna Danieli 2:44-mi akissutissarsissavarput. ’Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit [inuit pilersitaat] allat tamaasa aserortissavai suujunnaarsillugillu, namminerli soraajuitsumik atassaaq.’ Sooruna Guutip naalagaaffiata naalagaaffiit nunamiusut ’aserortariaqarai’? Guutimut naalakkumanatik Saatanip Edenip naatsiiviani aallarnigaatut kiffaanngissuseqarusuinnarmata. Taamatut isumaqaannartut inuiaat soqutigisaat kisiisa akerlilersunngilaat, Pinngortitsisuminnulli akerlilersuisunngortipput. (Tussiaat 2:6-12; Saqqummersitat 16:14, 16) Taamaattumik immitsinnut aperisariaqarpugut: ’Guutip aqutsinera illersorparput imaluunniit akerlilersorparput?’

Kia aqutsinera illersorpiuk?

Aqutsineq sorleq kissaatigineruneritsik eqqarsaatigilluakkamik inuit aalajangiisinnaaqqullugit, Jiisusip ajoqersukkani peqquai aaqqissuussinerup matuma naggatissaa pitinnagu ’naalagaaffimmik iivangkiiliu’ . . . ’oqaluussissutigineqassasoq inuiannut tamanut nalujunnaarsillugu’ (Matthæusi 24:14) Ullumikkut kikkut nunarsuaq tamakkerlugu Guutip naalagaaffianik oqaluussisutut ilisimaneqarpat? Atuagassiap matuma saqqaani ukiorpassuarni ima allassimasoq atuarneqarsinnaasimavoq „Jehovap Naalagaaffianik tusarliussisoq“. Ullumikkut inuit naalagaaffimmik tamatumannga ilisarsilernissaannik ikiorniarlugit nunani 230-nit amerlanerusuni 6 millionik oqaluussisartoqarpoq. *

 Naalagaffimmut innuttaasunut pilluaqqussutissat

Jiisusi tamatigut Guutitut iliortarpoq. Oqartussaaffigineqarusunnginneq qinernagu politikkiluunniit aqqutigalugu aaqqissuusernermut piusumut tapersersuiniarsarinani iluarsartuussiniarsarinaniluunniit, ilungersorluni Guutip naalagaafianut, silarsuarmi ajornartorsiutinik aaqqiisinnaasutuamut attuumassuteqartut siuarsarniarlugit suliniuteqarpoq. Aalajaannermigut naalagaaffimmi tamatumani naalannassutsip pianik qilammi kunngitut niaqoruserneqarpoq. Aap, Guutimut naalatsigitinnermigut pilluaqqusaangaarpoq. — Danieli 7:13, 14.

Ullumikkut millionillit Jiisusi assigalugu Guutip naalagaaffianik salliutitsisut Guutillu piumasaanut naalatsigitittut nuanningaartumik pissarsiassaqarumaarput — tassa Guutip naalagaaffiata ataani inuttaasussanngorlutik. (Matthæusi 6:33) Naalagaaffiup asannittumik aqutsinerani inuit naammalluinnartunngortinneqassapput inuunermik naassaanngitsumik kinguneqarsinnaasumik. (Saqqummersitat 21:3, 4) 1 Johannesi 2:17-mi allassimavoq: ’Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq.’ Saatani malittaalu piujunnaarpata nunarsuarlu inuiaqatigiissutsimik avissaartuuffiunngitsoq, niuernermik peqquserluffiunngitsoq eqqunngitsumillu upperisaqarfiunngitsoq paratiisinngortinneqarpat naassaanngitsumik inuuffigissallugu nuanningaassaaq. — Tussiaat 37:29; 72:16.

Aap, Guutimuna naalagaaffiata silarsuaq pitsaanerulersissinnaagaa, Naalagaaffimmillu tusarliussaq eqqortumik nutaarsiassamik nuannersumik taalluaannarneqarsinnaavoq. Tusarliussaq nuannersoq Jehovap Nalunaajaasuisa oqaluussissutigisaat suli ilassisimanngikkukku, soormi tulliani pulaarpata tusarnaarukkit! (wE 10/15 01)

[Quppernerup ataani ilanngussaq]

[Qupp. 5-mi assiliartaq]

Oqaluttuarisaanerup takutippaa inuit Guuteqaratik ingerlasinnaanngitsut

[Qupp. 5-mi assiliartaq]

Saatani ’silarsuup matuma’ naalagarimmani „naalagaaffiit tamaasa“ Jiisusimut neqeroorutigisinnaavai

[Qupp. 7-mi assiliartaq]

Jiisusip oqaluussissutigaa Guutip naalagaaffiata aqutsinerani silarsuaq nuannersilluinnarumaartoq