Uippakajaannginnerulissutissaq atoriaannaasoq
Uippakajaannginnerulissutissaq atoriaannaasoq
„Ornissinga tamassi suleruluttusi nanertugaasusilu, nukissaqalerseqqissavassi.“ — MATTHÆUSI 11:28, NV.
1, 2. (a) Uippakajaannginnerulersitsisinnaasoq suna Biibilimiippa? (b) Jiisusip ajoqersuutaa qanoq sunniuteqarluartigiva?
SOORLU nalunngereerunarit uippakajaarneq peqqinnanngitsoq; allaallu napparsimalissutaasinnaasoq. Biibilimi eqqaaneqarpoq inuiaat tamarmik nanertisimangaaramik inuppassuit inuuneq uippakajaarfiunngitsoq erinigigaat. (Romamiut 8:20-22) Biibilimili aamma takutinneqarpoq qanoq maannakkut allaat uippakajaarnermut ajoqutaasumut uippakajaannginnerulissutissarsisinnaasugut. Taamaaliorsinnaavugut angutip inuusuttup ukiut 2000-t matuma siorna inuusup siunnersuutaasa ilaannut tusarnaarnitsigut, maligassiaanillu maleruarnitsigut. Taanna sanasuuvoq, inunnilli soqutigininnerulluni. Uummataat killillugit oqaluttarpoq, ajornartorsiutaat soqutigalugit, sanngiitsut ikiortarlugit nikallungasullu tuppallersartarlugit. Saniatigut amerlasuut anersaakkut inersimasunngornissaannut ikiortarpai. Taamaalillutik uippakajaannginnerulissutissarsisarput, illittaaq taamaalisinnaavutit. — Lukasi 4:16-21; 19:47, 48; Johannesi 7:46.
2 Angutip taassuma, Jiisusip Nazaretimiup, Romamiut, Athenimiut imaluunniit Alexandriamiut ilisimassusiat tapersersortanngilaa. Taamaattorli ajoqersuutaa sumi tamani ilisimaneqarpoq. Ajoqersuutaani pingaaruteqarnerusoq tassaavoq aqutsineq naalakkersuinerluunniit Guutip nunarsuarmut pilersikkumaagaa, tamanut nalerisimaartitsisussaq. Aamma Jiisusip ajunngitsumik inuuneqarnissamut najoqqutassiat tunngaviusut saqqummiuppai — najoqqutassiat ullumikkut pingaaruteqangaartut. Jiisusip ajoqersuutaanik tusarnaartut inuunerminnilu maleruaasut, maannakkut allaat iluaqutigingaassavaat. Taamaaliortut ilaatigut uippakajaannginnerulersinnaapput. Taamaaliorusunngilatit?
3. Jiisusip qaaqqusissutaa nuanningaartoq suua?
3 Immaqa tamanna upperiuminaatsissavat. ’Angutip itsarsuarli inuusup uanga inuunera ajunngitsumik sunniuteqarfigisinnaagamiuk?’ aperissagunarputit. Jiisusip oqaasii kajumissinartut maluginiakkit: „Ornissinga tamassi suleruluttusi nanertugaasusilu, nukissaqalerseqqissavassi. Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; tarnissigullu nukissaqalissaasi. Nammaatarami iluaqaaq, nammakkiussaralu oqeqaluni.“ (Matthæusi 11:28-30, NV) Qanoq isumaqarpa? Oqaatsillu taakku qanoq uippakajaannginnerulissutigisinnaavavut? Tamanna misissornerussavarput.
4. Jiisusip kikkut saaffigai, oqaluffigisaasalu sooq piumasaqaataasut malillugit iliornissartik ilungersunartissimagunarpaat?
4 Jiisusip inuppassuit Mosesip Inatsisaanik maleruaaniaraluartut, juutilli upperisarsiornikkut siuttuisa guutisiorneq ilungersunartunngotimmassuk, ’nanertugaasut’ saaffigai. (Matthæusi 23:4) Inuunermut atatillugu suut tamangajaasa assigiinngitsorpassuarnik inatsisiliortarpaat. Qanoq ilioqqusaanerlutit qanorlu ilioqqusaannginnerlutit oqaluffigineqaannavittuuguit uippakajaalissannginnerpit? Jiisusili taamaattuunngilaq. Inuit qaaqquai nukissaqaleqqullugit. Tusarnaarnermikkut sallusuissut naapertuilluarnerlu ilikkassavaat, pitsaanerusumillu inuulersinnaallutik. Aap, Guuti ilumoortoq ilisarilerusukkunikku, Jiisusi Kristusi maluginiartariaqarpaat, taannami Jehovap pissusiinik ersersitsisuuvoq. Jiisusi oqarpoq: „Uannik takunnittup Ataataq takuaa.“ — Johannesi 14:9.
Inuunerit uippakajaarnartuua?
5, 6. Ullutsinnut naleqqiullugit Jiisusip nalaani sulisartut atugaat akissarsiaallu qanoq ippat?
5 Immaqa apeqqut taanna ilinnut pingaaruteqassaaq suliffinnut ilaquttannulluunniit atatillugu ajornartorsiuteqaruit, allanilluunniit ilungersunartitannik akisussaaffeqaruit. Taamaappat inuit eqqortuliorusuttut Jiisusip oqaluussaasa ikiugaasalu atugaasa assinginik atugaqarputit. Assersuutigalugu eqqarsaatigilaariakkit ulluinnarni inuunermi aningaasarsiornermilu ajornartorsiutit. Ullutsinni inuppassuarnut unamminiarnartuuvoq, Jiisusillu nalaani aamma taamaappoq.
6 Taamanikkut sulisartoq ulluni arfinilinni akunnerit aqqaneq-marluk suleruluttariaqarpoq, amerlanertigullu ulloq naallugu sulinerminut denarimik ataasiinnarmik akilerneqartarluni. (Matthæusi 20:2-10) Ullutsinnut naleqqiutissagaanni tamanna qanoq naleqarpa? Taamanikkut akissarsiat ullutsinni akissarsianut assersuunneqarsinnaanngikkaluarput, aningaasalli pisissutaasinnaanerat eqqarsaatigineqarsinnaavoq. Misissueqqissaartartoq oqarpoq qajuusanik 600 gramminik iffiugaq nalunaaquttap-akunnermusiatut akeqartoq. Misissueqqissaartartoq alla oqarpoq viinni pitsaasoq ermuseq ataaseq nalunaaquttap-akunnerinut marlunnut akissarsiatut akeqartoq. Taamaattumik taamanikkut inuussutissaqarniarluni sivisuumik suleruluttariaqarpoq. Inuit nanertuutiminnit aniguisinneqarnissartik nakussatsinneqarnissartillu pisariaqartippaat, soorluttaaq uagut pisariaqartikkipput. Suliffeqaruit immaqa misigisinnaavutit angusaqarnerunissannut kimigiiserfigineqarlutit. Amerlasuutigut misigisinnaavugut aalajangigassatta eqqarsaatiginissaannut piffissaqarnata. Tupinnanngilaq nanertuutigisatsinnit aniguisinneqarnissarput qilanaarigatsigu.
7. Inuit Jiisusip tusarliussaa qanoq isumaqarfigaat?
7 Qularutissaanngilaq Jiisusip ’suleruluttunut nanertugaasunullu’ tamanut qaaqqusissutaa tusarnaartorpassuinut killinnangaarsimassasoq. (Matthæusi 4:25; Markusi 3:7, 8) Eqqaamajuttaaq Jiisusi nangilluni oqartoq: „Nukissaqalerseqqissavassi.“ Uaguttaaq ullumikkut ’sulerulullutalu nanertugaasugut’ neriorsuut taanna iluaqutigisinnaavarput. Eqqarlitta ikinngutittalu tamatumunnga assingusunik atugaqartut iluaqutigisinnaavaattaaq.
8. Meeqqanik perorsaaneq utoqqalinerlu uagutsinnut qanoq nanertuutaappat?
8 Amerlasuut aamma assigiinngitsunik ’nanertugaasarput’. Assersuutigalugu meeqqanik perorsaaneq unamminiarnartuusinnaavoq. Allaat meeraaneq unamminiarnartuusinnaavoq. Inuit amerliartuinnartut qassinilluunniit ukiullit timikkut tarnikkullu nappaatiminnik naalliuuteqarput. Ullumikkut inuit inuuneqqortunerugaluartut, nakorsaatitigullu ilisimatuussutsikkut siumukartoqaraluartoq utoqqalisut aamma immikkut ajornartorsiuteqartarput. — Oqaluussisartup oqaasii 12:1.
Nammaataqarneq
9, 10. Itsaq nammaataq sumut assersuunneqartarpa, aamma sooq Jiisusip inuit kajumissaartarpai ’nammaataminik’ nammaatseqqullugit?
9 Malugaajuk Matthæusi 11:28, 29 naapertorlugu Jiisusi oqartoq: „Nammaatara ilissinnut pisissiuk, ilinniarfigisingalu“? Sulisartut taamanikkut inuusut nammaataqartutut misigisarsimagunarput. Itsarli nammaataq inussiaataanermut assersuutaajuartarsimavoq. (1 Mosesi 27:40; 3 Mosesi 26:13; 5 Mosesi 28:48) Laajat Jiisusip naapitaasa ilarpassui nammaataqarlutik sulisarput oqimaatsunillu nammattarlutik. Nammaataq qanoq iluseqarnersoq tuiinut pukusuanullu inissisimalluarnersoq angiunnersorluunniit aalajangiisuuvoq. Jiisusi sanasuugami nammaatsiortarsimasinnaavoq nalunagulu qanoq sanalluagaaguni ilusilerneqartariaqarnersoq. Nammaattap sinai amermik annoraaminermilluunniit nerussaqqusertarsimassagunarpai pukusuanut tuiinullu tunngasussamik nammaatigiuminarneruniassammat.
10 Jiisusi oqarami „nammaatara ilissinnut pisissiuk“ sulisut pukusuinut tuiinullu ’iluaqisumik’ nammaatsiortumut imminut assersuussimasinnaavoq. Taamaattumik ima nangippoq: ’Nammakkiussara oqeqaaq.’ Taamaassappat nammaataq nammaatigiuminaassanngilaq, nammatigiuminaappammi sulerulunnarpallaassaqaaq. Jiisusip tusarnaartini kajumissaaramigit nammaataminik nammaatseqqullugit soorunami isumaqanngilaq maannakkorluinnaq nanertuutaaruluinnassasut. ’Nukissaqaleqqissinnaappulli’ Jiisusimit ajoqersorneqarnermissut isiginnittaaseqalerunik. Aamma inooriaatsiminnik iliuutsiminnillu allanngortitsinertik iluaqutigisinnaavaat. Pingaarnerusumillu: piviusumik tunngaveqarluartumillu neriuuteqarnerup inuuneq uippakajaarnannginnerulersissavaa.
Nukissaqaleqqissinnaavutit
11. Jiisusi isumaqarpa inuit allamik nammaataliinnarsinnaasut? Nassuiaruk.
11 Malugiuk Jiisusi isumaqanngitsoq inuit allamik nammaattalissasut. Romamiut juutinut suli naalakkersuipput, soorluttaaq ullumikkut naalagaaffiit nunanut kristumioqarfiusunut naalakkersuisartut. Romamiut ukiuni hundredelinni siullerni inuit akileraartarunnaaqqunaviannglaat. Peqqissutsimikkut ajornartorsiutaarunnavianngillat aningaasatigulluunniit ajornartorsiutaarunnaviarnatik. Inuit suli naammalluinnanngitsuullutillu ajortiliupput. Jiisusilli ajoqersuutaa ilassigunikku nukinissaqaleqqissinnaapput — soorlu uaguttaaq taamaaliorsinnaasugut.
12, 13. Suna nukissaqaleqqinnartuunersoq Jiisusip qanoq takutippaa, ilaallu qanoq iliorpat?
12 Jiisusip nammaattamik assersuusiaanut atatillugu pingaarnerusut ilaat oqaluussinermut attuumassuteqarpoq. Qularutissaanngilaq Jiisusip suliassaani pingaarnerpaasoq ajoqersuganngortitsineq pingaartumillu Guutip naalagaaffianik oqaluussissutiginninneq. (Matthæusi 4:23) Oqarami „nammaatara ilissinnut pisissiuk“, ilaatigut isumaqarpoq tusarnaartaasa oqaluussisartutut malinniassagaat. Iivangkiiliuni takutinneqarpoq Jiisusip inuit eqqortuliorusuttut amerlasuunut pingaaruteqangaartumik allannguisissimagai, tassa suliaat eqqarsaatigalugu. Eqqaamajuk aalisartut Petrusi, Andreasi, Jaaku Johannesilu qanoq kajumissaarai: „Qaallusi malissinga, taava inunnik aalisartunngortissavassi.“ (Markusi 1:16-20) Takutippai suliaq nammineq pingaartingaakkani qanoq nalerisimaarutigisinnaagaat, ingammik naammassininniarnerminni siulersorpatik ikiorpatillu.
13 Juutit Jiisusip oqaasiinik tusarnaartut ilaasa paasivaat — tamannalu naapertorlugu iliuuseqarlutik. Lukasi 5:1-11-mi oqaluttuarineqartoq tasersuup sinaani pisimasoq takorlooriaruk. Genesaretip Tasersuani aalisartut sisamat unnuaq naallugu sulerulupput pisaqarnatilli. Qassutaat ulikkaariattaarput! Tamanna nalaatsornerinnaanngilaq, Jiisusiliuna akuliuttoq. Timmut qiviaramik takuaat inuppassuit Jiisusimut tusarnaaqqissaartut. Tamanna iluaqutigalugu aalisartut sisamat paasivaat Jiisusi qanoq isumaqartoq oqarami: „Maannamiit inunnik pisaqartalerumaar[pusi].“ Qanoq iliorpat? „Taava umiatsiatik tulatsippaat, tamaasalu qimallugit malippaat.“
14. (a) Ullumikkut qanoq nukissaqaleqqissinnaavugut? (b) Nutaarsiassaq nuannersoq kajumissinartoq suna Jiisusip oqaluussissutigaa?
14 Illittaaq tamatumunnga assingusumik iliuuseqarsinnaavutit. Suli sallusuissummik Biibilimeersumik ilinniartitsisoqartarpoq. Silarsuaq tamakkerlugu Jehovap Nalunaajaasui 6 millionit missaanniittut Jiisusip peqqussutaa malillugu nammaatserput ’inunnillu aalisartunngorlutik’. (Matthæusi 4:19) Ilaat piffissartik tamaat; allat piffissap ilaannaa sapinngisaminnik iliuuseqartarput. Oqaluussisarnermikkut tamarmik nukissaqaleqqittarput, inuunerminnilu uippakajaannginnerulertarlutik. Nuannarisaminnik sammisaqarput, tassa allat nutaarsiassamik nuannersumik oqaluttuullugit — ’Guutip naalagaaffianik nutaarsiassamik nuannersumik’. (Matthæusi 4:23, NV) Nuannertuaannarpoq allanik ajunngitsumik aveqatiginnissinnaaneq, Guutilli naalagaaffianik nutaarsiassaq nuannersoq immikkut ittuuvoq. Inuit uippakajaannginnerulersinnaanerannik qularunnaarsitsisinnaasumik Biibili imaqarpoq. — 2 Timotheusi 3:16, 17.
15. Jiisusip ajunnginnerpaamik inuuneq pillugu siunnersuutai qanoq iluaqutigineqarsinnaappat?
15 Aamma ilaat aatsaat ungasinngitsukkut Guutip naalagaaffia pillugu ilinnialersut qanoq ajunngitsumik inuusoqarsinaaneranik Jiisusimit siunnersuutiginerqartunik iluaqutiginnilereerput. Amerlasuut oqaluttuarisinnaavaat Jiisusip ajoqersuutaata nukissaqalerseqqissimagaatik inuunerminnillu allannguilluinnartissimagaatik. Illittaaq taamaalisinnaavutit inuunermut najoqqutassiat ilaannik Jiisusip inuuneranik kiffartorneranillu oqaluttuani, ingammik Matthæusip, Markusip Lukasillu iivangkiiliuini, saqqummiunneqartunik misissuinikkut.
Qanoq nukissaqaleqqittoqarsinnaasoq
16, 17. (a) Najoqqutassiat Jiisusip saqqummiusaasa pingaarnerit ilaat sumi atuarneqarsinnaappat? (b) Jiisusip najoqqutassiaasa maleruarnerannut nukissaqaleqqinnissamut suna pisariaqarpa?
16 Ukiumi 31-mi upernaakkut Jiisusi oqaluussivoq silarsuaq tamakkerlugu suli ilisimaneqartumik. Amerlanertigut Qaqqami oqaluutsimik taaneqartarpoq. Matthæusip iivangkiiliuani kapitalini 5-7-imi Lukasillu iivangkiiliuani kapitali 6-imi atuarneqarsinnaavoq, Jiisusillu ajoqersuutaasa ilarpassui taakkunaniipput. Iivangkiiliuni allani najoqqutassiat suli amerlanerusut Jiisusimit ajoqersuutigineqartut nanisinnaavatit. Oqaatigisaasa amerlanersaat paasinartuupput, maleruaanissarli unamminiarnartuusinnaavoq. Kapitalit taakkua peqqissaartumik atuarnissaat eqqarsaatigeqqissaarnissaallu iluaqutaasorujussuussaaq. Jiisusip eqqarsaataasa pissaanerat eqqarsaatinnut isiginnittaatsinnullu sunniuteqartiguk.
17 Najoqqutassiat Jiisusip saqqummiussai soorunami assigiinngitsorpassuarnut immikkoortiterneqarsinnaapput. Uani imatut immikkoortiterneqarput qaammatip ulluinut tamanut najoqqutassiaq ataaseq, siunertaavorlu inuuninni maleruassagitit. Qanoq? Atuapallaannarnagit. Eqqaamajuk pisooq inuusuttoq Jiisusimut ima aperisoq: „Qanoq iliussaanga inuuneq naassaanngitsoq kingornussariumallugu?“ Jiisusip Guutip inatsisaani piumasarineqartut pingaarnerit ilaat eqqartormagit, angutip akivaa piumasarineqartut taakku naammassereerlugit. Paasivaali iliuuseqarnerusariaqarluni. Jiisusip kajumissaarpaa Guutip najoqqutassiai iliuutsimini maleruarneroqqullugit ajoqersuilluartunngoqqullugulu. Angulli taama piareersimatigigunanngilaq. (Lukasi 18:18-23) Ullumikkut Jiisusip najoqqutassiaanik ilinnialerusuttut eqqaamasariaqarpaat isumaqataanerinnaq maleruaallunilu uippakajaannginnerulerneq assigiinngitsuusut.
18. Ungalusamiittut qanoq iluaqutigineqarsinnaasut nassuiaruk.
18 Jiisusip ajoqersuutai misissorusullugillu maleruarusukkukkit, ungalusami „Ilinniartitaaneq iluaqutigisinnaasat“-mi immikkoortoq siulleq misissoqqaarsinnaavat. Tassani Matthæusi 5:3-9 innersuussutigineqarpoq. Siunnersuutit pitsaasut versini taakkunani allassimasut eqqarsaatigilluarnerusinnaagaluarpavut. Ataatsimulli isigigutsigik qanoq isiginnittaaseqartariaqarnitsinnik paasitinneqarpugut. Inuuneq uippakajaarnannginnerusoq kissaatigigutsigu suna iluaqutigisinnaavarput? Anersaakkut ittut samminerugutsigik eqqarsaatiginerullugillu qanoq iluaqutigisinnaavavut? Anersaakkut ittut samminerusinnaajumallugit inuunitsinni pingaannginnerusut allat immikkoortittariaqannginnerpavut? Taamaaliorutta maannakkut allaat pilluarnerulissaagut.
19. Qanoq siuneqarnerulersinnaavugut paasisaqarnerulersinnaallutalu?
19 Ingerlaqqeriarta. Versit taakku pillugit uppeqat, immaqa aappaq, qanigisaq ikinngulluunniit, oqaloqatigigaanni iluaqutaassaaq. (Ussatit 18:24; 20:5) Eqqaamajuk inuusuttup pisuup alla, tassa Jiisusi, tamatumunnga assingusumik aperimmagu. Akissut pilluarnerulissutigisinnaagaluarpaa naassaanngitsumillu inuulissutigisinnaagaluarlugu. Soorunami versit taakku pillugit oqaloqatigisat Jiisusimut naleqqiunneqarsinnaanngilaq, tamassili Jiisusip ajoqersuutaa oqaloqatigiissutigalugu iluaqutigissavarsi. Misileriaruk!
20, 21. Jiisusip najoqqutassiai ilinniarnerujumallugit periaaseq suna maleruarneqarsinnaava, siumukarnerlu qanoq paasineqarsinnaava?
20 Ungalusaq misissoqqeriaruk. Ajoqersuutit agguataarneqarput qaammatip ingerlanerani ullut tamaasa minnerpaamik ajoqersuut ataaseq eqqarsaatigisinnaaniassagakku. Versini innersuussutigineqartuni Jiisusip oqaasii atuaqqaarsinnaavatit. Taava oqaasii inuuninnilu qanoq maleruarsinnaanerlugit eqqarsaatigisinnaavatit. Maleruaalereersutut misigiguit taava eqqarsaatigiuk ajoqersuutaa Guutimeersoq qanoq maleruarnerusinnaanerlugu. Ullup ingerlanerani maleruarnissaa sulissutigiuk. Paasiuminaatsikkukku imaluunniit takusinnaanngikkukku qanoq maleruarsinnaanerlugu, taava aqaguani sulissutigeqqiguk. Eqqaamajulli maleruarluinnartariaqannginnakku ingerlaqqitsinak. Aqaguani alla eqqarsaatigisinnaavat. Sapaatip-akunnerata naanerani eqqarsaatigisinnaavat Jiisusip ajoqersuutai sisamat tallimalluunniit qanoq maleruarsimatiginerlugit. Sapaatip-akunnerata tulliani ullut tamaasa ilasinnaavatit. Nikalloqinak aalajangersimasoq maleruaruminaatsissimallugu paasigukku. Tamatta taamaassinnaavugut. (2 Nalunaarsuutit 6:36; Tussiaat 130:3; Oqaluussisartup oqaasii 7:20; Jaaku 3:8) Sapaatip-akunnerisa pingajuanni sisamaannilu taamatut ingerlaannarit.
21 Qaammat naappat immaqa immikkoortut 31-t tamaasa atuareerpatit. Qaammatip tulliata aallartinnerani qanoq misigissasorivit? Nuannaarnerulaassannginnerpit, immaqalu qasukkarsimanerulaarlutit? Siumukalaaginnaraluarlutit, uippakajaannginnerulersimassagunarputit iluaqutiginngitsoorsimanavianngilalli ingerlaqqinnissannullu iluaqutissarsivutit. Puioqinagu Jiisusip ajoqersuuterpassuisa ilaat ungalusami eqqaaneqanngimmata. Soormi taakkua ilaat misissornianngiligit maleruarniarlugillu? — Filippimiut 3:16.
22. Jiisusip ajoqersuutaa maleruaraanni qanoq kinguneqarsinnaava, aamma alla suna misissussavarput?
22 Soorlu paasisinnaagit Jiisusip nammaataa iluangaartoq, malunnanngitsuunngikkaluarluni. Ajoqersuutaata maleruarnissaa taassumunngalu ajoqersugaanissaq artornanngilaq. Ukiuni 60-ini misilittagaqareerluni apustili Johannesi, Jiisusip qanimut ikinngutaa, oqarpoq: „Guutimummi asanninneq tassaavoq inassutai maleruaratsigit, inassutaalu artornartuunngillat.“ (1 Johannesi 5:3) Illittaaq taassumatut tatiginnissinnaavutit. Jiisusip ajoqersuutaa maleruarnerujartortillugu, paasinerujartuinnassavat ullumikkut inuppassuit uippakajaassutigisaat, ilinnut taama uippakajaarnartiginngitsut. Paasissavat atoriaannaasumik uippakajaannginnerulissutissarsisimallutit. (Tussiaat 34:9) Aammali Jiisusip nammaataanut iluaqisumut atatillugu allamik eqqumaffigisassaqarputit. Jiisusi oqarpoq isumakkut ’qanilaarluni’ ’uummatikkullu makitajuilluni’. Jiisusi tamatumuuna qanoq ilinniarfigisinnaavarput malissinnaallugulu? Tamanna allaaserisami tulliuttumi misissussavarput. — Matthæusi 11:29. (wE 12/15 01)
Qanoq akissavit?
• Sooq Jiisusitut iliortariaqarpugut uippakajaannginnerulissutissarsioraangatta?
• Nammaataq sumut assersuutaava, aamma sooq?
• Sooq Jiisusip inuit kajumissaarpai nammaataminik nammaatteqqullugit?
• Anersaakkut qanoq nukissaqaleqqissinnaavugut?
[Atuaqqissaarnermi apeqqutit]
[Qupp. 13-mi issuagaq]
Ukiumut 2002-mut allassimaffittut Jehovap Nalunaajaasuisa una atussavaat: „Ornissinga . . . nukissaqalerseqqissavassi.“ — Matthæusi 11:28, NV.
[Qupp. 10, 11-mi ungalusaq]
Ilinniartitaaneq iluaqutigisinnaasat
Matthæusip iivangkiiliuani kapitalit 5-7-miittut qanoq ilinniarfigisinnaavigit? Kapitalit taakkua Jiisusip ajoqersuillaqqissorsuup Galilæami qaqqap sivingarnani ajoqersuutaanik imaqarput. Versit innersuussutigineqartut nammineq Biibiliutinni atuariakkit imminullu ima aperalutit:
1. 5:3-9 Nalinginnaasumik isiginnittaasera eqqarsaatigalugu versini taakkunani suna ilinniarsinnaavara? Qanoq iliorsinnaavunga pilluarnerulerumallunga? Anersaakkut pisariaqartitsinera qanoq eqqumaffiginerusinnaavara?
2. 5:25, 26 Assortuiumatoorpassuit ilaaginnarnagit qanoq iliornissaq iluaqutaassava? — Lukasi 12:58, 59.
3. 5:27-30 Ajuutiginnilluni eqqarsaatersornerit pillugit Jiisusp oqaasiini suna erseqqissarneqarpa? Taamaattunik eqqarsaatersornaveersaaruma qanoq pilluarnerusinnaavunga isumakkullu eqqissinerusinnaallunga?
4. 5:38-42 Ullumikkut inuppassuit iliornerattut sooq pisinnaatitaanera aalajangiusimaniapallattassanngilara?
5. 5:43-48 Inuit akeqqatut isigisaluakka ilisarisimanerulerukkit qanoq iluaqutigisinnaavara? Taamaalioruma akunnitsinni najummassimanartoqarnera qanoq sunnissagunarpaa?
6. 6:14, 15 Ilaannikkut allat isumakkeerfigiuminaatsittarukkit sinnganeq ajorinninnerluunniit pissutaasinnaava? Tamanna qanoq allanngortissinnaavara?
7. 6:16-18 Qallikkut isikkora ilorlikkut pissusinnit pingaarnerutikkajuppara? Suna soqutiginerusariaqarpara?
8. 6:19-32 Aningaasat pigisallu pingaartippallaalerukkit qanoq pisoqarsinnaava? Suna eqqarsaatigisinnaavara tamakku oqimaaqatigiissumik isigisinnaajumallugit?
9. 7:1-5 Inuit assuarinnittut, isornartorsiuisut kukkunersiuiuartullu ilagigaangakkit qanoq misigisarpunga? Taamaattuunnginnissara sooq pingaaruteqarpa?
10. 7:7-11 Guutimut qinujuarneq iluaqutaappat, inuunermut tunngasut allat eqqarsaatigalugit aamma taamaanngila? — Lukasi 11:5-13.
11. 7:12 Maleruagassaq Atortuujuaannartoq nalunngilara, allanulli pissusilersorninni qanoq maleruakulatigaara?
12. 7:24-27 Inuunera nammineq akisussaafigigakku, ajoqutaalersinnaasut ajornartorsiutaalersinnaasullu piareersimaffigineruniarlugit qanoq iliorsinnaavunga? Sooq maannakkut eqqarsaatigilereertariaqarpara? — Lukasi 6:46-49.
Eqqarsaatigisinnaasakka allat:
13. 8:2, 3 Ajorsartut qanoq misiginneqatigisinnaavakka, Jiisusip migisinneqatiginnittarneratut?
14. 9:9-38 Qanoq naakkinnittuliorusutsigaanga, qanorlu naakkinnittuliornerusinnaavunga?
15. 12:19 Jiisusi pillugu siulittuut taanna ilinniarfigaara oqqassinaveersaartarlungalu?
16. 12:20, 21 Allat qanoq ajunngitsuliorfigisinnaavakka oqaatsinnillu iliuutsinnilluunniit aliatsatsinnagit?
17. 12:34-37 Suut oqaluuserinerusarpakka? Sunik uummammioqarpunga? Suut uummammiuginerlugit sooq eqqarsaatigisariaqarpara? — Markusi 7:20-23.
18. 15:4-6 Jiisusip oqaasiisa utoqqarnut asannittumik isumaginninneq pillugu sumik paasitippaatigut?
19. 19:13-15 Suna piffissaqarfigisariaqarpara?
20. 20:25-28 Sooq oqartussaaniaannarluni oqartussaaneq ajorpa? Tamatumunnga tunngatillugu Jiisusi qanoq ilaarsinnaavara?
Eqqarsaatigineqarsinnaasut suli allat, Markusimit allanneqartut:
21. 4:24, 25 Allanut pissusilersortarnera qanoq pingaaruteqarpa?
22. 9:50 Nuannersunik oqaluttarnera pissuserinneralu qanoq kinguneqarsinnaappat?
Naggasiutigissavavut najoqqutassiat Lukasimit allanneqartut:
23. 8:11, 14 Guutip oqaasia sussava inuunera isumakuluutinit, pisuussutinit inuulluarniutinillu aqutikkukku?
24. 9:1-6 Jiisusip suna pingaarnerpaatippaa napparsimasunik ajorunnaarsitsisinnaagaluarluni?
25. 9:52-56 Ajuallajavunga? Assinganik akisinaveersaartarpunga?
26. 9:62 Guutip naalagaaffiata oqaluussissutiginissaanut qanoq akisussaaffeqarpunga?
27. 10:29-37 Samariamiu naakkinnittoq qanoq ilaarsinnaavara takutillugulu allanut soqutigittaatsuunata?
28. 11:33-36 Inuunera qanoq pisariillisarsinnaavara?
29. 12:15 Inuuneq pigisallu qanoq imminnut attuumassuteqarpat?
30. 14:28-30 Aalajangiinikka eqqarsaatigeqqissaartarukkit suna pinngitsoorsinnaavara, tamannalu qanoq iluaqutigisinnaavara?
31. 16:10-12 Assuarnaattuaruma qanoq iluaqutigisinnaavara?
[Qupp. 9-mi assiliartaq]
Jiisusip nammaataanik nammaataqarluni inuunermik annaassiniarneq nukissaqaleqqinnarpoq