Nikodemusi ilinniarfiguuk

„UANNIK malinnikkumasoq imminut isumakkiissaaq, ullullu tamaasa [nappagaq naalliutsitaaffik NV.] ersullugu malissavaanga.” (Lukasi 9:23) Aalisartut maniguuttut akileraaruserisullu asissukkap qaaqqusissut taanna kajumillutik ilassivaat. Jiisusi malikkumallugu suut tamaasa qimappaat. — Matthæusi 4:18-22; Lukasi 5:27, 28.

Jiisusip qaaqqusissutaa suli ullumikkut tusarsaavoq, amerlasuunillu ilassineqarpoq. Biibilimilli Jehovap Nalunaajaasuinik atuaqqissaaqateqartartut ilaasa ’imminnut isumakkeerlutik [nappakkap naalliutsitaaffiup NV.] ersunnissaa’ nangaassutigaat. Jiisusip ajoqersugaasut akisussaaffik pisinnaatitaaffillu akueriuminaatsippaat.

Sooq ilaasa Jiisusip qaaqqusissutaanik ilassinninnissartik Jehova Guutimullu tunniulluinnarnissartik nangaanartoqartippaat? Juutisut-kristumiusut  ataasiinnarmik Guuteqarneranik upperisaqarluni peroriartorsimanngikkaanni piviusumik ajugaqanngitsumillu Pinngortitsisoqarnera sivisuumik paasiuminaatsinneqarsinnaavoq. Naak ilaasa Guutip piviusuunera qularutigiunnaaraluarlugu Jiisusip tumai atuarumasanngilaat. Jehovamut Nalunaajaasunngorunik qanoq ilaquttamik ikinngutimillu qisuariarnissaat immaqa ersissutigaat. Ilaasa piffissap sivikinnera puigorsimannguatsiaramikku pisuussutit ataqqinaallu ujartulersimavaat. (Matthæusi 24:36-42; 1 Timotheusi 6:9, 10) Jiisusimut ajoqersuganngornissaminnut aalajangiiniarnermik kinguartinneranut sunaluunniit peqqutigigaluarunikku juuti pisooq Jiisusip nalaani inuusoq Nikodemusi ilinniarfigisinnaavaat.

Nikodemusi tupinnaannartunik periarfissinneqarpoq

Jiisusip nunami kiffartulerneraniit ukiup affaata missaa qaangiutiinnartoq Nikodemusiip paasivaa Jiisusi ’ajoqersuisuusoq Guutimit pisoq’. Ukiumi 30-mi poorski nalliussineqarmat Jiisusip Jerusalemimi tupinnartuliai Nikodemusip killitsissutigingaarpai, taamaattumillu unnuaanerani uppernerminik nassuerfigiartorlugu paasisaqarfiginerorusullugulu Jiisusi ornippaa. Guutip naalagaaffianut isissagaanni ‘ernioqqissitaasariaqarnermik’ ajoqersuummik Jiisusip Nikodemusi oqaluttuuppaa. Taamanikkuttaaq Jiisusi oqarpoq: „ Guutimmi silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” — Johannesi 3:1-16.

Nikodemusi tupinnaannartumik periarfissinneqarpoq! Jiisusimut qanittumik suleqataalersinnaavoq nunarsuarmilu inuunera qanoq  ingerlanersoq nammineq qanimut takusinnaallugu. Juutisut ilinniartitsisutut aqutsisutullu Nikodemusi Guutip oqaasianik ilisimasaqarluarpoq. Aamma siuneqassutsimik pigisaqarsimassaaq, taamaanngippammi Jiisusi Guutimit aallartitaasoq paasisimanavianngikkaluarpaa. Nikodemusi anersaakkut ittunik soqutigisaqartoq tupinnaannartumik maniguuttuuvoq. Sanasup ernera nikanartoq Guutimit aallartitaasoq akuerissallugu juutit killisiuisoqatigiivini ilaasortaasumut oqitsuinnaanavianngilaq! Inuk Jiisusimut ajoqersuganngussappat pissutsit tamakku tamarmik pingaaruteqarluinnarput.

Nikodemusip piffissap ingerlanerani angummut Nazaretimiumut taassumunnga soqutiginninnini attatiinnannguatsiarpaa. Ukiut pingajuata affaa qaangiuttoq nalliussiviup tupiusaliorfiup nalaani Nikodemusi juutit killisiuisoqatigiivini ataatsimeeqataavoq. Taamanikkut suli taakkua ‘ilagaat’. Sakkutuunik Jiisusimik tigusarinnittussanik palasiunerit farisæerillu aallartitsipput, uterpulli oqarlutillu: „Inummik taassumatut oqaluttoqarsimanngisaannarpoq.” Taama oqarmata farisæerit mitallilerput: „Aammaana ilissi tammartitaasimasusi? Killisiuisoqatigiinni ilaasortanit farisæerinilluunniit upperfigineqarami? Naamik, inuit taakku inatsisinik nalusut perloqqusaapput.” Maanna Nikodemusi nipangersimaannarsinnaajunnaarpoq. Oqarpoq: „Inatsisitta inuk eqqartuuttanngilaat oqaasissai tusaqqaartinnagit qanorlu iliorsimanera paaseqqaartinnagu.” Taama oqarmat farisæerit ilaasa allat saassuppaat: „Aamma immaqa illit Galilæamiuugavit? Allakkat misissuiffigigukkit paasisinnaassavat Galilæamit pisumik pruffiiteqarsimanngitsoq.” — Johannesi 7:1, 10, 32, 45-52.

Ukiup affaata missaa qaangiuttoq ukiumi 33-mi poorskip ulluani Jiisusip timaa toqungasoq nappakkamit naalliutsitaaffimmit aqqarneqarmat Nikodemusi najuuppoq. Sanhedrinimi ilaasortaqanni Josefi Arimatæamioq ilagalugu Jiisusip timaata ilineqarnissaa piareersarpaat, siunertamullu tassunga „tarnut myrramik aloemillu akuugaq” ruumamiut pundiinik 100-ngajannik, tassa kiilunik 33-nik  oqimaassusilik nassarpaat. Tunissut taanna akisungaatsiarpoq. Nikodemusi taamaaliorami aamma sapiitsuusariaqarsimavoq, tassami taamaalilluni farisæerit Jiisusimut taaguinerat ilaarlugu ‘peqquserluttumut taassumunnga’ assersuunneqarpoq. Jiisusip timaa marluullutik piareersarasuariarlugu iliviliamut qanittumiittumut sulilu atorneqanngisaannartumut ilivaat. Maannamulli allaat Nikodemusi Jiisusip ajoqersugaatut nassuinngilaq! — Johannesi 19:38-42; Matthæusi 27:63; Markusi 15:43.

Sooq iliuuseqanngitsoq

Johannesip oqaluttuamini eqqaanngilaa sooq ‘nappagaq naalliutsitaaffik’ ersukkiuteriarlugu Jiisusip malinnissaanut Nikodemusi nangaasimanersoq. Farisæerilli taassuma aalajangerumaarnertuneranut nassuiaataasinnaasumik tikkuussipput.

Siullermik Johannesip eqqaavaa Nikodemusip ‘unnuakkut Jiisusi ornikkaa’. (Johannesi 3:2) Biibilimik misissuisartup isuma una saqqummiussimavaa: „Nikodemusi unnuakkut aggerpoq, imaanngitsoq ersilluni kisiannili Jiisusimik oqaloqatiginninnerminik akornussiisinnaasut inuppassuit ingalassimaniarlugit.” Johannesip Nikodemusi ‘angutitut qanga unnuaanerani Jiisusimut ornigussimasutut’ eqqaagamiuk aamma Josefi Arimatæamioq ‘Jiisusimut ajoqersugaasutut juutilli ersigalugit ajoqersugaanerminik isertuussisutut’ eqqaavaattaaq. (Johannesi 19:38, 39) Taamaattumik ilimanarpoq Nikodemusip ‘juutinut ersigami’ Jiisusi unnuami ornissimassagaa. Jiisusimut ajoqersugaasutut eqqaaneqarnissartik allat aamma annilaangassutigisarpaat. — Johannesi 7:13.

Ilaquttavit, ikinngutivit imaluunniit suleqativit qanoq oqarnissaat siooragigakku Jiisusimut ajoqersuganngornissannik aalajangiinissaq kinguartissimaviuk? „Inunnik qunugisaqarneq napiaaniutinngortarpoq,” taama ussateqarpoq. Siooraneq tamanna qanoq qaangerneqarsinnaava? Ussat nangippoq: „ [Jehovamilli] tatiginnittoq aarlerissutissaqanngilaq.” (Ussatit 29:25) Jehovamut tatiginninneq ineriartortissagukku ilumut ilinnut sernissuinera illit nammineq misigisariaqarpat. Eqqortunik aalajangiinissannut sapiissuseqalerseqqullutit Jehova qinnuviguuk, aamma pallorfiginninninnut tunngatillugu annikitsualunnguugaluarpataluunniit. Piffissap ingerlanerani Jehovamut uppernerit tatiginninnerillu ima ineriartortigissaaq allaat aalajangigassat pingaarutillit Guutip piumasaa naapertorlugu aalajangiiffigisinnaalissallugit.

Aappassaannik oqartussaassusillit ilaattut Nikodemusip atorfeqarnerata ataqqisaaneratalu imminut naaggaarluni pingaarutilimmik alloriarnissaanut akornusersimasinnaavaa. Taamaalinerani Sanhedrinimi ilaasortaanini suli pingaartissimassagunarpaa. Inuiaqatigiinni atorfigissaarnerup imaluunniit suliffimmi qaffakkiartorsinnaanerup annaanissaa annilaanngatigigakku Jiisusimut ajoqersuganngornissat nangaassutigaajuk? Piumasani naapertorlugu qinnutigisannik tunisisartup qilammi nunarsuarmilu Qutsinnerpaap kiffartuunnissaa sumulluunniit naleqqiunneqarsinnaanngilaq. — Tussiaat 10:17; 83:19; 145:18.

Nikodemusip nangaaneranut pissutaasinnaasut pingajuat tassaasinnaavoq pissoorsuunera. Farisæerinit allanit ‘aningaasanik nuannarisalinnit’ sunnerneqarsimasinnaavoq. (Lukasi 16:14) Tarnummik myrramik aloemillu akuukkamik akisuumik akissaqartitsinerata pisuujunera ersersippaa. Ullumi ilaasa pisuussutitik ernummatigigamikkik kristumiutut akisussaaffimmik tigusinissaminnik aalajangiinissaq kinguartittuarpaat. Jiisusilli ajoqersukkani ima oqaaqqissaarpai: „Inuunersi isumakuluutigeqinasiuk, suna nerissagissi, suna imissagissi imaluunniit timissigut suna atissagissi. ataatassilu qilammiittup nalunngilaa tamakku tamaasa pisariaqartikkisi. Guutilli naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.” — Matthæusi 6:25-33.

 Annaasaqangaarpoq

Nikodemusimik oqaluttuaq Johannesip iivangkiiliuinnaani eqqaaneqarpoq, ilisimatitsinngilarli Nikodemusi Jiisusimut kingusinnerusukkut ajoqersuganngorsimanersoq. Oqaluttuarsiaq ataaseq naapertorlugu Jiisusi aalajangerfigalugu kuisissimavoq, juutinit malersorneqarluni, atorfini annaallugu naggataagullu Jerusalemimit qimaatinneqarsimalluni. Qanorluunniilli ikkaluarpat manna allanngortitassaanngilaq: Jiisusi nunarsuarmiimmat nangaagami annaasaqangaarpoq.

Nikodemusip Jiisusi naapeqqaaramiulli malilersimagaluaruniuk ajoqersugai qanimut suleqatiginnittut ilagisimassagaluarpai. Ilisimassutsi, siuneqassutsi, maniguunnini anersaakkullu pisariaqartitaminik miserratiginninnginnini pissutigalugit ajoqersuganngorsinnaagaluarpoq pingaarutilik. Ajoqersuisorsuup oqalugiaatai uissuumminartut tusarnaarsinnaagaluarpai, assersuusiai pingaarutilimmik ilinniarfigalugit, tupinnartuliai tupinnaannartut nammineq isiminik takusimasinnaagaluarlugit, apustiliminullu naggataamik oqaaserisai nukissarsiffigisinnaagaluarlugit. Tamakkuli tamaasa annaavai.

Nikodemusi aalajangerumaarnertunerata annaasaqangaartippaa. Assersuutigalugu Jiisusip asannittumik qaaqqusinerigalua ilassinngilaa: „Ornissinga tamassi suleruluttusi nanertugaasusilu, qasuertissavassi. Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut. Nammaatarami iluaqaaq, nammakkiussaralu oqeqaluni.” (Matthæusi 11:28-30) Jiisusimit nutaanik nukissarsiffissaraluani Nikodemusip maanngaannartippaa!

Qanoq iliussavit?

Jiisusi 1914-imiilli Guutip naalagaaffiani qilammiittumi kunngisut najuuppoq. Najuunnissami nalaani qanoq pisoqarnissaa siulittuutigigamiuk ilaatigut ima oqarpoq: „Naalagaaffimmillu iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” (Matthæusi 24:14) Naggatissap nalliutinnginnerani nunarsuaq tamakkerlugu oqaluussisoqassaaq. Suliassami tamatumani inuit naammalluinnanngitsut sulisissallugit Jiisusip Kristusip iluaraa. Illittaaq peqataasinnaavutit.

Nikodemusip paasivaa Jiisusi Guutimit aallartitaasoq. (Johannesi 3:2) Biibilimik atuaqqissaarnikkut illittaaq taama inerniliissagunarputit. Inooriaatsinnik immaqa allannguivutit taamaalillutillu Biibilip killissarititai malilerlugit. Biibilimik ilisimasaqarnerujumallutit immaqa Jehovap Nalunaajaasuisa ataatsimiittarnerinut najuuttarputit. Tamakku tamaasa pillugit nersorneqassaatit. Kisianni Jiisusip Guutimit aallartitaasimaneranik Nikodemusip paasinninnera naammanngilaq. Aammattaaq ‘imminut isumakkeertariaqarpoq, ullullu tamaasa [nappagaq anniartitaaffik] ersullugu [Jiisusimik] malinnittariaqarluni’. — Lukasi 9:23

Apustili Paulusip oqaasii aalajangiuttariaqarpavut. Allappoq: „Guutimut suleqataasutut oqaaqqissaarpassi Guutip saammaannera pissarsiarsi maangaannarteqqunagu. Oqarpormi: ’Ullormi saammaassiviusumi tusarpakkit, ullormilu annaassiviusumi ikiorpakkit.’ Tassa maanna nalliuppoq ulloq saammaassivik, maanna nalliuppoq ulloq annaassivik!” — 2 Korinthimiut 6:1, 2.

Upperneq iliuuseqarnissamut kajungilersitsisoq ineriartortissallugu maanna piffissanngorpoq. Upperneq taamaattoq pigilerumallugu Biibilimi atuaqqissaakkatit eqqarsaatigeqqissaarsinnaavatit. Uppernerpit iliuuseqarnikkut takutinnissaanut ikioqqullutit Jehova qinnuviguuk. Ikiuinera malugilerukku tassunga qujaniarnerpit asanninnerpillu ‘imminut isumakkernissannik, ullullu tamaasa [nappagaq anniartitaaffik] ersullugu Jiisusi Kristusimik malinninnissannik’ kissaateqalersissavaatsit. Maanna taamaaliorusuppit? (wE 2/1 2002)

[Qupp. 26-mi assiliartaq]

Nikodemusip aallaqqaammut sapiilluni Jiisusi illersorpaa

[Qupp. 26-mi assiliartaq]

Nikodemusi akerlilersorneqaraluarluni Jiisusip timaata ilineqarnissaanut piareersaaqataavoq

[Qupp. 27-mi assiliartaq]

Nammineq atuaqqissaarnerup qinunerullu ajunngitsumik iliuuseqarnissannut sapiissuseqalersissinnaavaatit

[Qupp. 27-mi assiliartaq]

Jisusi Kristusip siulersuinerani kiffartornermik immikkut pisinnaatitaaffeqarusuppit?