Nutaarsiassap nuannersup sunniutai iluaqutaasut
Nutaarsiassap nuannersup sunniutai iluaqutaasut
’Jehovap . . . tanippaanga . . . nalunaarut nuannersoq oqaatigeqqullugu [qanilaartunut, NV], nakorsarneqarnissarlu aserorsimasumik uummatilinnut, . . . aliasuttut tamaasa tuppallersaqqullugit.’ — ESAJA 61:1, 2
1, 2. (a) Jiisusip kinaanerluni qanoq erseqqissarpaa? (b) Pilluaqqussutissat suut nutaarsiassamut nuannersumut Jiisusip oqaluussissutigisaanut attuumassuteqarpat?
KIFFARTORNERMINI siusissukkut Jiisusi sabbatimi Nazaretimi synagogimut iserpoq. Oqaluttuarineqarpoq ’pruffiitip Esajap allagai tunniunneqartut, mapperamigillu ima allassimasoq eqqoraa: „[Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq . . . tusarliuteqqullugu.”’ Jiisusip siulittuummik atuffassinini nangippaa, taavalu ingippoq oqarlunilu: „Oqaatsit allakkaniittut tusakkasi ullumikkut eqquupput.“ — Lukasi 4:16-21.
2 Taamaalilluni Jiisusip erseqqissarpaa nammineq iivangkiiliumik oqaluussisartuulluni tikiuttussaq, tassa nutaarsiassamik nuannersumik oqaluussissutiginnittussaalluni tuppallersaasussaallunilu. (Matthæusi 4:23) Jiisusilumi nutaarsiassamik nuannersuvimmik oqaluttuarinnittussaavoq! Tusarnaartiminut ima oqarpoq: „Uanga silarsuarmut qaammaqqutaavunga. Uannik malinnittoq taarsiunngisaannassaaq, qaammaqqulli inuuneqartitsisoq pigissavaa.“ (Johannesi 8:12) Aamma oqarpoq: „Oqaasera aalajangiussimajuarussiuk ilumut ajoqersugarissavassi, sallusuissullu ilisimalissavarsi, sallusuissutsillu inussiaajunnaarsissavaasi.“ (Johannesi 8:31, 32) Aap, Jiisusi „oqaatsinik naassaanngitsumik inuussutaasunik“ pigisaqarpoq. (Johannesi 6:68, 69) Qaamaneq, inuuneq, kiffaanngissuseq — pilluaqqussutissat qularnaatsut pingaartittariaqarpavut.
3. Nutaarsiassaq nuannersoq suna Jiisusip ajoqersugaasa oqaluussissutigaat?
3 Ukiumi 33-mi piinsip ulluata kingorna ajoqersukkat Jiisusip oqaluussineq aallartitaa ingerlatiinnarpaat. Guutip ’naalagaaffianik iivangkiiliu’ juutinut juutiunngitsunullu oqaluussissutigaat. (Matthæusi 24:14; Apustilit Suliaat 15:7; Romamiut 1:16) Nutaarsiassamik nuannersumik ilassinnittut Jehova Guutimik ilisarsilerput. Upperisarsiornikkut inussiaanerminnit aniguisitaapput anersaakkullu inuiaqatigiinnut nutaanut ’Israeli Guutip pigisaanut’ ilaalerlutik, taamaalillutik naalagartik Jiisusi Kristusi ilagalugu qilammi naalakkersuinissaq neriuutigaat. (Galatiamiut 5:1; 6:16; Efesosimiut 3:5-7; Kolossemiut 1:4, 5; Saqqummersitat 22:5) Pilluaqqussaangaarneq.
Ullumikkut iivangkiiliumik oqaluussineq
4. Ullumikkut nutaarsiassamik nuannersumik oqaluussissutiginninneq qanoq ingerlanneqartarpa?
4 Ullumikkut kristumiut tanitat, ’savanit allanit’ amerliartuinnartunit tapersersorneqarlutik, Jiisusimut suliassiissutigineqaqqaartoq nangippaat. (Saqqummersitat 7:9; Johannesi 10:16) Tamatuma kingunerisaanik nutaarsiassaq nuannersoq aatsaat taama oqaluussissutigineqartigaaq. Nunani sumiiffinnilu 235-ini Jehovap Nalunaajaasuisa ’nalunaarut nuannersoq [qanilaartunut, NV] oqariartuutigisarpaat . . . nakorsarneqarnissarlu aserorsimasumik uummatilinnut, torlulaatigisarlugu parnaarussat iperagaanissaat kalunnernillu qilersugaasimasut aniguisitaanissaat, torlulaatigisarlugit Jehovap ukiua saammaassivik ullorlu Guutitta akiniaaffia, aliasuttut tamaasa tuppallersarlugit’. (Esaja 61:1, 2) Taamaattumik kristumiut iivangkiiliumik oqaluussissutiginninnerat inuppassuarnut suli iluaqutaavoq inunnullu ’annikilliuuteqarnerni tamani’ tuppallersaatissaviulluni. — 2 Korinthimiut 1:3, 4.
5. Nutaarsiassamik nuannersumik oqaluussineq eqqarsaatigalugu Jehovap Nalunaajaasui kristumiuuneraqatigiinnit qanoq immikkooruteqarpat?
5 Ilumoorpoq kristumiuuneraqatigiit ilagiivi assigiinngitsunik iivangkiiliumik oqaluusseriaaseqarsimanerat. Assersuutigalugu oqaluffeqarfippassuit ajoqersuiartortitat aallartittarsimavaat nunani allani upperisamut ilanngutitsiniarlutik. Atuagassiami The Orthodox Christian Mission Center Magazine-mi nalunaarutigineqarpoq Madagaskarimi, Afrikap kujataani, Tanzaniami Zimbabwemilu ortodoksit ajoqersuiartortitaqartut. Ilagiinnulli kristumiuunerartunut allanut ilaasortaasutulli ilagiinnut ortodoksinut ilaasortaasut amerlanersaat suliamut taamattumut peqataaneq ajorput. Tamatuma akerlianik Jehovamut nalunaajaasut tunniulluinnarsimasut tamarmik iivangkiiliumik oqaluussineq peqataaffiginiartarpaat. Nalunngilaat nutaarsiassamik nuannersumik oqaluussinertik uppernermik piviusuuneranut ersiutaasoq. Paulusi oqarpoq: „Uummatikkummi upperneq iluartuutitaassutissaavoq, qanermillu nassuerneq annaanneqaatissaalluni.“ Upperneq iliuuseqarnissamut kajumississutaanngitsoq toqungavoq. — Romamiut 10:10; Jaaku 2:17.
Nutaarsiassaq nuannersoq ataavartumik iluaqutaasussaq
6. Ullumikkut nutaarsiassaq nuannersoq suna oqaluussisutigineqarpa?
6 Jehovap Nalunaajaasuisa nutaarsiassat nuannernerpaartaat oqaluussissutigaat. Biibili tunngavigalugu tusaarusuttut paasitittarpaat, Jiisusip inuunini pilliutigisimagaa inuit Guutimut qanillinissaannut, ajortaasa isumakkeerfigineqarnissaannut inuunermillu naassaanngitsumik neriuuteqalernissaannut periarfissinniarlugit. (Johannesi 3:16; 2 Korinthimiut 5:18, 19) Oqaluussissutigaat Guutip naalagaaffia Jiisusi Kristusi tanitaq kunngeralugu qilammi pilersinneqarsimasoq, naalagaaffiullu tamatuma erniinnaq ajussuseq nunarsuarmit piiarumaaraa Paratiisilu pilerseqqikkumaaraa. (Saqqummersitat 11:15; 21:3, 4) Esajap siulittuutaata eqquunneratut inoqatitik oqaluttuuttarpaat maanna ’Jehovap ukiorigaa saammaassivik’, sulilu nutaarsiassamik nuannersumik ilassininnissamut periarfissaqartoq. Aammattaaq mianersoqqussutigaat ’ulloq Guutitta akiniaaffia’ qanittukkut nalliutissasoq, Jehovallu inuit ajortut ajortuliaminnik peqqissimissuteqanngitsut nungutissagai. — Tussiaat 37:9-11.
7. Oqaluttuap suup takutippaa Jehovap Nalunaajaasui ataasiussuseqartut, ataasiussuseqarnerannullu suna pissutaava?
7 Silarsuarmi alianartunik ajunaarnersuarnillu misigisaqarfiusumi nutaarsiassaq nuannersoq taanna kisimi inunnut ataavartumik iluaqutaasinnaavoq. Tamatuminnga ilassinnittut silarsuaq tamakkerlugu qatanngutigiinnut kristumiunut ataasiussuseqartunut inuiaassutsikkut, naggueqatigiissutsikkut aningaasatigulluunniit assigiinngissutit pissutigalugit avissaartuussuteqanngitsunut ilaalertarput. Ativaat „asanninneq, tassaammat naammalluinnassutsip qilerutaa“. (Kolossemiut 3:14; Johannesi 15:12) Tamanna siorna nunami Afrikamiittumi uppernarsarneqarluarpoq. Ullaat ilaanni illoqarfiup pingaarnersaani eqqarpalummit inuit itertinneqarput. Naalakkersuisunik uppititsiniartoqalerpoq. Kingusinnerusukkut naggueqatigiit assigiinngitsut sorsuutilermata, ilaqutariit Jehovap Nalunaajaasui uppeqatiminnik naggueqatigiinnit allaneersunik illusisitsimmata avoqqaarineqarput. Ilaqutariit ima akipput: „ Jehovap Nalunaajaasuinnaanik illoqateqarpugut.“ Taakkununnga naggueqatigiissutsikkut assigiinngissutit soqutaanngillat; kristumiutut asanninneq — atugarliortunik tuppallersaaneq ikiuinerlu — pingaarnerpaavoq. Eqqarliisa ilaat nalunaajaasuunngitsoq oqarpoq: „Oqaluffinni tamani ilaasortat uppeqatiminnik killuutiginneriaannaasarput. Jehovap Nalunaajaasui kisimik taamaaliortanngillat.“ Nunani allani inuiaqatigiit imminnut sorsuunnerat pissutigalugu avissaartuuffiusuni tamatumunnga assingusunik nalunaaruteqartarpoq, Jehovap Nalunaajaasuisa ’qatanngutiminnik asanninnerannut’ uppernarsaataasumik. — 1 Petrusi 2:17.
Nutaarsiassap nuannersup inuit allanngortittarpai
8, 9. (a) Nutaarsiassamik nuannersumik ilassinnittut qanoq allannguisarpat? (b) Nutaarsiassap nuannersup kingunerisinnaasaanik taasaqarit.
8 Nutaarsiassaq nuannersoq ’inuunermut matumunnga piumaartussamullu’ Paulusip eqqartugaanut attuumassuteqarpoq. (1 Timotheusi 4:8) Siunissamut nuannersumik qularnaatsumillu neriuutissiinnanngilaatigut, aammali ’inuuneq manna’ pitsaanerulersittarpaa. Jehovap Nalunaajaasuisa inuttut ataasiakkaatut Guutip oqaasianit, Biibilimit, siulersortittarput, Guutip piumasaanut naapertuuttumik inuuneqalerniarlutik. (Tussiaat 119:101) Naapertuilluassuseq ilumoornerlu ineriartortikkaangamikkik inuttut nutaanngorsarneqartarput. — Efesosimiut 4:24.
9 Assersuutigalugu taaneqarsinnaavoq Franco. Taassuma kamannini aqukkuminaatsittarsimavaa. Ingerlanerliortoqaraangat kamarujussuartarpoq aserorterilertarlunilu. Nuliata Jehovap Nalunaajaasui Biibilimik atuaqatigisarpai, taakkualu kristumiutut maligassiunerat iluaqutigalugu Francop piffissap ingerlanerani paasilerpaa allanngortariaqarluni. Taamaattumik Biibilimik atuaqqissaaqatigisalerpai, naggataatigullu anersaap inerititai eqqissineq imminullu naalakkersinnaaneq pissuserilerlugit. (Galatiamiut 5:22, 23) Ukiumi kiffartorfiusumi 2001-imi Belgiami 492-it kuisimmata Franco kuiseqataavoq. Aamma eqqaaneqarsinnaavoq angut inuusuttoq Alejandro. Ikiaroornartunik ima pinngitsuuisinnaajunnaartigaaq allaat eqqaavissuarmi najugaqalerluni tassanilu nassaani tuniniartarpai atornerluinini akissaqartinniarlugu. Alejandro 22-nik ukioqartoq, Jehovap Nalunaajaasuisa Biibilimik atuaqqissaaqatiginissaanik neqeroorfigaat, akuersivorlu. Ullut tamaasa Biibilimi atuartarpoq kristumiullu ataatsimiinnerannut najuuttalerluni. Inuunerminik allanngortitsipallangaarami ukiup affaa qaangiutinngitsoq oqaluusseqataasinnaalerpoq — taamaattumillu siorna Panamami oqaluussisartunut 10.115-inut ilaalluni.
Nutaarsiassaq nuannersoq qanilaartunut iluaqutaavoq
10. Nutaarsiassaq nuannersoq kikkunnit ilassineqqarpa, tassuunalu inuunermut isiginnittaasiat qanoq allanngortinneqarpa?
10 Esajap siulittuutigaa nutaarsiassaq nuannersoq qanilaartunut oqaluussissutigineqarumaartoq. Qanilaartut kikkuuppat? Apustilit Suliaat naapertorlugit tassaapput inuit ’inuunermik naassaanngitsumik eqqortumik isumaqarfiginnittut’. (Apustilit Suliaat 13:48, NV) Tassaapput inuit maniguuttut innuttaasut inissisimaffiinit tamaneersut sallusuissummik tusarliussamut ammasumik uummatillit. Paasivaat Guutip piumasaanik iliorneq silarsuup matuma neqeroorutigisinnaasaanit pitsaanerungaartoq. (1 Johannesi 2:15-17) Jehovap Nalunaajaasuisali oqaluussinerminni inuit uummataat qanoq angusinnaavaat?
11. Paulusip oqaasii naapertorlugit nutaarsiassaq nuannersoq qanoq oqaluussissutigineqartussaava?
11 Assersuutigalugu taaneqarsinnaavoq apustili Paulusi Korinthimiunut ima allattoq: „Qatanngutit, ilissinnut tikiukkama Guutip anngigisaa ilissinnut nalunaajaassutiginngilara oqalloringaarneq ilisimassuseqangaarnerluunniit atorlugit. Aalajangiussimagakkumi ilissinni kisiat pingaartissallugu Jiisusi-Kristusi, tassa taannaasoq [nappakkamut, NV] kikiattugaq!“ (1 Korinthimiut 2:1, 2) Paulusip ilisimasani atorlugit tusarnaartini kakkanniarfiginngilai. Sallusuissutaannarnik Guutimeersunik ajoqersorpai, sallusuissutinik ullumikkut Biibilimiittunik. Malugiuttaaq Paulusip suleqatiminut Timotheusimut kajumissaarutaa: „Oqaaseq oqaluussissutiguuk, qanoq ilisukkulluunniit sassartarit.“ (2 Timotheusi 4:2) Timotheusip „oqaaseq“, tusarliussaq Guutimeersoq, oqaluussissutigisussaavaa. Paulusip aamma Timotheusi ima allaffigaa: „Noqqaassutiginiaruk sulisutut kanngusuutissaqanngitsutut oqaatsimik sallusuissutaasumik nassuiaasutut Guutip saavani misiligaaninni attassinissat.“ — 2 Timotheusi 2:15.
12. Jehovap Nalunaajaasuisa ullumikkut Paulusip siunnersuutai maligassiaalu qanoq malittarpaat?
12 Jehovap Nalunaajaasuisa Paulusip maligassiaa Timotheusimullu siunnersuutai malittarpaat. Guutip oqaasiata pissaanera akueraat Biibililu atorluartarpaat tuppallersaataasinnaasunik neriuuteqalersitsisinnaasunillu eqqortunik oqaasissarsioraangamik. (Tussiaat 119:52; 2 Timotheusi 3:16, 17; Hebræerit 4:12) Ilumoorpoq atuagassiat Biibililersaarutit neqeroorutigisaraat soqutiginnittut namminneq Biibili pillugu paasisaqarnerusinnaaqqullugit. Tamatigulli eqqarsaatit Guutip oqaasianeersut inunnut takutinniarsarisarpaat. Nalunngilaat tamanna maniguuttut uummataannut sunniuteqassasoq, taamatullu Biibili atoraangamikku namminneq uppernermikkut nakussatsinneqartarput.
’Aliasuttut tamaasa tuppallersarsigik’
13. 2001-imi pisimasut suut pissutigalugit ’aliasuttut tuppallersarneqartariaqalerpat’?
13 2001-imi arlalinnik ajunaarnersuaqarpoq, inuppassuillu tuppallersarneqartariaqarlutik. Septembarimi USA eqqugaangaarpoq peqqarniisaarniat New Yorkimi World Trade Center aamma Washington, D.C.-p eqqannguaniittoq Pentagon saassummatigik. Saassussinerit taakku nunamut tamarmut annilaarutaaqaat. Aammattaarli taamaattoqartillugu Jehovap Nalunaajaasui oqaluussiniarlutillu ’aliasuttut tamaasa tuppallersarniartarpaat’. Misigisat amerlanngitsut tulliuttut takutippaat qanoq taamaaliortarnersut.
14, 15. Jehovap Nalunaajaasuisa ilaat pisimasuni marlunni qanoq Biibili iluaqutigalugu aliasuttut tuppallersarsinnaasimavaat?
14 Qatanngutip arnap, piffissaq tamaat oqaluussisartuusup, aqqusinermi arnaq saaffigaa aperalugulu ungasinngitsukkut peqqarniisaarniat saassunnerat qanoq isumaqarfigineraa. Arnaq qissaserpoq. Oqarpoq ajorsuataarluni arlaatigullu ikiuukkusukkaluarluni. Oqaluussisartup oqaluttuuppaa Guutip tamatta assut soqutigigaatigut, allassimaffillu Esaja 61:1, 2 atuarlugu. Maanna arnap oqaatsit taakku paasilerpai inuillu tamaasa aliasunnerarlugit. Naqitaaqqamik pivoq oqaluussisartumullu pulaaqqulluni.
15 Jehovap Nalunaajaasuisa marluk oqaluussillutik angut suliffiutimini sulisoq saaffigaat. World trade Centerimi ajunaarnersuaq eqqaariarlugu Biibilimit oqaatsinik tuppallernartunik takutinniarlugu neqeroorfigaat. Angut akuersivoq, taava Korinthimiunut allakkat aappaat 1:3-7 atuarpaat. Tassani ilaatigut allassimavoq ’Kristusikkut naammangaartumik tuppallersarneqartartugut’. Angutip qujamasuutigeqaa oqaluussisartut pulaarnerat oqaatsinillu tuppallernartunik allanut takutitassaqarnerat, oqarporlu: „Guutip pilluaqqulisi suliasi ajunngitsut pillugit.“
16, 17. Aliasuttut pisunilluunniit ernumassuteqartut Biibilimit qanoq tuppallersarneqarsinnaanerannik takutitsisut misigisat marluk eqqaakkit.
16 Oqaluussisartoq soqutiginnittunik pulaaqqiiniarluni arnap pulaaqqinniakkami ernera naapippaa. Oqaluussisartup nassuiaappaa ajunaarnersuup qanittukkut pisup kingorna eqqaamiui isumaalugalugit. Angutip tupigusuutigaa oqaluussisartup inuit qanoq innersut paasiniarlugu piffissaqarmat. Oqaluttuarpoq peqqarniisaarniat saassussimmata World Trade Centerip eqqaani sulilluni, tamanillu takunnittuulluni. Aperimmat sooq Guutip naalliuutit akuerinerai, qatanngut Biibilimi allassimaffinnik atuaavoq, ilaatigut Tussiaat 37:39, tassani allassimavoq: „Iluartut [Jehovamit] annatsitaassapput, taanna sernissortigissavaat perlunnartoq nalliuppat.“ Angut inussiarnersumik aperivoq qatanngut ilaqutaalu qanoq innersut, aggeqqeqquaa pulaarneqarninilu qujassutigalugu.
17 Peqqarniisaarniat saassussinerisa kingorna aliasuttut tusindillit Jehovap Nalunaajaasuinit tuppallersarneqartut ilagaat arnaq oqaluussisartunit illumiit illumut angalaartunit naapinneqartoq. Pisoq annilaarutigingaarpaa, tusarnaarlunilu oqaluussisartut Tussiaat 72:12-14 atuarmassuk: „Annaatissavai piitsoq ikioqqulluni suaartartoq annikilliortitarlu ikiortissaaleqisoq. Nallittussavai sanngiitsut piitsullu, piitsullu inuunerat annaatissavaa. Aniguisissavai qunutitaanermit nakuuserfigisaanermillu, aavat erlinnangaartuuvoq taassuma isaani.“ Oqaatsit arnap killissutigeqai, oqaluussisartunullu atuaqqeqqullugit, iseqquaalu oqaloqatiginiarlugit. Ullorlu taanna Biibilimik atuaqqissaaqatigiilerput.
18. Jehovap Nalunaajaasuisa ilaat qinoqquneqarami qanoq iliorpa?
18 Jehovap Nalunaajaasuisa ilaat illoqarfiup ilaani pigissaarfiusumi Guutip naalagaaffia pillugu nutaarsiassamik nuannersumik siornatigut soqutiginnittoqarfiunngitsumi neriniartarfimmi sulisarpoq. Peqqarniisaarniat saassussinerisa kingorna tamaani najugallit aalassatsinneqangaarput. Saassussinerup kingorna tallimanngornermi unnukkut neriniartarfiup piginnittuata isersimasut tamaasa kajumissaarpai naneruummik tigumiarlutik silami minutsialunni nipaallisimallutik ajunaartut eqqaaniassagaat. Allat misigissusiinik ataqqinnilluni qatanngut angut aneqataavoq nipaallisimaqataallunilu. Piginnittup nalunnginnamiuk Jehovap Nalunaajaasuisa ilagigaat, minutsialunni nipaallisimareeramik qinnuigaa najuuttut qinoqatigiinnermi siulersoqqullugit. Qatanngut akuersivoq. Qinnummini aliasuttorpassuit eqqaavai, oqarlunili neriuuteqanngitsutut aliasuttariaqanngitsut. Eqqartorpaa siunissaq erloqinartunik taamaattunik pisoqarfiujunnaartussaq, oqarlunilu tamanit Guuti tuppallersaasoq qanillineqarsinnaasoq Biibili tunngavigalugu eqqorluartumik ilisarsinikkut. Amenneertoqareermat piginnittup inuit 60-init amerlanerusut neriniartarfiup silataaniittut malitsigalugit qatanngut ornippaa, qutsavigalugu eqitaarlugulu, oqarlunilu aatsaat taama qinummik nuannertigisumik tusarluni.
Inuiaqatigiinnut iluaqutaasoq
19. Misigisap suup takutippaa Jehovap Nalunaajaasuisa ileqqorissaarnerat ilaasa malugisaraat?
19 Ingammik maannakkut sumiiffinni amerlasuuni inuit oqartarput Jehovap Nalunaajaasuinik sanileqarnertik iluaqutigigitsik. Paasinarpoq eqqissinermik, peqqusersuissutsimik ileqqorissaartuunermillu siuarsaasoqarnera ajunngitsumik sunniuteqartartoq. Nunami Asiap qeqqaaniittumi Jehovap Nalunaajaasuisa ilaasa politiini isumannaallisaasuni atorfiliusimasoq naapippaat. Oqarpoq siornatigut upperisarsioqatigiinnik assigiinngitsunik misissuisimalluni. Jehovap Nalunaajaasui misissornerugamigit peqqusersuinnerat ileqqorissaarnerallu killissutigingaarpai. Upperluartuunerat ajoqersuutaasalu Biibilimit tunngaviqarnerat nuannarai. Angut Biibilimik atuaqqissaaqatigineqarnissaminut akuersivoq.
20. (a) Jehovap Nalunaajaasuisa siorna sulinerannik nalunaarusiap suna takutippaa? (b) Suup takutippaa suli suliassaqangaartoq, suliassarpullu qanoq isigaarput?
20 Allaaserisami matumani misigisalikkersaarutit, oqaluttuarineqarsinnaasut tusindilikkuutaat ilaminiinnannguisa, takutippaat Jehovap Nalunaajaasui ukiumi kiffartorfiusumi 2001-imi ulapissimasut. Inuit millionilikkuutaat oqaloqatigaat aliasuttorpassuillu tuppallersarlugit, iivangkiiliumillu oqaluussissutiginninnerat kinguneqarluartarluni. 263.431-t kuisinnermikkut Guutimut tunniulluinnarsimanertik takutippaat. Silarsuaq tamakkerlugu oqaluussisartut 1,7 procentinik amerlisimapput. 15.374.986-it Jiisusip toquneranik eqqaaniaalluni nalliuttorsiornermut najuummata, paasinarsivoq suli suliassaqangaartoq. (1 Korinthimiut 11:23-26) Qanilaartunik nutaarsiassamik nuannersumik ilassinnikkumasunik qanortoq ujarlertuarta. Jehovap „ukiua saammaassivik“ atuukkallartillugu ’aserorsimasumik uummatilinnik’ qanortoq tuppallersaajuarta. Suliassamik taassuminnga suliaqarneq nuannerluinnartuuvoq! Qularnanngilluinnartumik Esajatut tamatta misigivugut, taanna oqarami: „Uanga [Jehova] tipaatsuutigingaarpara, tarnima Guutiga qiimmattaatigaa.“ (Esaja 61:10) Qanortoq Jehovap atorluartuarlisigut siulittuutinik ukuninnga piviusunngortitsinermini: „Guutip [Jehovap] iluarneq issumit puttutitissavaa erinalimmillu unnersiutiginnissut naalersissallugu inuiaat tamarmik takkuanni.“ — Esaja 61:11. (wE 1/1 2002)
Uku eqqaamavigit?
• Inuit qanilaartut Jiisusip oqaluussissutigisaanik nutaarsiassamik nuannersumik tusarnertik qanoq iluaqutigaat?
• Ukiuni hundredelinni siullerni Jiisusip ajoqersugaasa oqaluussissutaannut tusarnaartut qanoq pilluaqquneqaatigaat?
• Ullumikkut tusaarusuttut nutaarsiassaq nuannersoq qanoq iluaqutigaat?
• Iivangkiiliumik oqaluussissutiginninnisarput qanoq isigaarput?
[Atuaqqissaarnermi apeqqutit]
[Qupp. 15-mi assiliartat]
Jehovap Nalunaajaasuisa oqaluussineq akisussaaffigalugu nalunngilaat
[Qupp. 17-mi assiliartat]
Nutaarsiassamik nuannersumik ilassinnittut silarsuaq tamakkerlugu qatanngutigiissuarnut ataasiussuseqartunut ilaalertarput