Qatanngutigiit assigiinngitsunik isiginnittaaseqalersut

ANGAJOQQAAT aalajangingaat meeqqanut avaqqussassaanngitsumik sunniuteqartarput. Ullutsinni taamaappoq soorlu naatsiivimmi Edenimi taamaassimasoq. Adamip Evallu pikitsitsinerat inunnut tamanut sunniuteqarpoq. (1 Mosesi 2:15, 16; 3:1-6; Romamiut 5:12) (1 Mosesi 2:15, 16; 3:1-6; Romamiut 5:12)Taamaakkaluartoq piumagutta tamatta Pinngortitsisumut attaveqarluarnermik ineriartortitsisinnaavugut. Tamanna Kainimik Abelimillu inuit oqaluttuarisaaneranni qatanngutigiinik siullernik oqaluttuami takusinnaavarput.

Adami Evalu Edenimit anisitaareerlutik Guutimit oqaluffigineqarnersut Biibilimi allassimanngilaq. Taamakkaluartoq Jehova ernerinut paasitinngitsuunngilaq. Qularutissaanngivissumik angajoqqaavi aqqutigalugit qanoq pisimasoqarneranik ilisimatinneqarput. Takusinnaavaat ’kerubit panalu innaallagissatut naaralaartoq . . ., orpimmut inuunartumut aqqutaasumut nakkutilliisoq’. (1 Mosesi 3:24) Aamma paasivaat Guuti ilumoortoq oqarami kiagunneq anniarnerlu inuunermi pissusiviusunut ilaassasut. — 1 Mosesi 3:16, 19.

Jehovap pulateriaarsummut oqaasii Kainip Abelillu nalunngissimassavaat: „Akerariissikkumaarpassi illit arnarlu, illit kinguaassatit taassumalu kinguaassai: Taassuma kinguaassaasa niaqqut aserortissavaat, illilli taassuma kinguaassaa kimmiatigut kiiumaarpat.“ (1 Mosesi 3:15) Kainip Abelillu Jehova pillugu ilisimasaasa taassumunnga iluarisaasumik attaveqarsinnaalertissavai.

Kainip Abelillu Jehovap siulittuutaanik pissusiinik asannittunik iluaqutaasunillu eqqarsaatiginneqqissaarnertik Jehovamit akuerisaarusulissutigisimassavaat. Taamatulli kissaateqarnertik qanormitaava ineriartortinniarpaat? Guutimik pallorfiginnikkusunnermik inunnguutsiminnit kissaateqarnertik naapertorlugu iliuuseqarniarpat anersaakkut ittunik pingaartitsineq ineriartortillugu uppissuseqalerlutillu? — Matthæusi 5:3.

Qatanngutigiit pilliuteqarput

Kinguningaatsiaagut Kaini Abelilu Guutimut pilliuteqarput. Kaini nunap inerititaanik tunissutinik pilliuteqarpoq, Abeli savaatimi piaqqeqqaataanik pilliuteqartoq. (1 Mosesi 4:3, 4) Qatanngutigiit taamani 100-t missaannik ukioqarunarput, Adami 130-nik ukioqarluni Set ernernertaarimmagu. — 1 Mosesi 4:25; 5:3.

Pilliuteqarnerisa ersersippaat Kainip Abelillu ajortiliunertik akuerigaat Guutimillu iluarisaanissartik kissaatigigaat. Jehovap pulateriaarsuk arnallu kinguaassaa pillugit neriorsuutaa isumaliutigisimassavaat. Kainip Abelillu Jehovamik iluarisaasutut attaveqarnissartik anguniarlugu piffissamik nukinnillu qanoq atuisimatiginersut oqaatigineqanngilaq, Guutilli pilliutaannik ilassinninnerata qamuuna eqqarsaataannik paasisaqalersippaatigut.

Biibilimik nassuiaasartut ilaasa eqqarsaatersuutigaat Evap Kaini „kinguaassatut“ pulateriaarsummik suujunnaarsitsisussaasorigaa, inunngormammi oqarpoq: „[Jehovap] ikiuineragut angut pinngortippara.“ (1 Mosesi 4:1) Kaini taamatut eqqarsarsimassaguni kukkulluinnarpoq. Abelili uppernikkut ilumoorluni pilliuteqarpoq. Taamaammat allassimasutut Abelip  „uppernikkut . . . Guutimut sassaappaa pilliut Kainip pilliutaanit annerusoq“. — Hebræerit 11:4.

Abelip anersaakkut ittunik paasisaqarnera Kainillu paasisaqannginnera qatanngutigiit assigiinngissutigiinnanngilaat. Isiginnittaatsimikkuttaaq assigiinngitsuupput. Taamaattumik allassimasutut „[Jehovap] Abelip pilliutaa iluaraa Kainilli pilliutaa iluarinagu“. Kainip pilliutini itinerusumik eqqarsaatigigunanngilaa misigissuseqaranilu sassaallugu. Guutilli qallikkuinnaq pallorfiginninneq taamaattoq naammaginngilaa. Kaini ajortumik uummateqalersimavoq, Jehovallu takusinnaavaa Kaini iliuutsiminut ajortumik pissuteqartoq. Kainip pilliutini iluarineqanngitsoq paasigamiuk kinaassusivia qisuariarneratigut ersersinneqarpoq. Allamik isumataarnermut taarsiullugu „Kaini ajuallappoq nakangallunilu angalalerluni.“ (1 Mosesi 4:5) Kiinaata isikkuata pissusilersorneratalu eqqarsaatai siunertarisaalu ajortut qulaarpai.

Mianersoqqussut qisuariarnerlu

Jehovap, Kainip isiginnittaasianik ilisimannittup, naqqippaa ima oqarfigalugu: „Sooq ajuallappit? Sooq nakangallutit angalalerpit? Ajunngitsulioruit nakimanak niaqqut makitissimasinnaavat, ajunngitsuliunngikkuilli ajorti matup killingani qamavoq. Pilerigigaluarpaatit, illilli taassumunnga naalagaassaatit.“ — 1 Mosesi 4:6, 7.

Tamanna ilinniarfigisinnaavarput. Ajorti matutta killingani aamma qamavoq, nungukkumalluta. Guutilli nammineq piumasatsinnik iliorsinnaatippaatigut ajunngitsuliornissamillu qinersisinnaatilluta. Jehovap Kaini ’ajunngitsulioqqullugu’ kajumissaarpaa, pinngitsaalinngilaali. Kainip nammineq piumasani maliinnarlugu iliornissani qinerpaa.

Oqaluttuaq isumassarsiarititaasoq nangippoq: „Kingorna Kainip nukki Abeli oqaluffigaa, ilaannilu silamiitillutik saassuppaa toqullugulu.“ (1 Mosesi 4:8) Kaini taamaalilluni Jehovap ilitsersuutaanik akerlilersuivoq piaaralunilu qatanngunni toqullugu. Peqqissimineranik malunnartoqanngivippoq Jehovamit aperineqarami: „Naak nukkat Abeli?“ Akerlianik sorraalluni misigittaallunilu akivoq: „Naluara, nukara paarisassarinerpara?“ (1 Mosesi 4:9) Kainip erseqqissumik sallulluni akisussaaffinilu tamaasa akisussaaffigiumanagit akissuteqarnermigut naakkittaassutsini ersersippaa.

Jehovap Kaini perloqqullugu naatsiiviup Edenip eqqaanit aallartippaa. Narsaammut perloqqusineq Kainimut malunnarnerusussaagunarpoq. Narsaat naggorissaraluarpagu  inerititaqassanngilaq. Angalaannartunngussaaq qimaasunngussallunilu. Kainip pillaatisiani artornarpallaarnerarlugu naammagittaalliutigigamiuk, qatanngummi toqutaaneranut akiniarneqarnissani annilaangatigaa, ilumoorlunili peqqissiminngilaq. Jehovap Kaini Abelimik toqutsinerminut akiniarneqarluni toqutaaqqunagu „nalunaaqutserpaa“ — aalajangersagaq pingaaruteqarpasisssoq tamanit ilisimaneqarluni maleruarneqartoq. — 1 Mosesi 4:10-15.

„Taava Kaini Jehova qimallugu nunami Nodimi Edenip kangiani nunaqalerpoq.“ (1 Mosesi 4:16) Qatanngummi imaluunniit jorngumi ilaannik nuliarluni ernerminut angajulliliaminut atsiullugu illoqarfiliorpoq Enokimik atsikkaminik. Kainip kinguaavisa ilaat, Lemeki, siuaasamisut nakuuserumatutigaaq. Kainip kinguaavi kingusinnerusukkut Noap nalaani ulersuarmi nungutitaapput. — 1 Mosesi 4:17-24.

Qanoq ilinniarfigisinnaanerivut

Kainimik Abelimillu oqaluttuaq ilinniarfigisinnaavarput. Apustili Johannesip kristumiut asaqatigeeqqullugit kajumissaarpai „assigissanagulu Kaini Ajortumit pisuusoq nukkaminillu toqutsisoq“ Kainip ‘suliai ajortuupput nukaatali suliai iluartuullutik.’ Johannesi nangilluni allappoq: „Kinaluunnit qatanngumminik uumiginnittoq toqutsisuuvoq, nalunngilarsilu toqutsisimasoq kinaluunniit inuunermik naassaanngitsumik immini pigisaqanngitsoq.“ Aap, kristumioqatitsinnut iliuutsivut Guutimut attaveqarnitsinnut siunissamilu inuusinnaanissatsinnut sunniuteqarput. Uppeqatitsinnik uumiginnikkutta Guutimit iluarisaasinnaanngilagut. — 1 Johannesi 3:11-15; 4:20.

Kaini Abelilu assigiimmik perorsarneqarsimassapput, Kainili Guutimut uppinngilaq. Iluamik oqaatigissagaanni Diaavulutut isiginnittaaseqarpoq, „taanna pileqqaarneranniit toqutsisuuvoq“ „sallumullu ataataalluni“.(Johannesi 8:44) Kainip pissusilersornerata takutippaa tamatta qinersisariaqartugut, ajortuliornissamik qinersisut Guutimit qimaguttartut, Guutilu peqqissiminatik isumataanngitsunut eqqartuussiumaartoq.

Akerlianik Abelip Jehova upperaa. Taanna pillugu allassimavoq: „Uppernikkut Abelip Guutimut sassaappaa pilliut Kainip pilliutaanit annerusoq, tamatumuunalu nalunaajaatigineqarpoq iluartuusoq. Pilliutai pillugit Guutip oqaatigaa taamaattuusoq.“ Aap, Abelip oqaaserisaanik Biibilimi nassaassaqanngikkaluarpoq, uppernermigut maligassaalluartukkut „suli oqaluppoq“. — Hebræerit 11:4.

Abeli angutit arnallu aalajaatsorpassuit assuarnaassutsiminnik attassiuaannartut siullersaraat. ‘Aava nunamit Jehovamut torlulasoq’ puigorneqanngilaq. (1 Mosesi 4:10; Lukasi 11:48-51) Abelitut uppissuseqarutta, uaguttaaq Jehovamut erlinnartumik ataavartumillu attaveqalersinnaavugut. (wE 1/15 2002)

[Qupp. 31-mi ungalusaq]

NAASORISSAASOQ SAVAATILILLU

Nunarsuarmik naggorissaanissaq uumasunillu paarsinissaq aallaqqaataaniilli Adamimut suliassiissutigineqartut ilagaat. (1 Mosesi 1:28; 2:15; 3:23) Ernera Kaini naasorissaasunngorpoq, Abeli savaatilinngortoq. (1 Mosesi 4:2) Inuit ulersuaqanngikkallarmat taamaallaat paarnat naasullu nerisaralugit sooq savanik kinguaassiortitsippat? — 1 Mosesi 1:29; 9:3, 4.

Savat uumassagunik ineriartussagunillu inunnit isumagineqartariaqarput. Abelip suliaa inuiaat pileqqaataanit savanik kinguaassiortitsisimanerannut uppernarsaataavoq. Inuit pileqqaarnerani immuttortarnersut Biibilimi oqaatigineqanngilaq, naatitaannarnilli nerisaqaraluarlutik savat meqqui atisaliaralugit allanullu atortarsinnaavaat. Savallu toqugaangata amii assigiinngitsunut iluaqutigisinnaasarpaat. Assersuutigalugu „Guutip Jehovap Adami nulialu amernik atisassiorpai atisassianilu taakkununnga atitillugit.“ — 1 Mosesi 3:21.

Kainip Abelillu aallaqqaataani suleqatigiissimanissaat naatsorsuutigissallugu pissusissamisoorpoq. Tamarmik immikkut ilaqutariinni allat atisassiarisinnaasaannik nerisassiarisinnaasaannilluunniit pissarsisinnaapput.

[Qupp. 32-mi assiliartaq]

Kainip suliai ajortuupput, nukaatali suliai iluartuullutik.