Atuartartut apeqqutaat

Nuliaq kristumiuusoq qanoq ililluni uiminut Jehovamut Nalunaajaasuunngitsumut ilumoortumik Guutimut naalatsigiitigaluni pissusilersorsinnaava, assersuutigalugu uiusoq Biibilimut akerliusumik upperisarsiorluni nalliuttorsiorniarpat?

Ilisimassuseqartariaqarlunilu pissuserissaartariaqarpoq. Pisussaaffiit taakku marluk tamaasa anguniagarigunit eqqortuliussaaq. Jiisusi pisimasumut assingusumut tunngatillugu ima ajoqersuivoq: „Taavami kaasari tunisiuk kaasarip piinik Guutilu Guutip piinik.“ (Matthæusi 22:21) Jiisusip oqartussaasunut qulliunerusunut pisussaaffiit, kingusinnerusukkut kristumiut peqquneqarnerminni naalatassaat eqqartoraluarpai. (Romamiut 13:1) Ajoqersuinerali aamma nuliaasup Guutimut pisussaaffianut, Biibililu naapertorlugu uiminut uppeqatiginngisaminut naalatsigitinnissamut pisussaafianut atorsinnaavoq.

Biibilimik ilisimannittup kialuunniit akerlilerusunnavianngilaa kristumiut, pingaarnerpaamik Guutimut ajugaqanngitsumut pisussaaffeqarnissaat  ilumoorfiginnittuarnissaallu erseqqissarneqartoq. (Apustilit Suliaat 5:29) Taamaattoq pallorfiginnittut ilumoortut Guutip inatsisai qutsissut unioqqutinngikkarluarlugit qulliunerusut piumasaqaataat amerlanertigut naammassisinnaavaat.

Hebræerit pingasut Danielip allagaani kapitali 3-mi allaaserineqartut ilinniarfigilluarsinnaasatsinnik maligassiuipput. Naalagaata kunngip Nebukadnezarip taakku pingasut naalagaanertallu Durap qooruanukaqqullugit naalakkerpai. Nalunngilaat guutipilussiortoqarniartoq — najuutinnginnissartillu kissaatiginerusimassavaat. Danieli peqataannginnissaminut pissutissaqarluarunarpoq, taakkuali pingasut itigartitsisinnaanngillat. * Taamaatumik peqqussut sapinngisamik malippaat, guutipilussiornermulli peqataannginnissartik aalajangiussimavaat — guutipilussiunngillallu. — Danieli 3:1-18.

Tamatumunnga assingusumik uiusup Jehovamut Nalunaajaasuunngitsup nuliani kristumiuusoq, Biibilimut akerliusumik upperisarsiorluni nalliuttorsiornermut atatillugu iliuusererusunngisaanik iliuuseqaqqusinnaavaa. Assersuutigalugu nalliuttorsiornermi nerisarineqartartunik nerisassioqqusinnaavaa. Imaluunniit ilaqutariit tamarmik, nuliaasoq ilanngullugu, ilaqutamini nereqatigiinnissaq pulaaginnarnissarluunniit piumasarisinnaavaa. Nulianiluunniit nalliuttorsiorneq sioqqullugu niuerniarpat — nerisassanik nalliuttorsiutissanik imaluunniit tunissutissaminik, poortuutissanik allaffissanillu tunissutinut atortussanik piseqqullugu qinnuigisinnaavaa.

Kristumiu nuliaasoq soorunami eqqunngitsumik upperisarsiornermut attuumassuteqartunut peqataajumassanngilaq, piumasaqaatinulli qulaani taaneqartunut atatillugu qanoq isiginnittaaseqassava? Uiusoq ilaqutariinnut qullersaavoq, Guutillu oqaasiani allassimavoq: „Nuliaasusi, uissinnut naalatsigitissaasi tamanna Naalakkami ileqqussaammat.“ (Kolossemiut 3:18) Taamatut pisoqartillugu uimi piumasaatut iliorsinnaava, uiminut naalatsigitiitigaluni Guutimut ilumoorfiginnilluni? Uiminut naalannissani Jehovamullu nalannissani, tassa naalannerusariaqakkani, qanoq ataatsikkoortissinnaanerlugit aalajangertariaqarpaa.

Uiusup nuliani piffissani allani aalajangersimasunik nerisassioqqusinera akornutissaqanngilaq, immaqa mamarinerpaasarigamiuk ukiulluunniit taamaalinerani nerisartagarigamiuk. Nuannaarluni piumasaa malissavaa takutillugulu oqartussaasuunera akuerigini. Maannakkut nalliuttorsiornermut atatillugu uimi piumasarisaatut iliorsinnaanersoq apeqqutaalerpoq. Kristumiut nuliaasut ilaasa ilerasuuteqaratik ulluinnarni nerisassiortarnermisut isigiinnassavaat. Kristumiup ilumoortup nalliuttorsiornermut attuumassuteqartut immikkut pingaarutilittut isigisariaqanngilai, naak uia taamaalioraluartoq. Taamaatuttaaq ippoq uiata piffissani allani ilaquttani pulaarniarlugit ilaaqquppani. Ullormi upperisarsiornikkut nalliuttorsiorfinni taamaaliorsinnaava? Pisiniartilluni pisiareqqusai aamma pisiarisinnaavai? Pisiareqqusai sumut atorniarnerai akuliuffiginngikkaluarlugu nalinginnaasumik taamaaliussannginnerpa?

Soorunami nuliaasup kristumiup iliuutsimi allanut qanoq sunniuteqarsinnaanera eqqarsaatigisariaqarpaa. (Filippimiut 2:4) Allammi isumaqalersikkusunngilai nalliuttorsioqataalluni, soorlu hebræerit pingasut Durap qooruanukartillutik allanik takuneqarusukkunanngitsut. Taamaattumik nuliaasoq silatusaassaaq mianersorluni uini eqqarsalersinniarsariguniuk paasiniarlugu — misigissutsini eqqarsaatigalugit — nalliuttorsiornermut attuumassuteqartut nammineerluni iliuuserisinnaannginnerai, taamaalillunilu nuliani ataqqinninnermik takutitsivigalugu. Immaqa paasisinnaassavaa iliuutsinut upperisarsiornermut tunngasunut nuliami nalunngeqatiginnissusianut akerliusunut peqataannginnerata marluullutik peqqusiileqinngitsoortissagaatik. Aap, eqqissilluni pissutsinik oqaluuserinnittarneq aaqqiissutissaqalersitsisarpoq. — Ussatit 22:3.

Ataatsimut isigalugit kristumiup aalajaatsup periarfissat assigiinngitsut misissoqqaarlugit aalajangiisariaqarpoq. Guutimut naalanneq salliutinneqartariaqarpoq, soorlu hebræerit pingasut taamaaliortut. (1 Korinthimiut 10:31) Tamanna eqqarsaatigiitigalugu ataasiakkaat nammineq aalajangertussaavaat, oqartussaasup qulliunerusup — ilaqutariinni imaluunniit inuiaqatigiinni — piumasaanut qanoq iliussanerlutik, unioqqutitsinatik. (wE 12/15 01)

[Quppernerup ataani ilanngussaq]