Biibilimi najoqqutassiat qanoq iluaqutigisinnaagitit

QULARUTIGIGUNANNGILAT uumasut nalugaluarlugu silatuujusut maskiinallu programmiligaasut. Inuilli najoqqutassianik siulersorneqartussatut pinngortitaapput. Tamanna qanoq nalunngissinnaagatsigu? Inatsisit najoqqutassiallu naapertuilluartut tamarmik Jehova Guutimit pilerfeqarput, inuillu siulliit marluk pinngortikkamigit oqarpoq: „Inunnik pinngortitsisa immitsinnik assililluta uatsitut.“ Pinngortitsisoq anersaajuvoq; uagutsitut inuttut uineqarnani. Taamaattumik ’imminut assililluni’ pinngortimmatigut isumaqarpoq kinaassusia ersersissinnaagipput pissusiilu ilaatigut ilaarsinnaallugit. Inuit najoqqutassianik, ileqqut ajunngitsut tungaatigut najoqqutassaasorisaminnik, siulersorneqarnissaminnut piginnaaneqarput. Jehovap oqaatsimini najoqqutassiarpassuit taamaattut allatsissimavai. — 1 Mosesi 1:26; Johannesi 4:24; 17:17.

Ilaat immaqa oqarumassapput: ’Biibilimili najoqqutassiat hundredelippassuupput, tamaasa ilisimasinnaanngilakka.’ Tamanna ilumoorpoq. Biibilimili najoqqutassiat tamarmik iluaqutaagaluarlutik ilaat allanit pingaannginnerupput.  Tamanna Matthæusi 22:37-39-mi erserpoq, tassani Jiisusip takutippaa Mosesip inatsisaani inassutit najoqqutassiallu ilaat allanit pingaarnerusut.

Taavami najoqqutassiat sorliit pingaarneruppat? Biibilimi najoqqutassiat pingaarnersaat Jehovamut attaveqarnitsinnut toqqaannartumik tunngassuteqarput. Maleruarutsigik Pingortitsisoq ileqqussatigut pujorsiutitsinnik sunniinerpaassaaq. Aammattaaq najoqqutassiaqarpoq inunnut allanut attaveqarnitsinnik sunniisunik. Maleruarutsigik imminuinnaq isumagineq uangasiornermut ilisarnaataasoq akiorsinnaassavarput.

Aallarniutigeriartigu sallusuissutit pingaarnersaasa ilaat, aamma Biibilimi najoqqutassiaasoq. Sallusuissut suna, aamma qanoq sunnersinnaavaatigut?

’Qutsinnerussaartoq nunarsuarmi tamarmi’

Erseqqissumik Biibilimi takutinneqarpoq Jehova sunik tamanik Pinngortitsisuusoq, Guutiusorlu Ajugaqanngitsoq. Kinaluunniit tassunga naleqqiussinnaanngilaq taarserluguluunniit sassarsinnaanani. Tamanna Biibilimi sallusuissutit tunngaviusut ilagaat. — 1 Mosesi 17:1; Oqaluussisartup oqaasii 12:1.

Tussiaatit-nik allattut ilaat Jehova pillugu ima allappoq: ’Kisivit . . . Qutsinnerussaartuuvutit nunarsuarmi tamarmi.’ Itsaq kunngi Daavi allappoq: „[Jehova], illit pigaat naalagaaffik, illimmi tamanut qullersaasutut qutsissisitaavutit.“ Ilisimaneqarluartorlu pruffiiti Jeremia ima oqarusussimavoq: „Ilittut ittoqanngilaq, [Jehova], angingaarputit, aqqillu angingaarpoq pissaallunilu.“ — Tussiaat 83:19; 1 Nalunaarsuutit 29:11; Jeremia 10:6.

Guuti pillugu sallusuissutit taakku ulluinnarni qanoq sunnertariaqarpaatigut?

Qularutigineqarsinnaanngilaq kina inuunitsinni salliutittariaqaripput — Pinngortitsiserput Inuunermillu tunisiserput. Malugeqqusaaqqajaanerit suulluunniit pinngitsoornissaat pissusissamisoortuussanngila? Inuit ilaat taamaaqqajaanerusut malunnarpoq. Najoqqutassiat silatuut maleruarsinnaasatta ilaat tassaavoq: ’Qanorluunniit ilioraluarutta taamaaliussasugut Guutip ataqqinaatissaanik.’ (1 Korinthimiut 10:31) Tamatumani pruffiiti Danieli maligassiuilluarpoq.

Oqaluttuarisaanermi pisimasup takutippaa Babylonip kunngia Nebukadrezari ilaanni sinnattuni nassuiaqqusani eqqissiunnaarutigigaa. Tamarmik sapilermata Danielip sinnattoq pillugu paasiumasaanik tamanik oqaluttuuppaa. Tamanna Danielip nammineq ataqqinaatiginiarpaa? Naamik, Guutimut qilammiittumut, ’isertukkanik saqqummersitsisartumut’, ataqqinaatigitippaa. Aammattaaq Danieli oqarpoq: „Uannut saqqummersinneqarmat imaanngilaq inoqatinnit ilisimassuseqarnerusunga.“ Najoqqutassiani naapertorlugit Danieli iliuuseqarpoq. Taamaattumik eqqumiiginanngilaq Danielimik allakkat-ni Jehovap isaani ’angutitut nuannarineqangaartutut’ pingasoriarluni taaneqarmat. — Danieli 2:28, 30; 9:23; 10:11, 19.

Danielip maligassiaa malikkutsigu iluaqutigissavarput. Taamaaliussagutta pingaaruteqarpoq eqqortumik pissuteqarnissarput. Iliuutsivut kimut ataqqinaataassappat? Atukkavut qanorluunniit ikkaluarpata Biibilimi najoqqutassiaq pingaarutilik una maleruarsinnaavarput: Jehova silarsuarmi kisimi Oqartussaavoq. Tamanna  maleruarutsigu Jehovap isaani ’nuannarineqangaassaagut’.

Maanna takussavavut najoqqutassiat tunngaviusut allanut attaveqarnitsinni atorsinnaasavut. Inuppassuit imminut pingaartingaarnerat eqqarsaatigalugu tamanna ingammik unamminiarnarsinnaavoq.

’Makitajuitsuunissigut allat ilissinnit annerutissigit’

Imminut eqqarsaatigeqqaartartut nalerisimaartuugajunngillat. Taamaattut amerlanersaat maannakkorpiaq ajunnginnerusumik inuuneqarusupput. Isumaqarput anneruniajuitsuuneq sanngiinnermut ersiutaasoq, allallu kisimik naammagittartuusussaasut. Qaffanniarneq iluatsitsiniarnerlu pineqaraangata suna tamaat atorsinnaasoraat. Illilli taamaattuusariaqarpit?

Taamatut isiginnittaasillit ullut tamaasa naammattoortaraluarlugit Guutip kiffai sunnertittariaqanngillat. Kristumiut inersimalluartut najoqqutassiaq una maleruarusuppaat: „Misiligaanermit aniguisoq tassaanngilaq imminut nersortoq, tassaallunili [Jehovap] nersugaa.“ — 2 Korinthimiut 10:18.

Aammattaaq tamatumunnga tunngatillugu najoqqutassiaq Filippimiunut allakkat 2:3, 4-miittoq eqqarsaatigissallugu pitsaassaaq. Tassani ima kajumissaarneqarpugut: „Namminissarsiorneq imminulluunniit angisuutinneq tunngavigalugit iliuuseqartaqinasi, makitajuitsuunissigulli allat ilissinnit annerutissigit. Tamassi immikkut nammineq iluaqutissarsi pinnagu inoqatississaaq iluaqutissaat isumagisiuk.“

Nammineq naleqassutsimik peqqissumik isiginnittaasilik tassaavoq  Gideoni, itsaq Hebræerit ilaat eqqartuussisoq. Israelimi siulersuisunngorniarsarinngilaq. Siulersuisunngoqquneqaramili imminut naleqqutinngitsutut isigaluni oqarpoq: „Eqqarlerisakka Manassekkunni nikanarnersaapput, uangalu ataatama inoqutaani nukarlersaavunga.“ — Eqqartuussisut 6:12-16.

Jehovap Gideoni ajugaatimmagu Efraimikkut angutitaasa uteriillutik saqitsaateqatiginiarsaraat. Gedioni qanoq qisuariarpa? Ajugaanini makitassutigilerpaa? Naagga. Sallaatsumik akilluni ajunaarneq pinngitsoortippaa. „Uanga naammassisara suugami ilissi naammassisassinnut naleqqiullugu?“ Tamatuma Gedioni maniguuttuusoq takutippaa. — Eqqartuussisut 8:1-3.

Tamakku qangarsuarli pisimagaluartut eqqarsaatigeqqissaarneri iluagutigisinnaavavut. Takuneqarsinnaavoq Gedionip isiginnittaasia ullumikkut isiginnittaatsimit nalinginnaasumit allaanerulluinnartoq, iliuutsinilu iluaqutigigai.

Isummap saqqummilaartup namminissarsiortuusup nammineq naleqassutsitsinnik kukkussumik isiginnittaaseqalersissinnaavaatigut. Tamanna Biibilimi najoqqutassianit iluarsineqarsinnaavoq, najoqqutassiat taakku Pinngortitsisumut allanullu sanilliulluta inissisimaffitsinnik paasitimmatigut.

Biibilimi najoqqutassiat maleruaraangatsigik piffissami matumani alutorineqartunit imaluunniit misigissutsitsinnit inuttulluunniit soqutigisatsinnit aqunneqassanngilagut. Najoqqutassiat naapertuilluartut ilinniarnerujartortillugit najoqqutassiisoq ilisarinerujartussavarput. Taamaattumik pitsaassaaq iluaqutaallunilu Biibilimi atuaraangatta najoqqutassiat immikkut maluginissaat. (Takuuk ungalusaq.)

Jehovap inuit uumasunit, nalugaluarlugu iliuuseqartartunit, qutsinnerusutut pinngortippai. Guutip piumasaatut iliussagutta Biibilimi najoqqutassiat maleruartariaqarpavut. Taamaalilluta qulakkiissavarput ileqqussatigut pujorsiuterput ajoquteqanngitsoq, pujorsiut tatiginartoq Guutip silarsuassaanut nutaamut, ’iluassutsip najugarisaanut’, siulersuisoq. — 2 Petrusi 3:13. (wE 2/15 02)

[Qupp. 6-mi ungalusaq/assiliartat]

Biibilimi najoqqutassiat iluaqutaasut

Ilaqutariinni:

„Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.“ (1 Korinthimiut 10:24)

„Asanninneq . . . namminissarsiortarinngilaq.“ (1 Korinthimiut 13:4, 5)

„Ilississaaq tamassi immikkut nuliasi immissisut asasussaavasi.“ (Efesosimiut 5:33)

„Nuliaasusi, uissinnut naalatsigitissaasi.“ (Kolossemiut 3:18)

„Naalanniaruk ataatat silarsuarmut pisitsisit, anaanallu utoqqalisoq sumiginnaqinagu.“ — Ussatit 23:22.

Atuarfimmi, niuernermi suliffimmiluunniit:

„Oqimaalutaaviit peqquserluutit [Jehovap] maajugai . . . Iluanngitsoq pissarsiaqartarpoq piunngitsumik.“ (Ussatit 11:1, 18)

„Tillittartoq tillissaarli, ilungersorlunili suliniarli.“ (Efesosimiut 4:28)

’Suliumanngitsoq aamma nerissanngilaq.’ (2 Thessalonikamiut 3:10)

„Qanorluunniit iliorussi taamaaliortaritsi uummammit pisumik — [Jehovamut].“ (Kolossemiut 3:23)

’Tamatigut eqqortumik iliorumasarpugut.’ — Hebræerit 13:18.

Pisuussutinut isiginnittaaseq:

„Pisuussutinik piumatuallaartoq pillarneqanngitsoortussaanngilaq.“ (Ussatit 28:20)

„Aningaaseritooq aningaasaatiminik ilatsaasuiuartarpoq.“ — Oqaluussisartup oqaasii 5:9.

Nammineq naleqassutsimik naliliineq:

„Imminut ataqqinartinniarsarineq nanertuutaavoq oqimaatsoq.“ (Ussatit 25:27)

„Allap nersorlisit, illit immminut pinnak,“ (Ussatit 27:2)

„Tamassi immikkut ima oqarfiginiarpassi: Immissinnik pingaarteqinasi pisariaqartumit annerusumik.“ (Romamiut 12:3)

„Imminut pingaartuusorisoq, uffa taamaannani, taanna imminut salloqittarpoq.“ — Galatiamiut 6:3.

[Qupp. 5-mi assiliartaq]

Danielip suna tamaat Guutimut ataqqinaatigitippaa

[Qupp. 7-mi assiliartaq]

Biibilimi najoqqutassiat naapertorlugit allanut iliuuseqaraangatta attaveqarluarnissatsinnut iluaqutaasarpoq

[Qupp. 7-mi suminngaanneernera]

U.S. Fish & Wildlife Service, Washington, D.C./Robert Bridges