Guutip asasaanut ilaavit?

„Inassutinnik piginnillunilu aalajangiussisoq tassaavoq uannik asannittoq; uannillu asannittoq Ataatannit asaneqassaaq.“ — JOHANNESI 14:21.

1, 2. (a) Jehovap inuiannut asanninini qanoq takutippaa? (b) Ukiumi 33-mi unnukkut nisanip ulluisa 14-ianni nalliuttorsuaq suna Jiisusip pilersippaa?

JEHOVAP pinngortitani nunamiusut asavai. Aap, inuiaat ima asatigai „ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu“. (Johannesi 3:16) Maanna Jiisusip toquneranik eqqaaniaalluni nalliuttorsiornissaq qanilliartortillugu, kristumiut ilumoortut aatsaat taama eqqumaffigitigisariaqarpaat Jehovap ima asatigigaatik allaat ’ernini aallartillugu ajortivut pillugit pilliutitut saammaannartitsissutitut’. — 1 Johannesi 4:10.

² Ukiumi 33-mi nisanip ulluisa 14-ianni unnukkut Jiisusi apustiliilu aqqaneq-marluk Jerusalemimi illumi katersuupput. Poorskisiorput taamaalillutillu Israelikkut Egyptenimit aniguisitaanerat eqqaaniarlugu. (Matthæusi 26:17-20) Juutit nalliuttorsuat tamanna nalliuttorsiutigereerlugu Jiisusip Judasi Iskarioti anisippaa nereqatigiinnerlu toqunini pillugu eqqaaniaalluni nalliuttorsiortarnissaq pilersillugu. * Jiisusip apustilit aqqanillit isersimasut nereqatigigamigit, timiusaq seernarsaateqanngitsoq timiminut assersuutitut atorpaa viinnilu aappaluttoq aamminut assersuutitut atorlugu. Qanoq iliornera iivangkiiliuni Matthæusip, Markusip Lukasillu allagaanni sukumiisumik allaatigineqarpoq. Aammattaaq apustili Paulusip tamanna allaatigaa, nereqatigiinneq „Naalakkap unnukkorsiortitsineranik“ taallugu. — 1 Korinthimiut 11:20, NV; Matthæusi 26:26-28; Markusi 14:22-25; Lukasi 22:19, 20.

3. Jiisusip inuunerani nalunaaquttap-akunnerini kingullerni ajoqersukkaminik najuineranik apustili Johannesip oqaluttuaa oqaluttuanit allanit qanoq allaassuteqarpa?

³ Soqutiginarpoq apustili Johannesip timiusaq viinnilu eqqaanngimmagit. Taamaaliunnginneranut pissutaagunarpoq iivangkiiliuni allammagu (ukiup 98-ip u.n.k missaani) nalliuttorsiornermut periaatsip kristumiuni siullerni aalajangiunneqareersimanera. (1 Korinthimiut 11:23-26) Johannesili kisimi pingaarutilinnik isumassarsisitaalluni paasissutissiivoq Jiisusip toqunini pillugu eqqaaniarlugu nalliuttorsiutiginnittarnissamik pilersitsinnginnermini pilersitsereernerminilu oqaasii iliuusiilu pillugit. Johannesip iivangkiiliuani paasissutissat sukumiisut tamakku kapitalinit tallimanit ikinnerunngillat. Taakkunani erseqqippoq Guutip kikkut asanerai. Taamaattumik Johannesip iivangkiiliuani kapitalit 13-imiit 17-mut misissoriartigik.

Jiisusip asanninnera ilinniarfigiuk

4. (a) Jiisusip eqqaaniaalluni nalliuttorsiortarnissaq pilersitsikkamiuk ajoqersukkaminut oqaasiisa pingaarnersaat Johannesip qanoq erseqqissarpaa? (b) Jehovap Jiisusimut asanninneranut pissutaasut suna ilagaat?

⁴ Kapitalini taakkunani Jiisusip ajoqersukkaminut naggammik oqaasiini oqaaqqissaarutaanilu kingullerni asanninneq pingaarnersaavoq. Tassami, oqaaseq ’asanninneq’ oqaluutillu tamatumunnga assingusut 31-eriarlugit atorneqarput. Kapitalini taakkunaniinnaq Jiisusip Ataataminut, Jehovamut, ajoqersukkaminullu asanningaarnera taama erseqqitsigisumik allaatigineqarpoq. Iivangkiiliuni tamani Jiisusip Jehovamut  asanninnera nalunaajaatigineqarpoq, Johannesilli kisimi Jiisusi ima oqartoq issuarpaa: ’Ataataq asavara.’ (Johannesi 14:31) Jiisusip aamma nalunaarutigaa Jehovap asagaani nassuiarlugulu sooq. Ima oqarpoq: „Soorlu Ataatap asagaanga, uangattaaq ilissi asavassi; asannissutsinniittuaritsi. Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu.“ (Johannesi 15:9, 10) Aap, Jehovap ernini asavaa naalalluinnarmat. Tamanna Jiisusi Kristusip ajoqersugaasa tamarmik ilinniarfigisinnaavaat.

5. Ajoqersukkaminik asannilluni Jiisusip qanoq takutippaa?

⁵ Jiisusip apustiliminik kingullermik ilaqarnera pillugu Johannesip oqaluttuaani Jiisusip taakkununnga asanningaarnera erseqqissarneqarpoq. Johannesi oqaluttuarpoq: „Poorskisiorfissaq nalliutinngitsorli Jiisusip ilisimareerpaa Ataatamukarluni silarsuarmit matumannga aallarfissani nalliussimasoq; pigisani silarsuarmiittut asajuarsimavai, naggatissamullu allaat asavai.“ (Johannesi 13:1) Unnummi pingaarutilimmi tassani allanik asannittumik kiffartuussinissaq pillugu puiunaatsumik ilinniartippai, isigai asallugit. Tamarmik immikkut Jiisusip qatanngutimillu isigaannik asaanissaminnut kajumittariaqaraluarput, taamaaliunngillalli. Jiisusi maniguulluni taamaaliorpoq, kingornalu ajoqersukkani ima oqarfigalugit: „Uanga ilissinnut Naalagaallungalu Ajoqersuisuusunga isikkasi asakkakkit, taava ilissi aamma pisussaavusi isikkassinnik asaaqatigiissallusi. Maligassippassi uanga ilissinnut iliornittut ilioqqullusi.“ (Johannesi 13:14, 15) Kristumiut ilumoortut kajumillutik nuannaarlutillu qatanngutitik kiffartuuttariaqarpaat. — Matthæusi 20:26, 27, aamma takuuk Ny Verden-nutsikkami quppernerup ataani nassuiaat; Johannesi 13:17.

Inassut nutaaq maleruaruk

6, 7. (a) Eqqaaniaalluni nalliuttorsiornerup pilersinneqarneranut atatillugu Johannesi pingaarutilimmik sumik paasissutissiiva? (b) Jiisusip ajoqersukkani inassumik nutaamik sumik tunivai, inassutillu suna nutaartaraa?

⁶ Nisanip 14-ianni unnukkorsiornermi Judasi Iskariotip ilaminik qimatsinera Johannesip oqaluttuaaniinnaq immikkut eqqaaneqarpoq. (Johannesi 13:21-30) Oqaluttuat imminnut naleqqiukkaanni imaakkunarpoq, Judasi anereermat aatsaat Jiisusip toqunini pillugu eqqaaniaalluni nalliuttorsiortarnissaq pilersikkaa. Tamatumalu kingorna apustiliminut aalajaatsunut oqalugiangaatsiarpoq naggammik siunnersorlugit oqaaqqissaarlugillu. Eqqaaniaalluni nalliuttorsiornissamut najuunnissatsinnut piareersaraangatta, maluginiartariaqarparput pisimasumi tassani Jiisusi qanoq oqarnersoq — minnerunngitsumik Guutip asasaanut ilaarusukkatta.

⁷ Toqunini pillugu eqqaaniaalluni nalliuttorsiortarnissaq pilersereeramiuk siornatigut tusarsimanngisaannik Jiisusip ajoqersukkani oqaaseqarfigeqqaarpai. Ima oqarpoq: „Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:34, 35) Inassutip taassuma suna nutaartaraa? Unnummi tassani kingusinnerulaartukkut Jiisusip tamanna nassuiarpaa oqarluni: „Inassutiga tassa asaqatigiissasusi, soorlu uanga ilissi asagissi. Annerusumik asanninneqanngilaq ikinngutini pillugit inuunerminik akiginnittup asanninneranit.“ (Johannesi 15:12, 13) Mosesip inatsisaani Israelikkut ima peqquneqarput: „Tullit ilittut asassavat.“ (3 Mosesi 19:18) Jiisusilli inassutaa imaqarneruvoq. Kristumiut asaqatigiittariaqarput soorlu Kristusip asagaatik, tamanna  isumaqarpoq qatanngutitik pillugit inuunertik pilliutigeriaannaasariaqaraat.

8. (a) Imminut pilliutigeriaannaalluni asanninneq sumik nassataqartarpa? (b) Ullumikkut Jehovap Nalunaajaasui imminut pilliutigeriaannaallutik qanoq asannippat?

⁸ Eqqaaniaalluni nalliuttorsiornissap tungaanut sapaatip-akunnerini imminut, inuttut ataasiakkaatut ilagiittullu, misissornissarput naleqqulluartuussaaq, paasiniarlugu kristumiut ilumoortut immikkut ilisarnaataannik, asanninnermik Jiisusi Kristusip asanninneratut ittumik, ilisarnaateqarnerluta. Imminut pilliutigeriaannaalluni asanninneq taamaattoq isumaqarsinnaavoq — ilaatigullu isumaqarluni — kristumiu qatanngutiminik killuutiginnikkumanani inuunerminik pilliutiginneriaannaasoq. Amerlanertigulli isumaqartarpoq inuttut soqutigisavut pilliutigeriaannaasariaqarivut qatanngutitsinnik allanillu ikiuisinnaajumalluta kiffartuussisinnaajumallutalu. Taamaaliorluni apustili Paulusi maligassiuilluarpoq. (2 Korinthimiut 12:15; Filippimiut 2:17) Silarsuaq tamakkerlugu Jehovap Nalunaajaasuisa imminut pilliutigeriaannaanertik tusaamassaassutigaat. Uppeqatitik nuannaarlutik ikiortarpaat inoqatitillu sallusuissummik Biibilimeersumik oqaluttuunniarlugit piffissartik, nukitik pigisatillu kajumillutik atortarlugit. * — Galatiamiut 6:10.

Attaveqarnerit erlinnartut sernigisassatit

9. Guutimut erneranullu erlinnartumik attaveqaannarniarluta nuannaarluta qanoq iliortarpugut?

⁹ Inuunitsinni Jehovap erneratalu Jiisusi Kristusip uatsinnut asanninnerannit erlinnarnerusoqanngilaq. Taamatulli asaneqassagutta asanninnerlu malugissagutsigu nammineq iliuuseqartariaqarpugut. Jiisusip unnuk kingulleq ajoqersukkani najoramigit oqarpoq: „Inassutinnik piginnillunilu aalajangiussisoq tassaavoq uannik asannittoq; uannillu asannittoq Ataatannit asaneqassaaq. Uangattaaq taanna asajumaarpara, saqqummerfigiumaarlugulu.“ (Johannesi 14:21) Guutimut erneranullu attaveqarnerput pingaartingaaratsigu kajumilluta peqqusinerattut iliortarpugut. Taamaaliussagutta inassut nutaaq maleruarlugu imminut pilliutigeriaannaalluta asannittariaqarpugut Kristusillu makinnermi kingorna ’ajoqersuganngortitsinissaq’ siunertaralugu ’inunnut oqaluusseqqusinera nalunaajaaqqusineralu’ naalallugu. — Apustilit Suliaat 10:42; Matthæusi 28:19, 20.

10. Tanitat ’savat allallu’ kikkunnut qanittumik attaveqarpat, aamma sooq?

¹⁰ Unnummi tassani kingusinnerusukkut apustilip aalajaatsup Judasip (Taddæusip) apeqqutaa akillugu Jiisusi ima oqarpoq: „Uannik asannittup oqaatsikka aalajangiutissavai, taannalu Ataatama asassavaa, ornikkumaarparpullu ineqarfigilerlugulu.“ (Johannesi 14:22, 23) Kristumiut tanitat, qilammi Kristusip naalakkersueqatissaasut qaaqqusaasut nunamiillutilli, Jehovamut erneranullu immikkut qanittumik attaveqarput. (Johannesi 15:15; 16:27; 17:22; Hebræerit 3:1; 1 Johannesi 3:2, 24) Suleqataalli  ’savanut allanut’ ilaasut, nunami naassaanngitsumik inuunissamik neriugisallit, paarsisuminnut Jiisusi Kristusimut, Guutiminnullu Jehovamut aamma erlinnartumik attaveqassapput, naalattuaannassagunik. — Johannesi 10:16; Tussiaat 15:1-5; 25:14.

’Silarsuarmit pisuunngilasi’

11. Jiisusip ajoqersukkani eqqarsariaallannartumik qanoq mianersoqquai?

¹¹ Toqunissi sioqqullugu Jiisusip ajoqersukkani aalajaatsut naggammik najoramigit eqqarsariaallannartumik mianersoqquai: Guutip asasai silarsuarmit uumissorneqassapput. Ima oqarpoq: „Silarsuup uumissorpasi ilisimassavarsi ilissi siunissigulli uumissormanga. Silarsuarmit pisuugussi silarsuup nammineq ilamisut asassagaluarpaasi; silarsuarmilli pisuunngilasi. Uangali silarsuarmit qinerpassi, taamaattumik silarsuup uumissorpaasi. Ilissinnut oqaatsikka uku eqqaamaniarsigit: Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi; oqaatsikka aalajangiussimagamikkit ilississaaq oqaatsisi aalajangiukkumaarpaat.“ — Johannesi 15:18-20.

12. (a) Silarsuarmit uumissorneqassasut Jiisusip ajoqersukkani sooq mianersoqquai? (b) Eqqaaniaalluni nalliuttorsiornissap tungaanut suna eqqarsaatigisariaqarparput?

¹² Jiisusi taama mianersoqqusivoq apustilini aqqanillit taakkualu kingorna kristumiut ilumoortut tamaasa nikalloqqunagit silarsuullu uumissuinera pissutigalugu uniinnaqqunagit. Ima nangippoq: „Taama oqaluffigaassi tunusseqqunasi. Synagoginit peersikkumaarpaasi, allaammi ullut nalliukkumaarput ilissinnik toqutsisut isumaqalerfissaat taamaaliornermikkut Guuti kiffartuullugu. Taamaaliussappullu Ataatarluunniit uangaluunniit ilisimannginnamisigut.“ (Johannesi 16:1-3) Biibili pillugu qinerlerfissiami nassuiarneqarpoq oqaluut uani „tunusseqqunasi“-mik nutserneqartoq isumaqartoq ’inuup tatigisassaraluanut naalatassaraluanullu tatiginnikkunnaarsitsineq ilumoorunnaarsitsinerlu, tunussititsineq’. Maanna eqqaaniaalluni nalliuttorsiornissap tungaanut siornatigut maannakkullu Jehovamut kiffaasut qanoq aalajaassimanersut eqqarsaatigisariaqarpavut, misilinneqarnitsinnilu aalajaannitsigut malillugit. Assortuinerup malersorneqarnerulluunniit Jehovamut Jiisusimullu ilumuunngitsunngortinngisaannarlisit, tatigiuaannarniarlugilli naalattuaannarniarlugillu aalajangiusimajuk.

13. Jiisusip Ataatani ajoqersukkaminut qanoq ilioqqullugu qinnuigaa?

¹³ Jerusalemimi illumit anitinnani Jiisusip qinnummini kingullermi Ataatani ima oqarfigaa: „Illit oqaatsinnik tunivakka; silarsuullu uumissorpai silarsuarmit pisuunngimmata, soorlu uanga silarsuarmit pisuunngitsunga. Qinnutinngilakka silarsuarmit peerseqqullugit, paareqqullugilli ajortumut peqqunagit. Silarsuarmit pisuunngillat, soorlu uanga silarsuarmit pisuunngitsunga.“ (Johannesi 17:14-16) Qularinngilluinnarsinnaavarput Jehovap asasani nakkutigigai, silarsuarmillu immikkoorpata nakussatsikkumaarai. — Esaja 40:29-31.

 Ataatap Ernerullu asannissusianniittuarit

14, 15. (a) Jiisusi imminut sumut assersuuppa, allaanerusorlu ’viinnequtaasimagaluartoq naalluarsimasoq’ sumut assersuutaava? (b) Kikkut ’viinneqummut piviusumut’ ’avalequtaappat’?​

¹⁴ Nisanip 14-ianni unnukkut Jiisusip ajoqersukkani aalajaatsut ikinngutimisut oqaloqatigigamigit imminut tassaanerarpoq ’viinnequt piviusoq’, Israelikkunit ilumuunngitsunit ’viinnequtaasimagaluartunit naalluarsimasunit’ allaanerusoq. Ima oqarpoq: „Uanga tassaavunga viinnequt piviusoq, Ataatagalu viinnequtilerisuuvoq.“ (Johannesi 15:1) Ukiut hundredellit tamatuma siorna pruffiitip Jeremiap inuiaqatigiinnut tunussisunut Jehovap oqaasii allappai: „Ikkussimagaluarpakkit viinnequtissatut, naanertut ikkutassatut pitsaalluartutut. Qanormi taava ilillutit naanerluttunngorsimavit tassaalerlutit viinnequtiviunngitsoq?“ (Jeremia 2:21) Pruffiitilu Hosea allappoq: ’Israeli viinnequtaasimagaluarpoq naalluarsimasoq inerititaqartoq. Inerititai amerliartorput. . . . Uummatimikkut peqqusersiortuupput.’  —Hosea 10:1, 2.

¹⁵ Pallorfiginninnerup ilumoortup inerititaanik inerititaqarnatik Israelikkut tunussipput namminnerlu inerititaminnik inerititaqarlutik. Jiisusip ajoqersukkami aalajaatsut kingullermik naapinnissaat ullunik pingasunik sioqqullugu, juutit siuttui ilumoortuusaartut oqarfigai: „Oqarfigaassi: Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.“ (Matthæusi 21:43) Inuiaat nutaat taakku tassaapput „Israeli Guutip pigisaa“, tassa kristumiut tanitat 144.000-it, taakkulu ’viinnequtip piviusup’, Jiisusi Kristusip, ’avalequtaanut’ assersuutigineqarlutik. — Galatiamiut 6:16; Johannesi 15:5; Saqqummersitat 14:1, 3.

16. Jiisusip apustilit aqqanillit aalajaatsut sumik kajumissaarpai, maannalu ulluni kingullerni tanitat sinneri qanoq oqaatigineqarsinnaappat?

¹⁶ Jiisusip apustilit aqqanillit unnukkorsioqatigisani oqarfigai: „Avalequtit uanniittut inerititaqanngitsut tamaasa peertarpai, inerititaqartullu salittarpai suli inerititaqarneruleqqullugit. Uanniittuaritsi, taava uangattaaq ilissinniittuassaanga. Soorlu avalequt imminik inerititaqarsinnaanngitsoq viinneqummut atajuanngikkuni, taamattaaq ilissi inerititaqarsinnaanngilasi uanniittuanngikkussi.“ (Johannesi 15:2, 4) Jehovap innuttaasa ukiuni nutaanerusuni oqaluttuarisaanerata takutippaa kristumiut tanitat sinneri aalajaatsut ’niaqquminni’ Jiisusi Kristusimiittuaannarsimasut. (Efesosimiut 5:23) Killorneqarnissartik ‘akuiarneqarnissartillu’ akueraat. (Malaki 3:2, 3) 1919-imiilli Guutip naalagaaffiata inerititaanik inerititaqangaarsimapput, siullermik kristumiut tanitat ilaat, kingusinnerusukkullu 1935-miit, suleqataat ’amerlangaartut’ amerliartuinnartut. — Saqqummersitat 7:9; Esaja 60:4, 8-11.

17, 18. (a) Jiisusip oqaasii suut iluaqutigalugit tanitat savallu allat Jehovap asannissusianiittuaannarsinnaappat? (b) Eqqaaniaalluni nalliuttorsiornermut najuunneq qanoq iluaqutigissavarput?

¹⁷ Jiisusip nangilluni oqaasii kristumiunut tanitanut suleqataannullu tamanut atuupput: „Inerititaqarluarnissigut uannullu ajoqersuganngornissigut Ataataga naalannarsissaaq. Soorlu Ataatap asagaanga, uangattaaq ilissi asavassi; asannissutsinniittuaritsi. Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu.“ — Johannesi 15:8-10.

 ¹⁸ Tamatta Guutip asannissusianiittuarusuppugut, taamaattumillu kristumiutut inerititaqarnissarput ilungersuutigalutigu. Taamaaliorsinnaavugut periarfissat tamaasa atorlugit ’Guutip naalagaaffianik nutaarsiassaq nuannersoq’ oqaluussissutigalugu. (Matthæusi 24:14, NV) Aamma sapinngisatsinnik iliuuseqarpugut ’anersaap inerititai’ inuunitsinni ineriartorniarlugit. (Galatiamiut 5:22, 23) Kristusip toquneranik eqqaaniaalluni nalliuttorsiornermut najuukkutta qulaani taaneqartutut iliuuseqarniarluta aalajangernerput nakussatsinneqassaaq, tamatumuunami Guutip Kristusillu uatsinnut asanningaassusiannik eqqaasinneqassagatta. — 2 Korinthimiut 5:14, 15.

19. Iluaqutaasoq alla suna allaaserisami tulliuttumi sammineqassava?

¹⁹ Eqqaaniaalluni nalliuttorsiutiginnittarnissaq pilersereeramiuk Jiisusi neriorsuivoq Ataatani ajoqersukkaminut aalajaatsunut ’illersuisumik’ imaluunniit ’ikiortimik’, anersaaq illernartumik, aallartitsissasoq. (Johannesi 14:26) Anersaaq taanna tanitat aamma savat allat Jehovap asannissusianiittuarnissaminnut qanoq iluaqutigineraat, allaaserisami tulliuttumi sammissavarput. (wE 2/1 02)

[Quppernerup ataani ilanngussat]

Uteqqiinermi apeqqutit

• Jiisusip ajoqersukkani allanik asannittumik kiffartuussinissaq pillugu atoriaannaasumik qanoq ilinniartippai?

• Sooq nalliuttorsiornissap tungaanut imminut misissornissaq naleqquttuuva?

• Silarsuarmit uumissorneqarnissatsinnik malersorneqarnisatsinnillu Jiisusip mianersoqqusinera sooq ‘tunussissutigissanngilarput’?

• ’Viinnequt piviusoq’ kinaava? Kikkut ‘avalequtaappat’, taakkulu sumik piumaffigineqarpat?

[Atuaqqissaarnermi apeqqutit]

[Qupp. 21-mi assiliartaq]

Jiisusip apustilini allanik asannittumik kiffartuussinissaq pillugu puiunaatsumik ilinniartippai

[Qupp. 22, 23-mi assiliartat]

Kristusip ajoqersugaasa imminut pilliutigeriaannaalluni asanninneq pillugu peqqussut naalattarpaat