Illoqarfik qaqqamiittoq

JIISUSIP qaqqami oqaluutsimini tusaamasaasumi ajoqersukkani oqarfigai: „Ilissi silarsuup qaamasoraasi. Illoqarfik qaqqap qaaniittoq isertorneqarsinnaanngilaq.“ — Matthæusi 5:14.

Judæami Galilæamilu illoqarfiit amerlasuut isumannaannissaq pingaarnerutillugu qooqquniinnatik qaqqat sivingarnaniipput. Israelimi illoqarfiit akeqqanit isaasunit saassunneqartarnermi saniatigut, piiaasoqatigiinnit aamma ujajaaffigineqartarput. (2 Kunngit 5:2; 24:2) Innuttaasut silatusaartut illut eqimattat imminnut qanittut qaqqamiittut, illoqarfimmit nunami atsissumiittumit qarmarsuarmik portusuumik illersuutissatut ungalusimasumit illersoruminartinnerussavaat.

Juutit illui kalkitigaasarmata, illut taamaattut ataatsimoortut qaqqap qaarpiaani sivinganermiittut ungasissumit takuneqarsinnaapput. (Apustilit suliaat 23:3) Imarsiortunut nalunaaqquttatut qinngorneqartarput takujuminartuullutillu, soorlu ullumikkut Immami Akullersuarmiittut illoqarfiit taamaattut.

Jiisusip ajoqersukkani paasitinniarlugit kristumiup ilumoortup suna suliassarineraa, Galilæami Judæamilu nalunngisani tamanna assersuutitut atorpaa. „Taamatuttaaq qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.“ (Matthæusi 5:16) Naak kristumiut inunnut nersoqqullutik ajunngitsuliunngikkaluartut, ileqqorissaarnerat malugineqanngitsuunngilaq. — Matthæusi 6:1.

Nunap immikkoortoqarfiani Jehovap Nalunaajaasuisa ataatsimeersuarneranni Nalunaajaasut ileqqorissaartuunerat immikkut ittumik maluginiarneqarsimavoq. Spaniami aviisimi ataatsimmersuarneq qanittukkut pisimasoq eqqartorneqarpoq, allapporlu: „Upperisarsiortuni allani upperisarsiornerup oqaluuserinissaa soqutigineerukkiartortoq, Jehovap Nalunaajaasuini taamaanngilaq. Biibilip pingaaruteqarunnaarnissaa kissaatiginnginnamikku, Guutip oqaasia malillugu iliortarput.“

Thomasip, Spaniap avannaata kitikanniani unammisarfissuarmi, Jehovap Nalunaajaasuisa ataatsimeersuarfigisartagaanni pisortaasup, inuit Guutip oqaasia malillugu inuusut ilagissallugit nuannarisimavaa. Tamanna pillugu Jehovap Nalunaajaasuisa nunap immikkoortortaani ataatsimeersuarnerannut najuukkumalluni soraarninngornissani sapaatip akunnerini arlalinni kinguartissimavaa. Ataatsimeersuarnerup kingorna ataatsimeersuarnermi peqataassorpassuit, inuusuttullu arlallit, ukiut ingerlaneranni suleqatigiissimanerminnik qutsaviginiarlugu siunissamilu ajunngitsunik tamanik kissaanniarlugu ornimmanni, qialerpoq. „Ilisarisimalersimagassi inuuninni misigisama nuannernerpaat ilagaat,“ oqarpoq.

Illoqarfik qaqqap qaaniittoq, inunnit malugineqartarpoq qilaannguussimanini pillugu illoqarfiullu illui qaqortut seqernup qinngorneranit akisuttaramik. Taamatut kristumiut ilumoortut inunnit malugineqartarput peqqusersuissusermut, ileqqorissusermut tullimullu asanninnermut Biibilip maleruaqqusaanik qutsissunik malinninnermikkut immikkooruteqarnertik pillugu.

Tamatuma saniatigut kristumiut oqaluussinermikkut sallusuissutsip qaamarnga tarranitsippaat. Ukiuni hundredelinni siullerni kristumiut pillugit apustili Paulusi allappoq: „Taamaattumik kiffartuutigisatsinni nallittorneqarnikkut pisimasatsinni nikallunngilagut . . sallusuissulli saqqummersittarparput taamaaliornitsigullu inuit tamarmik tarningisa nalunngissusiannut ilasseqqusarluta Guutip takkuani.“ (2 Korinthimiut 4:1, 2) Naak oqaluussiffigisaminni  tamani akerlilersorneqartaraluarlutik, kiffartornerat Jehovap pilluaqquaa allaat Paulusi ukioq 60-ip nalaani allassinnaanngorsimaluni nutaarsiassaq nuannersoq oqaluussissutigineqarsimasoq „qilaap ataani pinngortitanut tamanut.“ — Kolossemiut 1:23.

Ullumikkut Jehovap Nalunaajaasuisa aamma paasivaat Jiisusip peqqusineratut ’qaamasortik inunnut qaamatissallugu’ akisussaaffigigaat. Oqaluussinerit oqaatsillu naqitikkat iluaqutigalugit silarsuarmi nunani 235-usuni Jehovap Nalunaajaasuisa nutaarsiassaq nuannersoq siammarterpaat. Sallusuissutsip Biibilimeersup qaamarnga sapinngisamik amerlanerpaanut anngussinnaaqqullugu, atuagassiaatitik Biibililersaarutit oqaatsinut 370-it missaannut nutsertarpaat. — Matthæusi 24:14; Saqqummersitat 14:6, 7.

Sumiiffinni amerlasuuni Jehovap Nalunaajaasuisa assut unamminiarnartoq tigusimavaat, nunanit allanit oqaluussinermik killilersuiffiusunit killilersuiffiusimasuniluuniit nunasisut oqaloqatigisinnaajumallugit oqaatsinik allanik ilinniarlutik. Amerikami avannarlermi illoqarfinnut annerusunut arlalinnut, assersuutigalugu Kinamiit Ruslandimiillu inuppassuit tikerarsimapput. Illoqarfinni taakkunani Jehovap Nalunaajaasui tamaviaarput kinamiut, russit, allallu oqaasiinik ilinniarlutik najukkaminnut nuuttunut tusagassaq nuannersoq oqaluussissutigisinnaajumallugu. Allaat oqaatsinik assigiinngitsunik pikkorissarnerit tulleriiaat tamaviannguat ingerlanneqarput tusagassaq nuannersoq suli amerlanerusunut oqaluussissutigineqarniassammat, maannakkummi narsaatit ’katersuiffigeriaannanngorsimammata’. — Johannesi 4:35.

Pruffiitip Esajap siulittuutigaa: „Ullussani kingullerni qaqqaq [Jehovap] naalaffiata inaa aalajaalluni qaqqanit allanit portunerulerumaarpoq qattorngit tamaasa portussutsimigut akimorlugit. Tassunga inuiaat tamarmik ornigutissapput.“ Ileqqumikkut oqaluussinermikkullu Jehovap Nalunaajaasuisa inuit sumi tamaaniittut ikiortarpaat ’[Jehovap] illuata qaqqaanukartillugit’ Guutip aqqutigeqqusaanik ilinniartinniarlugit aqqusininnguisigullu ingerlaqqullugit. (Esaja 2:2, 3) Soorlu Jiisusi oqartoq, ataasiussuseqarlutik Jehova Guuti, ’Ataatartik qilanniittoq unnersiutigissavaat’. — Matthæusi 5:16; 1 Petrusi 2:12. (wE 2/1 02)